1 በዚ ኸምዚ ሰማያትን ምድርን ኵሉ ኣባታቶም ዘሎን ተፈጸመ።
2 ኣምላኽ ከኣ ኣብታ ሻውዐይቲ መዓልቲ ነቲ ዚገብሮ ዝነበረ ግብሪ ፈጸሞ፣ ኣብታ ሻውዐይቲ መዓልቲ ድማ ካብ ኵሉ እቲ ዚገብሮ ዝነበረ ግብሩ ኺዓርፍ ጀመረ።
3 ኣምላኽ ከኣ ካብቲ ዝፈጠሮን ኪገብሮ ዝመደቦን ኵሉ ግብሩ ብእኣ ይዓርፍ ስለ ዘሎ፡ ነታ ሻውዐይቲ መዓልቲ ባረኻን ቀደሳን።
4 ታሪኽ ሰማያትን ምድርን በታ እተፈጥሩላ መዓልቲ፡ ማለት በታ የሆዋ* ኣምላኽ ምድርን ሰማይን ዝገበረላ መዓልቲ እዚ እዩ።
5 የሆዋ ኣምላኽ ኣብ ምድሪ ገና ኣየዝነመን ነበረ፡ ንምድሪ ዚዓዪ ሰብ እውን ኣይነበረን እሞ፡ ኣብ ምድሪ ገና ቘጥቋጥ መሮር ኣይነበረን፡ ኣትክልቲ መሮር እውን ኣይበቘለን ነበረ።
6 ግናኸ፡ ግመ ኻብ ምድሪ ይልዓል፡ ንብዘሎ ገጽ ምድሪ እውን የስቲ ነበረ።
7 የሆዋ ኣምላኽ ከኣ ንሰብ ካብ ሓመድ ምድሪ ገበሮ፡ ኣብ ኣፍንጫኡ ድማ ትንፋስ ህይወት ኡፍ በለሉ፡ እቲ ሰብ ከኣ ህያው ፍጡር ኰነ።
8 የሆዋ ኣምላኽ ድማ ኣብ ኤደን ብሸነኽ ምብራቕ ገነት ተኸለ፣ ነቲ ዝገበሮ ሰብ ድማ ኣብኣ ኣንበሮ።
9 የሆዋ ኣምላኽ ከኣ ምርኣዩ ባህ ዜብልን ምብላዑ ዝጥዑምን ኵሉ ኦም ካብ ምድሪ ኣብቈለ፣ ኣብ ማእከል እታ ገነት ከኣ ኦም ህይወትን ኦም ፍልጠት ጽቡቕን ክፉእን ነበራ።
10 ነታ ገነት ዜስቲ ፈለግ ከኣ ካብ ኤደን ይውሕዝ ነበረ፣ ካብኡ ድማ ናብ ኣርባዕተ ኣፍላግ ይምቀል ነበረ።
11 ስም እቲ ቐዳማይ ጲሶን እዩ፣ ንሱ ነታ ወርቂ ዘለዋ ብዘላ ምድሪ ሓዊላ ይዞራ።
12 ወርቂ እታ ምድሪ እቲኣ ድማ ጽቡቕ እዩ። ኣብኡ እውን ዕንዲዳ ብዶላሕን እምኒ ኦኒክስን ኣሎ።
13 ስም እቲ ኻልኣይ ፈለግ ከኣ ጊሖን እዩ፣ ንሱ ንዅላ ምድሪ ኩሽ ይዞራ።
14 ስም እቲ ሳልሳይ ፈለግ ድማ ሂዴቄል እዩ፣ ንሱ ናብ ምብራቕ ኣሶር+ ኣቢሉ ዚኸይድ እዩ። እቲ ራብዓይ ፈለግ ከኣ ኤፍራጥስ እዩ።
15 የሆዋ ኣምላኽ ከኣ ንሰብ ወሲዱ፡ ምእንቲ ኺዓይያን ኪከናኸናን ኣብ ገነት ኤደን ኣቐመጦ።
16 የሆዋ ኣምላኽ ድማ ንሰብ ከምዚ ኢሉ ኣዘዞ፦ “ካብ ኵሉ ኦም ገነት ከም ምብላዕካ ብላዕ።
17 ብዛዕባ እታ ኦም ፍልጠት ጽቡቕን ክፉእን ግና፡ ካብኣ ኣይትብላዕ፣ ከመይሲ፡ በታ ኻብኣ እትበልዓላ መዓልቲ ብርግጽ ክትመውት ኢኻ።”
18 የሆዋ ኣምላኽ ከኣ፡ “ሰብኣይ በይኑ ኪኸውን ጽቡቕ ኣይኰነን። ንዕኡ መመላእታ እትዀኖ ሓጋዚትክገብረሉ እየ” በለ።
19 የሆዋ ኣምላኽ ድማ ንዅሉ እንስሳ መሮርን ንዅሉ በራሪ ፍጡር ሰማያትን ካብ ምድሪ ይገብር ነበረ፣ እንታይ ኢሉ ኸም ዚሰምዮም ምእንቲ ኺርኢ ኸኣ፡ ናብቲ ሰብኣይ ኣምጽኦም፣ ህያው ፍጡር ዘበለ ኸኣ ስሙ ኸምቲ እቲ ሰብኣይ ዝሰመዮ ዀነ።
20 እቲ ሰብኣይ ከኣ ንዅሉ እንስሳ ዘቤትን በረርቲ ፍጡራት ሰማያትን ንዅሉ እንስሳ መሮርን ሰስሙ ሃቦ፣ ንሰብኣይ ግና መመላእታ እትዀኖ ሓጋዚት ኣይነበረቶን።
21 የሆዋ ኣምላኽ ከኣ ነቲ ሰብኣይ ከቢድ ድቃስ ኣደቀሶ፣ ንሱ ደቂሱ ኸሎ ኸኣ፡ ሓንቲ ኻብ መሰናግለኡ ወሲዱ፡ ኣብ ቦታኣ ስጋ መልአ።
22 የሆዋ ኣምላኽ ድማ ነታ ኻብቲ ሰብኣይ ዝወሰዳ መሰንገለ፡ ሰበይቲ ገይሩ ሰርሓ እሞ፡ ናብቲ ሰብኣይ ኣምጽኣ።
23 እቲ ሰብኣይ ከኣ፡
“እዚኣስ ዓጽሚ ኻብ ኣዕጽምተይ
ስጋ ኸኣ ካብ ስጋይ እያ።
ካብ ሰብኣይ ተወሲዳ እያ እሞ፡
እዚኣ ሰበይቲ ትብሃል” በለ።
24 ስለዚ፡ ሰብኣይ ኣቦኡን ኣዲኡን ይሓድግ፡ ምስ ሰበይቱ ኸኣ ይጠብቕ፡ ሓደ ስጋ ድማ ይዀኑ።
25 እቲ ሰብኣይን እታ ሰበይቱን ድማ ክልቲኦም ጥራዮም ነበሩ፣ ግናኸ፡ ኣይሓንኩን ነበሩ።

1 የሆዋ ኣምላኽ ካብ ዝፈጠሮ ዅሉ እንስሳ መሮር፡ ተመን ኣዝዩ ጥንቁቕ* ነበረ። ነታ ሰበይቲ ኸኣ፡ “ኣምላኽሲ፡ ‘ካብ ኵሉ ኦም ገነት ኣይትብልዑ’ ኢሉዶ እዩ፧” በላ።
2 እታ ሰበይቲ ነቲ ተመን፡ “ኣብ ገነት ካብ ዘሎ ፍረ ኣእዋም ንበልዕ ኢና።
3 ብዛዕባ ፍረ እታ ኣብ ማእከል ገነት ዘላ ኦም ግና፡ ኣምላኽ፡ ‘ከይትሞቱስ፡ ካብኣ ኣይትብልዑ፡ ኣይትተንክይዋ እውን’ ኢሉ” በለቶ።
4 እቲ ተመን ድማ ነታ ሰበይቲ፡ “ከቶ ኣይክትሞቱን ኢኹም።
5 ኣምላኽ በታ ኻብኣ እትበልዑላ መዓልቲ ኣዒንትኹም ከም ዚኽፈታ፡ ከም ኣምላኽ እውን ከም እትዀኑ፡ ጽቡቕን ክፉእን ከኣ ከም እትፈልጡ ስለ ዝፈለጠ እዩ” በላ።
6 እታ ሰበይቲ ድማ፡ እታ ኦም ንምብልዓ ጥዕምቲ፡ ንኣዒንቲ ኸኣ ደስ እተብል፡ እወ፡ እታ ኦም ንምጥማታ ባህ እተብል ምዃና ረኣየት። ካብ ፍሪኣ ወሲዳ ድማ በልዐት። ድሕሪኡ፡ ሰብኣያ ምስኣ ምስ ኰነ እውን፡ ንዕኡ ሃበቶ፣ ንሱ ኸኣ በልዐ።
7 ሽዑ፡ ኣዒንቲ ኽልቲኦም ተኸፍታ፡ ጥራዮም ምዃኖም ድማ ፈለጡ። ኣቝጽልቲ በለስ ሰፍዮም ከኣ ተዓጥቁ።
8 መዓልቲ ምስ ወልወለ ድማ፡ ድምጺ የሆዋ ኣምላኽ ኣብ ገነት ኪመላለስ ሰምዑ፣ እቲ ሰብኣይን እታ ሰበይቱን ከኣ ካብ ገጽ የሆዋ ኣምላኽ ኣብ መንጎ ኣእዋም ገነት ተሓብኡ።
9 የሆዋ ኣምላኽ ድማ ነቲ ሰብኣይ፡ “ኣበይ ኣለኻ፧” እናበለ ደጋጊሙ ጸውዖ።
10 ኣብ መወዳእታ ኸኣ ንሱ፡ “ድምጽኻ ኣብ ገነት ሰሚዐ፣ ጥራየይ ስለ ዝዀንኩ ግና ፈሪሀ ተሓቢአ” በለ።
11 ንሱ ድማ፡ “ጥራይካ ምዃንካ ደኣ መን ነጊሩካ፧ ካብታ ኻብኣ ኸይትበልዕ ዝኣዘዝኩኻ ኦምዶ በሊዕካ ኢኻ፧” በሎ።
12 እቲ ሰብኣይ ከኣ፡ “እታ ምሳይ ክትከውን ዝሃብካኒ ሰበይቲ ኻብታ ኦም ሂባትኒ በሊዐ” በለ።
13 የሆዋ ኣምላኽ ድማ ነታ ሰበይቲ፡ “እዚ ዝገበርክዮ እንታይ እዩ፧” በላ። እታ ሰበይቲ ኸኣ፡ “ተመን ስለ ዘታለለኒ እየ በሊዐ” በለት።
14 የሆዋ ኣምላኽ ከኣ ነቲ ተመን፡ “እዚ ስለ ዝገበርካ፡ ካብ ኵሉ እንስሳ ዘቤትን ካብ ኵሉ እንስሳ መሮርን ርጉም ኢኻ። ብኸብድኻ ኽትከይድ፡ ኣብ ኵለን መዓልትታት ህይወትካ ድማ ሓመድ ክትበልዕ ኢኻ።
15 ኣብ መንጎኻን ኣብ መንጎ እታ ሰበይትን፡ ኣብ መንጎ ዘርእኻን ኣብ መንጎ ዘርኣን ጽልኢ እተክል ኣለኹ። ንሱ ርእስኻ ኺጭፍልቕ እዩ፣ ንስኻ ድማ ሸዀናኡ ኽትነክስ ኢኻ” በሎ።
16 ነታ ሰበይቲ ኸኣ፡ “ጻዕሪ ጥንስኺ ኣዝየ ኸብዝሖ እየ፣ ደቂ ብጻዕሪ ኽትወልዲ ኢኺ፣ ንሰብኣይኪ ሃረር ክትብልዮ ኢኺ፡ ንሱ እውን ኪመልከኪ እዩ” በላ።
17 ንኣዳም ከኣ፡ “ቃል ሰበይትኻ ስለ ዝሰማዕካ፡ ካብታ፡ ‘ካብኣ ኣይትብላዕ’ ኢለ ዝኣዘዝኩኻ ኦም ድማ ስለ ዝበላዕካ፡ ብሰርኻ ምድሪ ርግምቲ ትኹን። ኵሉ መዓልትታት ህይወትካ፡ ካብኣ ብጻዕሪ ኽትበልዕ ኢኻ። 18 እሾዅን ተዀርባን ከተብቍለልካ እያ፣ ኣትክልቲ መሮር ድማ ክትበልዕ ኢኻ።
19 ካብኣ ኢኻ ተፈጢርካ እሞ፡ ናብ ምድሪ ኽሳዕ እትምለስ፡ እንጌራ ብረሃጽ ገጽካ ኽትበልዕ ኢኻ። ሓመድ ኢኻ እሞ፡ ናብ ሓመድ ድማ ክትምለስ ኢኻ” በሎ።
20 ድሕርዚ፡ ኣዳም ንሰበይቱ፡ ኣደ ዅሉ ህያው ስለ እትኸውን፡ ሄዋን ኢሉ ሰመያ።
21 የሆዋ ኣምላኽ ድማ ንኣዳምን ንሰበይቱን ኪኸድኖም ኢሉ ኻብ ቈርበት ነዊሕ ክዳን ገበረሎም።
22 የሆዋ ኣምላኽ ከኣ፡ “እንሆ፡ ሰብ ከም ሓደ ኻባና፡ ጽቡቕን ክፉእን ዚፈልጥ ኰይኑ ኣሎ። ሕጂ ኸኣ ኢዱ ኸይዝርግሕ፡ ካብ ኦም ህይወት ወሲዱ ድማ ከይበልዕ፡ ንዘለኣለም ከኣ ህያው ኰይኑ ኸይነብር፡—” ኢሉ፡
23 ስለዚ፡ ነታ እተፈጥረላ ምድሪ ምእንቲ ኪዅስኵሳ፡ የሆዋ ኣምላኽ ካብ ገነት ኤደን ኣውጽኦ።
24 ንሰብ ከኣ ሰጐጎ፣ ነታ ናብ ኦም ህይወት እትወስድ መገዲ ንምሕላው ድማ፡ ብሸነኽ ምብራቕ ገነት ኤደን ኪሩቤልን+ ብልሓ ሃልሃል ዚብል እትሽክርከር ሰይፍን ኣቐመጠ።

1 ኣዳም ድማ ምስ ሰበይቱ ሄዋን ጾታዊ ርክብ ገበረ፡ ንሳ እውን ጠነሰት። ንቃየል ምስ ወለደት ከኣ፡ “ብረድኤት የሆዋ ወዲ ወሊደ” በለት።
2 ጸኒሓ፡ ንሓዉ ኣቤል+ ወለደት።
ኣቤል ድማ ጓሳ ኣባጊዕ ኰነ፣ ቃየል ከኣ ሓረስታይ ምድሪ ዀነ።
3 ድሕሪ ገለ ግዜ፡ ቃየል ካብ ፍረታት ምድሪ ንየሆዋ መስዋእቲ ኣምጽአ።
4 ኣቤል ከኣ ካብ በዅራት መጓሰኡን ካብ ስብሐንን ኣምጽአ። የሆዋ ናብ ኣቤልን ናብ መስዋእቱን ብሞገስ ረኣየ፣
5 ናብ ቃየልን ናብ መስዋእቱን ግና ብሞገስ ኣይረኣየን። ቃየል ከኣ ኣዝዩ ተቘጥዐን ጐሃየን።
6 የሆዋ ኸኣ ንቃየል፡ “ስለምንታይ ኢኻ ኣመና እተቘጣዕካን ዝጐሃኻን፧
7 ጽቡቕ ናብ ምግባር እንተ ትምለስሲ፡ ሞገስዶ ኣይምረኸብካን፧ ጽቡቕ ናብ ምግባር እንተ ዘይተመሊስካ ግና፡ ሓጢኣት ኣብ ኣፍ ደገ ትቃጸወካ ኣላ፣ ሃረርታኣ ኸኣ ኪዕብልለካ ይብል ኣሎ። ግናኸ፡ ክትመልካ ዲኻ፧” በሎ።
8 ድሕሪኡ፡ ቃየል ንሓዉ ኣቤል፡ “ናብ መሮር ንኺድ” በሎ። ኣብ መሮር ከለዉ ኸኣ፡ ቃየል ንሓዉ ኣቤል ኣጥቅዖ፡ ቀተሎ ድማ።
9 የሆዋ ኸኣ ንቃየል፡ “ሓውካ ኣቤል ኣበይ ኣሎ፧” በሎ። ንሱ ድማ፡ “ኣይፈልጥን። ኣነዶ ሓላው ሓወይ እየ፧” በለ።
10 ንሱ ኸኣ፡ “እንታይ ኢኻ ዝገበርካ፧ ስማዕ፡ ደም ሓውካ ኻብ ምድሪ ናባይ ይጠርዕ ኣሎ።
11 ሕጂ ድማ ካብዛ ደም ሓውካ ኻብ ኢድካ ኽትቅበል ኣፋ ዝኸፈተት ምድሪ እተሰጐጕካ ርጉም ኩን።
12 ንምድሪ ምስ እትሓርሳ፡ መሊሳ ፍሪኣ ኣይክትህበካን እያ። ኣብ ምድሪ ዀብላልን ቀባሕባሓይን ኩን” በሎ።
13 ቃየል ከኣ ንየሆዋ፡ “መቕጻዕቲ በደለይ ክጾሮ ዘይክእል ዓብዪ እዩ።
14 ሎሚ ኻብዛ ምድሪ እዚኣ ትሰጕጐኒ ኣለኻ፡ ኣነ እውን ካብ ገጽካ ኽሕባእ እየ፣ ኣብ ምድሪ ኸኣ ኰብላልን ቀባሕባሓይን ክኸውን እየ፡ ዚረኽበኒ ዘበለ እውን ብርግጽ ኪቐትለኒ እዩ” በሎ።
15 የሆዋ ድማ፡ “እምበኣር፡ ንቃየል ዝቐተለ ዘበለ፡ ሸውዓተ ዕጽፊ ሕነ ኺፍደዮ እዩ” በለ።
ዝረኸቦ ዘበለ ምእንቲ ኸይቀትሎ ኸኣ፡ የሆዋ ንቃየል ምልክት ገበረሉ።
16 ቃየል ድማ ካብ ቅድሚ የሆዋ ኸደ፡ ኣብ ምድሪ ስደት ከኣ፡ ብሸነኽ ምብራቕ ኤደን ተቐመጠ።
17 ድሕሪኡ፡ ቃየል ምስ ሰበይቱ ጾታዊ ርክብ ገበረ፡ ንሳ እውን ጠኒሳ፡ ንሄኖክ ወለደት። ከተማ ኸኣ ኪሰርሕ ጀመረ እሞ፡ ነታ ኸተማ ብስም ወዱ ሄኖክ ኢሉ ሰመያ።
18 ንሄኖክ ከኣ ዒራድ ተወልደሉ። ዒራድ ድማ ንሜሁያኤል ወለደ፣ ሜሁያኤል ከኣ ንሜቱሳኤል ወለደ፣ ሜቱሳኤል ድማ ንላሜክ ወለደ።
19 ላሜክ ከኣ ክልተ ኣንስቲ ኣእተወ። ስም እታ ቐዳመይቲ ዓዳ፡ ስም እታ ኻልአይቲ ድማ ጺላ ነበረ።
20 ዓዳ ኸኣ ንያባል ወለደት። ንሱ ድማ መስራቲ እቶም ኣብ ድንኳናት ዚቕመጡን ማል ዘለዋኦምን ኰነ።
21 ስም ሓዉ ኸኣ ዩባል እዩ። ንሱ ድማ መስራቲ እቶም ተጻወትቲ መሰንቆን* እምብልታን ኰነ።
22 ጺላ ኸኣ ነቲ ኻብ ነሓስን ሓጺንን ኵሉ ዓይነት ናውቲ ዚሓጕድ ቱባል-ቃይን ወለደት። ሓብቲ ቱባል-ቃይን ከኣ ናዓማ እያ።
23 ላሜክ ድማ ንኣንስቱ ዓዳን ጺላን ከምዚ በለን፦
“ኣትን ኣንስቲ ላሜክ፡ ቃለይ ስምዓ፣
ናብ ዘረባይ ጽን በላ፦
ስለ ዘቝሰለኒ፡ ሰብኣይ፡
ስለ ዝወቕዓኒ ድማ፡ ጐበዝ ቀተልኩ።
24 ንቃየል 7 ዕጽፊ ሕነ እንተ ተፈድዩሉስ፡
ንላሜክ ከኣ 77 ዕጽፊ።”
25 ኣዳም ከኣ መሊሱ ምስ ሰበይቱ ጾታዊ ርክብ ገበረ፡ ንሳ እውን ወዲ ወለደት። “ኣምላኽ ኣብ ክንዲ እቲ ቃየል ዝቐተሎ ኣቤል ዘርኢ ተኪኡለይ” ኢላ ስሙ ሴት ኣውጽኣትሉ።
26 ንሴት ድማ ወዲ ተወልደሉ፡ ንሱ እውን ሄኖስ ኢሉ ሰመዮ። ሽዑ፡ ሰባት፡ ስም የሆዋ ኺጽውዑ ጀመሩ።

1 መጽሓፍ ታሪኽ ኣዳም እዚ እዩ። በታ ኣምላኽ ንኣዳም ዝፈጠረላ መዓልቲ፡ ብምስሊ ኣምላኽ ገበሮ።
2 ተባዕታይን ኣንስተይትን ገይሩ ፈጠሮም። በታ እተፈጥሩላ መዓልቲ፡+ ባረኾም፡ ሰብ ኢሉ እውን ሰመዮም።
3 ኣዳም ድማ 130 ዓመት ገበረ። ድሕሪኡ፡ ብምስሉን ብመልክዑን ወዲ ወለደ፡ ሴት ኢሉ እውን ሰመዮ።
4 ኣዳም ንሴት ምስ ወለደ፡ 800 ዓመት ነበረ። ኣወዳትን ኣዋልድን ከኣ ወለደ።
5 ስለዚ፡ ኵሉ መዓልትታት ህይወት ኣዳም 930 ዓመት ኰነ፡ ሞተ ኸኣ።
6 ሴት ድማ 105 ዓመት ገበረ። ድሕሪኡ፡ ንሄኖስ ወለደ።
7 ሴት ንሄኖስ ምስ ወለደ፡ 807 ዓመት ነበረ። ኣወዳትን ኣዋልድን ከኣ ወለደ።
8 ስለዚ፡ ኵሉ ዕድመ ሴት 912 ዓመት ኰነ፡ ሞተ ኸኣ።
9 ሄኖስ ድማ 90 ዓመት ገበረ። ድሕሪኡ፡ ንቃይናን ወለደ።
10 ሄኖስ ንቃይናን ምስ ወለደ፡ 815 ዓመት ነበረ። ኣወዳትን ኣዋልድን ከኣ ወለደ።
11 ስለዚ፡ ኵሉ ዕድመ ሄኖስ 905 ዓመት ኰነ፡ ሞተ ኸኣ።
12 ቃይናን ድማ 70 ዓመት ገበረ። ድሕሪኡ፡ ንመሃላልኤል ወለደ።
13 ቃይናን ንመሃላልኤል ምስ ወለደ፡ 840 ዓመት ነበረ። ኣወዳትን ኣዋልድን ከኣ ወለደ።
14 ስለዚ፡ ኵሉ ዕድመ ቃይናን 910 ዓመት ኰነ፡ ሞተ ኸኣ።
15 መሃላልኤል ድማ 65 ዓመት ገበረ። ድሕሪኡ፡ ንያሬድ ወለደ።
16 መሃላልኤል ንያሬድ ምስ ወለደ፡ 830 ዓመት ነበረ። ኣወዳትን ኣዋልድን ከኣ ወለደ።
17 ስለዚ፡ ኵሉ ዕድመ መሃላልኤል 895 ዓመት ኰነ፡ ሞተ ኸኣ።
18 ያሬድ ድማ 162 ዓመት ገበረ። ድሕሪኡ፡ ንሄኖክ+ ወለደ።
19 ያሬድ ንሄኖክ ምስ ወለደ፡ 800 ዓመት ነበረ። ኣወዳትን ኣዋልድን ከኣ ወለደ።
20 ስለዚ፡ ኵሉ ዕድመ ያሬድ 962 ዓመት ኰነ፡ ሞተ ኸኣ።
21 ሄኖክ ድማ 65 ዓመት ገበረ። ድሕሪኡ፡ ንማቱሳላ ወለደ።
22 ሄኖክ ንማቱሳላ ምስ ወለደ እውን፡ 300 ዓመት ምስቲ ናይ ሓቂ ኣምላኽ* ተመላለሰ። ኣወዳትን ኣዋልድን ከኣ ወለደ።
23 ስለዚ፡ ኵሉ ዕድመ ሄኖክ 365 ዓመት ኰነ።
24 ሄኖክ ምስቲ ናይ ሓቂ ኣምላኽ ተመላለሰ። ድሕሪኡ፡ ኣምላኽ ስለ ዝወሰዶ፡ ኣይተራእየን።
25 ማቱሳላ ድማ 187 ዓመት ገበረ። ድሕሪኡ፡ ንላሜክ ወለደ።
26 ማቱሳላ ንላሜክ ምስ ወለደ፡ 782 ዓመት ነበረ። ኣወዳትን ኣዋልድን ከኣ ወለደ።
27 ስለዚ፡ ኵሉ ዕድመ ማቱሳላ 969 ዓመት ኰነ፡ ሞተ ኸኣ።
28 ላሜክ ድማ 182 ዓመት ገበረ። ድሕሪኡ፡ ወዲ ወለደ።
29 “ኣብዛ የሆዋ ዝረገማ ምድሪ ኻብ ዘሎ ዕዮናን ካብ ጻዕሪ ኢድናን ኬጸናንዓና እዩ” ኢሉ ስሙ ኖህ ኣውጽኣሉ።
30 ላሜክ ንኖህ ምስ ወለደ፡ 595 ዓመት ነበረ። ኣወዳትን ኣዋልድን ከኣ ወለደ።
31 ስለዚ፡ ኵሉ ዕድመ ላሜክ 777 ዓመት ኰነ፡ ሞተ ኸኣ።
32 ኖህ ወዲ 500 ዓመት ምስ ኰነ፡ ንሴምን ንካምን ንያፌትን ወለደ።

1 ሰባት ኣብ ልዕሊ ገጽ ምድሪ ኺበዝሑ ምስ ጀመሩ፡ ኣዋልድ ከኣ ምስ ተወልዳሎም፡
2 እቶም ደቂ እቲ ናይ ሓቂ ኣምላኽ፡ እተን ኣዋልድ ሰባት መልክዐኛታት ምዃነን ረኣዩ። ካባታተን ድማ ዘዝሓረይወን ኣንስቲ ወሰዱ።
3 ድሕርዚ፡ የሆዋ፡ “ንሱ ስጋ ጥራይ ስለ ዝዀነ፡ መንፈሰይ ንሓዋሩ ንሰብ ኣይኪጻወሮን እዩ። ስለዚ፡ መዓልትታቱ 120 ዓመት ኪኸውን እዩ” በለ።
4 በተን መዓልትታት እቲአንን ብድሕሪኡን፡ ነፊሊም ኣብ ምድሪ ነበሩ። በቲ ግዜ እቲ፡ ደቂ እቲ ናይ ሓቂ ኣምላኽ ናብተን ኣዋልድ ሰባት ኣተዉ፣ ንሳተን ድማ ኣወዳት ወለዳሎም። ንሳቶም ከኣ እቶም ስሙያት ዝነበሩ ናይ ጥንቲ ጀጋኑ እዮም።
5 የሆዋ ኸኣ፡ ክፍኣት ሰብ ኣብ ምድሪ ኸም ዝበዝሐን ኵሉ ዝንባለ ሓሳባት ልቡ ድማ ወትሩ ኽፉእ ጥራይ ከም ዝዀነን ረኣየ።
6 የሆዋ ኸኣ ንሰብ ኣብ ምድሪ ብምግባሩ ተጣዕሰ፡ ልቡ እውን ጐሃየ።
7 ስለዚ፡ የሆዋ፡ “ስለ ዝገበርክዎም ተጣዒሰ እየ እሞ፡ ንዝፈጠርክዎም ሰባት፡ ንሰብ ምስ እንስሳ ዘቤትን ለመምትን በረርቲ ፍጡራት ሰማያትን ብሓባር ካብ ገጽ ምድሪ ኽድምስሶም እየ” በለ።
8 ኖህ ግና ኣብ ቅድሚ ኣዒንቲ የሆዋ ሞገስ ረኸበ።
9 ታሪኽ ኖህ እዚ እዩ።
ኖህ ጻድቕ ሰብኣይ ነበረ። ኣብቶም ብዘመኑ ዚነብሩ ዝነበሩ፡ ኣበር ዘይብሉ ነበረ። ኖህ ምስቲ ናይ ሓቂ ኣምላኽ ተመላለሰ።
10 ኖህ ድማ ሰለስተ ኣወዳት፡ ሴምን ካምን ያፌትን፡ ወለደ።
11 ምድሪ ኸኣ ኣብ ቅድሚ እቲ ናይ ሓቂ ኣምላኽ ተበላሽያ ነበረት፡ ምድሪ ድማ ብዓመጻ መልአት።
12 ኣምላኽ ድማ ንምድሪ ረኣያ፡ ተበላሽያ ኸኣ ነበረት፣ ኵሉ ስጋ፡ መገዱ ኣብ ምድሪ ኣበላሽዩ ነበረ።
13 ድሕሪኡ፡ ኣምላኽ ንኖህ ከምዚ በሎ፦ “ብሰሮም ምድሪ ብዓመጻ መሊኣ እያ እሞ፡ ንዅሉ ስጋ መወዳእታ ኽገብረሉ ወሲነ እየ፣ ስለዚ፡ ምስ ምድሪ ኸጥፍኦም እየ።
14 ዕንዲዳ ኻብ ዜውጽእ ዕንጨይቲ ንዓኻ መርከብ ስራሕ። ነታ መርከብ ክፍልታት ግበረላ፡ ብውሽጣን ብደጊኣን ከኣ ብቕጥራን ለቕልቃ።
15 ከምዚ ኸኣ ግበራ፦ እታ መርከብ ምንዋሓ 300 እመት፡ ምግፋሓ 50 እመት፡ ቍመታ ድማ 30 እመት ይኹን።
16 ነታ መርከብ ካብ ላዕላያ ሓደ እመት ዝቝመቱ ንብርሃን ዚኸውን መስኰት ግበረላ። ኣፍ ደገ እታ መርከብ ድማ ብጐድና ግበሮ፣ ታሕተዋይ ባይታ፡ ካልኣይን ሳልሳይን ከኣ ደርቢ ግበረላ።
17 “ኣነ ኣብ ትሕቲ ሰማያት ንዘሎ ትንፋስ ህይወት ዘለዎ ዅሉ ስጋ ኸጥፍእሲ፡ ማይ ኣይሂ ኣብ ልዕሊ ምድሪ ኸምጽእ እየ። ኣብ ምድሪ ዘሎ ዅሉ እውን ኪጠፍእ እዩ።
18 ምሳኻ ኸኣ ኪዳነይ ከቕውም እየ፣ ንስኻ ድማ ምስ ደቅኻን ሰበይትኻን ኣንስቲ ደቅኻን ናብታ መርከብ እቶ።
19 ምሳኻ ብህይወት ምእንቲ ኺነብሩ ኸኣ፡ ካብ ኵሉ ዓይነት ህያው ፍጡር ከክልተ፡ ማለት ተባዕታይን ኣንስተይትን፡ ናብታ መርከብ ኣእቱ።
20 ካብቶም በረርቲ ፍጡራት በብዓይነቶም፡ ካብ እንስሳ ዘቤት በብዓይነቶም፡ ካብ ለመምቲ ምድሪ በብዓይነቶም፡ ብህይወት ምእንቲ ኺነብሩስ፡ ካብ ኵሉ ኸክልተ ናባኻ ይእተዉ።
21 ንዓኻን ነቶም እንስሳታትን ምግቢ ዚኸውን ከኣ፡ ኵሉ ዓይነት ዚብላዕ ምግቢ ኣኪብካ ምሳኻ ውሰድ።”
22 ኖህ ድማ ከምቲ ኣምላኽ ዝኣዘዞ ገበረ። ልክዕ ከምኡ ገበረ።

1 ድሕርዚ፡ የሆዋ ንኖህ ከምዚ በሎ፦ “ኣብዚ ወለዶ እዚ፡ ኣብ ቅድመይ ጸዲቕካ ረኺበካ እየ እሞ፡ ንስኻ ምስ ኵሎም ቤተ ሰብካ ናብ መርከብ እቶ።
2 ካብ ኵሉ ዓይነት ንጹህ እንስሳ ሸሸውዓተ፡ ተባዕታይን ኣንስተይትን፣ ካብ ኵሉ ዘይንጹህ እንስሳ ኸኣ ከክልተ፡ ተባዕታይን ኣንስተይትን፡ ምሳኻ ውሰድ፣
3 ከምኡ ድማ ኣብ ልዕሊ ዅላ ምድሪ ዘርኦም ምእንቲ ኺዕቀብ፡ ካብ በረርቲ ፍጡራት ሰማይ ሸሸውዓተ፡ተባዕታይን ኣንስተይትን።
4 ከመይሲ፡ ድሕሪ ሸውዓተ መዓልቲ፡ ኣብ ምድሪ 40 መዓልትን 40 ለይትን ከዝንም እየ፣ ነቲ ዝገበርክዎ ዅሉ ህያው ድማ ካብ ገጽ ምድሪ ኽድምስሶ እየ።” 5 ሽዑ፡ ኖህ ከምቲ የሆዋ ዝኣዘዞ ዅሉ ገበረ።
6 ማይ ኣይሂ ኣብ ምድሪ ኺመጽእ ከሎ፡ ኖህ ወዲ 600 ዓመት ነበረ።
7 ኖህ ድማ ምስ ደቁን ሰበይቱን ኣንስቲ ደቁን ቅድሚ ማይ ኣይሂ ናብ መርከብ ኣተወ።+
8 ካብ ኵሉ ንጹህ እንስሳን ካብ ኵሉ ዘይንጹህ እንስሳን ካብ በረርቲ ፍጡራትን ኣብ ምድሪ ኻብ ዚንቀሳቐስ ኵሉን፡
9 ከምቲ ኣምላኽ ንኖህ ዝኣዘዞ፡ ከክልተ፡ ተባዕታይን ኣንስተይትን፡ ናብ ኖህ ናብ መርከብ ኣተዉ።
10 ድሕሪ ሸውዓተ መዓልቲ ኸኣ፡ ማይ ኣይሂ ናብ ምድሪ መጸ።
11 ኣብ መበል 600 ዓመት ዕድመ ኖህ፡ ኣብታ ኻልአይቲ ወርሒ፡ ኣብ መበል 17 መዓልቲ እታ ወርሒ፡ በታ መዓልቲ እቲኣ ዅሉ ዓይኒ ማያት እቲ ሰፊሕ መዓሙቝ ማይ ተቐድደ፡ መሳዅቲ ሰማያት ከኣ ተኸፍተ። 12 40 መዓልትን 40 ለይትን ድማ ኣብ ምድሪ ዘነመ።
13 በታ መዓልቲ እቲኣ፡ ኖህን ደቁን፡ ማለት ሴምን ካምን ያፌትን፡ ሰበይቱን ሰለስቲአን ኣንስቲ ደቁን ናብታ መርከብ ኣተዉ።
14 ምስ ኵሉ እንስሳ ዘገዳም በብዓይነቱን ምስ ኵሉ እንስሳ ዘቤት በብዓይነቱን ምስ ኵሉ ለማሚ ምድሪ በብዓይነቱን ምስ ኵሉ በራሪ ፍጡር በብዓይነቱን ምስ ኵሉ ዑፍን ክንፊ ምስ ዘለዎ ዅሉ ፍጡርን ኣተዉ።
15 ትንፋስ ህይወት ካብ ዘለዎ ዅሉ ስጋ፡ ከክልተ ናብ ኖህ ናብ መርከብ ኣተዉ።
16 ከምቲ ኣምላኽ ዝኣዘዞ ድማ ካብ ኵሉ ዓይነት ስጋ፡ ተባዕታይን ኣንስተይትን ኣተዉ። የሆዋ ኸኣ ነቲ ማዕጾ ብድሕሪኡ ዓጸዎ።
17 ማይ ኣይሂ ድማ 40 መዓልቲ ኣብ ምድሪ ቐጸለ፣ እቲ ማያት ከኣ እናበዝሐ ኸደ እሞ ነታ መርከብ ኣልዓላ፡ ካብ ምድሪ ድማ ልዕል ኢላ ጸምበለል ትብል ነበረት።
18 እቲ ማያት እናበርትዐ፡ ኣብ ልዕሊ ምድሪ ኸኣ እናበዝሐ ኸደ፣ እታ መርከብ ግና ኣብ ልዕሊ እቲ ማያት ጸምበለል ትብል ነበረት።
19 እቲ ማያት ድማ ኣብ ምድሪ ኣዝዩ እናበርትዐ ብምኻዱ፡ ኣብ ትሕቲ ብዘሎ ሰማያት ዝነበረ ዅሉ ነዋሕቲ ኣኽራን ተጐልበበ።
20 እቲ ማያት ኣብ ልዕሊ እቲ ኣኽራን ክሳብ 15 እመት ንላዕሊ ኽብ በለ።
21 ስለዚ፡ ኣብ ልዕሊ ምድሪ ዚንቀሳቐሱ ዅሎም ህያዋን ፍጡራት፡ በረርቲ ፍጡራትን እንስሳታት ዘቤትን እንስሳታት ዘገዳምን ሓሰኽሰኽ ዚብሉ ፍጡራትን ኵሎም ሰባትን፡ ጠፍኡ።
22 ኣብ ንቑጽ ምድሪ ዝነበረ ኣብ ኣፍንጫኡ ትንፋስ ህይወት ዝነበሮ ዅሉ ሞተ።
23 ስለዚ፡ ንዅሉ ህያው፡ እንተላይ ሰብን እንስሳን ለማምን በራሪ ፍጡር ሰማይን፡ ካብ ገጽ ምድሪ ደምሰሰ። ኵላቶም ካብ ገጽ ምድሪ ተደምሰሱ፣ ኖህን እቶም ምስኡ ኣብ መርከብ ዝነበሩን ጥራይ ተረፉ።
24 እቲ ማያት ድማ ክሳዕ 150 መዓልቲ ኣብ ምድሪ በርትዐ።

1 ኣምላኽ ከኣ ንኖህን ምስኡ ኣብ መርከብ ንዝነበሩ ዅሎም እንስሳታት ዘገዳምን እንስሳታት ዘቤትን ቈላሕታ ገበረሎም፣ ኣምላኽ ድማ ኣብ ምድሪ ንፋስ ኣንፈሰ፡ እቲ ማያት ድማ ኪጐድል ጀመረ።
2 ዓይኒ ማያት እቲ መዓሙቝ ማይን መሳዅቲ ሰማያትን ተዓብሰ፣ እቲ ኻብ ሰማያት ዚዘንም ዝነበረ ዝናም እውን ዛረየ።
3 ሽዑ፡ እቲ ማያት ካብ ምድሪ እናነከየ ኸደ። ኣብ መወዳእታ 150 መዓልቲ ኸኣ፡ እቲ ማይ ጐደለ።
4 ኣብ ሻውዐይቲ ወርሒ፡ ኣብ መበል 17 መዓልቲ እታ ወርሒ፡ እታ መርከብ ኣብ ኣኽራን ኣራራት ዓረፈት።
5 እቲ ማያት ከኣ ክሳዕ ዓስረይቲ ወርሒ እናጐደለ ኸደ። ኣብታ ዓስረይቲ ወርሒ፡ ኣብታ ቐዳመይቲ መዓልቲ እታ ወርሒ፡ ኣራእስ እቲ ኣኽራን ተራእየ።
6 ኣብ መወዳእታ እቲ 40 መዓልቲ፡ ኖህ ነቲ ኣብ መርከብ ዝሰርሖ መስኰት ከፊቱ፡
7 ኳዅ ሰደደ፣ ንሱ ኸኣ ማያት ካብ ምድሪ ኽሳዕ ዚነቅጽ፡ ኣብ ወጻኢ ይነፍርን ይምለስን ነበረ።
8 ጸኒሑ፡ እቲ ማያት ካብ ገጽ ምድሪ ጐዲሉ እንተ ዀይኑ ኺርኢ፡ ርግቢ ሰደደ።
9 እቲ ማያት ንገጽ ብዘላ ምድሪ ኣጐልቢብዋ ስለ ዝነበረ፡ እታ ርግቢ መዕለቢ ስኢና ናብኡ ናብ መርከብ ተመልሰቶ። ኢዱ ዘርጊሑ ድማ ወሰዳ፡ ናብ መርከብ ከኣ ኣእተዋ።
10 ገና ኻልእ ሸውዓተ መዓልቲ ጸኒሑ ድማ፡ ነታ ርግቢ መሊሱ ኻብ መርከብ ሰደዳ።
11 እታ ርግቢ ኣጋ ምሸት ምስ ተመልሰቶ፡ ሓድሽ እተቐንጠበ ቘጽሊ ኣውልዕ ኣብ መትኰባ ረኣየ። ሽዑ፡ ኖህ እቲ ማያት ካብ ምድሪ ኸም ዝጐደለ ፈለጠ።
12 ገና ኻልእ ሸውዓተ መዓልቲ ጸኒሑ ድማ፡ ነታ ርግቢ ሰደዳ፣ ድሕሪኡ ግና ኣይተመልሰቶን።
13 ኣብ መበል 601 ዓመት፡ ኣብ ቀዳመይቲ ወርሒ፡ ኣብ ቀዳመይቲ መዓልቲ እታ ወርሒ፡ እቲ ማያት ካብ ምድሪ ነጸፈ፣ ኖህ ከኣ መኽደኒ እታ መርከብ ቀልዐ፡ ገጽ እታ ምድሪ ይነቅጽ ከም ዝነበረ ድማ ረኣየ።
14 ኣብ ካልአይቲ ወርሒ፡ ኣብ መበል 27 መዓልቲ እታ ወርሒ፡ ምድሪ ነቐጸት።
15 ኣምላኽ ድማ ንኖህ ከምዚ በሎ፦
16 “ንስኻን ሰበይትኻን ደቅኻን ኣንስቲ ደቅኻን ካብ መርከብ ውጹ።
17 ህያው ፍጡር ዘበለ ዅሉ ስጋን በረርቲ ፍጡራትን እንስሳታትን ኵሎም ለመምቲ ምድርን፡ ኣብ ምድሪ ኺስስኑ፡ ኣብ ልዕሊ ምድሪ ኸኣ ኪፋረዩን ኪባዝሑን ምሳኻ ኣውጽኣዮም።”
18 ሽዑ፡ ኖህ ምስ ደቁን ሰበይቱን ኣንስቲ ደቁን ወጸ።
19 ኵሉ ህያው ፍጡርን ኵሉ ለማምን ኵሉ በራሪ ፍጡርን ኣብ ምድሪ ዚንቀሳቐስ ዘበለ ዅሉን ድማ በብዓሌቶም ካብ መርከብ ወጹ።
20 ኖህ ድማ ንየሆዋ መሰውኢ ሰርሐ፣ ካብ ኵሉ ንጹህ እንስሳን ካብ ኵሉ ንጹህ በራሪ ፍጡርን+ ወሲዱ ኸኣ፡ ዚሓርር መስዋእቲ ኣብቲ መሰውኢ ኣቕረበ።
21 የሆዋ ድማ ነቲ ጥዑም ጨና ኣጫነዎ። ስለዚ፡ የሆዋ ብልቡ፡ “ዝንባለ ልቢ ሰብ ካብ ንእስነቱ ጀሚሩ ኽፉእ እዩ እሞ፡ ድሕሪ ደጊም ብሰሪ ሰብ ንምድሪ ኣይክረግማን እየ፣ ድሕሪ ደጊም እውን ከምቲ ዝገበርክዎ፡ ህያው ንዘበለ ዅሉ መሊሰ ኣይክወቅዕን እየ።
22 ካብ ሕጂ ንደሓር ኣብ ምድሪ፡ ዘርእን ዓጺድን፡ ዛሕልን ዋዕን፡ ሓጋይን ክረምትን፡ መዓልትን ለይትን ኣይኬቋርጽን እዩ” በለ።

1 ኣምላኽ ከኣ ንኖህን ንደቁን ባረኾም፡ ከምዚ ድማ በሎም፦ “ፍረዩን ተባዝሑን ንምድሪ ኸኣ ምልእዋ።
2 ኵሉ ህያው ፍጡር ምድርን ኵሉ በራሪ ፍጡር ሰማያትን ኣብ ምድሪ ዚንቀሳቐስ ዘበለ ዅሉን ኵሉ ዓሳ ባሕርን ድማ ብኣኻትኩም ይፍራህን ይሸበርን። ኣብ ኢድኩም ተዋሂቦም እዮም።
3 ዚንቀሳቐስ እንስሳ ዘበለ ዅሉ ህያው፡ ምግቢ ይኹንኩም። ከምቲ ለምለም ኣትክልቲ ዝሃብኩኹም፡ ኵላቶም እህበኩም ኣለኹ።
4 ግናኸ፡ ስጋ ምስ ህይወቱ፡ ማለት ምስ ደሙ፡ ኣይትብልዑ።
5 ብዘይካዚ፡ ነቲ ህይወትኩም ዝዀነ ደምኩም ኣነ ኽደልዮ እየ። ካብ ኢድ ኵሉ ህያው ፍጡር ክደልዮ እየ፣ ሓዉ ስለ ዝዀነ ድማ፡ ህይወት ሰብ ካብ ኢድ ሰብ ክደልያ እየ።
6 ኣምላኽ ንሰብ ብመልክዑ ገይርዎ እዩ እሞ፡ እቲ ደም ሰብ ዜፍስስ፡ ደሙ ብሰብ ኪፈስስ እዩ።
7 ንስኻትኩም ከኣ ፍረዩን ተባዝሑን፡ ኣብ ምድሪ ድማ ሰስኑን ተባዝሑን።”
8 ኣምላኽ ከኣ ንኖህ፡ ንደቁ ድማ ምስኡ ኸምዚ በሎም፦
9 “እንሆ ኸኣ፡ ምሳኻትኩም፡ ብድሕሬኹም ድማ ምስ ዘርእኹም ኪዳነይ አቕውም ኣለኹ።
10 ምስቲ ምሳኻትኩም ዘሎ ዅሉ ህያው ፍጡርን ምስ ኣዕዋፍን ምስ እንስሳታትን ምስ ኵሎም እቶም ምሳኻትኩም ዘለዉ ህያዋን ፍጡራት ምድርን ምስቲ ኻብ መርከብ ዝወጸ ዅሉ ህያው ፍጡር ምድርን እውን ኪዳነይ አቕውም ኣለኹ።
11 እወ፡ ምሳኻትኩም ኪዳነይ አቕውም ኣለኹ፦ ድሕሪ ደጊም ስጋ* ዘበለ ዅሉ ብማይ ኣይሂ ኣይኪጠፍን እዩ፣ ንምድሪ ዜጥፍእ ማይ ኣይሂ እውን መሊሱ ኣይኪኸውንን እዩ።”
12 ብተወሳኺ፡ ኣምላኽ ከምዚ በለ፦ “ምልክት እቲ ኣብ መንጎይን ኣብ መንጎኹምን ኣብ መንጎ እቲ ምሳኻትኩም ዘሎ ዅሉ ህያው ፍጡርን፡ ንውሉድ ወለዶ ዝገብሮ ኺዳን እዚ እዩ።
13 ቀስተ ደበናይ ኣብ ደበና አንብር ኣለኹ፣ ንሱ ድማ ምልክት እቲ ኣብ መንጎይን ኣብ መንጎ ምድርን ዘሎ ኺዳን ኪኸውን እዩ።
14 ደበና ኣብ ልዕሊ ምድሪ ኸደባኑ ኸለኹ፡ ኣብቲ ደበና፡ ቀስተ ደበና ብርግጽ ኪርአ እዩ።
15 ነቲ ምሳኻትኩምን ምስ ኵሉ ዓይነት ህያው ፍጡር ዘበለን ዝገበርክዎ ኺዳነይ ከኣ ብርግጽ ክዝክር እየ፣ ንዅሉ ስጋ ዜጥፍእ ማይ ኣይሂ እውን ደጊም ከቶ ኣይኪኸውንን እዩ።
16 ቀስተ ደበና ድማ ኣብ ደበና ኪኸውን እዩ፣ ኣነ ኸኣ ብርግጽ ክርእዮ፡ ነቲ ኣብ መንጎ ኣምላኽን ኣብ መንጎ እቲ ኣብ ምድሪ ዘሎ ዅሉ ዓይነት ህያው ፍጡር ዘበለን እተገብረ ናይ ዘለኣለም ኪዳን እውን ክዝክሮ እየ።”
17 ኣምላኽ ከኣ መሊሱ ንኖህ፡ “ምልክት እቲ ኣብ መንጎይን ኣብ መንጎ ዅሉ እቲ ኣብ ምድሪ ዘሎ ስጋን ዘቘምክዎ ኺዳን እዚ እዩ” በሎ።
18 እቶም ካብ መርከብ ዝወጹ ደቂ ኖህ ከኣ፡ ሴምን ካምን ያፌትን እዮም።+ ካም ድማ ኣቦ ከነኣን ኰነ።
19 እዚኣቶም ሰለስቲኦም ደቂ ኖህ እዮም፣ ካብዚኣቶም ከኣ ኵሎም ህዝቢ ምድሪ መጹ፡ ተበተኑ እውን።
20 ኖህ ድማ ሓረስታይ ኪኸውን ጀመረ፡ ኣታኽልቲ ወይኒ እውን ተኸለ።
21 ካብ ወይኒ ምስ ሰተየ ኸኣ ሰኸረ፡ ኣብ ውሽጢ ድንኳኑ ድማ ጥራዩ ዀነ።
22 ካም ኣቦ ከነኣን ከኣ ዕርቃን ኣቦኡ ርእዩ፡ ናብ ግዳም ወጺኡ ንኽልቲኦም ኣሕዋቱ ነገሮም።
23 ሴምን ያፌትን ድማ ክዳን ወሰዱ እሞ ኣብ መንኵቦም ገይሮም ንድሕሪት ከይዶም፡ ዕርቃን ኣቦኦም ከደኑ። ገጾም ብምምላሶም፡ ዕርቃን ኣቦኦም ኣይረኣዩን።
24 ኖህ ካብ ስኽራን ወይኑ ምስ ተበራበረ፡ እቲ ንእሽቶ ወዱ ዝገበሮ ፈለጠ።
25 ከምዚ ኸኣ በለ፦
“ከነኣን ርጉም ይኹን።
ንኣሕዋቱ ባርያ ባሮት ይኹን።”
26 ከምዚ እውን በለ፦
“የሆዋ፡ ኣምላኽ ሴም ይወደስ፡
ከነኣን ድማ ባርያ ሴም* ይኹን።
27 ኣምላኽ ንያፌት የስፍሓሉ፡
ኣብ ድንኳናት ሴም ከኣ ይንበር።
ከነኣን ድማ ባርያኡ ይኹን።”
28 ኖህ ከኣ ድሕሪ ማይ ኣይሂ 350 ዓመት ነበረ።
29 ኵሉ ዕድመ ኖህ 950 ዓመት ኰነ፡ ሞተ ኸኣ።

1 ታሪኽ ደቂ ኖህ፡ ሴምን ካምን ያፌትን፡ እዚ እዩ።
ድሕሪ ማይ ኣይሂ፡ ንዓታቶም ደቂ ተወልዱሎም።
2 ደቂ ያፌት፡ ጎሜርን ማጎግን ማዳይን ያዋንን ቱባልን ሜሴክን ቲራስን እዮም።
3 ደቂ ጎሜር፡ ኣሽከናዝን ሪፋትን ቶጋርማን እዮም።
4 ደቂ ያዋን፡ ኤሊሻን ተርሲስን ኪቲምን ዶዳኒምን እዮም።
5 ካብዚኣቶም ነበርቲ ደሴታት ከከም ቋንቋኦምን ከከም ዓሌቶምን በብህዝቦምን ነናብ ምድሮም ተበተኑ።
6 ደቂ ካም፡ ኩሽን ሚስራይምን ጱጥን ከነኣንን እዮም።
7 ደቂ ኩሽ፡ ሴባን ሓዊላን ሳብታን ራዕማን ሳብተካን እዮም።
ደቂ ራዕማ፡ ሳባን ዴዳንን እዮም።
8 ኩሽ ንኒምሮድ ወለደ። ንሱ ኣብ ምድሪ ናይ መጀመርታ ጅግና ነበረ።
9 ንየሆዋ ዚጻረር ጅግና ሃዳኒ ዀነ። ስለዚ ኸኣ እዩ፡ “ከም ኒምሮድ፡ ንየሆዋ ዚጻረር ጅግና ሃዳኒ” ዚብል ብሂል ዘሎ።
10 መጀመርታ መንግስቱ ድማ፡ ባቤልን ኤሬክን ኣካድን ካልነን ኣብ ምድሪ ሲንኣር ነበራ።
11 ካብታ ምድሪ እቲኣ፡ ናብ ኣሶር ከይዱ ንነነዌን ንሬሖቦት-ዒርን ንከላህን ሰርሐን፣
12 ንሬስን እውን ኣብ መንጎ ነነዌን ከላህን ሰርሓ፦ እዚኣ ዓባይ ከተማ እያ።
13 ሚስራይም ድማ ንሉዲምን ንዓናሚምን ንለሃቢምን ንናፍቱሒምን
14 ንጳጥሩሲምን ነቲ ኻብኡ ፍልስጥኤማውያን ዝወጹ ካስሉሒምን ንካፍቶሪምን ወለደ።
15 ከነኣን ንሲዶን በዅሩን ንሔትን
16 ንይቡሳውያንን ንኣሞራውያንን ንጊርጋሳውያንን
17 ንሒዋውያንን ንዓርቃውያንን ንሲኒውያንን
18 ንኣርዋዳውያንን ንጸማራውያንን ንሓማታውያንን ወለደ። ድሕርዚ፡ ዓሌታት ከነኣናውያን ፋሕ በሉ።
19 ዶብ ከነኣናውያን ድማ ካብ ሲዶን ክሳብ እታ ጥቓ ጋዛ ዘላ ጌራር፡ ክሳብ ሶዶምን ጎሞራን ኣድማን ጥቓ ላሻዕ ዘላ ጸቦኢምን ነበረ።
20 እዚኣቶም ከከም ዓሌቶምን ከከም ቋንቋኦምን በብምድሮምን በብህዝቦምን ደቂ ካም እዮም።
21 ንሴም እቲ ኣቦ ዅሎም ደቂ ዔበርን ሓው እቲ ዓብዪ ዝዀነ ያፌትን እውን ደቂ ተወልዱሉ።
22 ደቂ ሴም፡ ዔላምን ኣሹርን ኣርፋክሳድን ሉድን ኣራምን+ እዮም።
23 ደቂ ኣራም፡ ዑጽን ሑልን ጌተርን ማሽን እዮም።
24 ኣርፋክሳድ ንሸላሕ ወለደ፣ ሸላሕ ከኣ ንዔበር ወለደ።
25 ንዔበር ድማ ክልተ ኣወዳት ተወልዱሉ። እቲ ሓደ፡ ብዘመኑ ምድሪ ስለ እተኸፋፈለት፡ ስሙ ፌሌግ ተባህለ። ስም ሓዉ ኸኣ ዮቅጣን እዩ።
26 ዮቅጣን ንኣልሞዳድን ንሼሌፍን ንሓጻርማዌትን ንየራሕን
27 ንሃዶራምን ንኡዛልን ንዲቅላን
28 ንዖባልን ንኣቢማኤልን ንሳባን
29 ንኦፊርን ንሓዊላን ንዮባብን ወለደ። ኵሎም እዚኣቶም ደቂ ዮቅጣን እዮም።
30 መንበሪኦም ድማ ካብ ሜሻ ኽሳብ እቲ ኣኽራን ምብራቕ ዝዀነ ሰፋር ተዘርግሐ።
31 እዚኣቶም ከከም ዓሌቶምን ከከም ቋንቋኦምን በብምድሮምን በብህዝቦምን+ ደቂ ሴም እዮም።
32 እዚኣቶም ከከም ትውልዶምን በብህዝቦምን ዓሌታት ደቂ ኖህ እዮም። ካብዚኣቶም ድማ ድሕሪ ማይ ኣይሂ ኣህዛብ ኣብ ምድሪ ተበተኑ።

1 ኵላ ምድሪ ብሓደ ቛንቋን ብሓደ ጕጅለ ቓላትን ትዛረብ ነበረት።
2 ናብ ምብራቕ ኣቢሎም ምስ ተጓዕዙ ድማ፡ ኣብ ምድሪ ሲንኣር ጐልጐል ስንጭሮ ረኸቡ፡ ኣብኡ እውን ተቐመጡ።
3 ንሓድሕዶም ድማ፡ “ንዑ፡ ሕጡብ ንስራሕ እሞ ብሓዊ ነብስሎ” ተባሃሃሉ። ስለዚ፡ ሕጡብ ኣብ ክንዲ እምኒ፡ ቅጥራን ከኣ ኣብ ክንዲ ጭቃ መንደቕ ተጠቕሙ።
4 ሽዑ ድማ፡ “ኣብ ልዕሊ ገጽ ኵላ ምድሪ ፋሕ ምእንቲ ኸይንብልሲ፡ ንዑ፡ ከተማን ርእሱ ኽሳብ ሰማያት ዚበጽሕ ግምብን ንስራሕ፡ ስምና ኸኣ ነጸውዕ” በሉ።
5 የሆዋ ድማ ነቲ ደቂ ሰብ ዝሰርሕዎ ኸተማን ግምብን ኪርኢ ወረደ።
6 የሆዋ ኸኣ፡ “እንሆ፡ ሓደ ዝቛንቋኦም ሓደ ህዝቢ እዮም፣ እዚ ኸኣ ኪገብሩ ጀሚሮም። ሕጂ ድማ ካብቲ ኺገብርዎ ዚህቅኑ፡ ዘይከኣሎም ኣይኪህሉን እዩ።
7 ሓደ ናይቲ ሓደ ቛንቋ ምእንቲ ኸይርድኦስ፡ ንዑ ናብኡ ንውረድ እሞ ቛንቋኦም ንደባልቕ” በለ።
8 የሆዋ ድማ ካብኡ ናብ ገጽ ኵላ ምድሪ ፋሕ ኣበሎም፡ ምስራሕ እታ ኸተማ እውን በብቝሩብ ገደፉ።
9 የሆዋ ኣብኣ ቛንቋ ዅላ ምድሪ ስለ ዝደባለቐ፡ ስም እታ ኸተማ ባቤል ተባህለ፣ ካብኣ ኸኣ የሆዋ ናብ ልዕሊ ገጽ ኵላ ምድሪ ፋሕ ኣበሎም።
10 ታሪኽ ሴም እዚ እዩ።
ክልተ ዓመት ድሕሪ ማይ ኣይሂ፡ ሴም ወዲ 100 ዓመት ምስ ኰነ፡ ንኣርፋክሳድ ወለደ።
11 ሴም ንኣርፋክሳድ ምስ ወለደ፡ 500 ዓመት ነበረ። ኣወዳትን ኣዋልድን ከኣ ወለደ።
12 ኣርፋክሳድ ድማ 35 ዓመት ገበረ፣ ንሸላሕ ከኣ ወለደ።
13 ኣርፋክሳድ ንሸላሕ ምስ ወለደ፡ 403 ዓመት ነበረ። ኣወዳትን ኣዋልድን ከኣ ወለደ።
14 ሸላሕ ድማ 30 ዓመት ገበረ፣ ንዔበር ከኣ ወለደ።
15 ሸላሕ ንዔበር ምስ ወለደ፡ 403 ዓመት ነበረ። ኣወዳትን ኣዋልድን ከኣ ወለደ።
16 ዔበር ድማ 34 ዓመት ገበረ፣ ንፌሌግ ከኣ ወለደ።
17 ዔበር ንፌሌግ ምስ ወለደ፡ 430 ዓመት ነበረ። ኣወዳትን ኣዋልድን ከኣ ወለደ።
18 ፌሌግ ድማ 30 ዓመት ገበረ፣ ንረጉ ኸኣ ወለደ።
19 ፌሌግ ንረጉ ምስ ወለደ፡ 209 ዓመት ነበረ። ኣወዳትን ኣዋልድን ከኣ ወለደ።
20 ረጉ ድማ 32 ዓመት ገበረ፣ ንሴሩግ ከኣ ወለደ።
21 ረጉ ንሴሩግ ምስ ወለደ፡ 207 ዓመት ነበረ። ኣወዳትን ኣዋልድን ከኣ ወለደ።
22 ሴሩግ ድማ 30 ዓመት ገበረ፣ ንናሆር ከኣ ወለደ።
23 ሴሩግ ንናሆር ምስ ወለደ፡ 200 ዓመት ነበረ። ኣወዳትን ኣዋልድን ከኣ ወለደ።
24 ናሆር ድማ 29 ዓመት ገበረ፣ ንታራ ኸኣ ወለደ።
25 ናሆር ንታራ ምስ ወለደ፡ 119 ዓመት ነበረ። ኣወዳትን ኣዋልድን ከኣ ወለደ።
26 ታራ ድማ 70 ዓመት ገበረ፣ ንኣብራምን ንናሆርን ንሃራንን ከኣ ወለደ።
27 ታሪኽ ታራ እዚ እዩ።
ታራ ንኣብራምን ንናሆርን ንሃራንን ወለደ፣ ሃራን ድማ ንሎጥ+ ወለደ።
28 ሃራን ከኣ ኣቦኡ ታራ ብህይወቱ ኸሎ፡ ኣብታ እተወልደላ ምድሪ ኡር ናይ ከለዳውያን ሞተ።
29 ኣብራምን ናሆርን ድማ ኣንስቲ ኣእተዉ። ስም ሰበይቲ ኣብራም ሳራይ እዩ፣ ስም ሰበይቲ ናሆር ድማ ሚልካ፡ ጓል ሃራን፡ ኣቦ ሚልካን ዪስካን እዩ። 30 ሳራይ ድማ መኻን ነበረት፣ ውሉድ ከኣ ኣይነበራን።
31 ታራ ድማ ንኣብራም ወዱን ንሎጥ ወዲ ሃራን ወዲ ወዱን ንሳራይ ሰበይቲ ኣብራም ወዱን ወሰደ፣ ካብ ኡር ናይ ከለዳውያን ናብ ምድሪ ከነኣን ኪኸዱ ምስኡ ወጹ። ናብ ካራን መጺኦም ድማ፡ ኣብኣ ተቐመጡ።
32 ዕድመ ታራ ድማ 205 ዓመት ኰነ። ታራ ኸኣ ኣብ ካራን ሞተ።

1 የሆዋ ድማ ንኣብራም ከምዚ በሎ፦ “ካብ ምድርኻን ካብ ኣዝማድካን ካብ እንዳ ኣቦኻን ኣነ ናብ ዘርእየካ ምድሪ ኣቢልካ ውጻእ።
2 ዓብዪ ህዝቢ ኽገብረካን ክባርኸካን እየ፣ ንስምካ እውን ከዕብዮ እየ፣ ንበረኸት ድማ ክትከውን ኢኻ።
3 ንዚባርኹኻ ኽባርኾም፡ ንዚረግመካ እውን ክረግሞ እየ፣ ኵሎም ዓሌታት ምድሪ ኸኣ ብኣኻ ብርግጽ ኪባረኹ እዮም።”
4 ኣብራም ከኣ ከምቲ የሆዋ ዝበሎ ኸደ፣ ሎጥ ድማ ምስኡ ኸደ። ኣብራም ካብ ካራን ኪወጽእ ከሎ ኸኣ፡ ወዲ 75 ዓመት ነበረ።
5 ኣብራም ድማ ንሳራይ ሰበይቱን ንሎጥ ወዲ ሓዉን ነቲ ዘጥረይዎ ዅሉ ጥሪቶምን ነቶም ኣብ ካራን ዘጥረይዎም ሰባትን ወሰደ እሞ፡ ናብ ምድሪ ከነኣን ነቐሉ። ኣብ ምድሪ ከነኣን ምስ በጽሑ፡
6 ኣብራም በታ ምድሪ እቲኣ ኽሳብ እታ ኣብ ጥቓ ዓበይቲ ኣእዋም ሞሬ ዘላ ሴኬም ተጓዕዘ። በቲ ግዜ እቲ፡ ከነኣናውያን ኣብታ ምድሪ እቲኣ ነበሩ።
7 የሆዋ ድማ ንኣብራም ተራእዮ፡ “እዛ ምድሪ እዚኣ ንዘርእኻ ኽህቦ እየ” ኸኣ በሎ። ኣብኡ ድማ ነቲ እተራእዮ የሆዋ መሰውኢ ሰርሓሉ።
8 ካብኡ ናብቲ ብምብራቕ ቤት-ኤል ዘሎ ኣኽራን ተጓዒዙ፡ ኣብኡ ድንኳን ተኸለ እሞ፡ ቤት-ኤል ብምዕራቡ፡ ዓይ+ ከኣ ብምብራቑ ዀና። ኣብኡ ኸኣ ንየሆዋ መሰውኢ ሰርሐ፡ ስም የሆዋ እውን ኪጽውዕ ጀመረ።
9 ድሕርዚ፡ ኣብራም ካብቲ ዝሰፈረሉ ነቒሉ፡ ሰፈሩ ኻብ ቦታ ናብ ቦታ እናኣግዓዘ ናብ ነጌብ ኣቢሉ ኸደ።
10 ኣብታ ምድሪ ኸኣ ጥሜት ኰነ፣ ኣብታ ምድሪ ጥሜት ስለ ዝበርትዐ ድማ፡ ኣብራም ንግዜኡ ኣብኣ ኪቕመጥ+ ናብ ግብጺ ወረደ።
11 ናብ ግብጺ ኺኣቱ ምስ ቀረበ ኸኣ፡ ንሰበይቱ ሳራይ፡ “በጃኺ ስምዕኒ! መልክዐኛ ሰበይቲ ምዃንኪ እፈልጥ እየ።
12 ግብጻውያን ምስ ረኣዩኺ ድማ፡ ‘እዚኣ ሰበይቱ እያ’ ኺብሉ እዮም። ንዓይ ቀቲሎም ከኣ፡ ንዓኺ ብህይወት ኪሓድጉኺ እዮም።
13 ብሳላኺ ደሓን ምእንቲ ኽረክብ፡ ህይወተይ ከኣ ምእንቲ ኽትነሓፍሲ፡ በጃኺ ሓብቱ እየ በሊ” በላ።
14 ኣብራም ኣብ ግብጺ ምስ ኣተወ፡ ግብጻውያን እታ ሰበይቲ ኣዝያ መልክዐኛ ምዃና ረኣዩ።
15 መሳፍንቲ ፈርኦን ድማ ረኣይዋ፣ ኣብ ቅድሚ ፈርኦን ከኣ ወደስዋ፣ እታ ሰበይቲ እውን ናብ ቤት ፈርኦን ተወስደት።
16 ንሱ ድማ ንኣብራም ምእንታኣ ኢሉ ጽቡቕ ገበረሉ፣ ኣባጊዕን ከብትን ተባዕትዮን ኣንስትዮን ኣእዱግን ገላዉን ኣግራድን ኣግማልን ከኣ ኣጥረየ።
17 የሆዋ ኸኣ ብሰሪ ሳራይ ሰበይቲ ኣብራም፡ ንፈርኦንን ንቤተ ሰቡን ብብርቱዕ መዓት ወቕዖም።
18 ፈርኦን ድማ ንኣብራም ጸዊዑ፡ “እንታይ እዩ እዚ ዝገበርካኒ፧ ስለምንታይ ኢኻ ሰበይትኻ ምዃና ዘይነገርካኒ፧
19 ስለምንታይከ፡ ‘ሓብተይ እያ’ ኢልካኒ፧ ሰበይተይ ክትከውን ክወስዳ ኢለ ነይረ። ሕጂ ኸኣ፡ እንሃትልካ ሰበይትኻ። ሒዝካያ ኺድ!” በሎ።
20 ፈርኦን ድማ ብዛዕባኡ ንሰቡ ኣዘዞም፣ ንዕኡን ንሰበይቱን ንዘለዎ ዅሉን ከኣ ይኺዱ ሓደግዎም።

1 ኣብራም ከኣ፡ ንሱን ሰበይቱን ዘለዎ ዅሉን ምስ ሎጥ ሓቢሩ፡ ካብ ግብጺ ናብ ነጌብ ኣቢሉ ደየበ።
2 ኣብራም ድማ ብማልን ብብሩርን ብወርቅን ኣዝዩ ሃብቲሙ ነበረ።
3 ናብታ ኣብ መንጎ ቤት-ኤልን ዓይን ድንኳኑ ተኺሉላ ዝነበረ ቦታ ኽሳዕ ዚበጽሕ፡ ኣብ በቦታኡ እናሰፈረ ኻብ ነጌብ ናብ ቤት-ኤል ተጓዕዘ፣
4 እታ ቦታ እቲኣ ኸኣ ኣቐዲሙ መሰውኢ ሰሪሑላ ዝነበረ እያ። ኣብኣ ድማ ኣብራም ስም የሆዋ ጸውዐ።
5 እቲ ምስ ኣብራም ዚጕዓዝ ዝነበረ ሎጥ እውን፡ ኣባጊዕን ከብትን ድንኳናትን ነበሮ።
6 እታ ምድሪ ኸኣ ብሓደ ኪቕመጡ ኽትጾሮም ኣይከኣለትን፣ ጥሪቶም ብዙሕ ስለ ዝነበረ፡ ብሓደ ኪቕመጡ ኣይከኣሉን።
7 ኣብ መንጎ ጓሶት ማል ኣብራምን ጓሶት ማል ሎጥን ከኣ ባእሲ ዀነ። (በቲ ግዜ እቲ፡ ከነኣናውያንን ፈረዛውያንን ኣብታ ምድሪ ይቕመጡ ነበሩ።)
8 ስለዚ፡ ኣብራም ንሎጥ፡ “ንሕና ኣሕዋት ኢና እሞ፡ በጃኻ፡ ኣብ መንጎይን ኣብ መንጎኻን፡ ኣብ መንጎ ጓሶተይን ኣብ መንጎ ጓሶትካን ባእሲ ኣይኹን።
9 ኵላ ምድሪ ኣብ ቅድሜኻዶ የላን፧ በጃኻ፡ ካባይ ተፈለ። ናብ ጸጋም እንተ ኣቢልካ፡ ኣነ ድማ ናብ የማን አብል፣ ናብ የማን እንተ ኣቢልካ ኸኣ፡ ኣነ ድማ ናብ ጸጋም አብል” በሎ።
10 ሎጥ ከኣ ኣዒንቱ ኣልዒሉ፡ ብዘሎ ኸባቢ ዮርዳኖስ+ ክሳዕ ጾዓር፡ ከም ገነት የሆዋ፡ ከም ምድሪ ግብጺ፡ ማይ መሊእዎ ረኣየ። (እዚ ድማ የሆዋ ንሶዶምን ንጎሞራን ቅድሚ ምጥፋኡ እዩ።)
11 ሽዑ፡ ሎጥ ንብዘሎ ኸባቢ ዮርዳኖስ ሓረየ፣ ሎጥ ከኣ ሰፈሩ ናብ ምብራቕ ኣግዓዘ። ንሓድሕዶም ድማ ተፈላለዩ።
12 ኣብራም ኣብ ምድሪ ከነኣን ተቐመጠ፡ ሎጥ ድማ ኣብ መንጎ እተን ኣብቲ ኸባቢ ዘለዋ ኸተማታት ተቐመጠ።+ ኣብ መወዳእታ ኸኣ፡ ድንኳኑ ኣብ ጥቓ ሶዶም ተኸለ።
13 ሰብ ሶዶም ድማ እኩያት፡ ኣብ ቅድሚ የሆዋ ኸኣ ኣዝዮም ሓጥኣን ነበሩ።
14 ሎጥ ካብኡ ምስ ተፈልየ ድማ፡ የሆዋ ንኣብራም፡ “በጃኻ ኣዒንትኻ ኣልዕል እሞ፡ ካብዛ ዘለኻያ ቦታ ናብ ሰሜንን ናብ ደቡብን ናብ ምብራቕን ናብ ምዕራብን ጠምት፣
15 ከመይሲ፡ እዛ እትርእያ ዘለኻ ዅላ ምድሪ ንዓኻን ንዘርእኻን ንሓዋሩ ርስቲ ገይረ ኽህበካ እየ።
16 ንዘርእኻ ድማ ከም ሓመድ ምድሪ ኽገብሮ እየ። ሰብ፡ ሓመድ ምድሪ ኪቘጽር ዚኽእል እንተ ዀይኑ፡ ዘርእኻ ኸኣ ኪቝጸር ይከኣል።
17 ነዛ ምድሪ እዚኣ ንዓኻ ኽህበካ እየ እሞ፡ ተንስእ ብምንዋሓን ብምግፋሓን ተጐዓዝ” በሎ።
18 ኣብራም ድማ ኣብ ድንኳናት ይቕመጥ ነበረ። ጸኒሑ፡ ናብቲ ኣብ ኬብሮን ዘሎ ዓበይቲ ኣእዋም መምሬ መጺኡ፡ ኣብኡ ተቐመጠ፣ ኣብኡ ኸኣ ንየሆዋ መሰውኢ ሰርሐ።

1 ብዘመን ኣምራፌል ንጉስ ሲንኣር፡ ኣርዮክ ንጉስ ኤልሳር፡ ከዶርላኦመር ንጉስ ዔላም፡ ቲደዓል ንጉስ ጎይም፡
2 እዚኣቶም ምስ ቤራዕ ንጉስ ሶዶምን ምስ ቢርሻዕ ንጉስ ጎሞራን ምስ ሺንኣብ ንጉስ ኣድማን ምስ ሼምኤበር ንጉስ ጸቦኢምን ምስ ንጉስ ቤላዕን፡ ንሳ ኸኣ ጾዓር፡ ውግእ ገበሩ።
3 ኵሎም እዚኣቶም ኣብ ስንጭሮ ሲዲም፡ ንሱ ኸኣ ባሕሪ ጨው፡ ሓይልታቶም ኣሕበሩ።
4 ንከዶርላኦመር
12 ዓመት ተገዚኦምዎ ነበሩ፣ ኣብ መበል
13 ዓመት ግና ዓለዉ።
5 ኣብ መበል
14 ዓመት ድማ ከዶርላኦመርን እቶም ምስኡ ዝነበሩ ነገስታትን መጹ፡ ንረፋይም ኣብ ዓሽተሮት-ቀርናይም፡ ንዙዚም ኣብ ሃም፡ ንኤሚም ኣብ ሻዌ-ቂርያታይም፡
6 ንሖራውያን ከኣ ኣብ ከረን ሰዒር ክሳብ እታ ኣብ በረኻ ዘላ ኤል-ጳራን ሰዓርዎም።
7 ተመሊሶም ድማ ናብ ዔን-ምሽጳጥ፡ ንሳ ኸኣ ቃዴስ፡ መጺኦም፡ ንብዘላ ምድሪ ኣማሌቃውያንን ነቶም ኣብ ሓጻጾን-ታማር ዚቕመጡ ዝነበሩ ኣሞራውያንን ሰዓርዎም።
8 ሽዑ፡ ንጉስ ሶዶምን ንጉስ ጎሞራን ንጉስ ኣድማን ንጉስ ጸቦኢምን ንጉስ ቤላዕን፡ ንሳ ኸኣ ጾዓር፡ ወጺኦም ኣብ ስንጭሮ* ሲዲም ኪዋግኡ ተሰለፉ፣
9 ምስ ከዶርላኦመር ንጉስ ዔላምን ቲደዓል ንጉስ ጎይምን ኣምራፌል ንጉስ ሲንኣርን ኣርዮክ ንጉስ ኤልሳርን፡ ኣርባዕተ ነገስታት ምስ ሓሙሽተ ኺዋግኡ ተሰለፉ።
10 እቲ ስንጭሮ ሲዲም ድማ ጐዳጕዲ ቕጥራን መሊኡ ነበረ፣ ነገስታት ሶዶምን ጎሞራን ከኣ ኪሃድሙ ኸለዉ ኣብኡ ወደቑ፣ እቶም ዝተረፉ ድማ ናብ ኣኽራን ሃደሙ።
11 እቶም ዕዉታት ከኣ ኵሉ ጥሪት ሶዶምን ጎሞራን ኵሉ ምግቦምን ወሲዶም ከዱ።
12 ነቲ ኣብ ሶዶም ዚቕመጥ ዝነበረ ሎጥ ወዲ ሓዉ ንኣብራም እውን ምስ ጥሪቱ ሒዞምዎ ኸዱ።
13 ሓደ ዘምለጠ ኸኣ ናብ ኣብራም እቲ እብራዊ መጺኡ ነገሮ። ንሱ ድማ ኣብቲ ዓበይቲ ኣእዋም መምሬ እቲ ኣሞራዊ፡ ሓው ኤሽኮልን ዓኔርን ይነብር ነበረ። ንሳቶም ከኣ ምስ ኣብራም ኪዳን ተኣታትዮም ነበሩ።
14 ኣብራም ድማ ዘመዱ ኸም እተማረኸ ምስ ሰምዐ፡ ኣብ ቤቱ እተወልዱ 318 ዝሰልጠኑ ገላዉ ኣኪቡ፡ ክሳብ ዳን ደድሕሪኦም ሰዓበ።
15 ንሱን ገላዉኡን ተመቒሎም ከኣ፡ ብለይቲ ኣጥቂዖም ሰዓርዎም። ክሳብ እታ ብሰሜን ደማስቆ እትርከብ ሆባ እውን ሰጐጕዎም።
16 ኵሉ ጥሪት ከኣ ኣምለሰ፣ ንሎጥ ዘመዱን ንጥሪቱን ነተን ኣንስትን ነቲ ህዝብን እውን ኣምለሰ።
17 ኣብራም ንከዶርላኦመርን ነቶም ምስኡ ዝነበሩ ነገስታትን ስዒሩ ምስ ተመልሰ ኸኣ፡ ንጉስ ሶዶም ንኣብራም ኣብ ስንጭሮ ሻዌ፡ ንሱ ኸኣ ስንጭሮ ንጉስ፡ ኪቕበሎ ወጸ።
18 ሽዑ፡ መልከጼዴቅ ንጉስ ሳሌም እንጌራን ወይንን ኣምጽአ፣ ንሱ ኻህን እቲ ልዑል ኣምላኽ ነበረ።
19 ንሱ ድማ፡ ከምዚ ኢሉ ባረኾ፦
“ኣብራም በቲ ልዑል ኣምላኽ፡
በቲ ገባሪ ሰማይን ምድርን ይባረኽ፣
20 እቲ ንተጻረርትኻ ኣብ ኢድካ ኣሕሊፉ ዝሃበካ
ልዑል ኣምላኽ ይወደስ።”
ኣብራም ድማ ካብ ኵሉ፡ ዕሽር ሃቦ።
21 ንጉስ ሶዶም ከኣ ንኣብራም፡ “እቶም ሰባት ሃበኒ፡ ነቲ ጥሪት ግና ንዓኻ ውሰዶ” በሎ።
22 ኣብራም ግና ንንጉስ ሶዶም፡ “ኢደይ ንማሕላ ናብቲ ገባሪ ሰማይን ምድርን ዝዀነ የሆዋ እቲ ልዑል ኣምላኽ አልዕል ኣለኹ፣
23 ‘ንኣብራም ኣነ ኣሀብቲመዮ’ ኸይትብልሲ፡ ፈትሊ ዀነ ስራኽ ሳእኒ ዀነ፡ ናትካ ዘበለ ገለ እኳ ኣይወስድን እየ።
24 ብዘይካ እቲ እቶም ኣጕባዝ ዝበልዕዎ፡ ገለ እኳ ኣይወስድን እየ። ብዛዕባ ግደ እቶም ምሳይ ዝኸዱ ሰብኡት፡ ዓኔርን ኤሽኮልን መምሬን፡ ንሳቶም ግዲኦም ይውሰዱ” በሎ።

1 ድሕርዚ፡ ቃል የሆዋ ብራእይ ከምዚ ኢሉ ናብ ኣብራም መጸ፦ “ኣብራም፡ ኣይትፍራህ+ ዋልታኻ ኣነ እየ። ዓስብኻ ኣዝዩ ብዙሕ ኪኸውን እዩ።”
2 ኣብራም ከኣ፡ “ኦ ልዑላዊ ጐይታ ዝዀንካ የሆዋ፡ ኣነ ውሉድ ዘይብለይ እኸይድ ካብ ኣለኹ፡ ንቤተይ ዚወርስ ከኣ ኤልዔዘር+ ብዓል ደማስቆ ኻብ ኰነስ፡ እንታይ እሞ ኽትህበኒ ኢኻ፧” ኢሉ መለሰ።
3 ብተወሳኺ ድማ፡ ኣብራም፡ “ገለ ዘርኢ ኣይሃብካንን፡ ሓደ ኣባል ቤተ ሰበይ ድማ ኪወርሰኒ እዩ” በለ።
4 እንሆ ኸኣ፡ ቃል የሆዋ፡ “ወድኻ ደኣ እዩ ዚወርሰካ እምበር፡ እዝስ ኣይኪወርሰካን እዩ” ኢሉ መለሰሉ።
5 ንግዳም ኣውጺኡ ድማ፡ “በጃኻ ናብ ሰማያት ጠምት እሞ፡ ምቝጻሮም እትኽእል እንተ ዄንካ፡ ከዋኽብቲ ቝጸር” በሎ። “ዘርእኻ ኸምኡ ኪኸውን እዩ” ድማ በሎ።
6 ብየሆዋ ኸኣ ኣመነ፣ ንሱ ድማ ጽድቂ ገይሩ ቘጸረሉ።
7 ሽዑ፡ “ኣነ ነዛ ምድሪ እዚኣ ርስቲ ገይረ ኽህበካ ኢለ ኻብ ኡር ናይ ከለዳውያን ዘውጻእኩኻ የሆዋ እየ” ድማ በሎ።
8 ንሱ ኸኣ፡ “ኦ ልዑላዊ ጐይታ ዝዀንካ የሆዋ፡ ኣነ ነዚኣ ኸም ዝርስተያ ብምንታይ እፈልጥ፧” በለ።
9 ንሱ ድማ፡ “ሰለስተ ዓመት ዝገበረት ኣርሕን ሰለስተ ዓመት ዝገበረት ጤልን ሰለስተ ዓመት ዝገበረ ድዑልን ባሬቶን ጫቚት ርግብን ኣምጽኣለይ” ኢሉ መለሰሉ።
10 ነዚ ዅሉ ኣምጺኡ ድማ ኣብ ከክልተ ቘረጾ፣ ንነፍሲ ወከፍ ምቃል ከኣ ኣብ መንጽር እቲ ኻልእ ኣቐመጦ፣ ነተን ኣዕዋፍ ግና ኣይቈረጸንን።
11 ሽዑ፡ ኣሞራታት ናብቲ ስጋ ወረዱ፣ ኣብራም ግና ይሰጕጎም ነበረ።
12 ኣጋ ዕራርቦ ጸሓይ፡ ንኣብራም ከቢድ ድቃስ ወሰዶ፣ ሽዑ፡ ዜፍርህ ድቕድቕ ጸልማት ወደቖ።
13 ንኣብራም ከኣ ከምዚ በሎ፦ “ዘርእኻ ኣብ ዘይምድሮም ጓኖት ከም ዚዀኑን እቶም ኣብኡ ዚነብሩ ህዝቢ ን400 ዓመት ከም ዚገዝእዎምን ከም ዚገፍዕዎምን፡ እዚ ብርግጽ ፍለጥ።
14 ኣነ ግና ነቲ ዚግዝእዎ ህዝቢ ኽዳንዮ እየ፣ ድሕሪኡ ድማ፡ ብዙሕ ጥሪት ሒዞም ኪወጹ እዮም።
15 ንስኻ ግና ብሰላም ናብ ኣቦታትካ ኽትከይድ ኢኻ፣ ብጽቡቕ እርጋን ድማ ክትቅበር ኢኻ።
16 ስሕተት ኣሞራውያን ገና መስፈሩ ስለ ዘይመልአ፡ ኣብ ራብዓይ ወለዶ ናብዚ ኺምለሱ እዮም።”
17 ጸሓይ ምስ ዓረበት፡ ግብ ዝበለ ጸልማት ከኣ ምስ ኰነ፡ ዚተክኽ እቶን ተራእየ፡ ብመንጎ እቲ ምቃላት ድማ ሃልሃልታ ፋና ሓለፈ።
18 በታ መዓልቲ እቲኣ፡ የሆዋ ንኣብራም ከምዚ ኢሉ ኺዳን ኣተወሉ፦ “እዛ ምድሪ እዚኣ፡ ካብ ፈለግ ግብጺ ኽሳብ እቲ ዓብዪ ፈለግ፡ ፈለግ ኤፍራጥስ፡ ንዘርእኻ ኽህቦ እየ፣
19 ንሳ ድማ ምድሪ ቄናውያንን ቄኒዛውያንን ቃድሞናውያንን
20 ሔታውያንን ፈረዛውያንን ረፋይምን
21 ኣሞራውያንን ከነኣናውያንን ጊርጋሳውያንን ይቡሳውያንን እያ።”

1 ሳራይ ሰበይቲ ኣብራም ከኣ፡ ውሉድ ኣይወለደትሉን ነበረት፣ ኣጋር ዝስማ ግብጻዊት ገረድ ድማ ነበረታ።
2 ስለዚ፡ ሳራይ ንኣብራም፡ “በጃኻ ስምዓኒ! ከይወልድ የሆዋ ኸልኪሉኒ እዩ። በጃኻ ናብ ገረደይ እቶ። ምናልባት ብእኣ ውሉዳት እረክብ እኸውን” በለቶ። ኣብራም ድማ፡ ቃል ሳራይ ሰምዐ።
3 ኣብራም ኣብ ምድሪ ከነኣን ዓሰርተ ዓመት ምስ ገበረ፡ ሳራይ ሰበይቲ ኣብራም ንኣጋር እታ ግብጻዊት ገረዳ ወሲዳ፡ ንሰብኣያ ኣብራም፡ ሰበይቱ ኽትኰኖ ሃበቶ።
4 ንሱ ድማ ናብ ኣጋር ኣተወ፣ ንሳ ኸኣ ጠነሰት። ከም ዝጠነሰት ምስ ፈለጠት፡ ንእመቤታ ነዓቐታ።
5 ሳራይ ድማ ንኣብራም፡ “እዚ ኣባይ እተገብረ ዓገብ፡ ናትካ ጌጋ እዩ። ኣነ እየ ንገረደይ ኣብ ሕቝፍኻ ዝሃብኩኻ፣ ከም ዝጠነሰት ምስ ፈለጠት ከኣ ንዒቓትኒ። የሆዋ ኣብ መንጎይን ኣብ መንጎኻን ይፍረድ” በለቶ። 6 ኣብራም ድማ ንሳራይ፡ “እንሆ፡ ገረድኪ ኣብ ኢድኪ እያ። ጽቡቕ ኰይኑ እተራእየኪ ግበርያ” በላ። ሽዑ፡ ሳራይ ኣዋረደታ፣ ንሳ እውን ካብኣ ሃደመት።
7 መልኣኽ የሆዋ ኸኣ ኣብ ጥቓ እቲ ኣብ በረኻ ዘሎ ዓይኒ ማይ፡ ኣብ ጥቓ እታ ኣብ መገዲ ሹር ዘላ ዓይኒ ማይ ረኸባ።+
8 “ኣጋር ገረድ ሳራይ፡ ካበይ መጺእኪ፧ ናበይከ ትኸዲ ኣለኺ፧” ድማ በላ። ንሳ ኸኣ፡ “ካብ እመቤተይ ሳራይ እሃድም ኣለኹ” በለት።
9 መልኣኽ የሆዋ ድማ፡ “ናብ እመቤትኪ ተመለሲ፡ ኣብ ትሕቲ ኢዳ ኸኣ ትሕት በሊ” በላ።
10 መልኣኽ የሆዋ ድማ፡ “ንዘርእኺ ኻብ ምብዛሑ እተላዕለ ኪቝጸር ክሳዕ ዘይከኣል ኣዝየ ኸብዝሖ እየ” በላ።
11 ብተወሳኺ እውን፡ መልኣኽ የሆዋ፡ “እንሆ ጥንስቲ ኢኺ፣ ወዲ እውን ክትወልዲ ኢኺ፣ የሆዋ ጸበባኺ ሰሚዑ ኣሎ እሞ፡ ስሙ እስማኤል ኣውጽእሉ።
12 ንሱ ኸም ኣድጊ በረኻ ዝበለ ሰብ ኪኸውን እዩ። ኢዱ ኣንጻር ኵሉ፡ ኢድ ኵሉ ድማ ኣንጻሩ ኽትከውን እያ፣ ኣብ መንጽር ኵሎም ኣሕዋቱ ኸኣ ኪቕመጥ እዩ” በላ።
13 ንሳ ድማ፡ “ነቲ ዚርእየንስ ብሓቂዶ ኣብዚ ርእየዮ እየ፧” ኢላ፡ ስም እቲ ዚዛረባ ዝነበረ የሆዋ ጸዊዓ፡ “ኣታ ዚርኢ ኣምላኽ” በለት።
14 ስለዚ ኸኣ እያ እታ ዒላ ብኤር-ለሓይ-ሮይ እተባህለት። (ንሳ ኣብ መንጎ ቃዴስን ቤሬድን ኣላ።)
15 ኣጋር ከኣ ንኣብራም ወዲ ወለደትሉ፣ ኣብራም ድማ ነቲ ኣጋር ዝወለደትሉ ወዲ ስሙ እስማኤል ኣውጽኣሉ።
16 በቲ ኣጋር ንኣብራም፡ እስማኤል ዝወለደትሉ ግዜ፡ ኣብራም ወዲ 86 ዓመት ኰይኑ ነበረ።

1 ኣብራም ወዲ 99 ዓመት ምስ ኰነ፡ የሆዋ ንኣብራም ተራእዮ፣ “ኣነ እቲ ዅሉ ዚኽእል ኣምላኽ እየ። ኣብ ቅድመይ ተመላለስ፡ ኣበር ዘይብልካ እውን ኩን።
2 ኣነ ድማ ኣብ መንጎይን ኣብ መንጎኻን ኪዳነይ ከቕውም እየ፣ ኣዝየ፡ ኣዝየ እውን ከብዝሓካ እየ” በሎ።
3 ኣብራም ከኣ ብገጹ ተደፍአ፣ ኣምላኽ ድማ ከምዚ ኢሉ ተዛረቦ፦
4 “እንሆ፡ ኣነስ ኪዳነይ ምሳኻ እዩ፣ ንስኻ ኸኣ ብርግጽ ኣቦ ብዙሓት ኣህዛብ ክትከውን ኢኻ።
5 ኣቦ ብዙሓት ኣህዛብ ስለ ዝገብረካ፡ ኣብርሃም ደኣ እምበር፡ ደጊም ስምካ ኣብራም* ተባሂሉ ኣይኪጽዋዕን እዩ።
6 ኣዝየ፡ ኣዝየ ኸፍርየካ፡ ኣህዛብ ከም እትኸውን እውን ክገብረካ እየ፣ ነገስታት ከኣ ካባኻ ኺወጹ እዮም።
7 “ኣነ ድማ ንዓኻ፡ ብድሕሬኻ ኸኣ ንዘርእኻ ኣምላኽ ክኸውን፡ ኣብ መንጎይን ኣብ መንጎኻን፡ ብድሕሬኻ ድማ ኣብ መንጎ ዘርእኻ ንውሉድ ወለዶ ናይ ዘለኣለም ኪዳነይ ክሕሉ እየ።
8 እዛ ጓና ዄንካ ዝነበርካላ ምድሪ፡ —ኵላ ምድሪ ከነኣን፡—ንዓኻ፡ ብድሕሬኻ ድማ ንዘርእኻ ንሓዋሩ ርስቲ ገይረ ኽህብ እየ፣ ኣምላኾም ከኣ ክኸውን እየ።”
9 ኣምላኽ ድማ ንኣብርሃም ከምዚ በሎ፦ “ንስኻ ኸኣ ኪዳነይ ክትሕሉ ኢኻ፣ ንስኻ፡ ብድሕሬኻ ድማ ዘርእኻ ንውሉድ ወለዶ ኽትሕልዉ ኢኹም።
10 እቲ ኣብ መንጎይን ኣብ መንጎኹምን፡ ብድሕሬኻ ድማ ንስኻትኩምን ዘርእኹምን እትሕልውዎ ኺዳን እዚ እዩ፦ ኣብ መንጎኹም ዘሎ ተባዕታይ ዘበለ ዅሉ ይገዘር።
11 ስጋ ዕልቦኹም ግዘሩ፣ እዚ ድማ ነቲ ኣብ መንጎይን ኣብ መንጎኹምን ዘሎ ኺዳን ምልክት ኪኸውን እዩ።+
12 ኣብ ብዘሎ ወለዶኹም፡ ኣብ መንጎኹም ዘሎ ወዲ ሸሞንተ መዓልቲ ዝዀነ ተባዕታይ ዘበለ ዅሉ፡ ኣብ ቤት እተወልደ ዘበለን ካብ ዘርእኻ ዘይኰነ ብገንዘብ እተዓደገ ዘበለ ጓናን ይገዘር።
13 ኣብ ቤትካ እተወልደ ዘበለን ብገንዘብካ እተዓደገ ዘበለን ይገዘር፣ ኣብ ስጋኹም ዚግበር ኪዳነይ ድማ፡ ናይ ሓዋሩ ኪዳን ኪኸውን እዩ።
14 ዘይግዙር ዘበለ ተባዕታይ፡ ስጋ ዕልቦኡ እንተ ዘይተገዚሩ፡ እቲ ሰብ እቲ ኻብ ህዝቡ ኺምንቈስ እዩ። ኪዳነይ ኣፍሪሱ እዩ።”
15 ኣምላኽ ድማ ንኣብርሃም፡ “ንሰበይትኻ ሳራይ፡ ስማ ሳራ ስለ ዚኸውን፡ ሳራይ ኢልካ ኣይትጸውዓያ። 16 ክባርኻ፡ ካብኣ እውን ወዲ ኽህበካ እየ፣ ክባርኻ እየ፡ ኣህዛብ ከኣ ክትከውን እያ፣ ነገስታት ህዝብታት ካብኣ ኺወጹ እዮም” በሎ።
17 ሽዑ፡ ኣብርሃም ብገጹ ተደፍአ፡ ስሒቑ ድማ ብልቡ፡ “ንወዲ 100 ዓመትዶ ወዲ ይውለደሉ፧ ጓል 90 ዓመት ዝዀነት ሳራኸ ኽትወልድ ድያ፧” በለ።
18 ኣብርሃም ድማ ንኣምላኽ፡ “እስማኤል ግዳ ኣብ ቅድሜኻ እንተ ዚነብር” በሎ።
19 ኣምላኽ ከኣ ከምዚ በሎ፦ “ሰበይትኻ ሳራ ብርግጽ ወዲ ኽትወልደልካ እያ፣ ስሙ ድማ ይስሃቅ ኣውጽኣሉ። ኪዳነይ ከኣ ምስኡ፡ ብድሕሪኡ እውን ምስ ዘርኡ ናይ ዘለኣለም ኪዳን ከቕውም እየ።
20 ብዛዕባ እስማኤል ድማ ሰሚዐካ ኣለኹ። እንሆ፡ ክባርኾን ከፍርዮን ኣዝየ ኸብዝሖን እየ። 12 ሹም ኪወልድ እዩ፣ ዓብዪ ህዝቢ ድማ ክገብሮ እየ።
21 ግናኸ፡ ኪዳነይ ምስቲ ሳራ ንዓመታ በዚ ምዱብ ግዜ እዚ እትወልዶ ይስሃቅ ከቕውም እየ።”
22 ኣምላኽ ምስኡ ተዛሪቡ ምስ ወድአ፡ ካብ ኣብርሃም ደየበ።
23 ኣብርሃም ድማ ንወዱ እስማኤልን ኣብ ቤቱ ንእተወልዱ ዅሎምን ብገንዘቡ ንእተዓደጉ ዅሎምን፡ ካብ ቤተ ሰብ ኣብርሃም ተባዕታይ ዘበለ ዅሉ ወሲዱ፡ ከምቲ ኣምላኽ እተዛረቦ፡ በታ መዓልቲ እቲኣ ዕልቦ ስጋኦም ገዘረ።
24 ኣብርሃም ስጋ ዕልቦኡ ኺግዘር ከሎ፡ ወዲ 99 ዓመት ኰይኑ ነበረ።
25 ወዱ እስማኤል ስጋ ዕልቦኡ ኺግዘር ከሎ ድማ፡ ወዲ 13 ዓመት ኰይኑ ነበረ።
26 በታ መዓልቲ እቲኣ፡ ኣብርሃምን ወዱ እስማኤልን ተገዝሩ።
27 ኵሎም ሰብኡት ቤተ ሰቡ፡ ኣብ ቤቱ እተወልዱ ዘበሉን ብገንዘቡ ኻብ ጓና እተዓደጉ ዘበሉን እውን ምስኡ ተገዝሩ።

1 ድሕርዚ፡ መዓልቲ ኣብ ዚድህረሉ እዋን፡ ንሱ ኣብ ኣፍ ደገ ድንኳን ተቐሚጡ ኸሎ፡ የሆዋ ኣብቲ ዓበይቲ ኣእዋም መምሬ ተራእዮ።
2 ኣዒንቱ ኸኣ ኣልዓለ እሞ፡ ሰለስተ ሰብኡት ካብኡ እተወሰነ ርሒቖም ደው ኢሎም ረኣየ። ምስ ረኣዮም፡ ካብ ኣፍ ደገ እቲ ድንኳን ኪቕበሎም ጐየየ፡ ናብ ምድሪ ኸኣ ሰገደ።
3 ከምዚ ድማ በለ፦ “የሆዋ፡ ኣብ ቅድሚ ኣዒንትኻ ሞገስ እንተ ረኺበስ፡ በጃኻ ንጊልያኻ ኣይትሕለፈኒ።
4 በጃኹም ሒደት ማይ ይምጽኣልኩም እሞ፡ ኣእጋርኩም ተሓጸቡ፣ ኣብ ትሕቲ እዛ ኦም ድማ ተቐመጡ።
5 ናብ ጊልያኹም ካብ መጻእኩምሲ፡ ሓይልኹም ምእንቲ ኺሕደስ፡ ቍራስ እንጌራ ኸምጽኣልኩም። ድሕሪኡ፡ ትኸዱ።” ንሳቶም ድማ፡ “ሕራይ። ከምቲ ዝበልካዮ ግበር” በልዎ።
6 ኣብርሃም ከኣ ቀልጢፉ ናብ ድንኳን ናብ ሳራ ኸይዱ፡ “ቀልጥፊ! ሰለስተ ስፍሪ* ድኹም ሓርጭ ለዊስኪ፡ ቅጫታት ሰንክቲ” በላ።
7 ድሕርዚ፡ ኣብርሃም ናብ ከብቱ ጐይዩ፡ ልምሉም ጽቡቕ ምራኽ ሓረየ። ንጊልያኡ ድማ ሃቦ፣ ንሱ ኸኣ ኬዳልዎ ተቐላጠፈ።
8 ጠስምን ጸባን ነቲ ዘዳለዎ ምራኽን ወሲዱ ድማ ኣቕረበሎም። ኪበልዑ ኸለዉ ኸኣ፡ ንሱ ኣብ ትሕቲ እታ ኦም ኣብ ጥቓኦም ደው በለ።
9 ንሳቶም ድማ፡ “ሰበይትኻ ሳራ ኣበይ ኣላ፧” በልዎ። ንሱ ኸኣ፡ “ኣብ ድንኳን እንሃ” ኢሉ መለሰ።
10 ሽዑ፡ ሓደ ኻባታቶም፡ “ንዓመታ ኸምዛ ግዜ እዚኣ ብርግጽ ክምለሰካ እየ፣ ሰበይትኻ ሳራ ድማ ወዲ ኺህልዋ እዩ” በለ። ሳራ ኸኣ ኣብ ኣፍ እቲ ብድሕሪ እቲ ሰብኣይ ዘሎ ድንኳን ኰይና ትሰምዕ ነበረት።
11 ኣብርሃምን ሳራን ብዕድመ ዝደፍኡ ኣረገውቲ ነበሩ። ሳራ ድማ ካብ እትወልደሉ ዕድመ ሓሊፋ ነበረት።
12 ስለዚ፡ ሳራ ብልባ እናሰሓቐት፡ “ድሕሪ እርጋነይን ጐይታይ ምስ ኣረገንዶ እዚ ባህታ እዚ ኽረክብ እየ፧” በለት።
13 የሆዋ ኸኣ ንኣብርሃም፡ “ስለምንታይ እያ ሳራ፡ ‘ኣሪገ ኸለኹስ፡ ብሓቂዶ ኽወልድ እየ፧’ ኢላ ዝሰሓቐት፧
14 ንየሆዋዶ ዚሰኣኖ ነገር ኣሎ እዩ፧ ንዓመታ ኸምዚ ምዱብ ግዜ እዚ ኽምለሰካ እየ፣ ሳራ ድማ ወዲ ኺህልዋ እዩ” በሎ።
15 ሳራ ግና ፈሪሃ ነበረት እሞ፡ “ኣይሰሓቕኩን!” ኢላ ኣሉ በለት። ንሱ ኸኣ፡ “ኣይፋል፡ ስሒቕኪ እባ ደኣ” በለ።
16 እቶም ሰብኡት ኪኸዱ ምስ ተንስኡ፡ ናብ ሶዶም ገጾም ኣንቈልቊሎም ጠመቱ፣ ኣብርሃም ከኣ ኬፋንዎም ምሳታቶም ይኸይድ ነበረ።
17 የሆዋ ድማ ከምዚ በለ፦ “እቲ ዝገብሮስ ካብ ኣብርሃምዶ ኽሓብኦ እየ፧
18 ኣብርሃምሲ ብርግጽ ዓብይን ብርቱዕን ህዝቢ ኪኸውን እዩ፣ ኵሎም ኣህዛብ ምድሪ ድማ ብእኡ ኺባረኹ እዮም።
19 ከመይሲ፡ የሆዋ ነቲ ብዛዕባ ኣብርሃም ዝኣተዎ ቓል ኬምጽኦስ፡ ንሱ ንደቁን ብድሕሪኡ ንቤተ ሰቡን፡ ጽድቅን ፍትሕን ብምግባር መገዲ የሆዋ ኺሕልዉ ምእንቲ ኺእዝዞም ኢለ እየ ፈሊጠዮ።”
20 ሽዑ፡ የሆዋ፡ “ብሰንኪ ሶዶምን ጎሞራን ዚእወ ኣውያት ኣመና በርቲዑ፡ ሓጢኣቶም ከኣ ኣዝዩ ኸቢዱ እዩ።
21 ስለዚ፡ ከምቲ ናባይ ዝበጽሐ ኣውያት ይገብሩ እንተ ኣልዮም ክርኢ ኽወርድ እየ። እንተ ዘይኰይኑ ኸኣ፡ ክፈልጥ እየ” በለ።
22 ሽዑ፡ እቶም ሰብኡት ካብኡ ሓሊፎም ናብ ሶዶም ገጾም ከዱ፣ የሆዋ ግና ምስ ኣብርሃም ተረፈ።
23 ኣብርሃም ድማ ቀሪቡ፡ “ንጻድቕከ ምስ እኩይዶ ኽትኵስትሮ ኢኻ፧
24 ምናልባት ኣብታ ኸተማ 50 ጻድቃን ይርከቡ ይዀኑ፣ እሞኸ ኽትኵስትሮም ዲኻ፧ ምእንቲ እቶም ኣብኣ ዘለዉ 50 ጻድቃን ኢልካስ ነታ ቦታዶ ኣይትንሕፋን፧
25 መወዳእታ እቲ ጻድቕ ከምቲ እኩይ ኪኸውን፡ ንጻድቕ ምስ እኩይ ብምቕታል ከምዚ ዝበለ ነገር ክትገብርሲ ዘይሕሰብ እዩ! እዝስ ኣባኻ ዘይሕሰብ እዩ። እቲ ፈራድ ኵላ ምድርስ ቅኑዕዶ ኣይገብርን፧” በለ።
26 የሆዋ ኸኣ፡ “ኣብ ሶዶም፡ ኣብታ ኸተማ 50 ጻድቃን እንተ ረኺበ፡ ምእንታኦም ኢለ ንብዘላ እታ ቦታ ኽንሕፋ እየ” በለ።
27 ኣብርሃም ድማ መሊሱ፡ “በጃኻ ስምዓኒ፡ እንሆ ኣነ ሓመድን ሓምዅሽትን ክነሰይ፡ ምስ የሆዋ ኽዛረብ ደፊረ።
28 ምናልባት ካብቶም 50 ጻድቃን ሓሙሽተ ይጐድሉ ይዀኑ። ብዛዕባ እቶም ሓሙሽተዶ ንብዘላ እታ ኸተማ ኸተጥፍኣ ኢኻ፧” በለ። ንሱ ኸኣ፡ “45 እንተ ረኺበላ፡ ኣይከጥፍኣን እየ” በለ።
29 ከም ብሓድሽ ከኣ፡ “ምናልባት 40 ይርከብዋ ይዀኑ” ኢሉ ተዛረቦ። ንሱ ድማ፡ “ምእንቲ እቶም 40 ኢለ ኣይክገብሮን እየ” ኢሉ መለሰ። 30 ንሱ ኸኣ፡ “የሆዋ፡ በጃኻ ብምዝራበይ ኣይትቈጣዕ፦ ምናልባት
30 ጥራይ ይርከብዋ ይዀኑ” በለ። ንሱ ድማ፡ “30 እንተ ረኺበላስ፡ ኣይክገብሮን እየ” ኢሉ መለሰሉ።
31 ንሱ ኸኣ፡ “በጃኻ ስምዓኒ፡ እንሆ ምስ የሆዋ ኽዛረብ ደፊረ፦ ምናልባት 20 ጥራይ ይርከብዋ ይዀኑ” በለ። ንሱ ድማ፡ “ምእንቲ እቶም 20 ኢለ ኣይከጥፍኣን እየ” ኢሉ መለሰ።
32 ኣብ መወዳእታ፡ “የሆዋ፡ በጃኻ ሓንሳእ ጥራይ ክዛረብሲ ኣይትቈጣዕ፦ ምናልባት ዓሰርተ ጥራይ ይርከብዋ ይዀኑ” በለ። ንሱ ድማ፡ “ምእንቲ እቶም ዓሰርተ ኢለ ኣይከጥፍኣን እየ” ኢሉ መለሰ።
33 የሆዋ ምስ ኣብርሃም ተዛሪቡ ምስ ወድአ፡ ከደ፡ ኣብርሃም እውን ናብ ቦታኡ ተመልሰ።

1 ምስ መሰየ፡ እቶም ክልተ መላእኽቲ ናብ ሶዶም በጽሑ፣ ሎጥ ከኣ ኣብ ኣፍ ደገ ሶዶም ተቐሚጡ ነበረ። ሎጥ ድማ ምስ ረኣዮም፡ ኪቕበሎም ተንስአ፡ ብገጹ ናብ ምድሪ ተደፊኡ ኸኣ ሰገደ።
2 “ኣቱም ጐይተተይ፡ በጃኹም ናብ ቤት ጊልያኹም ኣላጊስኩም ሕደሩ፡ ኣእጋርኩም እውን ተሓጸቡ። ኣንጊህኩም ተንሲእኩም ከኣ መገድኹም ትኸዱ” ድማ በለ። ንሳቶም ከኣ፡ “ኣይፋልናን፡ ኣብ ኣደባባይ ደኣ ኢና እንሓድር” በሉ።
3 ንሱ ግና ኣዝዩ ግዲ በሎም እሞ ምስኡ ናብ ቤቱ ኸዱ። ንሱ ድማ ድግስ ደገሰሎም፡ ቅጫ ኸኣ ሰንከተ፡ ንሳቶም እውን በልዑ።
4 ቅድሚ ምድቃሶም ከኣ፡ ሰብኡት እታ ኸተማ፡ ሰብ ሶዶም፡ ካብ ቈልዓ ኽሳዕ ኣረጊት፡ ኵላቶም ብሓደ ተኣኪቦም ነታ ቤት ከበብዋ።
5 ንሎጥ ድማ፡ “እቶም ሎሚ ለይቲ ናባኻ ዝመጹ ሰባት ኣበይ ኣለዉ፧ ምሳታቶም ጾታዊ ርክብ ክንገብርሲ፡ ናባና ኣውጽኣዮም” እናበሉ ጸውዕዎ።
6 ሎጥ ድማ ናባታቶም ናብ ኣፍ ደገ ወጸ፣ ነቲ ማዕጾ እውን ብድሕሪኡ ዓጸዎ።
7 ከምዚ ኸኣ በሎም፦ “ኣሕዋተየ፡ በጃኹም፡ እከይ ኣይትግበሩ።
8 በጃኹም፡ እነዋ፡ ምስ ሰብኣይ ጾታዊ ርክብ ዘይገበራ ኽልተ ኣዋልድ ኣለዋኒ። በጃኹም፡ ንዓታተን ከውጽኣልኩም፡ ቅኑዕ ዚመስለኩም ግበርወን። ነዞም ሰብኡት እዚኦም ግና ኣብ ትሕቲ ጽላል ናሕሰይ ኣትዮም እዮም እሞ፡ ገለ እኳ ኣይትግበርዎም።”
9 ንሳቶም ከኣ፡ “ኣልግስ!” በልዎ። ኣስዕብ ኣቢሎም ከኣ፡ “እዚ ኣብዚ ኺነብር ዝመጸ ሓደ በይኑ ጓናስ፡ ኪፈርደና ደፊሩ! ሕጂ ኻብ ንዓታቶም ዝኸፍአ ኽንገብረካ ኢና” በሉ። ንሎጥ ከኣ ዓጐጕዎ፡ ነቲ ማዕጾ ኺሰብርዎ ድማ ቀረቡ።
10 ሽዑ፡ እቶም ሰብኡት ኣእዳዎም ዘርጊሖም፡ ንሎጥ ናባታቶም ናብ ቤት ኣእተውዎ፡ ነቲ ማዕጾ ኸኣ ዓጸውዎ።
11 ነቶም ኣብ ኣፍ ደገ እታ ቤት ዝነበሩ ሰባት ግና፡ ካብ ንኣሽቱ ኽሳዕ ዓበይቲ ብዑረት ወቕዕዎም እሞ፡ ነቲ ኣፍ ደገ ኺረኽቡ ይደኽሙ ነበሩ።
12 እቶም ሰብኡት ድማ ንሎጥ፡ “ኣብዚ ኻልእ ሰብዶ ኣሎካ፧ ሰብኡት ኣዋልድካን ኣወዳትካን ኣዋልድካን ኣብዛ ኸተማ ዘሎ ሰብካ ዘበለ ዅሉን ካብዛ ቦታ እዚኣ ኣውጽኣዮም።
13 ከመይሲ፡ ብሰንኮም ዚእወ ኣውያት ኣብ ቅድሚ የሆዋ ስለ ዝበርትዐ፡ የሆዋ ነዛ ኸተማ እዚኣ ኸነጥፍኣ ልኢኹና እዩ እሞ፡ ነዛ ቦታ እዚኣ ኸነጥፍኣ ኢና” በልዎ።
14 ሎጥ ከኣ ወጺኡ ነቶም ንኣዋልዱ ኺምርዓውወን ኢሎም ዝነበሩ ሰብኡት ኣዋልዱ፡ “የሆዋ ነዛ ኸተማ እዚኣ ስለ ዜጥፍኣ፡ ተንስኡ፡ ካብዛ ቦታ እዚኣ ውጹ!” ኢሉ ተዛረቦም። እቶም ሰብኡት ኣዋልዱ ግና፡ ዚዋዘ ዘሎ መሰሎም።
15 ኪወግሕ ከሎ ድማ፡ እቶም መላእኽቲ ንሎጥ፡ “ብስሕተት እዛ ኸተማ እዚኣ ኸይትጠፍእሲ፡ ተንስእ፡ ሰበይትኻን ኣብዚ ምሳኻ ዘለዋ ኽልተ ኣዋልድካን ውሰድ!” ኢሎም ሃወኽዎ።
16 ንሱ ምስ ደንጐየ ኸኣ፡ የሆዋ ስለ ዝራሕርሓሉ፡ እቶም ሰብኡት ኢዱን ኢድ ሰበይቱን ኢድ ክልቲአን ኣዋልዱን ሒዞም ኣውጽእዎ፡ ኣብ ወጻኢ እታ ኸተማ እውን ሓደግዎ።
17 ናብ ወሰን ምስ ኣውጽእዎም ከኣ፡ “ምእንቲ ህይወትካ ኣምልጥ! ንድሕሪት ገጽካ ግልጽ ኣይትበል፡ ኣብ ኵሉ እዚ ኸባቢ ድማ ደው ኣይትበል! ከይትጠፍእሲ፡ ናብ ኣኽራን ኣቢልካ ኣምልጥ” በለ።
18 ሎጥ ከኣ ከምዚ በሎም፦ “የሆዋ፡ በጃኻ ኣብኡስ ኣይኹን!
19 ሕጂ ጊልያኻ ኣብ ቅድሚ ኣዒንትኻ ሞገስ ረኺቡ ኣሎ፣ ንዓይ ብምድሓን ከኣ ዓብዪ ለውሃት ጌርካለይ ኢኻ፣ መዓት ከየርክበኒ እሞ ኸይመውት ስለ ዝፈራህኩ ግና፡ በጃኻ፡ ናብ ኣኽራን ክሃድም ኣይክእልን እየ።
20 ሕጂ ድማ በጃኻ፡ እዛ ኸተማ እዚኣ ቐረባ እያ፡ ናብኣ ኽሃድም እውን እኽእል እየ፣ ንእሽቶ ኸኣ እያ። በጃኻ ናብኣዶ ኸምልጥ፧ ንእሽቶ እያ። ሽዑ ድማ እድሕን።”
21 ንሱ ድማ፡ “ሕራይ፡ ነታ እተዛረብካላ ኸተማ ብዘይምግልባጥ+ እውን ክሓልየልካ እየ።+
22 ኣብኣ ኸይበጻሕካ፡ ገለ ነገር ክገብር ስለ ዘይክእል፡ ቀልጢፍካ ናብኣ ኣምልጥ!” በሎ።+ ስለዚ ኸኣ፡ ነታ ኸተማ ጾዓር ኢሉ ሰመያ።
23 ሎጥ ናብ ጾዓር ምስ በጽሐ፡ ኣብታ ምድሪ እቲኣ ጸሓይ በረቐት።
24 ሽዑ፡ የሆዋ ኣብ ልዕሊ ሶዶምን ጎሞራን፡ ዲንን ሓውን ኣዝነመ፣ ካብ የሆዋ፡ ካብ ሰማያት ድማ መጸ።
25 ነዘን ከተማታት እዚአን፡ እወ፡ ንብዘሎ እቲ ኸባቢ፡ እንተላይ ንዅሎም ነበርቲ እተን ከተማታትን ንኣትክልቲ ምድርን ገልበጠ።
26 ብድሕሪኡ ዝነበረት ሰበይቲ ሎጥ ግና፡ ንድሕሪት ግልጽ በለት፣ ሓወልቲ ጨው ከኣ ኰነት።
27 ኣብርሃም ድማ ኣንጊሁ ተንሲኡ፡ ናብታ ኣብ ቅድሚ የሆዋ ደው ኢሉላ ዝነበረ ቦታ ኸደ።
28 ናብ ሶዶምን ጎሞራን ናብ ኵሉ ምድሪ እቲ ኸባብን ኣንቈልቊሉ ምስ ጠመተ፡ ጉድ ረኣየ። ካብታ ምድሪ ድማ ዒግ ዝበለ ትኪ እቶን ዚመስል ዒግታ ትኪ ኺልዓል ረኣየ።
29 ስለዚ፡ ኣምላኽ ነተን ኣብቲ ኸባቢ ዝነበራ ኸተማታት ኬጥፍአን ከሎ፡ ካብተን ንሱ ዝገልበጠን፡ ሎጥ ከኣ ተቐሚጥወን ዝነበረ ኸተማታት ንሎጥ ብምውጻእ፡ ኣምላኽ ንኣብርሃም ዘከሮ።
30 ጸኒሑ ሎጥ ኣብ ጾዓር ምቕማጥ ስለ ዝፈርሀ፡ ምስ ክልቲአን ኣዋልዱ ኻብ ጾዓር ደዪቡ ኣብ ኣኽራን ተቐመጠ።+ ምስ ክልቲአን ኣዋልዱ ድማ ኣብ በዓቲ ተቐመጠ።
31 እታ በዅሪ ኸኣ ነታ ንእሽቶ፡ “ኣቦና ኣሪጉ እዩ፣ ኣብዛ ምድሪ እዚኣ ድማ ከም ልምዲ ዅላ ምድሪ ዜእትወና ሰብኣይ የልቦን።
32 ንዒ፡ ንኣቦና ወይኒ ነስትዮ፡ ምስኡ ንደቅስ፡ ካብ ኣቦና እውን ዘርኢ ነትርፍ” በለታ።
33 በታ ለይቲ እቲኣ ኸኣ ንኣቦአን ወይኒ ብብዝሒ ኣስተያኦ፣ ሽዑ፡ እታ በዅሪ ምስ ኣቦኣ ደቀሰት፣ ንሱ ግና ምድቃሳን ምትንስኣን ኣይፈለጠን።
34 ንጽብሒቱ ድማ እታ በዅሪ ነታ ንእሽቶ፡ “እንሆ፡ ትማሊ ለይቲ ምስ ኣቦይ ደቂሰ። ሎሚ ለይቲ እውን ወይኒ ነስትዮ። ሽዑ፡ ኣቲኺ ምስኡ ደቅሲ፡ ካብ ኣቦና ኸኣ ዘርኢ ነትርፍ” በለታ።
35 በታ ለይቲ እቲኣ እውን ንኣቦአን ወይኒ ብብዝሒ ኣስተያኦ፣ ሽዑ፡ እታ ንእሽቶ ኸይዳ ምስኡ ደቀሰት፣ ንሱ ግና ምድቃሳን ምትንስኣን ኣይፈለጠን።
36 ክልቲአን ኣዋልድ ሎጥ ከኣ ካብ ኣቦአን ጠነሳ።
37 እታ በዅሪ ድማ ወዲ ወለደት እሞ፡ ሞኣብ ኢላ ሰመየቶ። ንሱ ኣቦ እቶም ሎሚ ሞኣባውያን ዚብሃሉ እዩ።
38 እታ ንእሽቶ እውን ወዲ ወለደት እሞ፡ ቤን-ዓሚ ኢላ ሰመየቶ። ንሱ ኣቦ እቶም ሎሚ ዓሞናውያን ዚብሃሉ እዩ።

1 ኣብርሃም ድማ ሰፈሩ ኻብኡ+ ናብ ምድሪ ነጌብ ኣግዓዘ፣ ኣብ መንጎ ቃዴስን ሹርን ድማ ተቐመጠ። ኣብ ጌራር ተቐሚጡ ኸሎ ኸኣ፡
2 ኣብርሃም ብዛዕባ ሰበይቱ ሳራ መሊሱ፡ “ሓብተይ እያ” በለ። ኣቢሜሌክ ንጉስ ጌራር ከኣ፡ ልኢኹ ንሳራ ወሰዳ።
3 ኣምላኽ ድማ ናብ ኣቢሜሌክ ለይቲ ብሕልሚ መጺኡ፡ “እዛ ወሲድካያ ዘለኻ ሰበይቲ፡ ብዓልቲ ሰብኣይ ስለ ዝዀነት፡ እንሆ፡ ብሰራ ኽትመውት ኢኻ” በሎ።
4 ኣቢሜሌክ ግና ኣይቀረባን ነበረ። ስለዚ፡ “የሆዋ፡ ንንጹህ ህዝቢ እውንዶ ትቐትል ኢኻ፧
5 ንሱ ባዕሉ ደይኰነን፡ ‘ንሳ ሓብተይ እያ’ ዝበለኒ፧ ንሳኸ ባዕላ ደይኰነትን፡ ‘ንሱ ሓወይ እዩ’ ዝበለትኒ፧ ብቕኑዕ ልበይን ብንጹህ ኢደይን እየ እዚ ዝገበርኩ” በለ።
6 እቲ ናይ ሓቂ ኣምላኽ ከኣ ብሕልሚ፡ “ኣነ እውን እዚ ብቕኑዕ ልብኻ ኸም ዝገበርካዮ እፈልጥ እየ፣ ኣብ ቅድመይ ሓጢኣት ከይትገብር ድማ ከልከልኩኻ። ስለዚ፡ ክትትንክያ ኣይፈቐድኩልካን።
7 ሕጂ ሰበይቲ እቲ ሰብኣይ ምለሳ፣ ንሱስ ነብዪ እዩ፡ ኪምህለለልካ ኸኣ እዩ፡+ ንስኻ ድማ ብህይወት ትነብር። እንተ ዘይመሊስካያ ግና፡ ንስኻን ናትካ ዘበለ ዅሉን ብርግጽ ከም እትሞቱ ፍለጥ” በሎ።
8 ኣቢሜሌክ ድማ ኣንጊሁ ተንስአ፣ ንዅሎም ገላዉኡ ጸዊዑ ኸኣ ንዅሉ እዚ ነገር እዚ ነገሮም፡ ንሳቶም እውን ኣዝዮም ፈርሁ።
9 ሽዑ፡ ኣቢሜሌክ ንኣብርሃም ጸዊዑ፡ “እንታይ ኢኻ ዝገበርካና፧ እንታይ በዲለካ እየ፡ ኣባይን ኣብ መንግስተይን ዓብዪ ሓጢኣት ከተምጽኣልና ዝበልካ፧ ዘይግበር ግብሪ ኢኻ ጌርካኒ” በሎ።
10 ኣቢሜሌክ ድማ ንኣብርሃም፡ “እንታይ ሓሲብካ ኢኻ እዚ ነገር እዚ ዝገበርካ፧” በሎ።
11 ኣብርሃም ከኣ ከምዚ በለ፦ “‘ኣብዛ ቦታ እዚኣ ብርግጽ ፍርሃት ኣምላኽ የልቦን፡ ብሰሪ ሰበይተይ ድማ ኪቐትሉኒ እዮም’ ኢለ እየ።
12 ንሳ ድማ ብሓቂ ሓብተይ፡ ጓል ኣቦይ እያ፡ ጓል ኣደይ ግና ኣይኰነትን፣ ሰበይተይ ከኣ ኰነት።
13 ስለዚ፡ ኣምላኽ ካብ ቤት ኣቦይ ኬውጽኣኒ ኸሎ፡ ‘ንዓይ ብተኣማንነት እተፍቅርኒ በዚ እዩ፦ ኣብ ኵሉ እንኸዶ ዘበለ፡ “ንሱ ሓወይ እዩ” በሊ’ በልክዋ።”
14 ኣቢሜሌክ ከኣ ኣባጊዕን ከብትን ገላዉን ኣግራድን ወሲዱ ንኣብርሃም ሃቦ፣ ሰበይቱ ሳራ ድማ መለሰሉ። 15 ኣቢሜሌክ ከኣ፡ “እንሆ፡ ምድረይ ኣብ ቅድሜኻ እያ። ቃሕ ኣብ ዝበለካ ተቐመጥ” በለ።
16 ንሳራ ድማ፡ “እንሆ፡ ንሓውኪ 1,000 ብሩር ሂበዮ ኣለኹ።+ እዚ ኣብ ቅድሚ እቶም ምሳኺ ዘለዉን ኣብ ቅድሚ ዅሉን ምልክት ንጽህናኺ እዩ፣* ንስኺ እውን ካብ ወቐሳ ናጻ ዄንኪ ኢኺ” በላ።
17 ኣብርሃም ከኣ ናብቲ ናይ ሓቂ ኣምላኽ ተማህለለ፣ ኣምላኽ ድማ ንኣቢሜሌክን ንሰበይቱን ንደቂ ኣንስትዮ ባሮቱን ኣሕወዮም፡ ኪወልዱ እውን ጀመሩ።
18 ከመይሲ፡ የሆዋ ብሰሪ ሳራ ሰበይቲ ኣብርሃም፡ ንዅለን ኣንስቲ ቤት ኣቢሜሌክ ኣምኪንወን ነበረ።

1 የሆዋ ድማ፡ ከምቲ ዝበሎ ንሳራ ቘላሕታ ገበረላ፣ የሆዋ ኸኣ ንሳራ ኸምቲ እተዛረቦ ገበረላ።
2 ሳራ ድማ ጠነሰት፡ በቲ ኣምላኽ እተዛረቦ ምዱብ ግዜ ኸኣ፡ ንኣብርሃም ኣብ እርጋኑ ወዲ ወለደትሉ።
3 ኣብርሃም ድማ ነቲ ሳራ ዝወለደትሉ ወዱ፡ ይስሃቅ ኢሉ ሰመዮ።
4 ኣብርሃም ከኣ ንይስሃቅ ወዱ፡ ከምቲ ኣምላኽ ዝኣዘዞ፡ ወዲ ሸሞንተ መዓልቲ ምስ ኰነ፡ ገዘሮ።
5 ኣብርሃም ድማ ወዱ ይስሃቅ ኪውለደሉ ኸሎ፡ ወዲ 100 ዓመት ኰይኑ ነበረ።
6 ሳራ ኸኣ፡ “ኣምላኽ ኣስሒቑኒ፣ እዚ ዝሰምዐ ዘበለ ዅሉ ምሳይ ኪስሕቕ እዩ” በለት።
7 ኣስዕብ ኣቢላ እውን፡ “‘ሳራ ብርግጽ ቈልዓ ኸተጥቡ እያ’ ኢሉ ንኣብርሃም መን ምነገሮ፧ እንሆ ግና፡ ኣብ እርጋኑ ወዲ ወሊደሉ ኣለኹ” በለት።
8 እቲ ውሉድ ከኣ ዓበየ፡ ጡብ እውን ሓደገ፣ በታ ይስሃቅ ጡብ ዝሓደገላ መዓልቲ ድማ፡ ኣብርሃም ዓብዪ ድግስ ገበረ።
9 ሳራ ኸኣ እቲ ኣጋር እታ ግብጻዊት ንኣብርሃም ዝወለደትሉ ወዲ ንይስሃቅ ኬላግጸሉ ረኣየት።
10 ስለዚ፡ ንኣብርሃም፡ “ወዲ እዛ ባርያ እዚኣ ምስ ወደይ ይስሃቅ ኣይኪወርስን እዩ እሞ፡ ነዛ ባርያ እዚኣን ንወዳን ስጐጎም” በለቶ።
11 ኣብርሃም ግና፡ እቲ ብዛዕባ ወዱ ዝበለቶ ነገር ብዙሕ ኣጕሃዮ።
12 ኣምላኽ ድማ ንኣብርሃም፡ “በቲ ሳራ ብዛዕባ እዚ ወድን ብዛዕባ እዛ ባርያኻን እትብለካ ዘላ ኣይትጕሀ። ብይስሃቅ እዩ ዘርእኻ ዚጽዋዕ እሞ፡ ቃላ ስማዕ።
13 ንወዲ እዛ ባርያ ኸኣ፡ ዘርእኻ ስለ ዝዀነ፡ ህዝቢ ኽገብሮ እየ” በሎ።+
14 ኣብርሃም ድማ ኣንጊሁ ተንስአ፡ እንጌራን ሓርቢ ማይን ወሲዱ ኸኣ ንኣጋር ሃባ። ኣብ መንኵባ ኣሰኪሙ ድማ፡ ምስቲ ወዲ ብሓባር ገይሩ ሰደዳ። ንሳ ኸኣ ከይዳ፡ ኣብ በረኻ ብኤር-ሸባዕ ኰለል ትብል ነበረት።
15 እቲ ኣብቲ ሓርቢ ዝነበረ ማይ ድማ ተወድአ፣ ንሳ ኸኣ ነቲ ወዲ ኣብ ትሕቲ ሓደ ኻብቲ ቘጥቋጣት ደርበየቶ።
16 “ሞት እዚ ወዲ ኸይርኢ” ኢላ ድማ ከደት እሞ ምውርዋር ቀስቲ ዚኣክል ርሒቓ በይና ተቐመጠት። ርሕቕ ኢላ ተቐሚጣ ኸኣ፡ ዓው ኢላ ኽትበኪ ጀመረት።
17 ኣምላኽ ከኣ ድምጺ እቲ ወዲ ሰምዐ፣ መልኣኽ ኣምላኽ ድማ ንኣጋር ካብ ሰማያት ጸዊዑ፡+ “ኣጋር፡ እንታይ ኴንኪ ኢኺ፧ ኣምላኽ ድምጺ እቲ ወዲ ኣብታ ዘለዋ ሰሚዑ እዩ እሞ፡ ኣይትፍርሂ።
18 ነቲ ወዲ ዓብዪ ህዝቢ ኽገብሮ እየ እሞ፡ ተንስኢ፡ ኣልዒልኪ ብኢድኪ ሓዝዮ” በላ።
19 ሽዑ፡ ኣምላኽ ኣዒንታ ኸፈተላ እሞ ዒላ ማይ ረኣየት፣ ከይዳ ኸኣ ነቲ ሓርቢ ማይ መሊኣ ነቲ ወዲ ኣስተየቶ።
20 እቲ ወዲ ኺዓቢ ኸሎ ድማ፡ ኣምላኽ ምስኡ ነበረ። ኣብ በረኻ ኸኣ ተቐመጠ፡ ቀስተኛ እውን ኰነ።
21 ኣብ በረኻ ጳራን ድማ ይቕመጥ ነበረ፣ ኣዲኡ ኸኣ ካብ ምድሪ ግብጺ ሰበይቲ ኣምጽኣትሉ።
22 በቲ ግዜ እቲ፡ ኣቢሜሌክ ምስ ፊኮል ሓለቓ ሰራዊቱ መጺኡ ንኣብርሃም፡ “ኣብ እትገብሮ ዘበለ ዅሉ ኣምላኽ ምሳኻ እዩ።
23 ሕጂ ኸኣ ንዓይን ንደቀይን ንደቂ ደቀይን ከይትጠልም፡ ንዓይን ነዛ እትነብረላ ዘለኻ ምድርን፡ ከምቲ ኣነ ብተኣማንነት ዘፍቀርኩኻ፡ ከምኡ ኽትገብር ብኣምላኽ ምሓለለይ” በሎ።
24 ኣብርሃም ድማ፡ “ኣነ እምሕል” በለ።
25 ኣብርሃም ግና ብዛዕባ እታ ገላዉ ኣቢሜሌክ ብሓይሊ ዝሓዝዋ ዒላ ማይ ንኣቢሜሌክ ወቐሶ።
26 ኣቢሜሌክ ከኣ፡ “ነዚ ነገር እዚ መን ከም ዝገበሮ ኣይፈለጥኩን፣ ንስኻ ድማ ብዛዕባኡ ኣይነገርካንን፣ ኣነ እውን ክሳዕ ሎሚ ብዛዕባኡ ገለ እኳ ኣይሰማዕኩን” ኢሉ መለሰ።
27 ኣብርሃም ድማ፡ ኣባጊዕን ከብትን ወሲዱ ንኣቢሜሌክ ሃቦ፣ ክልቲኦም ከኣ ኪዳን ተኣታተዉ።
28 ኣብርሃም ካብተን መጓሰኡ ሸውዓተ ሽበን* ምስ ፈለየ፡
29 ኣቢሜሌክ ንኣብርሃም፡ “ስለምንታይ ኢኻ ነዘን ሸውዓተ ሽበን ንበይነን ዝፈለኻየን፧” በሎ።
30 ንሱ ድማ፡ “ነዛ ዒላ እዚኣ ኣነ ኸም ዝዀዓትክዋ ምስክር ምእንቲ ኪዀና፡ እዘን ሸውዓተ ሽበን እዚአን ካብ ኢደይ ተቐበል” በለ።
31 ስለዚ፡ ክልቲኦም ኣብኣ ስለ እተማሓሓሉ፡ እታ ቦታ እቲኣ ብኤር-ሸባዕ* ተባህለት።
32 ኣብ ብኤር-ሸባዕ ከኣ ኪዳን ተኣታተዉ፣ ድሕሪኡ ድማ፡ ኣቢሜሌክ ምስ ፊኮል ሓለቓ ሰራዊቱ ተንስአ፣ ናብ ምድሪ ፍልስጥኤማውያን እውን ተመልሱ።
33 ድሕርዚ፡ ኣብ ብኤር-ሸባዕ ኦም ዕቦል ተኸለ፣ ኣብኡ ኸኣ ስም የሆዋ እቲ ናይ ዘለኣለም ኣምላኽ ጸውዐ።+
34 ኣብርሃም ድማ ኣብ ምድሪ ፍልስጥኤማውያን ነዊሕ ግዜ ተቐመጠ።

1 ድሕርዚ፡ እቲ ናይ ሓቂ ኣምላኽ ንኣብርሃም ፈተኖ፣ “ኣብርሃም” ከኣ በሎ፣ ንሱ ኸኣ፡ “እነኹ” በለ።
2 ሽዑ፡ “በጃኻ ነቲ እትፈትዎ ሓደ ወድኻ ይስሃቅ ውሰድ እሞ፡ ናብ ምድሪ ሞርያ ተጐዓዝ፣ ኣብኣ ድማ ኣብ ሓደ ኻብቲ ኣነ ዝብለካ ኣኽራን ዚሓርር መስዋእቲ ጌርካ ሰውኣዮ” በሎ።
3 ኣብርሃም ድማ ኣንጊሁ ተንስአ፣ ኣድጉ ጽዒኑ ኸኣ፡ ክልተ ገላዉኡ ምስኡን ምስ ወዱ ይስሃቅን ወሰደ። ንዚሓርር መስዋእቲ ዚኸውን ዕንጨይቲ ፈሊጹ ኸኣ፡ ተንሲኡ ናብታ እቲ ናይ ሓቂ ኣምላኽ ዝበሎ ቦታ ተጓዕዘ። 4 ኣብ ሳልሰይቲ መዓልቲ፡ ኣብርሃም ኣዒንቱ ኣልዒሉ ነታ ቦታ ብርሑቕ ረኣያ።
5 ኣብርሃም ድማ ንገላዉኡ፡ “ምስዚ ኣድጊ፡ ኣብዚ ጽንሑ፣ ኣነን እዚ ወድን ከኣ ናብቲ ኼድና ኣምሊኽና ናባኻትኩም ክንምለስ ኢና” በሎም።
6 ኣብርሃም ድማ ነቲ ንዚሓርር መስዋእቲ ዚኸውን ዕንጨይቲ ወሲዱ ንወዱ ይስሃቅ ኣሰከሞ። ሓውን ካራን ከኣ ብኣእዳዉ ወሰደ፣ ክልቲኦም ድማ ብሓባር ከዱ።
7 ይስሃቅ ከኣ ንኣቦኡ ኣብርሃም፡ “ኣቦየ” በሎ። ንሱ ድማ፡ “እነኹ፡ ወደየ” ኢሉ መለሰሉ። ንሱ ኸኣ፡ “ሓውን ዕንጨይትንሲ ኣሎ፣ እቲ ንዚሓርር መስዋእቲ ዚኸውን በጊዕ ደኣ ኣበይ ኣሎ፧” በለ።
8 ኣብርሃም ድማ፡ “ወደየ፡ ኣምላኽ ባዕሉ ንዚሓርር መስዋእቲ ዚኸውን በጊዕ+ ኬቕርብ እዩ” በለ። ክልቲኦም ከኣ ብሓባር ከዱ።
9 ናብታ ኣምላኽ ዝበሎ ቦታ ኸኣ በጽሑ፣ ኣብርሃም ድማ ኣብኣ መሰውኢ ሰርሐ፡ ነቲ ዕንጨይቲ እውን ኣብኡ ጸፍጸፎ። ንወዱ ይስሃቅ ኢዱን እግሩን ኣሲሩ ኸኣ፡ ኣብቲ መሰውኢ ኣብ ልዕሊ እቲ ዕንጨይቲ በጥ ኣበሎ።
10 ኣብርሃም ድማ ንወዱ ኺሓርድ፡ ኢዱ ዘርጊሑ ኻራ ወሰደ።
11 መልኣኽ የሆዋ ግና ካብ ሰማያት ጸዊዑ፡ “ኣብርሃም፡ ኣብርሃም” በሎ፣ ንሱ እውን፡ “እነኹ” ኢሉ መለሰ።
12 ንሱ ኸኣ፡ “ሓደ ውሉድካ እኳ ስለ ዘይከላእካኒ፡ ንኣምላኽ ከም እትፈርህ ሕጂ ፈሊጠ ኣለኹ እሞ፡+ ነቲ ወዲ ኣይትጕድኣዮ፡ ገለ እውን ኣይትግበሮ” በለ።
13 ኣብርሃም ድማ ኣዒንቱ ኣልዓለ፣ ክንዮኡ ኸኣ ኣቕርንቱ ኣብ ጣሻ ተጠናኒጉ እተታሕዘ ድዑል ረኣየ። ኣብርሃም ድማ ከይዱ ነቲ ድዑል ወሲዱ፡ ኣብ ክንዲ ወዱ ንዚሓርር መስዋእቲ ሰውኦ።
14 ኣብርሃም ከኣ ነታ ቦታ እቲኣ፡ የሆዋ-ይርኤ ኢሉ ሰመያ። ስለዚ ኸኣ እዩ ኽሳዕ ሎሚ፡ “ኣብ ከረን የሆዋ ይቕረብ እዩ” ዚብሃል።
15 መልኣኽ የሆዋ ድማ ካልኣይ ሳዕ ካብ ሰማያት ንኣብርሃም ጸውዖ፡
16 ከምዚ እውን በሎ፦ “‘ብርእሰይ እምሕል ኣለኹ፡’ ይብል የሆዋ፡ ‘እዚ ነገር እዚ ስለ ዝገበርካን ነቲ ሓደ ወድኻ ስለ ዘይከላእካንን፡
17 ብርግጽ ክባርኸካ፡ ንዘርእኻ ድማ ከም ከዋኽብቲ ሰማያትን ኣብ ገምገም ባሕሪ ኸም ዘሎ ሑጻን ብርግጽ ከብዝሖ እየ፣ ዘርእኻ ኣፍ ደገ ጸላእቱ ኺርስተ እዩ።
18 ቃለይ ስለ ዝሰማዕካ፡ ኵሎም ኣህዛብ ምድሪ ብዘርእኻ በረኸት ኪረኽቡ እዮም።’”
19 ድሕሪኡ፡ ኣብርሃም ናብ ገላዉኡ ተመልሰ፣ ተንሲኦም ከኣ ብሓባር ናብ ብኤር-ሸባዕ ከዱ፣ ኣብርሃም ድማ ኣብ ብኤር-ሸባዕ ተቐመጠ።
20 ድሕርዚ፡ ንኣብርሃም፡ “እንሆ፡ ሚልካ ንሓውካ ናሆር ደቂ ወሊዳትሉ፣
21 ንሳቶም ድማ፡ ዑጽ እቲ በዅሩን ሓዉ ቡዝን ቄሙኤል ኣቦ ኣራምን
22 ከሰድን ሓዞን ጲልደሽን ይድላፍን ቤቱኤልን+ እዮም” ተባሂሉ ተነግሮ።
23 ቤቱኤል ድማ ንርብቃ ወለደ። እዚኣቶም ሸሞንቲኦም ሚልካ ንናሆር ሓው ኣብርሃም ወለደትሉ።
24 ሬኡማ ዝስማ ሰበይቲ ወሰኑ እውን፡ ደቂ ወለደትሉ፣ ንሳቶም ድማ፡ ጤባሕን ጋሓምን ታሓሽን ማዓካን እዮም።

1 ሳራ ድማ 127 ዓመት ነበረት፣ እዚ ዕድመ ሳራ እዩ።
2 ሳራ ኸኣ ኣብ ቂርያት-ኣርባዕ፡ ንሳ ኬብሮን፡ ኣብ ምድሪ ከነኣን ሞተት፣ ኣብርሃም ድማ ንሳራ ሓዘነላን በኸየላን።
3 ድሕሪኡ፡ ኣብርሃም ካብ ቅድሚ እታ ምዉትቱ ተንስአ፣ ንደቂ ሔት ድማ፡
4 “ኣነ ኣብ መንጎኹም ጓናን ሰፋርን እየ። ነዛ ምዉትተይ ክቐብርሲ፡ ርስቲ መቓብር ኣብ ማእከልኩም ሃቡኒ” በሎም።
5 ደቂ ሔት ድማ ንኣብርሃም፡
6 “ጐይታይ፡ ስምዓና። ንስኻ ኣብ መንጎና ሹም ኣምላኽ ኢኻ። ካብ መቓብራትና ኣብቲ ምሩጽ ዝበልካዮ ምዉትትኻ ቕበር። ካባና ሓደ እኳ ምዉትትኻ ንምቕባር መቓብሩ ዚኸልኣካ የልቦን” ኢሎም መለሱሉ።
7 ኣብርሃም ከኣ ተንሲኡ፡ ንደቂ እታ ዓዲ፡ ንደቂ ሔት፡ ሰገደሎም፣
8 “ንምዉትተይ ክቐብር እንተ ተሰማሚዕኩም፡ ስምዑኒ፣ ንዔፍሮን ወዲ ጾሓር ከኣ፡
9 እታ ኣብ ደረት ግራቱ ኣብ ማክጴላ ዘላ በዓቱ ኺሸጠለይ ለምኑለይ። ርስቲ መቓብር ምእንቲ ኺህልወንስ፡ ኣብ ቅድሜኹም ብምሉእ ዋጋ ይሽጠለይ” ድማ በሎም።
10 ዔፍሮን ከኣ ኣብ መንጎ እቶም ደቂ ሔት ተቐሚጡ ነበረ። ዔፍሮን እቲ ሔታዊ ድማ፡ ደቂ ሔት እናሰምዑ፡ ኣብ ቅድሚ እቶም ብኣፍ ደገ እታ ኸተማ ዚኣትዉ ዅሎም፡+ ንኣብርሃም፡
11 “ኣይፋልካን ጐይታይ። ስምዓኒ ደኣ። እታ ግራትን እታ ኣብኣ ዘላ በዓትን እህበካ ኣለኹ። ኣብ ቅድሚ ደቂ ህዝበይ እህበካ ኣለኹ። ምዉትትኻ ቕበር” ኢሉ መለሰሉ።
12 ኣብርሃም ከኣ ኣብ ቅድሚ እቶም ደቂ እታ ዓዲ ሰገደ፣
13 ንዔፍሮን ድማ እቶም ደቂ እታ ዓዲ እናሰምዑ፡ “ስምዓኒ ደኣ። ነታ ግራት ምሉእ ዋጋ ብብሩር ክህበካ እየ። ምዉትተይ ክቐብርሲ፡ ካባይ ውሰዶ” ኢሉ ተዛረቦ።
14 ዔፍሮን ድማ ንኣብርሃም፡
15 “ጐይታይ፡ ስምዓኒ ደኣ። እዛ ግራት እዚኣ 400 ሲቃል ብሩር እዩ ዋግኣ፣ እዚ ግና ኣብ መንጎይን ኣብ መንጎኻን እንታይ እዩ፧ ምዉትትኻ ደኣ ቕበር” ኢሉ መለሰሉ።
16 ኣብርሃም ከኣ ንዔፍሮን ሰምዖ፣ ኣብርሃም ድማ ንዔፍሮን፡ ነቲ ደቂ ሔት እናሰምዑ እተዛረቦ ዋጋ ብሩር፡ ከምቲ ብነጋዶ ቕቡል ዝዀነ ሚዛን 400 ሲቃል ብሩር መዘነሉ።
17 በዚ ኸምዚ፡ ኣብ ማክጴላ፡ ኣብ መንጽር መምሬ ዝነበረት ግራት ዔፍሮን፡—እታ ግራትን ኣብኣ ዘላ በዓትን ኣብ ውሽጢ ደረታ ዝነበረ ዅሉ ኣእዋምን፡—
18 ኣብ ቅድሚ ደቂ ሔት፡ ኣብ ቅድሚ እቶም ብኣፍ ደገ እታ ኸተማ ዚኣትዉ ዅሎም፡ ኣብርሃም ዝዓደጋ ንብረት ኰነት።
19 ድሕርዚ፡ ኣብርሃም ንሰበይቱ ሳራ ኣብ በዓቲ ግራት ማክጴላ፡ ኣብ መንጽር መምሬ፡ ንሳ ኸኣ ኬብሮን፡ ኣብ ምድሪ ከነኣን ቀበራ።
20 በዚ ኸምዚ፡ እታ ግራትን እታ ኣብኣ ዝነበረት በዓትን ካብ ደቂ ሔት ናብ ኣብርሃም ርስቲ መቓብር ኰይና ተመሓላለፈት።

1 ኣብርሃም ከኣ ብዕድመ ደፊኡን ኣሪጉን ነበረ፣ የሆዋ ድማ ንኣብርሃም ብዅሉ ባሪኽዎ ነበረ።
2 ኣብርሃም ከኣ ነቲ ንዅሉ ዜመሓድር ዝነበረ ኣብ ቤተ ሰቡ ብዕድመ ዝዓበየ ጊልያኡ፡ “በጃኻ ኢድካ ኣብ ትሕቲ ሰለፈይ ኣንብር፣
3 ንወደይ ካብ ኣዋልድ እዞም ኣነ ኣብ መንጎኦም ዝቕመጥ ዘለኹ ከነኣናውያን ሰበይቲ ኸይተምጽኣሉ ብየሆዋ ኣምላኽ ሰማያትን ኣምላኽ ምድርን አምሕለካ ኣለኹ።
4 ናብ ሃገረይን ናብ ኣዝማደይን ደኣ ኼድካ፡ ንወደይ ይስሃቅ ሰበይቲ ኣምጽኣሉ” በሎ።
5 እቲ ጊልያ ግና፡ “እታ ሰበይቲ ናብዛ ምድሪ እዚኣ ምሳይ ክትመጽእ እንተ ዘይፈተወትከ፧ ሽዑ፡ ንወድኻ ናብታ ዝመጻእካላ ምድሪዶ ኽመልሶ፧” በሎ።
6 ኣብርሃም ድማ፡ “ንወደይ ናብኣ ኸይትመልሶ ተጠንቀቕ።
7 እቲ ኻብ ቤት ኣቦይን ካብ ምድሪ ኣዝማደይን ዘውጽኣኒ፡ ‘እዛ ምድሪ እዚኣ ንዘርእኻ+ ኽህቦ እየ’ ኢሉ ኸኣ እተዛረበንን ዝመሓለለይን የሆዋ ኣምላኽ ሰማያት፡ ንሱ መልኣኹ ቕድሜኻ ኺልእኽ እዩ፡+ ካብኡ ኸኣ ንወደይ ሰበይቲ ብርግጽ ከተምጽኣሉ ኢኻ።
8 እታ ሰበይቲ ምሳኻ ኽትመጽእ እንተ ዘይፈትያ ግና፡ ንስኻ ኻብዚ ማሕላ ንጹህ ትኸውን። ሓንትስ ንወደይ ደኣ ናብኣ ኣይትምለሶ” በሎ።
9 እቲ ጊልያ ኸኣ ኢዱ ኣብ ትሕቲ ሰለፍ ጐይታኡ ኣብርሃም ኣንበረ፡ ብዛዕባ እዚ ነገር እዚ እውን መሓለሉ።
10 እቲ ጊልያ ድማ ካብ ኣግማል ጐይታኡ ዓሰርተ ኣግማል ወሲዱ፡ ካብ ኵሉ ዓይነት ጽቡቕ ዘበለ ንብረት ጐይታኡ ተማሊኡ ተበገሰ። ናብ መሶጶታምያ፡ ናብ ከተማ ናሆር ድማ ከደ።
11 ኣጋ ምሸት፡ በታ ደቂ ኣንስትዮ ማይ ኪቐድሓ ዚወጻላ ግዜ ኸኣ፡ ነተን ኣግማል ኣብ ወጻኢ እታ ኸተማ፡ ኣብ ጥቓ ዒላ ማይ ኣብረኸን።
12 ከምዚ ድማ በለ፦ “ኦ የሆዋ፡ ኣምላኽ ጐይታይ ኣብርሃም፡ ሎሚ መዓልቲ ዀታ ኣስልጠለይ፡ ንጐይታይ ኣብርሃም ከኣ ብተኣማንነት ኣፍቅሮ።
13 እንሆ፡ ኣብ ጥቓ ዓይኒ ማይ ደው ኢለ ኣለኹ፣ ኣዋልድ ደቂ እዛ ኸተማ ኸኣ ማይ ኪቐድሓ ይመጻ ኣለዋ።
14 ይኹን ከኣ፡ ‘ክሰትስ በጃኺ ዕትሮኺ ትሕት ኣብልዮ’ ዝብላ ጓል፡ ንሳ ኸኣ፡ ‘ስተ፡ ንኣግማልካ እውን ከስትየን እየ’ እትብለኒ፡ ንሳ ንጊልያኻ ይስሃቅ ዝሓረኻያ ትኹን፣ ንጐይታይ ብተኣማንነት ከም ዘፍቀርካዮ ድማ በዚ ኣፍልጠኒ።”
15 ገና ዘረባኡ ኸይወድአ ኸሎ፡ ርብቃ ጓል ቤቱኤል+ ወዲ ሚልካ፡+ ሰበይቲ ናሆር ሓው ኣብርሃም፡ ዕትሮኣ ኣብ መንኵባ ጾይራ መጸት።
16 እታ ጓል ድማ ኣዝያ መልክዐኛ፡ ምስ ሰብኣይ ጾታዊ ርክብ ገይራ ዘይትፈልጥ ድንግል ነበረት። ናብታ ዓይኒ ማይ ወሪዳ ኸኣ ዕትሮኣ መሊኣ ደየበት።
17 እቲ ጊልያ ኸኣ ጐይዩ ናብኣ ኸይዱ፡ “በጃኺ ኻብ ዕትሮኺ ሒደት ማይ ኣስትይኒ” በላ።
18 ንሳ ኸኣ፡ “ጐይታይ፡ ስተ” ኢላ፡ ቀልጢፋ ዕትሮኣ ናብ ኢዳ ኣውሪዳ ኣስተየቶ።
19 ምስ ኣስተየቶ ድማ፡ “ንኣግማልካ እውን ክሳዕ ዚኣኽለን ኪሰትያ ክቐድሓለን እየ” በለቶ።
20 ቀልጢፋ ኸኣ ዕትሮኣ ናብ ጋብላ ኣዕሪቓ፡ ማይ ክትቀድሕ መመሊሳ ናብታ ዒላ ጐየየት፣ ንዅለን ኣግማሉ እውን ቀድሓትለን።
21 እቲ ሰብኣይ ድማ፡ የሆዋ መገዱ ኣቕኒዑሉ እንተ ዀይኑ ወይስ እንተ ዘይኰይኑ ኺፈልጥ፡ ስቕ ኢሉ ብምግራም ኣተኲሩ ይጥምታ ነበረ።
22 እተን ኣግማል ሰትየን ምስ ኣእከላ፡ እቲ ሰብኣይ ፍርቂ ሲቃል ዚምዘን ናይ ኣፍንጫ ቐለቤት ወርቅን ዓሰርተ ሲቃል ዚምዘን ክልተ ኣምባርን ንኣእዳዋ ኣውጽአ፣
23 “በጃኺ ንገርኒ፡ ጓል መን ኢኺ፧ ኣብ ቤት ኣቦኺኸ እንሓድረሉ ቦታዶ ኣሎ፧” ድማ በላ።
24 ንሳ ኸኣ፡ “ኣነ ጓል ቤቱኤል፡ ወዲ ሚልካ ንናሆር ዝወለደትሉ፡ እየ” በለቶ።
25 መሊሳ ኸኣ፡ “ብዙሕ ሓሰርን ድርቋን፡ ንመሕደሪ ዚኸውን ከኣ ቦታ ኣሎና” በለቶ።
26 እቲ ሰብኣይ ኣብ ቅድሚ የሆዋ ፍግም ኢሉ ሰጊዱ፡
27 “እቲ ብተኣማንነት ዜርእዮ ፍቕሩን ተኣማንነቱን ካብ ጐይታይ ዘየቋረጸ የሆዋ፡ ኣምላኽ ጐይታይ ኣብርሃም፡ ይወደስ። የሆዋ ናብ ቤት ኣሕዋት ጐይታይ መሪሑኒ” በለ።
28 እታ ጓል ከኣ እዚ ነገር እዚ ኽትነግር ናብ ቤት ኣዲኣ ጐየየት።
29 ርብቃ ድማ ላባን ዝስሙ ሓው ነበራ። ላባን ከኣ ናብቲ ኣብ ግዳም ጥቓ እታ ዓይኒ ማይ ዝነበረ ሰብኣይ ጐየየ።
30 ነቲ ቐለቤት ኣፍንጫን ነቲ ኣምባርን ኣብ ኣእዳው ሓብቱ ምስ ረኣየ፡ ዘረባ ርብቃ ሓብቱ ድማ፡ “እቲ ሰብኣይ ከምዚ ኢሉኒ” ኽትብል ምስ ሰምዐ፡ ነቲ ሰብኣይ ኪረኽቦ መጸ፣ ንሱ እውን ምስተን ኣግማል ኣብ ጥቓ እታ ዓይኒ ማይ ደው ኢሉ ነበረ።
31 ብኡብኡ፡ “ኣታ ብየሆዋ እተባረኽካ፡ ንዓ። ስለምንታይ ኣብ ግዳም ደው እትብል፧ ቤት ኣዳልየልካ ኣለኹ፣ ንኣግማልካ ኸኣ ቦታ ኣሎ” በሎ።
32 ሽዑ፡ እቲ ሰብኣይ ናብ ቤት ኣተወ፣ ንሱ ድማ ነተን ኣግማል ኣራገፈን፡ ሓሰርን ድርቋን ሃበን፣ ንምሕጻብ ኣእጋሩን ኣእጋር እቶም ምስኡ ዝነበሩ ሰባትን ከኣ ማይ ሃቦም።
33 ዚብላዕ ኣብ ቅድሚኡ ምስ ተቐረበ ግና፡ “ጕዳየይ ከይነገርኩስ ኣይበልዕን” በለ። ላባን ከኣ፡ “ተዛረብ” በሎ።
34 ንሱ ድማ ከምዚ በለ፦ “ኣነ ጊልያ ኣብርሃም እየ።
35 የሆዋ ኸኣ ንጐይታይ ኣባጊዕን ከብትን ብሩርን ወርቅን ገላዉን ኣግራድን ኣግማልን ኣእዱግን ብምሃብ፡ ኣብዚሑ ባሪኽዎን ኣዝዩ ኣሀብቲምዎን ኣሎ።
36 ሳራ ሰበይቲ ጐይታይ እውን ምስ ኣረገት ንጐይታይ ወዲ ወሊዳትሉ ኣላ፣+ ንሱ ኸኣ ንዕኡ ዘለዎ ዅሉ ኺህቦ እዩ።
37 ጐይታይ ድማ ከምዚ ኢሉ ኣምሓለኒ፦ ‘ካብ ኣዋልድ እዞም ኣነ ኣብ ምድሮም ዝቕመጥ ዘለኹ ከነኣናውያን፡ ንወደይ ሰበይቲ ኸይተምጽኣሉ።
38 ናብ ቤት ኣቦይን ናብ ዓሌተይን ደኣ ኼድካ፡ ንወደይ ሰበይቲ ኣምጽኣሉ።’
39 ኣነ ግና ንጐይታይ፡ ‘እታ ሰበይቲ ምሳይ ክትመጽእ እንተ ዘይፈተወትከ፧’ በልክዎ።
40 ንሱ ድማ፡ ‘እቲ ኣነ ኣብ ቅድሚኡ ዝመላለስ የሆዋ መልኣኹ ምሳኻ ልኢኹ፡ መገድኻ ብርግጽ ኬቕንዓልካ እዩ፣ ንወደይ ከኣ ካብ ዓሌተይን ካብ ቤት ኣቦይን ሰበይቲ ኣምጽኣሉ።
41 ናብ ዓሌተይ ምስ ከድካ እሞ እንተ ዘይሂቦምኻ፡ ሽዑ ኻብቲ ዝመሓልካለይ ማሕላ ንጹህ ትኸውን። እዚ ድማ ካብቲ ዝመሓልካለይ ማሕላ ንጹህ ኪገብረካ እዩ’ በለኒ።
42 “ሎሚ ናብታ ዓይኒ ማይ ምስ በጻሕኩ፡ ‘ኦ የሆዋ፡ ኣምላኽ ጐይታይ ኣብርሃም፡ እዛ ዝኸዳ ዘለኹ መገዲ ተቕንዓለይ እንተ ዄንካስ፡
43 እንሆ፡ ኣብ ጥቓ ዓይኒ ማይ ደው ኢለ ኣለኹ። ማይ ክትቀድሕ ንእትመጽእ ጓል፡ “በጃኺ ኻብ ዕትሮኺ ሒደት ማይ ኣስትይኒ” ምስ በልክዋ፡
44 “ስተ፡ ንኣግማልካ እውን ክቐድሓለን እየ” ምስ እትብለኒ፡ ንሳ እታ የሆዋ ንወዲ ጐይታይ ዝሓረያ ሰበይቲ ትኹን’ በልኩ።
45 “ብልበይ ተዛሪበ ኸይወዳእኩ፡ ርብቃ ዕትሮኣ ኣብ መንኵባ ጾይራ መጸት፣ ናብ ዓይኒ ማይ ወሪዳ ድማ ማይ ቀድሐት። ኣነ ኸኣ፡ ‘በጃኺ፡ ኣስትይኒ’ በልክዋ።
46 ንሳ ድማ ቀልጢፋ ዕትሮኣ ኻብ መንኵባ ኣውሪዳ፡ ‘ስተ፡ ንኣግማልካ እውን ከስትየን እየ’ በለትኒ። ኣነ ኸኣ ሰተኹ፡ ነተን ኣግማል እውን ኣስተየተን።
47 ድሕሪኡ፡ ‘ጓል መን ኢኺ፧’ ኢለ ሓተትክዋ። ንሳ ድማ፡ ‘ጓል ቤቱኤል ወዲ ናሆር፡ ሚልካ ዝወለደትሉ፡ እየ’ ኢላ መለሰትለይ። ስለዚ፡ ቀለቤት ኣብ ኣፍንጫኣ፡ ኣምባር ከኣ ኣብ ኣእዳዋ ገበርኩላ።
48 ኣብ ቅድሚ የሆዋ ፍግም ኢለ ድማ ሰገድኩ፡ ጓል ሓው ጐይታይ ንወዱ ኽወስድ ብቕንዕቲ መገዲ ንዝመርሓኒ የሆዋ ኣምላኽ ጐይታይ ኣብርሃም ድማ ወደስክዎ።
49 ሕጂ ኸኣ፡ ንጐይታይ ብተኣማንነት እተፍቅርዎን ተኣማንነት እተርእይዎን እንተ ዄንኩም፡ ንገሩኒ፣ እንተ ዘይኰነ ግና፡ ናብ የማን ወይስ ናብ ጸጋም ከብል ንገሩኒ።”
50 ሽዑ፡ ላባንን ቤቱኤልን፡ “እዚ ነገር እዚ ኻብ የሆዋ እዩ። ክንፈቅድ ወይ ክንከልእ* ኣይንኽእልን ኢና።
51 እንሃ፡ ርብቃ ኣብ ቅድሜኻ ኣላ። ውሰዳ እሞ ኺድ፣ ከምቲ የሆዋ ዝበሎ ድማ፡ ሰበይቲ ወዲ ጐይታኻ ትኹን” ኢሎም መለሱሉ።
52 እቲ ጊልያ ኣብርሃም ዘረባኦም ምስ ሰምዐ፡ ኣብ ቅድሚ የሆዋ ናብ ምድሪ ሰገደ።
53 እቲ ጊልያ ኸኣ ኣቕሑ ብሩርን ኣቕሑ ወርቅን ክዳውንትን ኣውጺኡ ንርብቃ ሃባ፣ ንሓዋን ንኣዲኣን ድማ ክቡር ነገር ሃቦም።
54 ንሱን እቶም ምስኡ ዝነበሩ ሰባትን ከኣ በልዑን ሰተዩን፣ ኣብኡ ድማ ሓደሩ።
ንግሆ ምስ ተንስአ ኸኣ፡ “ናብ ጐይታይ ኣሰናብቱኒ” በለ።
55 ሓዋን ኣዲኣን ድማ፡ “እዛ ጓል እንተ ወሓደ ዓሰርተ መዓልቲ ምሳና ትቐኒ። ድሕሪኡ፡ ትኺድ” በልዎ።
56 ንሱ ግና፡ “የሆዋ መገደይ ካብ ኣቕንዓለይሲ፡ ኣይተደናጕዩኒ” በሎም።
57 ንሳቶም ከኣ፡ “ነታ ጓል ጸዊዕና ንሕተታ” በሉ።
58 ንርብቃ ጸዊዖም ድማ፡ “ምስ እዚ ሰብኣይ እዚዶ ትኸዲ፧” በልዋ። ንሳ ኸኣ፡ “ሕራይ፡ እኸይድ” ኢላ መለሰት።
59 ሽዑ፡ ንሓብቶም ርብቃን ንመጕዚታን ነቲ ጊልያ ኣብርሃምን ንሰቡን ይኺዱ ሓደግዎም።
60 ንርብቃ ኸኣ፡ “ኣቲ ሓብትና፡ ኣሻሕ ኣእላፋት ኩኒ፣ ዘርእኺ ድማ ኣፍ ደገ ጸላእቱ ይረስተ” ኢሎም መረቕዋ።
61 ድሕሪኡ፡ ርብቃን ኣግራዳን ኣብ ኣግማል ተወጢሐን ነቲ ሰብኣይ ሰዓባኦ። እቲ ጊልያ ኸኣ ንርብቃ ወሰዳ እሞ ኸደ።
62 ይስሃቅ ከኣ ኣብ ምድሪ ነጌብ ይቕመጥ ነበረ እሞ፡ ካብ መገዲ ብኤር-ለሓይ-ሮይ+ መጺኡ ነበረ።
63 ይስሃቅ ድማ ኣጋ ምሸት ኣብ መሮር ኰይኑ ኼስተንትን ወጺኡ ነበረ።+ ኣዒንቱ ኣልዒሉ ኸኣ፡ ኣግማል ኪመጻ ረኣየ።
64 ርብቃ ድማ ኣዒንታ ምስ ኣልዓለት፡ ንይስሃቅ ረኣየቶ፡ ቀልጢፋ ኸኣ ካብ ገመል ወረደት።
65 ነቲ ጊልያ ድማ፡ “እቲ ኣብ መሮር ኪቕበለና ዚመጽእ ዘሎ፡ እንታዋይ ሰብኣይ እዩ፧” ኢላ ሓተተቶ፣ እቲ ጊልያ ኸኣ፡ “ጐይታይ እዩ” በላ። ሽዑ፡ መጐልበቢ ወሲዳ ተጐልበበት።
66 እቲ ጊልያ ድማ ኵሉ እቲ ዝገበሮ ነገር ንይስሃቅ ነገሮ።
67 ድሕሪኡ፡ ይስሃቅ ናብ ድንኳን ኣዲኡ ሳራ ኣእተዋ። በዚ ኸምዚ፡ ንርብቃ ወሰዳ እሞ ሰበይቱ ዀነት፡ ኣፍቀራ እውን፣ ይስሃቅ ከኣ ድሕሪ ሞት ኣዲኡ ተጸናንዐ።

1 ኣብርሃም ድማ ከም ብሓድሽ ቄጡራ ዝስማ ሰበይቲ ኣእተወ።
2 ንሳ ኸኣ ንዚምራንን ንዮቅሻንን ንሜዳንን ንሚድያንን ንይሽባቅን ንሹኣሕን ወለደትሉ።
3 ዮቅሻን ድማ ንሳባን ንዴዳንን ወለደ።
ደቂ ዴዳን ከኣ ኣሹሪምን ለጡሺምን ለኡሚምን እዮም።
4 ደቂ ሚድያን ድማ ዔፋን ዔፌርን ሓኖክን ኣቢዳዕን ኤልዳዕን እዮም።
ኵሎም እዚኣቶም ደቂ ቄጡራ እዮም።
5 ኣብርሃም ከኣ ዘለዎ ዅሉ ንይስሃቅ ሃቦ፣
6 ኣብርሃም ግና ነቶም ካብ ኣንስቲ ወሰኑ እተወልዱ ደቁ ህያባት ሂቡ፡ ገና ብህይወቱ ኸሎ፡ ካብ ይስሃቅ ወዱ ኣርሒቑ ናብ ምብራቕ ኣቢሉ ናብ ምድሪ ምብራቕ ሰደዶም።
7 ዓመታት ህይወት ኣብርሃም፡ 175 ዓመት እዩ።
8 ኣብርሃም ድማ ጽቡቕ እርጋን ኣሪጉ፡ ዕድመ ጸጊቡ፡ ትንፋሱ ሓለፈት፡ ናብ ህዝቡ ኸኣ ተኣከበ።
9 ደቁ ይስሃቅን እስማኤልን ድማ ኣብታ ኣብ ግራት ዔፍሮን ወዲ ጾሓር እቲ ሔታዊ፡ ኣብ መንጽር መምሬ ዘላ በዓቲ ማክጴላ ቐበርዎ፣
10 ኣብታ ኣብርሃም ካብ ደቂ ሔት ዝዓደጋ ግራት ቀበርዎ። ኣብኣ ኸኣ ኣብርሃም ምስ ሰበይቱ ሳራ ተቐብረ።
11 ድሕሪ ሞት ኣብርሃም፡ ኣምላኽ ንወዱ ይስሃቅ ባረኾ፣ ይስሃቅ ከኣ ኣብ ጥቓ ብኤር-ለሓይ-ሮይ ይቕመጥ ነበረ።
12 ታሪኽ እስማኤል ወዲ ኣብርሃም፡ ኣጋር እታ ግብጻዊት ገረድ ሳራ ንኣብርሃም ዝወለደትሉ እዚ እዩ።
13 ስማት ደቂ እስማኤል በብስሞም፡ ከከም ትውልዶም እዚ እዩ፦ በዅሪ እስማኤል ነባዮት፡ ደሓር ቄዳርን+ ኣድብኤልን ሚብሳምን
14 ሚሽማዕን ዱማን ማሳን
15 ሃዳድን ቴማን የጡርን ናፊሽን ቄድማን።
16 እዚኣቶም ደቂ እስማኤል እዮም፣ ስማቶም በብዓዶምን በብሰፈሮምን እዚ እዩ፦ በብእንዳኦም 12 ሹም።
17 ዓመታት ህይወት እስማኤል ድማ 137 ዓመት ኰነ። ትንፋሱ ኸኣ ሓለፈት እሞ ሞተ፡ ናብ ህዝቡ ድማ ተኣከበ።
18 ካብታ ጥቓ እታ ኣብ መንጽር ግብጺ ዘላ ሹር እትርከብ ሓዊላ ኽሳብ ኣሶር ይቕመጡ ነበሩ። ኣብ መንጽር ኵሎም ኣሕዋቱ ድማ ሰፈረ።
19 ታሪኽ ይስሃቅ ወዲ ኣብርሃም ከኣ እዚ እዩ።
ኣብርሃም ንይስሃቅ ወለደ።
20 ይስሃቅ ድማ ንርብቃ ጓል ቤቱኤል እቲ ኣራማዊ ብዓል ጳዳን-ኣራም፡ ሓብቲ ላባን እቲ ኣራማዊ ኺምርዓዋ ኸሎ፡ ወዲ 40 ዓመት ኰይኑ ነበረ።
21 ንሳ መኻን ስለ ዝነበረት፡ ይስሃቅ ብዛዕባ ሰበይቱ ንየሆዋ ለመኖ፣ የሆዋ ኸኣ ንልማኖኡ መለሰሉ፡ ሰበይቱ ርብቃ እውን ጠነሰት።
22 እቶም ኣብ ውሽጣ ዝነበሩ ደቃ ኸኣ ይቃለሱ ነበሩ እሞ፡+ “ከምዚ ኻብ ኰነ ደኣ፡ ስለምንታይ እየ ዝነብር፧” በለት። ንየሆዋ ድማ ሓተተቶ።
23 የሆዋ ኸኣ፡ “ኣብ ማሕጸንኪ ኽልተ ህዝቢ ኣለዉ፣ ካብ ከርስኺ እውን ክልተ ህዝቢ ኺፈላለዩ እዮም። እቲ ሓደ ህዝቢ ኻብቲ ኻልእ ህዝቢ ኺብርትዕ እዩ፣ እቲ ዓብዪ ድማ ነቲ ንእሽቶ ኺግዝኦ እዩ” በላ።
24 እትወልደሉ እዋን ምስ ኣኸለ፡ እንሆ፡ ኣብ ማሕጸና ማንታ ነበሩ።
25 ሽዑ፡ እቲ ቐዳማይ ዝወጸ ዅለንትናኡ ጸጕሪ ባርኖስ ዚመስል ቀይሕ ነበረ፣ ኤሳው ኢሎም ድማ ሰመይዎ።
26 ድሕሪኡ፡ ሓዉ ወጸ፡ ኢዱ ኸኣ ሸዀና ኤሳው ሒዛ ነበረት፣ ያእቆብ ኢሉ ድማ ሰመዮ። ንሳ ኽትወልዶም ከላ፡ ይስሃቅ ወዲ 60 ዓመት ኰይኑ ነበረ።
27 እቶም ቈልዑ ድማ ዓበዩ፣ ኤሳው ከኣ ክኢላ ሃዳኒ፡ ናይ መሮር ሰብ ኰነ። ያእቆብ ግና ኣብ ድንኳናት ዚቕመጥ መንቅብ ዘይብሉ ሰብኣይ ነበረ።
28 ይስሃቅ ከኣ ንኤሳው ይፈትዎ ነበረ፣ ከመይሲ፡ ሃሃዲኑ የብልዖ ነበረ። ርብቃ ግና ንያእቆብ ትፈትዎ ነበረት።
29 ሓደ ግዜ፡ ያእቆብ ጸብሒ ኺሰርሕ ከሎ፡ ኤሳው ደኺሙ ኻብ መሮር ተመልሰ።
30 ሽዑ፡ ኤሳው ንያእቆብ፡ “ደኺመ እየ እሞ፡ በጃኻ ቐልጥፍ፡ ካብቲ ቐይሕ ጸብሒ ሒደት ሃበኒ” በሎ። ስለዚ፡ ስሙ ኤዶም ተባህለ።
31 ያእቆብ ከኣ፡ “ቅድም ብዅርናኻ ሽጠለይ” በሎ።
32 ኤሳው ድማ፡ “እንሆ፡ ክመውት ኢለ ኣለኹ። ብዅርናኸ እንታይ ኪዓብሰለይ እዩ፧” በለ።
33 ያእቆብ ከኣ፡ “ቅድም ምሓለለይ” በሎ። ንሱ ድማ መሓለሉ፡ ብዅርናኡ እውን ንያእቆብ ሸጠሉ።
34 ሽዑ፡ ያእቆብ ንኤሳው እንጌራን ጸብሒ ብርስንን ሃቦ፣ ንሱ ድማ በልዐን ሰተየን። ተንሲኡ ኸኣ ከደ። በዚ ኸምዚ፡ ኤሳው ንብዅርናኡ ነዓቓ።

1 ብዘይካ እቲ ብዘመን ኣብርሃም ዝዀነ ቐዳማይ ጥሜት፡ ኣብታ ምድሪ ኻልእ ጥሜት ኰነ፣ ይስሃቅ ድማ ናብ ኣቢሜሌክ ንጉስ ፍልስጥኤማውያን፡ ናብ ጌራር ከደ።
2 የሆዋ ኸኣ ተራእዮ፡ ከምዚ እውን በሎ፦ “ናብ ግብጺ ኣይትውረድ። ኣብታ ኣነ ዝብለካ ምድሪ ደኣ ተቐመጥ።
3 ኵላ እዛ ምድሪ ንዓኻን ንዘርእኻን ክህበካ እየ እሞ፡ ኣብዛ ምድሪ እዚኣ ጓና ዄንካ ተቐመጥ፣ ምሳኻ ክኸውንን ክባርኸካን ከኣ እየ። እቲ ንኣቦኻ ኣብርሃም ዝመሓልኩሉ ማሕላ ድማ ክፍጽሞ እየ።
4 ‘ንዘርእኻ ኸኣ ከም ከዋኽብቲ ሰማያት ከብዝሖ፡ ኵላ እዛ ምድሪ ድማ ንዘርእኻ ኽህቦ እየ፣ ኵሎም ኣህዛብ ምድሪ ኸኣ በረኸት ኪረኽቡ እዮም።’
5 ከመይሲ፡ ኣብርሃም ቃለይ ሰሚዑ፡ እቲ ኣብ ቅድመይ ዘለዎ ግዴታታትን ትእዛዛተይን ስርዓታተይን ሕግታተይን ድማ ሓልዩ እዩ።”
6 ይስሃቅ ከኣ ኣብ ጌራር ተቐመጠ።
7 ሰብ እታ ቦታ ብዛዕባ ሰበይቱ ኺሓትትዎ ኸለዉ ድማ፡ “ሓብተይ እያ” ይብል ነበረ። ትርኢታ ጽቡቕ ስለ ዝነበረ፡ “ሰብ እዛ ቦታ እዚኣ ብሰሪ ርብቃ ኪቐትሉኒ እዮም” ኢሉ ነበረ እሞ፡ “ሰበይተይ እያ” ምባል ፈርሀ። 8 እተወሰነ ግዜ ምስ ሓለፈ፡ ኣቢሜሌክ ንጉስ ፍልስጥኤማውያን ብመስኰት ኪጥምት ከሎ፡ ይስሃቅ ንሰበይቱ ርብቃ ፍቕሩ ኺገልጸላ ኸሎ ረኣዮ።
9 ኣቢሜሌክ ከኣ ንይስሃቅ ጸዊዑ፡ “ብርግጽ ሰበይትኻ እያ! ስለምንታይ ደኣ፡ ‘ሓብተይ እያ’ ዝበልካ፧” በሎ። ይስሃቅ ድማ፡ “ብሰራ ኸይመውት ኢለ እየ” በሎ።
10 ኣቢሜሌክ ድማ፡ “እንታይ እዩ እዚ ዝገበርካና፧ ሓደ ኻብዚ ህዝቢ ብቐሊሉ ምስ ሰበይትኻ ምደቀሰ ነይሩ፣ በደልቲ ኸኣ ምገበርካና ኔርካ” በለ።
11 ሽዑ፡ ኣቢሜሌክ ንዅሉ እቲ ህዝቢ፡ “ነዚ ሰብኣይ እዝን ንሰበይቱን ዝተንከየ፡ ብርግጽ ኪመውት እዩ” ኢሉ ኣዘዞ።
12 ይስሃቅ ድማ ኣብታ ምድሪ እቲኣ ዘርኢ ዘርአ፣ በታ ዓመት እቲኣ ኸኣ፡ የሆዋ ስለ ዝባረኾ፡ 100 ዕጽፊ እቲ ዝዘርኦ ሓፈሰ።
13 እቲ ሰብኣይ ድማ ሃብተመ፡ ኣዝዩ ኽሳዕ ዚህብትም ከኣ በልጸገ።
14 መጓሰ ኣባጊዕን መጓሰ ከብትን ብዙሓት ገላዉን ድማ ነበርዎ፣ ስለዚ ኸኣ፡ ፍልስጥኤማውያን ቀንኡሉ።
15 ሽዑ፡ ፍልስጥኤማውያን ንዅሉ እቲ ገላዉ ኣቦኡ ብዘመን ኣቦኡ ኣብርሃም ዝዀዓትዎ ዒላታት ብሓመድ ደበይዎ።
16 ኣቢሜሌክ ድማ ንይስሃቅ፡ “ካባና ብዝያዳ ሓይልካ ኢኻ እሞ፡ ካብዚ ኸባቢና ኺድ” በሎ።
17 ይስሃቅ ከኣ ካብኡ ግዒዙ፡ ኣብ ስንጭሮ ጌራር ሰፈረ፡ ኣብኡ ድማ ተቐመጠ።
18 ይስሃቅ ድማ ነቲ ብዘመን ኣቦኡ ኣብርሃም ዝዀዓትዎ፡ ፍልስጥኤማውያን ግና ድሕሪ ሞት ኣብርሃም ዝደበይዎ ዒላታት፡ መሊሱ ዀዓቶ፣ ከምቲ ኣቦኡ ዘውጽኣሉ ስማት እውን ሰመዮ።
19 ገላዉ ይስሃቅ ኣብቲ ስንጭሮ* ምስ ኰዓቱ፡ ፈልፋሊ ዒላ ማይ ረኸቡ።
20 ጓሶት ጌራር ድማ ምስ ጓሶት ይስሃቅ፡ “እዚ ማይና እዩ” ኢሎም ተባእሱ። ምስኡ ስለ እተባእሱ ኸኣ፡ ነታ ዒላ ዔሰቅ ሰመያ።
21 ካልእ ዒላ ድማ ኰዓቱ፣ ብዛዕባኣ እውን ተባእሱ። ንዓኣ ኸኣ ሲጥና* ኢሉ ሰመያ።
22 ካብኡ ድማ ገዓዘ፡ ካልእ ዒላ እውን ኰዓተ፣ ብዛዕባኣ ግና ኣይተባእሱን። ስለዚ፡ “ሕጂ የሆዋ ስለ ዘርሓበልናን ኣብዛ ምድሪ እዚኣ ስለ ዘፋረየናን እዩ” ኢሉ ረሖቦት ኢሉ ሰመያ።
23 ካብኡ ኸኣ ናብ ብኤር-ሸባዕ ደየበ።
24 በታ ለይቲ እቲኣ ድማ፡ የሆዋ ተራእዮ እሞ፡ “ኣነ ኣምላኽ ኣቦኻ ኣብርሃም እየ። ኣነ ምሳኻ እየ እሞ፡ ኣይትፍራህ፣ ምእንቲ ጊልያይ ኣብርሃም ኢለ ድማ ክባርኸካን ንዘርእኻ ኸብዝሖን እየ” በሎ።
25 ንሱ ኸኣ ኣብኡ መሰውኢ ሰሪሑ፡ ስም የሆዋ ጸውዐ። ይስሃቅ ድማ ኣብኡ ድንኳኑ ተኸለ፣ ገላዉኡ ኸኣ ኣብኡ ዒላ ዀዓቱ።
26 ኣቢሜሌክ ድማ፡ ኣሑዛት ምስ ዚብሃል ኣማኻሪኡን ምስ ፊኮል ሓለቓ ሰራዊቱን፡ ካብ ጌራር ናብኡ መጸ። 27 ይስሃቅ ከኣ፡ “ጸሊእኩምኒ፡ ካብ ከባቢኹም ከኣ ሰጒጕኩምኒ ኽነስኹም፡ ስለምንታይ ደኣ ናባይ መጺእኩም፧” በሎም።
28 ንሳቶም ድማ፡ “የሆዋ ምሳኻ ኸም ዘሎ ብንጹር ርኢና ኢና። ስለዚ፡ ከምዚ ኢልና፦ ‘ንሕናን ንስኻን በጃኻ ንማሓሓል፡ ምሳኻ ኸኣ ኪዳን ንእቶ፣
29 እዚ ድማ፡ ከምቲ ንሕና ዘይተንከናካ፡ ጽቡቕ ጥራይ ከኣ ዝገበርናልካ፡ ብሰላም እውን ዘሰናበትናካ፡ ንስኻ ድማ ንዓና ኽፉእ ከይትገብረና እዩ። ሕጂ ንስኻ ናይ የሆዋ ብሩኽ ኢኻ’” በልዎ።
30 ሽዑ፡ ንሱ ድግስ ደገሰሎም እሞ፡ በልዑን ሰተዩን።
31 ንጽብሒቱ ድማ ኣንጊሆም ተንሲኦም፡ ንሓድሕዶም ተማሓሓሉ። ድሕሪኡ፡ ይስሃቅ ኣሰናበቶም፡ ካብኡ እውን ብሰላም ከዱ።
32 በታ መዓልቲ እቲኣ፡ ገላዉ ይስሃቅ መጺኦም፡ ብዛዕባ እታ ዝዀዓትዋ ዒላ፡ “ማይ ረኺብናላ!” ኢሎም ነገርዎ።
33 ንሱ ድማ ሺብዓ ኢሉ ሰመያ። ስለዚ፡ ስም እታ ኸተማ ኽሳዕ እዛ መዓልቲ እዚኣ ብኤር-ሸባዕ+ እዩ።
34 ኤሳው ወዲ 40 ዓመት ምስ ኰነ፡ ንይሁዲት ጓል ብኤሪ እቲ ሔታውን ንባስማት ጓል ኤሎን እቲ ሔታውን ኣንስቱ ኪዀናኦ ወሰደን።
35 ንሳተን ከኣ ንይስሃቅን ንርብቃን ምንጪ ዓብዪ ጓሂ ዀናኦም።

1 ይስሃቅ ኣሪጉ ኣዒንቱ ምርኣይ ክሳዕ ዚስእና ምስ ደኸማ፡ ንኤሳው እቲ ዓብዪ ወዱ ጸዊዑ፡ “ወደየ” በሎ። ንሱ ኸኣ፡ “እነኹ” ኢሉ መለሰ።
2 ንሱ ድማ፡ “ሕጂ ኣሪገ እየ። መዓልቲ ሞተይ ከኣ ኣይፈልጥን እየ።
3 ሕጂ ድማ በጃኻ ኣጽዋርካ፡ ማለት ጕልድባኻን ቀስትኻን፡ ውሰድ እሞ፡ ንመሮር ወፊርካ፡ ሃዲንካ ኣምጽኣለይ።
4 ኣነ ዝፈትዎ ጥዑም ብልዒ ኸኣ ሰሪሕካ ኣምጽኣለይ። ሽዑ፡ ቅድሚ ሙማተይ ምእንቲ ኽምርቐካስ፡ ክበልዖ እየ” በለ።
5 ርብቃ ግና ይስሃቅ ንወዱ ኤሳው ኪዛረቦ ኸሎ ትሰምዖ ነበረት። ኤሳው ድማ ሃዲኑ ኼምጽእ ናብ መሮር ወፈረ።
6 ርብቃ ኸኣ ንወዳ ያእቆብ፡ “ኣቦኻ ንሓውካ ኤሳው ከምዚ ኢሉ ኺዛረቦ ሰሚዐ፦
7 ‘ሃዲንካ ጥዑም ብልዒ ሰሪሕካ ኣምጽኣለይ። ኣነ ድማ ቅድሚ ሞተይ፡ በሊዐ ኣብ ቅድሚ የሆዋ ኽምርቐካ እየ።’
8 ሕጂ ኸኣ ወደየ፡ ተጠንቂቕካ ስማዕ፡ ከምቲ ዝእዝዘካ ድማ ግበር።
9 በጃኻ ናብተን መጓሰ ኼድካ፡ ካብአን ክልተ ብሉጻት መሓስእ ኣምጽኣለይ፣ ኣነ ኸኣ ንዓታተን ከምቲ ኣቦኻ ዚፈትዎ ጥዑም ብልዒ ገይረ ኽሰርሓሉ እየ።
10 ሽዑ፡ ቅድሚ ሞቱ ምእንቲ ኺምርቐካስ፡ ናብ ኣቦኻ ትወስዶ” በለቶ።
11 ያእቆብ ድማ ንኣዲኡ ርብቃ፡ “ሓወይ ኤሳው ግና ጸጓር ሰብኣይ እዩ፣+ ኣነ ኸኣ ልሙጽ ሰብኣይ እየ። 12 ኣቦይ እንተ ዳህሰሰኒኸ፧+ ሽዑ፡ ኣብ ቅድሚኡ ብርግጽ መላገጺ ክኸውን እየ፣ ኣብ ልዕለይ ከኣ ኣብ ክንዲ ምርቓስ፡ መርገም ከምጽእ እየ” በላ።
13 ኣዲኡ ድማ፡ “ወደየ፡ እቲ ንዓኻ እተባህለ መርገምሲ ኣባይ ይብጻሕ። ከምቲ ዝበልኩኻ ግዳ ግበር፡ ኬድካ ኸኣ ኣምጽኣለይ” በለቶ።
14 ከይዱ ድማ ወሰደን፡ ንኣዲኡ እውን ኣምጽኣላ፣ ኣዲኡ ኸኣ ከምቲ ኣቦኡ ዚፈትዎ ጥዑም ብልዒ ሰርሐት።
15 ድሕርዚ፡ ርብቃ ነቲ ኣብ ቤት ዝነበረ ብሉጽ ክዳውንቲ ኤሳው እቲ ዓብዪ ወዳ ወሲዳ፡ ንያእቆብ እቲ ንእሽቶ ወዳ ኸደነቶ።
16 ኣብ ኣእዳዉን ኣብቲ ጸጕሪ ዘይብሉ ኽፋል ክሳዱን ከኣ፡ ቈርበት እተን መሓስእ ገበረትሉ።
17 ሽዑ፡ ነቲ ዝሰርሓቶ ጥዑም ብልዕን እንጌራን ንወዳ ያእቆብ ሃበቶ።
18 ንሱ ድማ ናብ ኣቦኡ ኣትዩ፡ “ኣቦየ” በሎ። ንሱ ድማ፡ “እነኹ። ወደይ ንስኻ መን ኢኻ፧” በለ።
19 ያእቆብ ከኣ ንኣቦኡ፡ “ኣነ ኤሳው በዅርኻ እየ።+ ከምቲ ዝበልካኒ ገይረ ኣለኹ። በጃኻ ቕንዕ ኢልካ ኾፍ በል እሞ ምእንቲ ኽትምርቐንስ፡ ካብዚ ሃዲነ ዘምጻእክዎ ብላዕ” በሎ።
20 ይስሃቅ ድማ ንወዱ፡ “ወደየ፡ ከመይ ኢልካ ደኣ ኽንድዚ ብቕልጡፍ ረኺብካ፧” በሎ። ንሱ ኸኣ፡ “የሆዋ ኣምላኽካ ስለ ዘጓነፈለይ እዩ” ኢሉ መለሰ።
21 ይስሃቅ ድማ ንያእቆብ፡ “ወደየ፡ ብሓቂ ንስኻ ወደይ ኤሳው እንተ ዄንካ ወይ እንተ ዘይኴንካ ምእንቲ ኽፈልጥሲ፡ በጃኻ ኽድህስሰካ ቕረብ” በሎ።
22 ያእቆብ ከኣ ናብ ኣቦኡ ይስሃቅ ቀረበ፣ ንሱ ኸኣ ዳህሰሶ እሞ፡ “ድምጽስ ድምጺ ያእቆብ እዩ፣ ኣእዳው ግና ኣእዳው ኤሳው እየን” በለ።
23 ኣእዳዉ ኸም ኣእዳው ሓዉ ኤሳው ጸጓራት ኰይነን ስለ ዝነበራ፡ ኣየለለዮን። ስለዚ፡ መረቖ።
24 ድሕሪኡ፡ “ብሓቂዶ ወደይ ኤሳው ኢኻ፧” ኢሉ ሓተቶ። ንሱ ኸኣ፡ “እወ፡ ኣነ እየ” ኢሉ መለሰ።
25 ንሱ ድማ፡ “ወደየ፡ ካብቲ ሃድን ክበልዕሲ ኣቕርበለይ፣ ድሕሪኡ፡ ክምርቐካ እየ” በለ። ምስ ኣቕረበሉ፡ ንሱ በልዐ፣ ወይኒ እውን ኣቕረበሉ፡ ንሱ ድማ ሰተየ።
26 ኣቦኡ ይስሃቅ ከኣ፡ “ወደየ፡ በጃኻ ቐሪብካ ስዓመኒ” በሎ።
27 ቀሪቡ ድማ ሰዓሞ፣ ንሱ ድማ ጨና ኽዳውንቱ ኣጫነወ። ሽዑ፡ ከምዚ ኢሉ መረቖ፦
“እንሆ፡ ጨና ወደይ ከም ጨና እቲ የሆዋ ዝባረኾ መሮር እዩ።
28 እቲ ናይ ሓቂ ኣምላኽ ከኣ ኣውሊ ሰማያትን ፍርያም ሓመድ ምድርን ኣኺሉ ዚተርፍ እኽልን ጕዕሽ ወይንን ይሃብካ።
29 ህዝብታት ይገዝኡኻ፡ ኣህዛብ ድማ ይስገዱልካ። ጐይታ ኣሕዋትካ ኹን፡ ደቂ እኖኻ እውን ይስገዱልካ። ዚረግመካ ርጉም፡ ዚምርቐካ ድማ ምሩቕ ይኹን።”
30 ይስሃቅ ንያእቆብ መሪቑ ምስ ወድአ፡ ያእቆብ ድማ ካብ ቅድሚ ኣቦኡ ይስሃቅ ውጽእ ምስ በለ፡ ሓዉ ኤሳው ካብ ሃድን ተመልሰ።
31 ንሱ እውን ጥዑም ብልዒ ኣዳልዩ፡ ናብ ኣቦኡ ኣቕረቦ። ንኣቦኡ ኸኣ፡ “ምእንቲ ኽትምርቐንስ፡* ኣቦይ ተንሲኡ ኻብ ሃድን ወዱ ይብላዕ” በሎ።
32 ኣቦኡ ይስሃቅ ከኣ፡ “ንስኻ መን ኢኻ፧” በሎ። ንሱ ድማ፡ “ኣነ ኤሳው በዅሪ ወድኻ እየ” በለ።
33 ሽዑ፡ ይስሃቅ ራዕራዕ በለ፡ “እቲ ሃዲኑ ዘምጽኣለይ ደኣ መን እዩ፧ ቅድሚ ምምጻእካ ድማ ኣነ በሊዐ መሪቐዮ እየ፣ ብርግጽ ድማ ምሩቕ ኪኸውን እዩ” ኸኣ በለ።
34 ኤሳው ዘረባ ኣቦኡ ምስ ሰምዐ፡ ኣዝዩ ዓው ኢሉ ኣምሪሩ ገዓረ፣ ንኣቦኡ ኸኣ፡ “ኣቦየ፡ ንዓይ እውን መርቐኒ” በሎ።
35 ንሱ ግና፡ “እቲ ንዓኻ እተባህለ ምርቓስ፡ ሓውካ ኣታሊሉ ወሲድዎ” በሎ።
36 ንሱ ኸኣ፡ “ክልተ ሳዕ ቦታይ ኪወስድሲ፡ ስሙዶ ግዳ ያእቆብ* ኣይተባህለን፧ ድሮ ብዅርናይ ወሲዱ እዩ፣ ሕጂ ኸኣ ምርቓይ ወሲዱ!” በለ። ኣስዕብ ኣቢሉ ድማ፡ “ንዓይከ ምርቓዶ ኣየትረፍካለይን፧” በለ።
37 ይስሃቅ ግና ንኤሳው፡ “እንሆ፡ ጐይታኻ ገይረዮ፡ ኵሎም ኣሕዋቱ ኸኣ ገላዉኡ ገይረ ሂበዮ፡ ብእኽልን ብጕዕሽ ወይንን ከኣ ኣጸግየዮ እየ። ወደየ፡ ንዓኻ ዝገብረልካ ደኣ እንታይ ዝተረፈ ኣልዩ፧” ኢሉ መለሰሉ።
38 ኤሳው ድማ ንኣቦኡ፡ “ኣቦየ፡ ሓንቲ ምርቓ ጥራይ ድያ ዘላትካ፧ ኣቦየ፡ ንዓይ እውን መርቐኒ” በሎ። ኤሳው ከኣ ዓው ኢሉ በኸየ።
39 ኣቦኡ ይስሃቅ ድማ ከምዚ ኢሉ መለሰሉ፦
“እንሆ፡ ምቕማጥካ ኻብ ፍርያም ሓመድ ምድሪ ዝረሓቐ ኪኸውን፡ ካብ ኣውሊ ናይ ላዕሊ ሰማያት እውን ዝረሓቐ ኪኸውን እዩ።
40 ብሰይፍኻ ኽትነብር ኢኻ፣ ንሓውካ ድማ ክትግዝኦ ኢኻ። ዕረፍቲ ምስ ሰኣንካ ግና፡ ኣርዑቱ ኻብ ክሳድካ ኽትሰብር ኢኻ።”
41 ኤሳው ግና ብምኽንያት እቲ ኣቦኡ ዝመረቖ ምርቓ፡ ንያእቆብ ጸልኦ። ኤሳው ከኣ ብልቡ፡ “ንኣቦይ እንሓዝነሉ መዓልትታት ይቐርባ ኣለዋ። ሽዑ፡ ንሓወይ ያእቆብ ክቐትሎ እየ” በለ።
42 ንርብቃ ድማ ዘረባ ኤሳው ዓብዪ ወዳ ምስ ተነግራ፡ ብኡብኡ ንያእቆብ እቲ ንእሽቶ ወዳ ጸዊዓ፡ “እንሆ፡ ሓውካ ኤሳው ሕነ ኺፈዲ ኢሉ ኪቐትለካ ይደሊ ኣሎ።
43 ሕጂ ኸኣ ወደየ፡ ከምዚ ዝብለካ ግበር፣ ተንስእ እሞ ናብ ሓወይ ላባን፡ ናብ ካራን ህደም።
44 ነድሪ ሓውካ ኽሳዕ ዚሃድእ፡ ንግዜኡ ምስኡ ተቐመጥ።
45 ቍጥዓ ሓውካ ኽሳዕ ዚዝሕል፡ እቲ ዝገበርካዮ ድማ ክሳዕ ዚርስዖ ምስኡ ጽናሕ። ሽዑ፡ ልኢኸ ኻብኡ ኸምጽኣካ እየ። ስለምንታይ ንኽልቴኹም ብሓንቲ መዓልቲ ዝስእነኩም፧” በለቶ።
46 ድሕርዚ፡ ርብቃ ንይስሃቅ፡ “ብምኽንያት ኣዋልድ ሔት፡ ንህይወተይ ፈንፊነያ እየ። ያእቆብ ካብ ኣዋልድ ሔት፡ ከምዘን ኣዋልድ እዛ ምድሪ እዚኣ፡ ሰበይቲ እንተ ወሲዱ፡ ህይወት እንታይ ትዓብሰለይ፧” ትብሎ ነበረት።

1 ይስሃቅ ከኣ ንያእቆብ ጸዊዑ መረቖ፡ ከምዚ ኢሉ ድማ ኣዘዞ፦ “ካብ ኣዋልድ ከነኣን ሰበይቲ ኣይተእቱ።
2 ናብ ጳዳን-ኣራም፡ ናብ እንዳ ኣቦሓጎኻ ቤቱኤል ኪድ እሞ፡ ካብኡ ኸኣ ካብ ኣዋልድ ኣኮኻ ላባን+ ሰበይቲ ኣእቱ።
3 እቲ ዅሉ ዚኽእል ኣምላኽ ድማ ኪባርኸካን ኬፍርየካን እዩ፣ ብርግጽ እውን ጭፍራ ህዝብታት ክትከውን ኢኻ።
4 ነዛ ኣምላኽ ንኣብርሃም ዝሃቦ ጓና ዄንካ እትነብረላ ዘለኻ ምድሪ ምእንቲ ኽትርስተያ፡ ንዓኻን ምሳኻ ድማ ንዘርእኻን በረኸት ኣብርሃም ኪህበካ እዩ።”
5 ይስሃቅ ከኣ ንያእቆብ ሰደዶ፣ ንሱ ድማ ናብ ጳዳን-ኣራም፡ ናብ ላባን ወዲ ቤቱኤል እቲ ኣራማዊ፡+ ሓው ርብቃ ኣደ ያእቆብን ኤሳውን፡ ከደ።
6 ኤሳው ከኣ፡ ይስሃቅ ንያእቆብ ከም ዝመረቖ፡ ካብኡ ሰበይቲ ኼእቱ ድማ ናብ ጳዳን-ኣራም ከም ዝሰደዶ፡ ኪምርቖ ኸሎ ኸኣ፡ “ካብ ኣዋልድ ከነኣን ሰበይቲ ኸይተእቱ” ኢሉ ኸም ዝኣዘዞ ረኣየ።
7 ያእቆብ ድማ ንኣቦኡን ንኣዲኡን ተኣዚዙ፡ ናብ ጳዳን-ኣራም ነቐለ።
8 ሽዑ፡ ኤሳው፡ ኣዋልድ ከነኣን ንኣቦኡ ይስሃቅ ከም ዘጕሃያኦ ረኣየ።
9 ስለዚ፡ ኤሳው ናብ እስማኤል ከይዱ ኣብ ልዕሊ እተን ዝነበራኦ ኣንስቲ፡ ንማሓላት ጓል እስማኤል ወዲ ኣብርሃም፡ ሓብቲ ነባዮት፡ ሰበይቲ ኽትኰኖ ኣእተዋ።
10 ያእቆብ ከኣ ካብ ብኤር-ሸባዕ ነቒሉ፡ ናብ ካራን ኣቢሉ ኸደ።
11 ኣብ ሓንቲ ቦታ ምስ በጽሐ፡ ጸሓይ ስለ ዝዓረበት፡ ኣብኣ ኺሓድር መደበ። ካብቲ ኣብታ ቦታ እቲኣ ዝነበረ ኣእማን ሓንቲ ወሲዱ ድማ፡ ተተርኢስዋ፡ ኣብኣ ደቀሰ።
12 ሽዑ፡ ሓለመ፡ እንሆ ኸኣ፡ መደያይቦ* ኣብ ምድሪ ደው ኢሉ፡ ርእሱ ድማ ክሳብ ሰማያት በጺሑ ነበረ። መላእኽቲ ኣምላኽ ድማ ይድይቡሉን ይወርዱሉን ነበሩ።
13 እንሆ ኸኣ፡ የሆዋ ኣብ ልዕሊኡ ዀይኑ ኸምዚ በሎ፦
“ኣነ የሆዋ፡ ኣምላኽ ኣቦኻ ኣብርሃምን ኣምላኽ ይስሃቅን እየ። እዛ ደቂስካላ ዘለኻ ምድሪ ንዓኻን ንዘርእኻን ክህበኩም እየ።
14 ዘርእኻ ድማ ብርግጽ ከም ሓመድ ምድሪ ኪኸውን እዩ፣ ናብ ምዕራብን ናብ ምብራቕን ናብ ሰሜንን ናብ ደቡብን ከኣ ከተስፋሕፍሕ ኢኻ፣ ኵሎም ዓሌታት ምድሪ ድማ ብኣኻን ብዘርእኻን ብርግጽ ኪባረኹ እዮም።
15 ኣነ ኸኣ ምሳኻ እየ፣ ኣብ እትኸዶ ዅሉ ኽሕልወካ፡ ናብዛ ምድሪ እዚኣ ድማ ክመልሰካ እየ። እቲ ቓል ዝኣቶኹልካ ኽሳዕ ዝገብሮ፡ ኣይክሓድገካን እየ።”
16 ያእቆብ ከኣ ካብ ድቃሱ ተበራበረ እሞ፡ “ኣነ ደኣ እየ ዘይፈለጥኩ ነይረ እምበር፡ ብሓቂ የሆዋ ኣብዛ ቦታ እዚኣ ኣሎ” በለ።
17 ፈሪሁ ድማ፡ “እዛ ቦታ እዚኣ ኽንደይ ተፍርህ እያ! እዚኣ ቤት ኣምላኽ እያ እምበር፡ ካልእ ኣይኰነትን፣ እዚኣ ኸኣ ኣፍ ደገ ሰማያት እያ” በለ።
18 ያእቆብ ድማ ኣንጊሁ ተንሲኡ፡ ነታ ተተርኢስዋ ዝነበረ እምኒ ወሲዱ፡ ሓወልቲ ኽትከውን ኣቘማ፡ ኣብ ልዕሊኣ እውን ዘይቲ ኣፍሰሰላ።
19 ነታ ቦታ እቲኣ ድማ ቤት-ኤል ኢሉ ሰመያ፣ ቅድሚኡ ግና ስም እታ ኸተማ ሉዝ ነበረ።
20 ያእቆብ ድማ ከምዚ ኢሉ መብጽዓ ተመባጽዐ፦ “ኣምላኽ ምሳይ እንተ ዀይኑ፡ ኣብ ጕዕዞይ ከኣ እንተ ሓልዩኒ፡ ዝበልዖ እንጌራን ዝኽደኖ ኽዳንን ድማ እንተ ሂቡኒ፡
21 ናብ ቤት ኣቦይ እውን ብደሓን እንተ ተመሊሰ፡ ሽዑ የሆዋ ብርግጽ ኣምላኸይ ኪኸውን እዩ።
22 እዛ ሓወልቲ ገይረ ኣቚመያ ዘለኹ እምኒ ኸኣ፡ ቤት ኣምላኽ ክትከውን እያ፣ ኣነ ድማ ካብ እትህበኒ ዘበለ ዅሉ ብርግጽ ዕሽር ክህበካ እየ።”

1 ድሕሪኡ፡ ያእቆብ ጕዕዞኡ ቐጸለ፡ ናብ ሃገር ደቂ ምብራቕ ድማ ከደ።
2 ኣብ መሮር ከኣ ዒላ ረኣየ፣ ካብቲ ዒላ ድማ ነተን መጓሰ የስትዩ ስለ ዝነበሩ፡ ኣብ ጥቓኡ ሰለስተ መጓሰ ኣባጊዕ ደቂሰን ነበራ። ኣብ ኣፍ እቲ ዒላ ኸኣ ዓብዪ እምኒ ነበረ።
3 ኵለን እተን መጓሰ ናብኡ ምስ ተኣከባ፡ ነቲ እምኒ ኻብ ኣፍ እቲ ዒላ ኣንከባሊሎም፡ ነተን መጓሰ የስትይወን ነበሩ፣ ድሕሪኡ፡ ነቲ እምኒ ናብ ቦታኡ፡ ናብ ኣፍ እቲ ዒላ ይመልስዎ ነበሩ።
4 ያእቆብ ከኣ፡ “ኣሕዋተየ፡ ካበይ ኢኹም፧” በሎም። ንሳቶም ድማ፡ “ካብ ካራን ኢና” በልዎ።
5 ንሱ ኸኣ፡ “ንላባን ወዲ ወዱ ንናሆርዶ ትፈልጥዎ፧” በሎም። ንሳቶም ድማ፡ “እወ ንፈልጦ” በሉ።
6 ንሱ ኸኣ፡ “ደሓንዶ ኣሎ፧” በሎም። ንሳቶም ድማ፡ “ደሓን ኣሎ። ራሄል ጓሉ እውን እንሃ ምስተን ኣባጊዕ ትመጽእ ኣላ” ኢሎም መለሱሉ።
7 ንሱ ኸኣ፡ “ገና ፍርቂ መዓልቲ እዩ። መጓሰ ዚእከባላ ግዜ ኣይኰነትን። ነዘን ኣባጊዕ ኣስትይወን እሞ፡ ኬድኩም ኣብልዕወን” በሎም።
8 ንሳቶም ድማ፡ “ኵለን መጓሰ ኸይተኣከባ፡ ነቲ እምኒ ኸኣ ካብ ኣፍ እቲ ዒላ ኸይገልበጥዎ፡ ከምኡ ኽንገብር ኣይፍቀደልናን እዩ። ሽዑ፡ ነተን ኣባጊዕ ነስትየን” በሉ።
9 ገና ምሳታቶም ኪዛራረብ ከሎ፡ ራሄል ጓሳ ስለ ዝነበረት፡ ምስ ኣባጊዕ ኣቦኣ መጸት።
10 ያእቆብ ከኣ ንራሄል ጓል ላባን ኣኮኡን ንኣባጊዕ ላባንን ምስ ረኣየ፡ ያእቆብ ብኡብኡ ቐሪቡ ነቲ እምኒ ኻብ ኣፍ እቲ ዒላ ኣንከባለሎ፡ ንኣባጊዕ ኣኮኡ ላባን ድማ ኣስተየን።
11 ያእቆብ ከኣ ንራሄል ሰዓማ፡ ድምጹ ዓው ኣቢሉ እውን በኸየ።
12 ያእቆብ ድማ ንራሄል፡ ንሱ ዘመድ* ኣቦኣን ወዲ ርብቃን ምዃኑ ነገራ። ንሳ ኸኣ ጐይያ ንኣቦኣ ነገረቶ።
13 ላባን ወረ ያእቆብ ወዲ ሓብቱ ምስ ሰምዐ፡ ኪቕበሎ ጐየየ። ሓቚፉ ድማ ሰዓሞ፡ ናብ ቤቱ እውን ኣእተዎ። ንሱ ኸኣ እዚ ዅሉ ነገር እዚ ንላባን ነገሮ።
14 ላባን ድማ፡ “ብሓቂ ዓጽመ ስጋይ ኢኻ” በሎ። ስለዚ፡ ምስኡ ምሉእ ወርሒ ተቐመጠ።
15 ድሕርዚ፡ ላባን ንያእቆብ፡ “ዘመደይ ስለ ዝዀንካዶ ብኸንቱ ኽትግዝኣኒ ኢኻ፧ ዓስብኻ እንታይ ምዃኑ ደኣ ንገረኒ” በሎ።
16 ላባን ከኣ ክልተ ኣዋልድ ነበራኦ። ስም እታ ዓባይ ልያ፡ ስም እታ ንእሽቶ ድማ ራሄል ነበረ።
17 ኣዒንቲ ልያ ጨምጫማት ነበራ፣ ራሄል ግና ውቅብትን መልክዐኛን ነበረት።
18 ያእቆብ ድማ ንራሄል ኣፍቀራ እሞ፡ “ምእንቲ ራሄል እታ ንእሽቶ ጓልካ፡ ሸውዓተ ዓመት ክግዝኣካ ፍቓደኛ እየ” በሎ።
19 ላባን ከኣ፡ “ንኻልእ ሰብኣይ ካብ ዝህባ፡ ንዓኻ ኽህባ ይሕሸኒ። ምሳይ ተቐመጥ” በሎ።
20 ያእቆብ ድማ ምእንቲ ራሄል ሸውዓተ ዓመት ተገዝአ፣ ብምኽንያት እቲ ንዓኣ ዝነበሮ ፍቕሪ ግና፡ ኣብ ኣዒንቱ ኸም ሒደት መዓልትታት ኰይነን ተራእያኦ።
21 ድሕርዚ፡ ያእቆብ ንላባን፡ “መዓልትታተይ ስለ ዝኣኸላ፡ ከእትዋ ሰበይተይ ሃበኒ” በሎ።
22 ሽዑ፡ ላባን ንዅሎም ሰብ እታ ቦታ ኣኪቡ ድግስ ገበረ።
23 ምስ መሰየ ግና፡ ንልያ ጓሉ ወሲዱ፡ ናብኡ ኣምጽኣ፣ ንሱ ኸኣ ናብኣ ኣተወ።
24 ላባን ድማ ንልያ ጓሉ፡ ገረድ እትዀና ዚልጳ ገረዱ ሃባ።
25 ምስ ነግሀ ኸኣ፡ ያእቆብ፡ ልያ ምዃና ረኣየ። ስለዚ፡ ንላባን፡ “እንታይ ኢኻ ዝገበርካኒ፧ ምእንቲ ራሄልዶ ኣይኰንኩን እተገዛእኩኻ፧ ስለምንታይ ደኣ ኣታሊልካኒ፧” በሎ።
26 ላባን ድማ፡ “ኣብ ዓድና ንእሽቶ ቕድሚ በዅሪ ምሃብ፡ ባህልና ኣይኰነን።
27 ናይ እዚኣ፡ ሰሙን ተሓጸን። ድሕሪኡ፡ ስለቲ ኸም ብሓድሽ ንሸውዓተ ዓመት እትግዝኦ መግዛእቲ፡ እዛ ኻልእ ክትውሃበካ እያ” በሎ።
28 ያእቆብ ከኣ ከምኡ ገበረ፣ ናይ እዚኣ፡ ሰሙን ተሓጸነ። ድሕሪኡ ድማ፡ ንሱ፡ ራሄል ጓሉ ሰበይቲ ኽትኰኖ ሃቦ።
29 ላባን ድማ ንራሄል ጓሉ፡ ገረድ እትዀና ቢልሃ ገረዱ ሃባ።
30 ያእቆብ ከኣ ናብ ራሄል ኣተወ፣ ንራሄል ድማ ሓለፋ ልያ ኣፍቀራ፣ ምስኡ ዀይኑ ኸኣ ካልእ ሸውዓተ ዓመት ተገዝአ።
31 የሆዋ ድማ ልያ ኸም ዘይተፈቕረት ምስ ረኣየ፡ ጥንሲ ኽትሕዝ ኣኽኣላ፣ ራሄል ግና መኻን ነበረት።
32 ልያ ድማ ጠነሰት፡ ወዲ እውን ወለደት፣ “የሆዋ መከራይ ስለ ዝረኣየ እዩ፣ ሕጅስ ሰብኣየይ ኬፍቅረኒ እዩ” ኢላ ኸኣ ስሙ ሮቤል ኣውጽኣትሉ።
33 መሊሳ ኸኣ ጠነሰት፡ ወዲ እውን ወለደት፣ “የሆዋ ኸም ዘይተፈቐርኩ ስለ ዝሰምዐ እዩ ነዚ እውን ዝሃበኒ” ኢላ ስሙ ስምኦን ኣውጽኣትሉ።
34 ከም ብሓድሽ ድማ ጠነሰት፡ ወዲ እውን ወለደት፣ “ሰለስተ ኣወዳት ስለ ዝወለድኩሉ፡ ሕጂ ሰብኣየይ ናባይ ኪለግብ እዩ” በለት። ስለዚ፡ ስሙ ሌዊ ተባህለ።
35 መሊሳ ኸኣ ጠነሰት፡ ወዲ እውን ወለደት፣ “ሕጅስ ንየሆዋ ኽውድሶ እየ” ኢላ ስሙ ይሁዳ ኣውጽኣትሉ። ድሕርዚ፡ ምውላድ ኣቋረጸት።

1 ራሄል ንያእቆብ ውሉዳት ከም ዘይወለደትሉ ምስ ረኣየት፡ ንሓብታ ቐንኣትላ፣ ንያእቆብ ከኣ፡ “ውሉዳት ሃበኒ፣ እንተ ዘይኰነ ኽመውት እየ” በለቶ።
2 ያእቆብ ከኣ ንራሄል ኣዝዩ ተቘጥዓ፣ “ኣነዶ ኣብ ቦታ እቲ ፍረ ኸርሲ ዝኸልኣኪ ኣምላኽ እየ፧” ድማ በላ።
3 ንሳ ኸኣ፡ “እንሃ ቢልሃ ባርያይ።+ ውሉዳት ምእንቲ ኽትወልደለይ፡ ብእኣ ኣቢለ እውን ውሉዳት ምእንቲ ኺህልዉንስ፡ ናብኣ እቶ” በለቶ።
4 ንቢልሃ ገረዳ ኸኣ ሰበይቱ ኽትኰኖ ሃበቶ፣ ያእቆብ እውን ናብኣ ኣተወ።
5 ቢልሃ ድማ ጠነሰት፡ ንያእቆብ እውን ወዲ ወለደትሉ።
6 ሽዑ፡ ራሄል፡ “ኣምላኽ ዳኛይ ኰይኑ፡ ቃለይ ሰሚዑ እውን ወዲ ሂቡኒ” ኢላ ስሙ ዳን ኣውጽኣትሉ።
7 ቢልሃ ገረድ ራሄል መሊሳ ጠነሰት፡ ንያእቆብ እውን ካልኣይ ወዲ ወለደትሉ።
8 ሽዑ፡ ራሄል፡ “ምስ ሓብተይ ሓያል ቅልስ ተቓሊሰ፡ ተዓወትኩ” ኢላ ስሙ ንፍታሌም ኣውጽኣትሉ።
9 ልያ ኸኣ ምውላድ ከም ዘቋረጸት ምስ ረኣየት፡ ንዚልጳ ገረዳ ወሲዳ፡ ንያእቆብ ሰበይቱ ኽትኰኖ ሃበቶ።
10 ዚልጳ ገረድ ልያ ድማ ንያእቆብ ወዲ ወለደትሉ።
11 ሽዑ፡ ልያ፡ “ተዓዲለ” ኢላ ስሙ ጋድ ኣውጽኣትሉ።
12 ድሕርዚ፡ ዚልጳ ገረድ ልያ ንያእቆብ ካልኣይ ወዲ ወለደትሉ።
13 ሽዑ፡ ልያ፡ “ኣዋልድ ብርግጽ ሕጕስቲ ኺብላኒ እየን እሞ፡ ተሓጒሰ” ኢላ ስሙ ኣሴር ኣውጽኣትሉ።
14 ሮቤል+ ድማ ብግዜ ዓጺድ ስርናይ ኣብ መሮር ኪኸይድ ከሎ፡ ፍረታት ማንድራጎራ ረኸበ። ናብ ኣዲኡ ልያ ኸኣ ኣምጽኦ። ሽዑ፡ ራሄል ንልያ፡ “በጃኺ ኻብ ፍረታት ማንድራጎራ ወድኺ ሃብኒ” በለታ።
15 ንሳ ኸኣ፡ “ሰብኣየይ ዝወሰድክለይዶ ውሒዱ፧ ፍረታት ማንድራጎራ ወደይ ድማዶ ኽትወስዲ፧” በለታ። ሽዑ፡ ራሄል፡ “ሕራይ፡ ኣብ ክንዲ ፍረታት ማንድራጎራ ወድኺ፡ እዛ ለይቲ እዚኣ ምሳኺ ይደቅስ” በለታ።
16 ምሸት ያእቆብ ካብ መሮር ኪኣቱ ኸሎ፡ ልያ ኽትቅበሎ ወጺኣ፡ “ብፍረታት ማንድራጎራ ወደይ ስለ እተኻረኹኻ፡ ናባይ ኢኻ እትኣቱ” በለቶ። በታ ለይቲ እቲኣ ኸኣ፡ ምስኣ ደቀሰ።
17 ኣምላኽ ድማ ንልያ ሰምዓ፡ ንሳ ኸኣ ጠነሰት፡ ንያእቆብ እውን ሓምሻይ ወዲ ወለደትሉ።
18 ሽዑ፡ ልያ፡ “ገረደይ ንሰብኣየይ ስለ ዝሃብኩ፡ ኣምላኽ ዓስበይ ሂቡኒ” ኢላ፡ ስሙ ይሳኮር ኣውጽኣትሉ።
19 ልያ ድማ መሊሳ ጠነሰት፡ ንያእቆብ ከኣ ሻድሻይ ወዲ ወለደትሉ።
20 ሽዑ፡ ልያ፡ “ኣምላኽ ጽቡቕ ህያብ ሂቡኒ። ሽዱሽተ ኣወዳት ስለ ዝወለድኩሉ፡ ሕጅስ ሰብኣየይ ኪጻወረኒ እዩ”+ ኢላ ስሙ ዛብሎን* ኣውጽኣትሉ። 21 ድሕርዚ ድማ፡ ጓል ወለደት፡ ስማ ኸኣ ዲና ኣውጽኣትላ።
22 ኣምላኽ ድማ ንራሄል ዘከራ፣ ኣምላኽ ከኣ ሰምዓ እሞ፡ ጥንሲ ኽትሕዝ ኣኽኣላ።
23 ንሳ ድማ ጠነሰት፡ ወዲ እውን ወለደት። ሽዑ፡ “ኣምላኽ ሕስራነይ ኣርሓቐለይ” በለት።
24 “የሆዋ ኻልእ ወዲ ይወስኸኒ” ኢላ ኸኣ ስሙ ዮሴፍ* ኣውጽኣትሉ።
25 ራሄል ንዮሴፍ ምስ ወለደት፡ ብኡብኡ ያእቆብ ንላባን፡ “ናብ ቦታይን ናብ ምድረይን ክኸይድ ኣሳናብተኒ።+ 26 ከመይ ከም እተገዛእኩኻ ኣጸቢቕካ ትፈልጦ ኢኻ እሞ፡ ክኸይድሲ፡ እተን ምእንታአን እተገዛእኩኻ ኣንስተይን ደቀይን ሃበኒ” በሎ።
27 ላባን ድማ፡ “ኣብ ቅድሚ ኣዒንትኻ ሞገስ እንተ ረኺበስ፡ የሆዋ ምእንታኻ ኢሉ ይባርኸኒ ኸም ዘሎ፡ ፋል ርእየ ኣለኹ” በሎ።
28 ኣስዕብ ኣቢሉ ኸኣ፡ “ዓስብኻ ንገረኒ እሞ፡ ክህበካ እየ” በለ።
29 ያእቆብ ድማ፡ “ከመይ ከም እተገዛእኩኻ፡ መጓሰኻ እውን ከመይ ከም ዝዀና ትፈልጥ ኢኻ።+ 30 ኣነ ቕድሚ ምምጻአይ ሒደት ነበራኻ፣ ኣነ ኻብ ዝመጽእ ኣትሒዙ ግና መጓሰኻ በዚሐንን ረቢሐንን እየን፡ የሆዋ ድማ ባሪኹካ እዩ። ሕጂኸ ንቤተይ ደኣ መዓስ ገለ ኽገብር እየ፧” በሎ።
31 ንሱ ኸኣ፡ “እንታይ እሞ ኽህበካ፧” በሎ። ያእቆብ ድማ ከምዚ በሎ፦ “ገለ እኳ ኣይትሃበኒ። እዚ ሓደ ነገር እዚ እንተ ጌርካለይ፡ መሊሰ ንመጓሰኻ ኽጓስየንን ክሕልወንን እየ።
32 ሎሚ፡ ብመንጎ ዅለን መጓሰኻ ኽሓልፍ እየ። ካብአን ከኣ ኵለን ትኳዕ ትኳዕን ጕራጕራን ኣባጊዕ፡ ኵሎም ደባን ቡናዊ ገንሸላት ኣባጊዕ፡ ጕራጕራን ትኳዕ ትኳዕን ዘበላ ኣጣል ፍለ። ካብ ሕጂ ንደሓር፡ ከምዚኣተን ዘበላ ዓስበይ ይኹና።
33 ኣብ መጻኢ ብዛዕባ ዓስበይ ክትጸባጸብ ምስ እትመጽእ፡ ጽድቀይ ኪምስክረለይ እዩ፣ ትኳዕ ትኳዕን ጕራጕራን ዘይኰና ኣጣልን ደባን ቡናዊ ዘይኰኑ ገንሸላትን ምሳይ እንተ ተረኺቦም፡ ከም እተሰርቀ ጌርካ ይቝጸር።”
34 ላባን ከኣ፡ “ሕራይ፡ ከምቲ ዘረባኻ ይኹን” በለ።
35 በታ መዓልቲ እቲኣ ድማ፡ ሽራጥ ሽራጥን ጕራጕራን ድቤላታት፡ ኵለን ትኳዕ ትኳዕን ጕራጕራን ኣጣል፡ ገለ ጻዕዳ ዘለዎም ዘበሉን ደባን ቡናዊ ዘለዎም ዘበሉን ገንሸላት ፈለየ፣ ኣብ ኢድ ደቁ ድማ ሃቦም።
36 ድሕርዚ፡ ኣብ መንጎኡን ኣብ መንጎ ያእቆብን መገዲ ሰለስተ መዓልቲ ኣረሓሓቐ፣ ያእቆብ ድማ ነተን ዝተረፋ መጓሰ ላባን ይጓሲ ነበረ።
37 ድሕርዚ፡ ያእቆብ ካብ ኣእዋም ሊብነን ለውዝን ዓርሞንን ጥሉል ኣባትር ወሲዱ፡ ነቲ ኣባትር ቀሊጡ ዕሮርባይ ገበሮ።
38 ነቲ ዕሮርባይ ዝገበሮ ኣባትር ድማ፡ ኣብ ቅድሚ እቲ እተን መጓሰ ኺሰትያሉ ዚመጻ ጋብላታት ገበሮ፣ ኪሰትያ ምስ ዚመጻ ኸኣ፡ ኣብ ቅድሚኡ ይስረራ ነበራ።
39 ስለዚ፡ እተን መጓሰ ኣብ ቅድሚ እቲ ኣባትር ይስረራ እሞ፡ እተን መጓሰ ሽራጥ ሽራጥን ትኳዕ ትኳዕን ጕራጕራን ይወልዳ ነበራ።
40 ያእቆብ ከኣ ነቶም ገንሸላት ፈለየ፣ ገጽ እተን መጓሰ ኸኣ ናብተን ኣብ መጓሰ ላባን ዚርከባ ሽራጥ ሽራጥን ኵለን ደባን ቡናውን ገበረ። ድሕርዚ፡ ንመጓሰኡ ፈለየን፡ ምስ መጓሰ ላባን ከኣ ኣይሓወሰንን።
41 በቲ እተን ብርቱዓት መጓሰ ዚስረራሉ እዋን፡ ኣብ ጥቓ እቲ ኣባትር ምእንቲ ኺስረራ፡ ያእቆብ ነቲ ኣባትር ኣብቲ ጋብላታት ኣብ ቅድሚ ኣዒንቲ እተን መጓሰ የንብሮ ነበረ።
42 እተን መጓሰ ድኹማት ኣብ ዝነበራሉ እዋን ግና፡ ነቲ ኣባትር ኣብኡ ኣየንብሮን ነበረ። ስለዚ፡ እተን ድኹማት ንላባን፡ እተን ብርቱዓት ግና ንያእቆብ ይዀና ነበራ።
43 እቲ ሰብኣይ ከኣ ኣዝዩ በልጸገ፡ ብዙሓት መጓሰን ገላዉን ኣግራድን ኣግማልን ኣእዱግን ድማ ነበሮ።

1 ደቂ ላባን ድማ፡ “እቲ ናይ ኣቦና ዘበለ ዅሉ ያእቆብ ወሲድዎ፣ ካብቲ ናይ ኣቦና ዘበለ ኸኣ ነዚ ዅሉ ሃብቲ ደሊቡ” ይብሉ ኸም ዝነበሩ ሰምዐ።
2 ያእቆብ፡ ገጽ ላባን ምስ ጠመተ፡ ንዕኡ ዝነበሮ ኣረኣእያ ኸም ቀደሙ ኸም ዘይኰነ ረኣየ።
3 የሆዋ ኸኣ ንያእቆብ፡ “ናብ ምድሪ ኣቦታትካን ኣዝማድካን ተመለስ፡ ኣነ እውን ምሳኻ ክኸውን እየ” በሎ።
4 ያእቆብ ድማ ልኢኹ ንራሄልን ንልያን ናብተን መጓሰኡ ናብ መሮር ጸውዐን፡
5 ከምዚ ኸኣ በለን፦
“ኣቦኽን ንዓይ ዘለዎ ኣረኣእያ ኸም እተቐየረ ርእየ እየ፣ ኣምላኽ ኣቦይ ግና ምሳይ ነበረ።
6 ንኣቦኽን ብዅሉ ሓይለይ ከም እተገዛእክዎ፡ ባዕልኻትክን ብርግጽ ትፈልጣ ኢኽን።
7 ኣቦኽን ከኣ ዓስበይ ዓሰርተ ሳዕ እናለዋወጠ ኣታሊሉኒ፣ ኣምላኽ ግና ኪጐድኣኒ ኣይፈቐደሉን።
8 በቲ ሓደ ሸነኽ፡ ‘ትኳዕ ትኳዕ ዘበላ ዓስብኻ ይኹና’ ምስ በለ፡ ኵለን እተን መጓሰ ትኳዕ ትኳዕ ወለዳ፣ በቲ ኻልእ ሸነኽ፡ ‘ሽራጥ ሽራጥ ዘበላ ዓስብኻ ይኹና’ ምስ በለ ኸኣ፡ ኵለን እተን መጓሰ ሽራጥ ሽራጥ ወለዳ።
9 በዚ ኸምዚ፡ ኣምላኽ ማል ኣቦኽን ኣግዲፉ ንዓይ ሃበኒ።
10 በቲ እተን መጓሰ ዚስረራሉ እዋን ኣዒንተይ ኣልዓልኩ፡ ብሕልሚ ኸኣ እቶም ነተን መጓሰ ዚሰርሩወን ድቤላታት፡ ሽራጥ ሽራጥን ትኳዕ ትኳዕን ነጠብጣብን ምዃኖም ረኣኹ።
11 ሽዑ፡ መልኣኽ እቲ ናይ ሓቂ ኣምላኽ ብሕልሚ፡ ‘ያእቆብ’ በለኒ፣ ኣነ ድማ፡ ‘እነኹ’ በልኩ።
12 ንሱ ኸኣ፡ ‘ኣዒንትኻ ኣልዕል እሞ፡ ኵሎም እዞም ነተን መጓሰ ዚሰርሩወን ዘለዉ ድቤላታት ሽራጥ ሽራጥን ትኳዕ ትኳዕን ነጠብጣብን ምዃኖም ርአ፣ ከመይሲ፡ እቲ ላባን ዝገበረካ ዅሉ ርእየዮ ኣለኹ።
13 ኣነ እቲ ሓወልቲ ኣብ ዝቐባእካሉን ንዓይ መብጽዓ ኣብ እተመባጻዕካሉን ቤት-ኤል እተረኣኹኻ ናይ ሓቂ ኣምላኽ እየ። ሕጂ ተንስእ እሞ፡ ካብዛ ምድሪ እዚኣ ናብታ እተወለድካላ ምድሪ ተመለስ’ በለኒ።”
14 ራሄልን ልያን ከኣ ከምዚ ኢለን መለሳሉ፦ “ደጊምዶ ኣብ ቤት ኣቦና እንወርሶ ግደ ኣልዩና፧
15 ካብ ሸጠናን ነቲ ምእንታና እተኸፍለ ገንዘብ ካብ በልዖን፡ ከም ጓኖት ቈጺሩናዶ ኣይኰነን፧
16 ኵሉ እቲ ኣምላኽ ካብ ኣቦና ዘግደፎ ሃብቲ ናትናን ናይ ደቅናን እዩ። ሕጂ እምበኣር፡ ኵሉ እቲ ኣምላኽ ዝበለካ ግበር።”
17 ሽዑ፡ ያእቆብ ተንሲኡ፡ ደቁን ኣንስቱን ኣብ ኣግማል ኣወጥሐ።
18 ንዅለን እተን መጓሰን ንዅሉ እቲ ዘጥረዮ ጥሪትን፡ ኣብ ጳዳን-ኣራም ዘጥረየን ማሉ፡ ወሲዱ ናብ ኣቦኡ ይስሃቅ ናብ ምድሪ ከነኣን ኪጕዓዝ ጀመረ።
19 ላባን ከኣ ኣባጊዕ ኪቕምቅም ከይዱ ነበረ፣ ራሄል ድማ ተራፊም ኣቦኣ ሰረቐት።
20 ያእቆብ ድማ ንላባን እቲ ኣራማዊ ገለ ኸይበሎ ስለ ዝሃደመ፡ ኣዐሸዎ።
21 ዘለዎ ዅሉ ሒዙ ኸኣ ሃደመ፡ ፈለግ እውን ተሳገረ። ናብ ኣኽራን ጊልዓድ ኣቢሉ ድማ ኣቕንዐ።
22 ኣብ ሳልሰይቲ መዓልቲ፡ ያእቆብ ከም ዝሃደመ፡ ንላባን ተነግሮ።
23 ንሱ ኸኣ ኣሕዋቱ* ምስኡ ወሲዱ፡ ደድሕሪኡ መገዲ ሸውዓተ መዓልቲ ሰዓበ፡ ኣብ ኣኽራን ጊልዓድ ከኣ ኣርከቦ።
24 ሽዑ፡ ኣምላኽ ብሕልሚ ለይቲ ናብ ላባን እቲ ኣራማዊ መጺኡ፡ “ብዛዕባ እቲ ንያእቆብ እትዛረቦ ጽቡቕ ወይ ክፉእ ተጠንቀቕ” በሎ።
25 ያእቆብ ድንኳኑ ኣብ ከረን ተኺሉ ኸሎ፡ ላባን ናብ ያእቆብ ቀረበ፣ ላባን ድማ ምስ ኣሕዋቱ ኣብ ኣኽራን ጊልዓድ ሰፈረ።
26 ሽዑ፡ ላባን ንያእቆብ ከምዚ በሎ፦ “እንታይ ኢኻ ዝገበርካ፧ ስለምንታይ ኢኻ ዘዐሾኻኒ፧ ስለምንታይከ ኢኻ ንኣዋልደይ ብሰይፊ ኸም እተማረኻ ዝኸብከብካየን፧
27 ስለምንታይ ኢኻ ኸይነገርካኒ ተሓቢእካ ዝሃደምካን ዘዐሾኻንን፧ እንተ ትነግረኒ፡ ብሓጐስን ብመዝሙርን ብኸበሮን ብመሰንቆን መሰናበትኩኻ ነይረ።
28 ንስኻ ግና ንደቂ ደቀይን ንኣዋልደይን ክስዕሞም እኳ ዕድል ኣይሃብካንን። ዕሽነት ኢኻ ጌርካ።
29 ክጐድኣኩም እኽእል እየ፣ ኣምላኽ ኣቦኹም ግና ትማሊ ለይቲ፡ ‘ብዛዕባ እቲ ንያእቆብ እትዛረቦ ጽቡቕ ወይ ክፉእ ተጠንቀቕ’ ኢሉ ተዛሪቡኒ እዩ።
30 ቤት ኣቦኻ ናፊቕካ ኻብ ከድካስ፡ ስለምንታይ ደኣ ኢኻ ኣማልኽተይ ዝሰረቕካ፧”
31 ያእቆብ ድማ ንላባን፡ “ኣዋልድካ ብሓይሊ ኸይተግድፈኒ ኢለ ስለ ዝፈራህኩ እየ።
32 እቲ ኣማልኽትኻ እተረኽቦ ኸኣ ብህይወት ኣይንበር። ኣብ ቅድሚ ኣሕዋትና ጐርጒርካ፡ ናትካ ዘበለ ውሰድ” ኢሉ መለሰሉ። ያእቆብ ግና፡ ራሄል ከም ዝሰረቐቶም ኣይፈለጠን ነበረ።
33 ላባን ድማ ናብ ድንኳን ያእቆብን ናብ ድንኳን ልያን ናብ ድንኳን ክልቲአን ባሮትን ኣተወ፣ ግናኸ ኣይረኸቦምን። ካብ ድንኳን ልያ ወጺኡ ኸኣ፡ ናብ ድንኳን ራሄል ኣተወ።
34 ራሄል ድማ ነቶም ተራፊም ወሲዳ፡ ኣብ ናይ ደቂ ኣንስትዮ ኮረሻ ገመል ኣእትያ፡ ኣብ ልዕሊኦም ኮፍ በለት። ላባን ከኣ ንብዘላ እታ ድንኳን ጐርጐራ፣ ግናኸ ኣይረኸቦምን።
35 ንሳ ኸኣ ንኣቦኣ፡ “ጐይታይ፡ እቲ ናይ ኣንስቲ ልምዲ መጺኡኒ እዩ እሞ፡ ኣብ ቅድሜኻ ሓፍ ክብል ብዘይምኽኣለይ፡ ኣይትቈጣዕ” በለቶ። ንሱ ድማ ኣጸቢቑ ጐርጐረ፣ ግናኸ ነቶም ተራፊም ኣይረኸቦምን።
36 ሽዑ፡ ያእቆብ ኣዝዩ ተቘጥዐ፡ ንላባን ድማ ነቐፎ። ያእቆብ ድማ ንላባን ከምዚ በሎ፦ “ደድሕረይ ዝሰዓብካስ፡ እንታይ እዩ በደለይ፧ እንታይከ እዩ ሓጢኣተይ፧
37 ሕጂ ንዅሉ ኣቕሖይ ጐርጒርካኸ፡ ካብ ኣቕሑ ቤትካ እንታይ ረኺብካ፧ ኣብ መንጎ ኽልቴና ኺፈርዱስ፡ ኣብዚ ኣብ ቅድሚ ኣሕዋተይን ኣሕዋትካን ኣንብሮ።
38 ኣብዘን ምሳኻ ዝነበርኩለን 20 ዓመት፡ ኣባጊዕካን ኣጣልካን ኣየቘልዓን፣ ደዓውል መጓሰኻ እውን ከቶ ኣይበላዕኩን።
39 ኣራዊት ዝሰላልዖ እንስሳ ባዕለይ ተካእኩልካ እምበር፡ ኣየምጻእኩልካን። መዓልቲ እተሰርቀ ዀነ ለይቲ እተሰርቀ እንስሳ ድማ፡ ካብ ኢደይ ትደልዮ ነበርካ።
40 ብመዓልቲ ሃሩር፡ ብለይቲ እውን ቍሪ ወዲኡኒ፡ ድቃስ ከኣ ካብ ዓይነይ በረረ።
41 በዚ ኸምዚ ኣብ ቤትካ 20 ዓመት ገበርኩ። 14 ዓመት ምእንቲ ኽልቲአን ኣዋልድካ፡ 6 ዓመት ከኣ ምእንቲ መጓሰኻ ተገዛእኩኻ፣ ዓስበይ ከኣ ዓሰርተ ሳዕ ለዋወጥካ።
42 ኣምላኽ ኣቦይ፡ ኣምላኽ ኣብርሃምን እቲ ይስሃቅ ዚፈርሆን፡ ምሳይ እንተ ዘይህሉስ፡ ሕጂ ጥራይ ኢደይ ምሰደድካኒ ኔርካ። ኣምላኽ ግና መከራይን ጻዕሪ ኢደይን ረኣየ፣ ስለዚ ድማ እዩ ትማሊ ለይቲ ዝገንሓካ።”
43 ላባን ድማ ንያእቆብ ከምዚ ኢሉ መለሰሉ፦ “እዘን ኣዋልድ፡ ኣዋልደይ እየን፣ እዞም ደቂ ኸኣ፡ ደቀይ እዮም፣ እዘን መጓሰ ድማ፡ መጓሰይ እየን፣ ኵሉ እዚ እትርእዮ ዘለኻ ኸኣ፡ ናተይን ናይ ኣዋልደይን እዩ። ሎሚ እሞ ኣብ ልዕሊ እዚኣተን ኰነ ኣብ ልዕሊ እቶም ዝወለዳኦም ደቀን እንታይ ክገብር እየ፧
44 ሕጂ ንዓ ኣነን ንስኻን ኪዳን ንተኣታቶ፣ ኣብ መንጎይን ኣብ መንጎኻን ድማ ምስክር ኪኸውን እዩ።”
45 ያእቆብ ከኣ እምኒ ወሲዱ ሓወልቲ ገይሩ ኣቘሞ።
46 ያእቆብ ድማ ንኣሕዋቱ፡ “ኣእማን እረዩ” በሎም። ኣእማን ወሲዶም ከኣ ጨርሒ ጨርሑ። ድሕሪኡ፡ ኣብቲ ጨርሒ በልዑ።
47 ላባን ድማ ይጋር-ሰሃዱታ ኢሉ ሰመዮ፣ ያእቆብ ከኣ ጋልዔድ ኢሉ ሰመዮ።
48 ሽዑ፡ ላባን፡ “ሎሚ እዚ ጨርሒ እዚ ኣብ መንጎይን ኣብ መንጎኻን ምስክር እዩ” በለ። ስለዚ፡ ስሙ ጋልዔድ ተባህለ፣
49 ግምቢ ዘብዐኛ እውን ተባህለ፣ ከመይሲ፡ “ንሓድሕድና ኣብ ዘይንርኣኣየሉ፡ የሆዋ ኣብ መንጎይን ኣብ መንጎኻን ይቋመት።
50 ንኣዋልደይ እንተ ገፊዕካየንን ኣብ ልዕሊ ኣዋልደይ ካልኦት ኣንስቲ እንተ ኣእቲኻን፡ ምሳና እኳ ሰብ እንተ ዘየልቦ፡ ኣምላኽ ኣብ መንጎይን ኣብ መንጎኻን ምስክር ምዃኑ ዘክር” ኢሉ ነበረ።
51 ላባን ድማ መሊሱ ንያእቆብ ከምዚ በሎ፦ “እንሆ እዚ ጨርሒ፡ እንሆ ኸኣ እዚ ኣብ መንጎይን ኣብ መንጎኻን ዝተኸልክዎ ሓወልቲ።
52 ኣነ ኽጐድኣካ ኢለ ነዚ ጨርሒ እዚ ኸይሓልፍ፡ ንስኻ እውን ክትጐድኣኒ ኢልካ ነዚ ጨርሒ እዝን ነዚ ሓወልቲ እዝን ከይትሓልፍ፡ እዚ ጨርሒ እዚ ምስክር እዩ፡ እዚ ሓወልቲ እዚ እውን ይምስክር እዩ።
53 ኣምላኽ ኣብርሃምን ኣምላኽ ናሆርን፡ ኣምላኽ ኣቦኦም፡ ኣብ መንጎና ይፍረድ።” ያእቆብ ድማ በቲ ኣቦኡ ይስሃቅ ዚፈርሆ፡ መሓለ።
54 ድሕርዚ፡ ያእቆብ ኣብቲ ኸረን መስዋእቲ ሰውአ፣ ንኣሕዋቱ ኸኣ እንጌራ ኺበልዑ ዓደሞም። በሊዖም ከኣ ኣብቲ ኸረን ሓደሩ።
55 ላባን ድማ ኣንጊሁ ተንስአ፡ ንደቂ ደቁን ንኣዋልዱን ከኣ ስዒሙ መረቖም። ድሕሪኡ፡ ላባን ነቒሉ ናብ ዓዱ ተመልሰ።

1 ያእቆብ ድማ መገዱ ኸደ፣ መላእኽቲ ኣምላኽ ከኣ ተጓነፍዎ።
2 ያእቆብ ርእይ ምስ ኣበሎም፡ “እዚ ሰፈር ሰራዊት ኣምላኽ እዩ” በለ። ስለዚ፡ እታ ቦታ እቲኣ ማሓናዪም ተባህለት።
3 ሽዑ፡ ያእቆብ ናብ ሓዉ ኤሳው፡ ናብ ምድሪ ሰዒር፡ ናብ ምድሪ ኤዶም ቀቅድሚኡ ልኡኻት ለኣኸ፣
4 ከምዚ ኢሉ ድማ ኣዘዞም፦ “ንጐይታይ ኤሳው ከምዚ በልዎ፦ ‘ጊልያኻ ያእቆብ ከምዚ ይብል፦ “ምስ ላባን ክሳዕ ሕጂ ንነዊሕ ግዜ ተቐሚጠ ነበርኩ።
5 ኣብዑርን ኣእዱግን ኣባጊዕን ገላዉን ኣግራድን ከኣ ኣጥረኹ፣ ኣብ ቅድሚ ኣዒንትኻ ሞገስ ምእንቲ ኽረክብ ድማ፡ እዚ መልእኽቲ እዚ ንጐይታይ ክነግር ለኣኽኩ።”’”
6 እቶም ልኡኻት ከኣ ናብ ያእቆብ ተመሊሶም፡ “ንኤሳው ሓውካ ረኺብናዮ፣ ንሱ ኸኣ ኪቀባበለካ ይመጽእ ኣሎ፣ ምስኡ እውን 400 ሰብኡት ኣለዉ” በልዎ።
7 ያእቆብ ከኣ ኣዝዩ ፈርሀ፡ ተጨነቐ እውን። ስለዚ፡ ነቶም ምስኡ ዝነበሩ ሰባትን ጤለ በጊዕን ከብትን ኣግማልን ኣብ ክልተ ሰፈር መቐለ።
8 “ኤሳው ነዚ ሓደ ሰፈር እንተ ኣጥቂዕዎ፡ እቲ ኻልእ ሰፈር ኬምልጥ ይኽእል” ከኣ በለ።
9 ድሕርዚ፡ ያእቆብ ከምዚ በለ፦ “ኦ ኣምላኽ ኣቦይ ኣብርሃምን ኣምላኽ ኣቦይ ይስሃቅን፡ ኣታ፡ ‘ናብ ምድርኻን ናብ ኣዝማድካን ተመለስ፡ ኣነ ድማ ጽቡቕ ክገብረልካ እየ’ ዝበልካኒ የሆዋ፡
10 እዚ ንጊልያኻ ጌርካዮ ዘለኻ ዅሉ ብተኣማንነት ዚርአ ፍቕርን ኵሉ ተኣማንነትን ዘይግብኣኒ እዩ። ከመይሲ፡ ነዛ ዮርዳኖስ እዚኣ በትረይ ጥራይ ሒዘ እየ እተሳገርክዋ፡ ሕጂ ግና ክልተ ሰፈር ኰይነ ኣለኹ
11 መጺኡ ኸየጥቅዓኒ፡+ ንኣዴታትን ንደቀንን ከኣ ከየጥቅዕ እፈርሆ ኣለኹ እሞ፡ በጃኻ ኻብ ኢድ ሓወይ ኤሳው ኣናግፈኒ
12 ‘ብርግጽ ጽቡቕ ክገብረልካ፡ ንዘርእኻ እውን ከምቲ ኻብ ብዝሑ እተላዕለ ዘይቍጸር ሑጻ ባሕሪ ኽገብሮ እየ’ ድማ ኢልካ ኢኻ።”
13 በታ ለይቲ እቲኣ ኸኣ፡ ኣብኣ ሓደረ። ካብቲ ጥሪቱ ድማ፡ ንሓዉ ኤሳው ህያብ ወሰደ፦
14 200 ጤልን 20 ድቤላን፡ 200 በጊዕን 20 ድዑልን፡
15 30 እተጥቡ ገመል መምስ ውላደን፡ 40 ላምን 10 ዝራብዕን፡ 20 ኣንስተይቲ ኣድግን 10 ተባዕታይ ኣድግን ሃቦ።
16 ነዚኣተን ከኣ በብመጋርያ ኸፋፊሉ ንገላዉኡ ሃቦም፣ ንገላዉኡ ድማ፡ “ቀቅድመይ ስገሩ፡ መጋርያ ኻብ መጋርያ ኸኣ ኣረሓሕቑ” በሎም። 17 ነቲ ቐዳማይ ድማ ከምዚ ኢሉ ኣዘዞ፦ “ሓወይ ኤሳው እንተ ተጓኒፉካ እሞ፡ ‘ናይ መን ኢኻ፧ ናበይከ ትኸይድ ኣለኻ፧ እዘን ቀቅድሜኻ ዘለዋኸ ናይ መን እየን፧’ ኢሉ እንተ ሓቲቱካ፡ 18 ‘ናይ ጊልያኻ ያእቆብ እየን። ንጐይታይ ኤሳው ዝሰደደን ህያብ እየን።+ እንሆ፡ ንሱ ብድሕሬና ኣሎ’ በሎ።”
19 ነቲ ኻልኣይን ነቲ ሳልሳይን ንዅሎም እቶም መጓሰ ዚኽብክቡን እውን ከምዚ ኢሉ ኣዘዞም፦ “ንኤሳው ምስ ረኸብኩምዎ፡ ከምዚ ዘረባ እዚ ተዛረብዎ።
20 ‘እንሆ፡ ጊልያኻ ያእቆብ ብድሕሬና ኣሎ’ እውን በልዎ።” ከመይሲ፡ ‘ቀቅድመይ ህያብ ብምልኣኽ እንተ ኣዝሒለዮ፡ ድሕሪኡ ምስ ረኣኽዎ ብጽቡቕ ይቕበለኒ ይኸውን’ ኢሉ ነበረ።
21 ስለዚ፡ እቲ ህያብ ቀቅድሚኡ ሰገረ፣ ንሱ ግና በታ ለይቲ እቲኣ ኣብቲ ሰፈር ሓደረ።
22 በታ ለይቲ እቲኣ ኸኣ፡ ተንሲኡ ኽልቲአን ኣንስቱን ክልቲአን ኣግራዱን 11 ደቁን ወሲዱ፡ መሳገሪ ያቦቅ ተሳገረ።
23 ወሲዱ ኸኣ፡ ርባ ኣሳገሮም፣ ዘለዎ ዅሉ ድማ ኣሳገረ።
24 ያእቆብ ግና በይኑ ተረፈ። ሽዑ፡ ሓደ ሰብኣይ ክሳዕ ዚወግሕ ተቓለሶ።
25 ኬሕምቖ ኸም ዘይክእል ምስ ረኣየ፡ መላግቦ ምሕኵልቱ ተንከዮ፣ ኪቃለሶ ኸሎ ኸኣ፡ መላግቦ ምሕኵልቲ ያእቆብ መለቘ።
26 ድሕርዚ፡ “ይወግሕ ኣሎ እሞ፡ ሕደገኒ” በሎ። ንሱ ኸኣ፡ “ከይባረኽካንስ ኣይሓድገካን እየ” በለ።
27 ሽዑ፡ ንሱ፡ “መን እዩ ስምካ፧” በሎ፣ ንሱ ድማ፡ “ያእቆብ” በለ።
28 ንሱ ኸኣ፡ “ምስ ኣምላኽን ምስ ሰብን ተቓሊስካ፡ ኣሕሚቕካ ኢኻ እሞ፡ ደጊም ስምካ እስራኤል ደኣ እምበር፡ ያእቆብ ኣይብሃልን” በሎ።
29 ያእቆብ ድማ፡ “በጃኻ ስምካ ንገረኒ” ኢሉ ሓተቶ። ንሱ ግና፡ “ስለምንታይ ብዛዕባ ስመይ ትሓትት፧” በለ።ኣብኡ ኸኣ ባረኾ።
30 ያእቆብ ድማ፡ “ንኣምላኽ ገጽ ንገጽ ርእየዮ ኽነሰይሲ፡ ህይወተይ ድሒና” ኢሉ ስም እታ ቦታ እቲኣ ጰኒኤል ኣውጽኣላ።
31 ንጰኑኤል ምስ ሓለፈ፡ ጸሓይ በረቐቶ፣ ንሱ ግና ብምኽንያት ምሕኵልቱ ይሕንክስ ነበረ።
32 ነቲ ምስ ጅማት ሰለፍ ዘሎ መላግቦ ምሕኵልቲ ያእቆብ ስለ ዝተንከዮ፡ ስለዚ ደቂ እስራኤል ክሳዕ እዛ መዓልቲ እዚኣ ነቲ ኣብ መላግቦ ምሕኵልቲ ዚርከብ ጅማት ሰለፍ ኣይበልዑን እዮም።

1 ያእቆብ ከኣ ኣዒንቱ ኣልዓለ፣ ኤሳው ምስ 400 ሰብኡት ኪመጽእ ድማ ረኣየ። ስለዚ፡ ነቶም ደቂ ኣብ መንጎ ልያን ራሄልን እተን ክልተ ኣግራድን መቓቐሎም።
2 ነተን ኣግራድን ንደቀንን ቅድሚት፡ ንልያን ንደቃን ድማ ደድሕሪኦም፡ ንራሄልን ንዮሴፍን ከኣ ድሕሪኦም ገበሮም።
3 ንሱ ድማ ቅድሚኦም ሓሊፉ፡ ናብ ሓዉ ኽሳዕ ዚበጽሕ ሸውዓተ ሳዕ ናብ ምድሪ ሰገደ።
4 ኤሳው ከኣ ኪቕበሎ ጐየየ፡ ሓቚፉ እውን ሰዓሞ፣ በኸዩ ድማ።
5 ኣዒንቱ ኣልዒሉ ኣንስትን ቈልዑን ምስ ረኣየ፡ “እዞም ምሳኻ ዘለዉ ደኣ እንታዎት እዮም፧” በለ። ንሱ ድማ፡ “ኣምላኽ ንጊልያኻ ዝጸገዎ ደቂ እዮም” በለ።
6 ሽዑ፡ እተን ኣግራድ ምስ ደቀን ቀሪበን ሰገዳ፣
7 ልያ እውን ምስ ደቃ ቐረበት፡ ሰገዱ ኸኣ። ድሕርዚ፡ ዮሴፍ ምስ ራሄል ቀረበ፡ ሰገዱ ድማ።
8 ኤሳው ከኣ፡ “እዚ ዅሉ ዘጓነፈኒ ሰፈር ተጓዓዝቲ ደኣኸ ንምንታይ እዩ፧” በሎ።+ ንሱ ድማ፡ “ኣብ ቅድሚ ኣዒንቲ ጐይታይ ሞገስ ክረክብ ኢለ እየ” ኢሉ መለሰ።
9 ኤሳው ከኣ፡ “ሓወየ፡ ኣዝዩ ብዙሕ ጥሪት ኣሎኒ። ናትካስ ንዓኻ ደኣ ይኹን” በለ።
10 ያእቆብ ግና፡ “ኣይፋልካን። ገጽካ ምእንቲ ኽርኢ ስለ ዘምጻእክዎ፡ ኣብ ቅድሚ ኣዒንትኻ ሞገስ እንተ ረኺበስ፡ በጃኻ ህያበይ ካብ ኢደይ ተቐበል። ባህ ኢሉካ ኻብ ተቐበልካንስ፡ ንገጽካ ገጽ ኣምላኽ ከም ምርኣይ ርእየዮ እየ።
11 ኣምላኽ ጸግዩኒ እዩ፡ ዜድልየኒ ዘበለ ዅሉ እውን ኣሎኒ እሞ፡ በጃኻ ነቲ ዝሰደድኩልካ ገጸ በረኸተይ ውሰዶ” በለ። ግዲ እውን በሎ፡ ንሱ ኸኣ ወሰዶ።
12 ጸኒሑ፡ ኤሳው፡ “ንንቀል እሞ ንኺድ፣ ኣነ ድማ ቀቅድሜኻ ክኸይድ እየ” በለ።
13 ንሱ ግና፡ “እዞም ቈልዑ ተነቀፍቲ ምዃኖም፡ ዜጥብዋ ኣባጊዕን ኣሓን ከኣ ከም ዘለዋኒ፡ ጐይታይ ይፈልጥ እዩ። ሓንቲ መዓልቲ እምብዛ እንተ ሃዊኾምወን፡ ኵለን መጓሰ ይሞታ።
14 ጐይታይሲ፡ ቀቅድሚ ጊልያኡ ደኣ ይሕለፍ፣ ኣነ ድማ ናብ ጐይታይ ኣብ ሰዒር ክሳዕ ዝበጽሕ፡ ከም ስጕምቲ እተን ማለይን ከም ስጕምቲ እቶም ቈልዑን ገይረ ቐስ እናበልኩ ኽመጽእ እየ” በሎ።
15 ኤሳው ከኣ፡ “እሞ ኻብዞም ምሳይ ዘለዉ ሰባት ክሓድገልካ” በለ። ንሱ ግና፡ “እዚኸ ስለምንታይ እዩ፧ ኣብ ቅድሚ ኣዒንቲ ጐይታይ ደኣ ሞገስ እርከብ” በለ።
16 ስለዚ፡ በታ መዓልቲ እቲኣ ኤሳው ናብ ሰዒር ኣቢሉ ተመልሰ።
17 ያእቆብ ድማ ናብ ሱኮት ተጓዕዘ፣ ንዕኡ ኸኣ ቤት ሃነጸ፡ ንመጓሰኡ እውን ዳሳት ሰርሐ። ስለዚ፡ ነታ ቦታ እቲኣ ሱኮት ኢሉ ሰመያ።
18 ያእቆብ ካብ ጳዳን-ኣራም ተጓዒዙ፡ ናብታ ኣብ ምድሪ ከነኣን ዘላ ኸተማ ሴኬም+ ብደሓን በጽሐ፣ ኣብ መንጽር እታ ኸተማ ኸኣ ሰፈረ።
19 እታ ድንኳኑ ዝተኸለላ ኽፋል ግራት ድማ፡ ካብ ደቂ ሓሞር፡ ኣቦ ሴኬም፡ ብ100 ቀሲጣ ዓደጋ።
20 ድሕርዚ፡ ኣብኣ መሰውኢ ኣቘመ እሞ፡ ኣምላኽ፡ ኣምላኽ እስራኤል ኢሉ ሰመዮ።

1 እታ ልያ ንያእቆብ ዝወለደትሉ ዲና ጓላ፡ ምስ ኣዋልድ እታ ምድሪ እቲኣ ግዜ ንምሕላፍ ትወጽእ ነበረት።
2 ሴኬም ወዲ ሓሞር እቲ ሒዋዊ፡ ሹም እታ ምድሪ እቲኣ፡ ምስ ረኣያ፡ ወሲድዋ ምስኣ ደቀሰ፡ ዓመጻ ድማ።
3 ንሱ ኸኣ ንዲና ጓል ያእቆብ ኣዝዩ ፈተዋ፣ ምስታ ጓል ድማ ፍቕሪ ሓዞ፡ ንልባ ብዜእምን እውን ተዛረባ።
4 ሴኬም ከኣ ንኣቦኡ ሓሞር፡ “ነዛ ጓል እዚኣ ሰበይተይ ክትኰነኒ ኣምጽኣለይ” በሎ።
5 ያእቆብ ድማ ንሱ ንጓሉ ዲና ኸም ዘርከሳ ኣብ ዝሰምዓሉ እዋን፡ ደቁ ምስ መጓሰኡ ኣብ መሮር ነበሩ። ስለዚ፡ ያእቆብ ክሳዕ ዚምለሱ፡ ስቕ በለ።
6 ጸኒሑ፡ ሓሞር ኣቦ ሴኬም ምስ ያእቆብ ኪዛረብ ከደ።
7 ደቂ ያእቆብ ከኣ ብዛዕባኡ ሰሚዖም፡ ብኡብኡ ኻብ መሮር ተመልሱ። ምስ ጓል ያእቆብ ብምድቃሱ፡ ኣብ እስራኤል ኪግበር ዘይግባእ ነውሪ ስለ ዝገበረ፡ ጐሃዩን ኣዝዮም ተቘጥዑን።
8 ሓሞር ድማ ከምዚ ኢሉ ተዛረቦም፦ “ወደይ ሴኬም ንጓልኩም ኣዝዩ ይምነያ እዩ። በጃኹም ሰበይቱ ኽትኰኖ ሃብዎ፣
9 ምሳና ኸኣ ተዋሰቡ። ኣዋልድኩም ሃቡና፡ ንዓኻትኩም እውን ኣዋልድና ውሰዱ።
10 ምሳና ድማ ክትቅመጡ ትኽእሉ ኢኹም፣ እዛ ምድሪ እዚኣ ኣብ ቅድሜኹም ኣላ። ኣብኣ ተቐሚጥኩም ንገዱላን ስፈርዋን።”
11 ሴኬም ከኣ ንኣቦኣን ንኣሕዋታን፡ “ኣብ ቅድሚ ኣዒንትኹም ሞገስ እርከብ እምበር፡ ዝበልኩምኒ ዘበለ ኽህብ እየ።
12 ኣዝዩ ብዙሕ ገዝምን ህያብን ክትእዝዙኒ ትኽእሉ ኢኹም። ዝበልኩምኒ ዘበለ ኽህብ ፍቓደኛ እየ። ሓንትስ ነታ ጓል ደኣ ሰበይቲ ኽትኰነኒ ሃቡኒ” በሎም።
13 ደቂ ያእቆብ ከኣ፡ ንሱ ንሓብቶም ዲና ስለ ዘርከሳ፡ ንሴኬምን ንኣቦኡ ሓሞርን ብተንኰል ተዛረብዎም። 14 ከምዚ ድማ በልዎም፦ “ሓብትና ንዘይተገዝረ ሰብኣይ ክንህብ፡ እዚ የነውረና እዩ እሞ፡ ከምኡ ኽንገብር ኣይንኽእልን ኢና።
15 ኵሉ ተባዕታይኩም ብምግዛር ከማና እንተ ዄንኩም፡ በዚ ጥራይ ኢና ሕራይ እንብለኩም።
16 ሽዑ፡ ኣዋልድና ንህበኩም፡ ንዓና ኸኣ ኣዋልድኩም ንወስድ፣ ምሳኻትኩም ድማ ንቕመጥ፡ ሓደ ህዝቢ እውን ንኸውን።
17 ክትግዘሩ እንተ ዘይሰሚዕኩምና ግና፡ ጓልና ሒዝና ንኸይድ።”
18 ዘረባኦም ከኣ ንሓሞርን ንሴኬም ወዲ ሓሞርን ባህ ኣበሎም።
19 እቲ ጐበዝ ድማ ብጓል ያእቆብ ደስ ኢልዎ ስለ ዝነበረ፡ ከምቲ ዝበልዎ ንምግባር ኣይደንጐየን፣ ኣብ ቤት ኣቦኡ ኻብ ዘለዉ ዅሎም ከኣ ንሱ ይኸብር ነበረ።
20 ሓሞርን ወዱ ሴኬምን ድማ ናብ ኣፍ ደገ እታ ኸተማ ኸይዶም፡ ንሰብ እታ ኸተማኦም ከምዚ ኢሎም ተዛረብዎም፦
21 “እዞም ሰባት እዚኦም ምሳና ብሰላም ኪነብሩ እዮም ዚደልዩ። እዛ ምድሪ እዚኣ ንዓታቶም እትኣክል ገፋሕ እያ እሞ፡ ኣብዛ ምድሪ እዚኣ ይቀመጡን ይንገዱላን። ኣዋልዶም ንዓና ኣንስቲ ኪዀናና ኽንወስድ፡ ኣዋልድና እውን ንዓታቶም ክንህቦም ንኽእል ኢና።
22 እዞም ሰባት እዚኦም ግና ምሳና ኪቕመጡን ሓደ ህዝቢ ኪዀኑን ሕራይ ዚብሉና፡ በዚ ሓደ ነገር ጥራይ እዩ፦ ከምቲ ንሳቶም ግዙራት ዝዀኑ፡ ኵሉ ተባዕታይና ይገዘር።
23 ሽዑ፡ ጥሪቶምን ሃብቶምን ማሎምን ናትና ደይኰነን ዚኸውን፧ ስለዚ፡ ምሳና ምእንቲ ኪቕመጡ፡ ንሕና እውን ሕራይ ንበሎም።”
24 ኵሎም እቶም ብኣፍ ደገ ኸተማኡ ዝወጹ፡ ንሓሞርን ንወዱ ሴኬምን ሰምዕዎም፣ እቶም ብኣፍ ደገ እታ ኸተማ ዝወጹ ዘበሉ ዅሎም ተባዕትዮ ድማ ተገዝሩ።
25 ኣብ ሳልሰይቲ መዓልቲ ኪቕንዘዉ ኸለዉ ግና፡ ክልተ ደቂ ያእቆብ፡ ስምኦንን ሌዊን፡ ኣሕዋት ዲና፡ ሰሰይፎም ወሲዶም፡ ናብታ ኸተማ ብድንገት ከይዶም፡ ተባዕታይ ዘበለ ዅሉ ቐተሉ።
26 ንሓሞርን ንወዱ ሴኬምን ድማ ብሰይፊ ቐቲሎም፡ ንዲና ኻብ ቤት ሴኬም ወሲዶምዋ ኸዱ።
27 ካልኦት ደቂ ያእቆብ ከኣ ናብቶም ቅቱላት መጺኦም፡ ንሓብቶም ስለ ዘርከስዋ፡ ነታ ኸተማ ዘመትዋ።
28 ጤለ በጊዕን ከብትን ኣእዱግን ኣብታ ኸተማ ዀነ ኣብ መሮር ዝነበረ ዘበለን ወሰዱ።
29 ኵሉ ጥሪቶም ወሰዱ፡ ንዅሎም ቈልዑኦምን ኣንስቶምን ማረኹ፡ ኣብ ኣባይቲ እተረኽበ ዘበለ ዅሉ ድማ ዘመቱ።
30 ያእቆብ ከኣ ንስምኦንን ንሌዊን፡ “ኣብ መንጎ እዞም ነበርቲ እዛ ምድሪ፡ ኣብ መንጎ ከነኣናውያንን ፈረዛውያንን፡ ሕማቕ ጨና ስለ ዝገበርኩምኒ፡ ብዙሕ ጭንቂ ኣምጺእኩምለይ። ኣነ ብቝጽሪ ሒደት እየ፣ ንሳቶም ከኣ ብርግጽ ተኣኪቦም ኬጥቅዑኒ እዮም፣ ኣነን ቤተይን ከኣ ክንጠፍእ ኢና” በሎም።
31 ንሳቶም ድማ፡ “ኣብ ሓብትናዶ ደኣ ኸም ኣብ ኣመንዝራ ኺግበር እዩ፧” በሉ።

1 ድሕርዚ፡ ኣምላኽ ንያእቆብ፡ “ተንስእ እሞ ናብ ቤት-ኤል ደይብ፡ ኣብኣ እውን ተቐመጥ፣ ኣብኣ ድማ ነቲ ኻብ ሓውካ ኤሳው ክትሃድም ከለኻ እተራእየካ ናይ ሓቂ ኣምላኽ መሰውኢ ግበር” በሎ።
2 ሽዑ፡ ያእቆብ ንቤተ ሰቡን ንዅሎም እቶም ምስኡ ዝነበሩን፡ “ኣብ ማእከልኩም ዘለዉ ጓኖት ኣማልኽቲ ኣርሕቑ፡ ጽረዩ፡ ክዳውንትኹም እውን ለውጡ፣
3 ንተንስእ፡ ናብ ቤት-ኤል ድማ ንደይብ። ኣብኣ ኸኣ ነቲ ብመዓልቲ ጭንቀይ ዝመለሰለይን ኣብ ዝኸድክዎ ዘበለ ምሳይ ዝነበረን ናይ ሓቂ ኣምላኽ መሰውኢ ኽገብር እየ” በሎም።
4 ምሳታቶም ዝነበሩ ዅሎም ጓኖት ኣማልኽትን ኣብ ኣእዛኖም ዝነበረ ቐላብትን ድማ ንያእቆብ ሃብዎ፣ ያእቆብ ከኣ ኣብ ትሕቲ እቲ ኣብ ጥቓ ሴኬም ዝነበረ ዓብዪ ኦም ቀበሮ።
5 ጕዕዞኦም ምስ ቀጸሉ ኸኣ፡ ኣብተን ኣብ ዙርያኦም ዝነበራ ኸተማታት ካብ ኣምላኽ ሽበራ ስለ ዝዀነ፡ ንደቂ ያእቆብ ኣይሰጐጕዎምን።
6 ያእቆብ ምስ ኵሉ እቲ ምስኡ ዝነበረ ህዝቢ ናብታ ኣብ ምድሪ ከነኣን እትርከብ ሉዝ፡ ንሳ ድማ ቤት-ኤል፡ መጸ።
7 ኣብኣ ኸኣ መሰውኢ ሰርሐ፣ ካብ ሓዉ ኺሃድም ከሎ፡ እቲ ናይ ሓቂ ኣምላኽ ኣብኣ ስለ እተገልጸሉ ድማ፡ ነታ ቦታ እቲኣ ኤል-ቤት-ኤል ኢሉ ሰመያ።
8 ዴቦራ፡ መጕዚት ርብቃ፡ ኸኣ ሞተት፣ ኣብ ትሕቲ ቤት-ኤል፡ ኣብ ትሕቲ ሓደ ገዚፍ ኦም ድማ ተቐብረት። ስለዚ ኸኣ፡ ኣሎን-ባኹት ኢሉ ሰመዮ።
9 ያእቆብ ካብ ጳዳን-ኣራም ኪመጽእ ከሎ፡ ኣምላኽ ከም ብሓድሽ ተራእዮ፡ ባረኾ ኸኣ።
10 ኣምላኽ ድማ፡ “ስምካ ያእቆብ እዩ። ድሕሪ ደጊም ስምካ ያእቆብ ኣይኪብሃልን እዩ፣ የግዳስ፡ ስምካ እስራኤል ኪብሃል እዩ” በሎ። እስራኤል ኢሉ እውን ኪጽውዖ ጀመረ።
11 ኣምላኽ ከኣ ኣስዒቡ፡ “ኣነ እቲ ዅሉ ዚኽእል ኣምላኽ እየ። ፍረን ተባዛሕን። ኣህዛብን ጭፍራ ኣህዛብን ካባኻ ኺወጹ እዮም፣ ነገስታት ከኣ ካባኻ ኺውለዱ እዮም።
12 እታ ንኣብርሃምን ንይስሃቅን ዝሃብክዎም ምድሪ፡ ንዓኻ ኽህበካ እየ፣ ብድሕሬኻ ድማ እታ ምድሪ ንዘርእኻ ኽህቦ እየ” በሎ።
13 ድሕርዚ፡ ኣምላኽ ካብታ ምስኡ እተዛረበላ ቦታ ደየበ።
14 ያእቆብ ከኣ ኣብታ ምስኡ እተዛረበላ ቦታ ሓወልቲ፡ ሓወልቲ እምኒ፡ ኣቘመ፣ ኣብ ልዕሊኡ ድማ መስዋእቲ መስተ ኣፍሰሰ፡ ኣብ ልዕሊኡ እውን ዘይቲ ኣፍሰሰ።
15 ያእቆብ ከኣ ነታ ኣምላኽ ምስኡ እተዛረበላ ቦታ፡ ቤት-ኤል ኢሉ ይጽውዓ ነበረ።
16 ካብ ቤት-ኤል ድማ ተላዕሉ። ናብ ኤፍራታ ኺበጽሑ ገና ገለ ርሕቐት ተሪፍዎም ከሎ ኸኣ፡ ራሄል ሕርሲ ተታሕዘት፣ ሽዑ፡ ጻዕሪ ኣዝዩ በርትዓ።
17 ብሕርሲ ኽትጽዓር ከላ ግና፡ እታ መሕረሲት፡ “ሕጂ እውን ወዲ ረኺብኪ ኢኺ እሞ፡ ኣይትፍርሂ” በለታ። 18 ክትመውት ኢላ፡ ህይወታ ኽትሓልፍ ከላ፡ ቤን-ኦኒ ኢላ ሰመየቶ፣ ኣቦኡ ግና ብንያም ኢሉ ሰመዮ።
19 ራሄል ከኣ ሞተት፣ ኣብ መገዲ ኤፍራታ፡ ንሳ ኸኣ ቤት-ልሄም፡ ድማ ተቐብረት።
20 ሽዑ፡ ያእቆብ ኣብ መቓብራ ሓወልቲ ኣቘመ፣ ክሳዕ እዛ መዓልቲ እዚኣ ኸኣ፡ ንሱ ሓወልቲ መቓብር ራሄል እዩ።
21 ድሕርዚ፡ እስራኤል ካብኡ ተላዒሉ ድንኳኑ ኽንየው ግምቢ ዔደር ተኸለ።
22 እስራኤል ኣብታ ምድሪ እቲኣ ተቐሚጡ ኸሎ፡ ሮቤል ከይዱ ምስ ቢልሃ ሰበይቲ ወሰን ኣቦኡ ደቀሰ፣ እስራኤል ከኣ ሰምዐ።
ኣወዳት ያእቆብ ድማ 12 ነበሩ።
23 ደቂ ልያ፡ እቲ በዅሪ ያእቆብ ዝዀነ ሮቤልን ስምኦንን ሌዊን ይሁዳን ይሳኮርን ዛብሎንን ነበሩ።
24 ደቂ ራሄል፡ ዮሴፍን ብንያምን ነበሩ።
25 ደቂ ቢልሃ ገረድ ራሄል፡ ዳንን ንፍታሌምን ነበሩ።
26 ደቂ ዚልጳ ገረድ ልያ ኸኣ፡ ጋድን ኣሴርን ነበሩ። እዚኣቶም ኣብ ጳዳን-ኣራም እተወልዱሉ ደቂ ያእቆብ እዮም።
27 ያእቆብ ድማ ናብታ ኣቦኡ ይስሃቅ ዝነበረላ መምሬ፡ ናብ ቂርያት-ኣርባዕ፡ መጸ፣ ንሳ ኸኣ እታ ኣብርሃምን ይስሃቅን ጓኖት ኰይኖም እተቐመጡላ ኬብሮን እያ።
28 ይስሃቅ ድማ 180 ዓመት ነበረ።
29 ይስሃቅ ድማ ትንፋሱ ሓለፈት እሞ ሞተ፡ ኣሪጉን ዕድመ ጸጊቡን ከኣ ናብ ህዝቡ ተኣከበ፣ ደቁ ኤሳውን ያእቆብን ድማ ቀበርዎ።

1 ታሪኽ ኤሳው፡ ንሱ ድማ ኤዶም፡ እዚ እዩ።
2 ኤሳው ካብ ኣዋልድ ከነኣን ኣንስቲ ኣእተወ፦ ዓዳ ጓል ኤሎን እቲ ሔታውን ኦሆሊባማ ጓል ዓና ጓል ወዱ ንጺብዖን እቲ ሔታውን
3 ባስማት ጓል እስማኤል ሓብቲ ነባዮትን።
4 ዓዳ ኸኣ ንኤሳው፡ ኤሊፋዝ ወለደትሉ፣ ባስማት ድማ ንረዑኤል ወለደት።
5 ኦሆሊባማ ኸኣ ንየዑሽን ንያዕላምን ንቆራሕን ወለደት።
እዚኣቶም ኣብ ምድሪ ከነኣን እተወልዱሉ ደቂ ኤሳው እዮም።
6 ድሕርዚ፡ ኤሳው ኣንስቱን ኣወዳቱን ኣዋልዱን ኵለን ኣባላት ቤተ ሰቡን መጓሰኡን ኵሉ ዝተረፈ እንስሳኡን ኣብ ምድሪ ከነኣን ዘጥረዮ ዅሉ ሃብቱን ወሰደ፡ ካብ ሓዉ ያእቆብ ርሒቑ ኸኣ ናብ ካልእ ምድሪ ኸደ።
7 ከመይሲ፡ ብሓደ ኸይቅመጡ እቲ ጥሪቶም ኣመና በዚሑ ነበረ እሞ፡ ብምኽንያት መጓሰኦም እታ ዚቕመጡላ ዝነበሩ ምድሪ ኽትጾሮም ኣይከኣለትን።
8 ስለዚ፡ ኤሳው ኣብ ኣኽራን ሰዒር ተቐመጠ። ኤሳው፡ ኤዶም እዩ።
9 ታሪኽ ኤሳው ኣቦ ኤዶማውያን ኣብ ኣኽራን ሰዒር እዚ እዩ።
10 ስማት ደቂ ኤሳው እዚ እዩ፦ ኤሊፋዝ ወዲ ዓዳ ሰበይቲ ኤሳው፣ ረዑኤል ወዲ ባስማት ሰበይቲ ኤሳው።
11 ደቂ ኤሊፋዝ ከኣ፡ ቴማንን ኦማርን ጼፎን ጋዕታምን ቄናዝን እዮም።
12 ቲምናዕ ድማ ሰበይቲ ወሰኑ ንኤሊፋዝ ወዲ ኤሳው ኰነት። ንሳ ኸኣ ንኤሊፋዝ፡ ኣማሌቅ ወለደትሉ። እዚኣቶም ደቂ ዓዳ ሰበይቲ ኤሳው እዮም።
13 ደቂ ረዑኤል እዚኣቶም እዮም፦ ናሓትን ዜራሕን ሻማን ሚዛን። እዚኣቶም ደቂ ባስማት ሰበይቲ ኤሳው እዮም።
14 ደቂ ኦሆሊባማ ጓል ዓና ጓል ወዱ ንጺብዖን ሰበይቲ ኤሳው፡ ንኤሳው ዝወለደትሉ እዚኣቶም እዮም፦ የዑሽን ያዕላምን ቆራሕን።
15 ሹማምንቲ ደቂ ኤሳው እዚኣቶም እዮም ደቂ ኤሊፋዝ በዅሪ ኤሳው፦ ሹም ቴማን፡ ሹም ኦማር፡ ሹም ጼፎ፡ ሹም ቄናዝ፡
16 ሹም ቆራሕ፡ ሹም ጋዕታም፡ ሹም ኣማሌቅ። እዚኣቶም ሹማምንቲ ኤሊፋዝ ኣብ ምድሪ ኤዶም እዮም። እዚኣቶም ደቂ ዓዳ እዮም።
17 ደቂ ረዑኤል ወዲ ኤሳው እዚኣቶም እዮም፦ ሹም ናሓት፡ ሹም ዜራሕ፡ ሹም ሻማ፡ ሹም ሚዛ። እዚኣቶም ሹማምንቲ ረዑኤል ኣብ ምድሪ ኤዶም እዮም። እዚኣቶም ደቂ ባስማት ሰበይቲ ኤሳው እዮም።
18 ደቂ ኦሆሊባማ ሰበይቲ ኤሳው ድማ እዚኣቶም እዮም፦ ሹም የዑሽ፡ ሹም ያዕላም፡ ሹም ቆራሕ። እዚኣቶም ሹማምንቲ ኦሆሊባማ ጓል ዓና ሰበይቲ ኤሳው እዮም።
19 እዚኣቶም ደቂ ኤሳው እዮም፣ እዚኣቶም ከኣ ሹማምንቶም እዮም። ንሱ ኤዶም እዩ።
20 ደቂ ሰዒር እቲ ሖራዊ፡ ነበርቲ እታ ምድሪ እቲኣ እዚኣቶም እዮም ሎጣንን ሾባልን ጺብዖንን ዓናን
21 ዲሾንን ኤጸርን ዲሻንን። እዚኣቶም ሹማምንቲ ሖራውያን ደቂ ሰዒር ኣብ ምድሪ ኤዶም እዮም።
22 ደቂ ሎጣን ከኣ ሖሪን ሄማምን እዮም፣ ሓብቲ ሎጣን ድማ ቲምናዕ እያ።
23 ደቂ ሾባል እዚኣቶም እዮም፦ ዓልዋንን ማናሓትን ዔባልን ሸፎን ኦናምን።
24 ደቂ ጺብዖን እዚኣቶም እዮም ኣያን ዓናን። እዚ ዓና እዚ፡ ኣእዱግ ኣቦኡ ጺብዖን ኣብ በረኻ ኺጓሲ ኸሎ፡ ዓይንታት ማይ ውዑይ ዝረኸበ እዩ።
25 ደቂ ዓና እዚኣቶም እዮም፦ ዲሾንን ኦሆሊባማ ጓል ዓናን።
26 ደቂ ዲሾን እዚኣቶም እዮም፦ ሔምዳንን ኤሽባንን ዪትራንን ከራንን።
27 ደቂ ኤጸር እዚኣቶም እዮም፦ ቢልሃንን ዛዕዋንን ዓቃንን።
28 ደቂ ዲሻን እዚኣቶም እዮም፦ ዑጽን ኣራንን።
29 ሹማምንቲ ሖራውያን እዚኣቶም እዮም፦ ሹም ሎጣን፡ ሹም ሾባል፡ ሹም ጺብዖን፡ ሹም ዓና፡
30 ሹም ዲሾን፡ ሹም ኤጸር፡ ሹም ዲሻን። እዚኣቶም ሹማምንቲ ሖራውያን በብሹማምንቶም ኣብ ምድሪ ሰዒር እዮም።
31 ኣብ ልዕሊ እስራኤላውያን ንጉስ ከይነገሰ ኸሎ፡+ ኣብ ምድሪ ኤዶም ዝነገሱ ነገስታት እዚኣቶም እዮም። 32 ቤላዕ ወዲ ቤዖር ኣብ ኤዶም ነገሰ፣ ስም ከተማኡ ኸኣ ዲንሃባ ነበረ።
33 ቤላዕ ምስ ሞተ፡ ዮባብ ወዲ ዜራሕ ካብ ቦጽራ ኣብ ክንዳኡ ነገሰ።
34 ዮባብ ምስ ሞተ፡ ሑሻም ካብ ምድሪ ቴማናውያን ኣብ ክንዳኡ ነገሰ።
35 ሑሻም ምስ ሞተ፡ እቲ ንሚድያናውያን ኣብ ምድሪ ሞኣብ ዝሰዓረ ሃዳድ ወዲ በዳድ ኣብ ክንዳኡ ነገሰ፣ ስም ከተማኡ ድማ ዓዊት ነበረ።
36 ሃዳድ ምስ ሞተ፡ ሳምላ ኻብ ማስሬቃ ኣብ ክንዳኡ ነገሰ።
37 ሳምላ ምስ ሞተ፡ ሻኡል ካብታ ኣብ ጥቓ ፈለግ ዘላ ረሖቦት ኣብ ክንዳኡ ነገሰ።
38 ሻኡል ምስ ሞተ፡ በዓል-ሓናን ወዲ ዓኽቦር ኣብ ክንዳኡ ነገሰ።
39 በዓል-ሓናን ወዲ ዓኽቦር ምስ ሞተ፡ ሃዳር ኣብ ክንዳኡ ነገሰ። ስም ከተማኡ ኸኣ ጳዑ ነበረ፣ ስም ሰበይቱ ድማ ሜሄጣብኤል እዩ፣ ንሳ ጓል ማጥሬድ ጓል ሜዛሃብ እያ።
40 ስማት ሹማምንቲ ኤሳው ከከም ዓሌቶም፡ ከከም ቦታኦም፡ በብስማቶም እዚ እዩ፦ ሹም ቲምናዕ፡ ሹም ዓልዋ፡ ሹም የቴት፡
41 ሹም ኦሆሊባማ፡ ሹም ኤላህ፡ ሹም ጲኖን፡
42 ሹም ቄናዝ፡ ሹም ቴማን፡ ሹም ሚብጻር፡
43 ሹም ማግዲኤል፡ ሹም ዒራም። እዚኣቶም ከከም ሰፈሮም ኣብ ምድሪ ርስቶም ዘለዉ ሹማምንቲ ኤዶም እዮም። እዚ ኤሳው ኣቦ ኤዶም እዩ።

1 ያእቆብ ድማ ኣብታ ኣቦኡ ጓና ዀይኑ ዚነብረላ ዝነበረ ምድሪ ከነኣን ተቐመጠ።
2 ታሪኽ ያእቆብ እዚ እዩ።
ዮሴፍ ወዲ 17 ዓመት መንእሰይ ምስ ኰነ፡ ምስ ደቂ ቢልሃን ደቂ ዚልጳን ኣንስቲ ኣቦኡ መጓሰ ይጓሲ ነበረ። ዮሴፍ ከኣ ብዛዕባኦም ክፉእ ወረ ንኣቦኦም የምጽኣሉ ነበረ።
3 እስራኤል ድማ ንዮሴፍ፡ ኣብ እርጋኑ ስለ ዝወለዶ፡ ሓለፋ ዅሎም ደቁ ይፈትዎ ነበረ፣ ወለል ዚብል ብሉጽ ክዳን ድማ ኣስርሓሉ።
4 እቶም ኣሕዋቱ፡ ኣቦኦም ሓለፋ ዅሎም ኣሕዋቱ ኸም ዚፈትዎ ምስ ረኣዩ፡ ኪጸልእዎ ጀመሩ፣ ብሰላም ኪዛረብዎ ድማ ኣይከኣሉን።
5 ዮሴፍ ከኣ ሕልሚ ሓለመ፡ ንኣሕዋቱ ድማ ነገሮም፣ ንሳቶም ከኣ ተወሳኺ መጽልኢ ረኸቡሉ።
6 ንሱ ድማ፡ “በጃኹም ዝሓለምክዎ ሕልሚ ስምዑ።
7 እንሆ፡ ንሕና ኣብ ማእከል ግራት እንዳእቲ ኽንኣስር ከለና፡ እንዳእተይ ተንሲኣ ትኽ በለት፣ እንዳእትታትኩም ከኣ ንእንዳእተይ ከቢበን ሰገዳላ” በሎም።
8 ሽዑ፡ ኣሕዋቱ፡ “ብሓቂዶ ኣብ ልዕሌና ኽትነግስን ክትገዝኣናን ኢኻ፧” በልዎ። ብምኽንያት ሕልምታቱን ዘረባኡን ከኣ፡ ካልእ መጽልኢ ረኸቡሉ።
9 ካልእ ሕልሚ ድማ ሓለመ፡ ንኣሕዋቱ ኸኣ፡ “ካልእ ሕልሚ ሓሊመ። ጸሓይን ወርሕን 11 ኸዋኽብትን ይሰግዱለይ ነበሩ” ኢሉ ነገሮም።
10 ንኣቦኡን ንኣሕዋቱን ድማ ነገሮም፣ ኣቦኡ ኸኣ፡ “እዚ ዝሓለምካዮ እንታይ ሕልሙ እዩ፧ ብሓቂዶ ኣነን ኣዴኻን ኣሕዋትካን መጺእና ናብ ምድሪ ተደፊእና ኽንሰግደልካ ኢና፧” ኢሉ ገንሖ።
11 ኣሕዋቱ ኸኣ መሊሶም ቀንኡሉ፣ ኣቦኡ ግና ነዚ ዘረባ እዚ ኣብ ልቡ የዋህልሎ ነበረ።
12 ኣሕዋቱ ድማ ንመጓሰ ኣቦኦም ኬብልዑ ናብ ጥቓ ሴኬም ከዱ።
13 ድሕሪ እተወሰነ ግዜ፡ እስራኤል ንዮሴፍ፡ “ኣሕዋትካ ኣብ ጥቓ ሴኬም ይጓስዩዶ የለዉን፧ ንዓ፡ ናባታቶም ክሰድደካ” በሎ። ንሱ ኸኣ፡ “እነኹ” በሎ።
14 ንሱ ድማ፡ “በጃኻ ኼድካ ኣሕዋትካ ደሓን እንተ ኣለዉ ርአ። እተን መጓሰ ኸመይ ከም ዘለዋ ኸኣ ርአ፡ ደሃይ ድማ ሒዝካለይ ተመለስ” በሎ። ካብ ስንጭሮ ኬብሮን ከኣ ለኣኾ፣+ ንሱ ድማ ናብ ሴኬም ገጹ ኸደ። 15 ኣብ መሮር ኰለል ኪብል ከሎ፡ ሓደ ሰብኣይ ረኸቦ። እቲ ሰብኣይ ከኣ፡ “እንታይ ትደሊ ኣለኻ፧” ኢሉ ሓተቶ።
16 ንሱ ድማ፡ “ኣሕዋተይ እደሊ ኣለኹ። ኣበይ ይጓስዩ ኸም ዘለዉ እንዶ በጃኻ ንገረኒ፧” በለ።
17 እቲ ሰብኣይ ከኣ፡ “‘ናብ ዶታን ንኺድ’ ኪብሉ ሰሚዐዮም ነይረ እየ እሞ፡ ካብዝስ ከይዶም እዮም” በለ። ዮሴፍ ድማ ደድሕሪ ኣሕዋቱ ኸይዱ፡ ኣብ ዶታን ረኸቦም።
18 ንሳቶም ከኣ ካብ ርሑቕ ረኣይዎ፣ ኣባታቶም ከይበጽሐ ኸሎ ድማ፡ ኪቐትልዎ ተተናዀሉ።
19 ንሓድሕዶም ከኣ፡ “እቲ ሓላሚ እንሆ ይመጽእ ኣሎ።
20 ሕጂ ኸኣ ንዑ ንቕተሎ እሞ ኣብ ሓንቲ ኻብዘን ጕድጓድ ማይ ንደርብዮ፣ ሕሱም ኣራዊት በሊዕዎ ድማ ንበል። ሽዑ፡ እቲ ሕልምታቱ እንታይ ከም ዚኸውን ክንርኢ ኢና” ተባሃሃሉ።
21 ሮቤል እዚ ምስ ሰምዐ፡ ካብ ኢዶም ኬናግፎ ፈተነ። “ህይወቱ ኣይነጥፍእ” ድማ በለ።
22 ሮቤል ከኣ፡ “ደም ኣይተፍስሱ። ኣብዚ በረኻ እዚ ኣብ ዘሎ ጕድጓድ ማይ ደርብይዎ እምበር፡ ኣይትጕድእዎ” በሎም። ከመይሲ፡ ካብ ኢዶም ኣናጊፉ ናብ ኣቦኡ ኺመልሶ ኢሉ ነበረ።
23 ዮሴፍ ናብ ኣሕዋቱ ምስ መጸ፡ ነቲ ተኸዲንዎ ዝነበረ ወለል ዚብል ብሉጽ ክዳን ቀንጠጥዎ።
24 ድሕሪኡ፡ ወሲዶም ናብ ጕድጓድ ማይ ደርበይዎ። ኣብቲ ግዜ እቲ፡ እቲ ጕድጓድ ጥራዩ ነበረ፡ ማይ እውን ኣይነበሮን።
25 እንጌራ ኺበልዑ ድማ ተቐመጡ። ኣዒንቶም ምስ ኣልዓሉ፡ እስማኤላውያን ቃፍላይ ካብ ጊልዓድ ኪመጹ ረኣዩ። እተን ኣግማሎም ከኣ ምዑዝ ዕንዲዳን በለሳንን ዕንዲዳዊ ቕላጥን ተጻዒነን ነበራ፣ ናብ ግብጺ ድማ ይወርዱ ነበሩ።
26 ይሁዳ ኸኣ ንኣሕዋቱ፡ “ንሓውና ቐቲልና ደሙ እንተ ሓቢእናስ፡ እንታይ ረብሓ ኽንረክብ ኢና፧
27 ንዑ ግዳ ናብዞም እስማኤላውያን ንሽጦ፣ ሓውናን ስጋናን እዩ እሞ፡ ኢድና ኣብ ልዕሊኡ ኣይትኹን” በሎም። ንሳቶም ድማ ንሓዎም ሰምዕዎ።
28 እቶም ሚድያናውያን ነጋዶ ኺሓልፉ ኸለዉ፡ ንዮሴፍ ካብቲ ጕድጓድ ማይ ኣውጺኦም፡ ብ20 ብሩር ንእስማኤላውያን ሸጥዎ። ንሳቶም ከኣ ንዮሴፍ ናብ ግብጺ ወሰድዎ።
29 ጸኒሑ፡ ሮቤል ናብቲ ጕድጓድ ማይ ምስ ተመልሰ እሞ፡ ዮሴፍ ኣብቲ ጕድጓድ ማይ ከም ዘየሎ ምስ ረኣየ፡ ክዳኑ ቐደደ።
30 ናብ ኣሕዋቱ ምስ ተመልሰ ድማ፡ “እቲ ቘልዓ የሎን! ኣነ ደኣ እንታይ እየ ዝገብሮ፧” በለ።
31 ንሳቶም ከኣ ነቲ ወለል ዚብል ክዳን ዮሴፍ ወሲዶም፡ ወጠጦ ሓሪዶም ነቲ ኽዳን ኣብቲ ደም ኣጥለቕዎ። 32 ድሕሪኡ፡ ነቲ ወለል ዚብል ብሉጽ ክዳን ናብ ኣቦኦም ሰዲዶም፡ “እዚ ረኺብና። ክዳን ወድኻ እንተ ዀይኑ ወይ እንተ ዘይኰይኑ፡ እስከ መርምር” በልዎ።
33 ንሱ ምስ መርመሮ ኸኣ፡ “እዚ ኽዳን ወደይ እዩ! ሕሱም ኣራዊት በሊዕዎ ኪኸውን ኣለዎ! ዮሴፍ ብርግጽ ተበሊዑ!” በለ።
34 ሽዑ፡ ያእቆብ ክዳኑ ቐዲዱ፡ ኣብ ሕቘኡ ማቕ ተዓጢቑ፡ ብዛዕባ ወዱ ብዙሕ መዓልትታት ሓዘነ።
35 ኵሎም ኣወዳቱን ኵለን ኣዋልዱን ድማ ኬጸናንዕዎ ይፍትኑ ነበሩ፣ ንሱ ግና ምጽንናዕ ኣበየ፡ “ብወደይ እናሓዘንኩ ናብ መቓብር ክወርድ እየ!” ድማ ይብል ነበረ። ኣቦኡ ኸኣ ይበኽየሉ ነበረ።
36 እቶም ሚድያናውያን ድማ ኣብ ግብጺ፡ ናብ ጶጢፋር እቲ ኣገልጋሊ ቤተ መንግስቲ ፈርኦንን እቲ ሓለቓ ዘብዐኛታትን ሸጥዎ።

1 ኣብቲ ግዜ እቲ ኣቢሉ፡ ይሁዳ ኻብ ኣሕዋቱ ተፈልዩ፡ ኣብ ጥቓ ሓደ ሒራ ዝስሙ ዓዱላማዊ ሰብኣይ ድንኳኑ ተኸለ።
2 ኣብኡ ኸኣ ይሁዳ፡ ሓንቲ ጓል ሓደ ሹዓ ዝስሙ ከነኣናዊ ሰብኣይ ረኣየ። ንዓኣ ወሲዱ ኸኣ ናብኣ ኣተወ፣
3 ንሳ ድማ ጠነሰት፡ ወዲ ኸኣ ወለደት፡ ዔር ኢላ እውን ሰመየቶ።
4 መሊሳ ድማ ጠነሰት፡ ወዲ ኸኣ ወለደት፡ ኦናን ኢላ እውን ሰመየቶ።
5 ከም ብሓድሽ ድማ ወዲ ወለደት፡ ሸላሕ ኢላ እውን ሰመየቶ። ንዕኡ ኽትወልድ ከላ ኸኣ፡ ንሱ ኣብ ኣክዚብ ነበረ።
6 ይሁዳ ድማ ንዔር እቲ በዅሪ ወዱ፡ ታማር ዝስማ ሰበይቲ ኣምጽኣሉ።
7 ዔር እቲ በዅሪ ይሁዳ ግና፡ ንየሆዋ ዜጕሂ ነበረ፣ ስለዚ፡ የሆዋ ቐተሎ።
8 ሽዑ፡ ይሁዳ ንኦናን፡ “ናብ ሰበይቲ ሓውካ እቶ እሞ ውረሳ፡ ንሓውካ ድማ ዘርኢ ኣተንስኣሉ” በሎ።
9 ኦናን ግና እቲ ዘርኢ ንዕኡ ኸም ዘይከውን ፈለጠ። ስለዚ፡ ናብ ሰበይቲ ሓዉ ኺኣቱ ኸሎ፡ ንሓዉ ዘርኢ ምእንቲ ኸይህብ ኢሉ፡ ዘርኡ ናብ ምድሪ ኸዓዎ።
10 እቲ ዝገበሮ ኣብ ቅድሚ ኣዒንቲ የሆዋ ኽፉእ ነበረ። ስለዚ፡ ንዕኡ እውን ቀተሎ።
11 ሽዑ፡ ይሁዳ፡ ንታማር ሰበይቲ ወዱ፡ “ወደይ ሸላሕ ክሳዕ ዚዓቢ፡ ኣብ ቤት ኣቦኺ መበለት ኴንኪ ተቐመጢ” በላ። ከመይሲ፡ ‘ንሱ እውን ከም ኣሕዋቱ ኺመውት ይኽእል እዩ’ ኢሉ ነበረ። ታማር ድማ ከይዳ ኣብ ቤት ኣቦኣ ተቐመጠት።
12 ድሕሪ ገለ እዋን ከኣ ጓል ሹዓ ሰበይቲ ይሁዳ ሞተት። ይሁዳ ሓዘኑ ድሕሪ ምውዳኡ፡ ምስ ሒራ እቲ ዓዱላማዊ ፈታዊኡ ናብቶም ኣብ ቲምና ዝነበሩ ቐምቀምቲ ኣባጊዑ ደየበ።
13 ንታማር ድማ፡ “ሓሙኺ ኣባጊዑ ኪቕምቅም ናብ ቲምና ይድይብ ኣሎ” ተባሂሉ ተነግራ።
14 ንሳ ኸኣ፡ ሸላሕ ዓብዩ ኽነሱ፡ ሰበይቱ ኽትኰኖ ኸም ዘይተዋህበት ረኣየት እሞ፡ ክዳን ምብልውናኣ ቐንጢጣ፡ ብመጐልበቢ ተጐልቢባ ኣብታ ኣብ ጥቓ መገዲ ቲምና ዘላ ኣፍ ደገ ዔናይም ተቐመጠት።
15 ይሁዳ ምስ ረኣያ፡ ገጻ ሸፊና ስለ ዝነበረት፡ ኣመንዝራ መሰለቶ።
16 ሰበይቲ ወዱ ምዃና ኣይፈለጠን እሞ፡ ናብኣ ናብቲ ጥቓ መገዲ ኣላጊሱ፡ “ናባኺ ኽኣቱ በጃኺ ፍቐድለይ” በላ። ንሳ ድማ፡ “ናባይ ክትኣቱስ እንታይ እሞ ኽትህበኒ ኢኻ፧” በለቶ።
17 ንሱ ኸኣ፡ “ካብ መጓሰይ ማሕስእ ክሰድደልኪ እየ” በላ። ንሳ ድማ፡ “ክሳዕ እትሰድደለይከ ትሕጃዶ ኽትህበኒ፧” በለቶ።
18 ንሱ ኸኣ፡ “እንታይ ትሕጃ ደኣ እሞ ኽህበኪ፧” በላ። ንሳ ድማ፡ “ቀለቤት ማሕተምካን+ ማዕተብካን እዛ ኣብ ኢድካ ዘላ በትርኻን” በለቶ። ሽዑ፡ ንሱ ንዓኣ ሃባ፡ ናብኣ ኸኣ ኣተወ፡ ንሳ እውን ካብኡ ጠነሰት።
19 ድሕርዚ፡ ተንሲኣ ኸደት፡ መጐልበቢኣ ቐንጢጣ ድማ ክዳን ምብልውናኣ ተኸድነት።
20 ይሁዳ ኸኣ ነቲ ትሕጃ ኻብ ኢድ እታ ሰበይቲ ኺወስድ ኢሉ፡ ብኢድ እቲ ዓዱላማዊ+ ፈታዊኡ ማሕስእ ሰደደላ፣ ንሱ ግና ኣይረኸባን።
21 ሽዑ፡ ንሰብ እታ ቦታ እቲኣ፡ “እታ ኣብ ዔናይም፡ ኣብ ጥቓ መገዲ ዝነበረት ኣመንዝራ ቤተ መቕደስ ኣበይ ኣላ፧” ኢሉ ሓተቶም። ንሳቶም ከኣ፡ “ኣብዚ ቦታ እዚ ኣመንዝራ ቤተ መቕደስ ኣይነበረትን” በሉ።
22 ናብ ይሁዳ ተመሊሱ ድማ፡ “ኣይረኸብክዋን፡ ሰብ እታ ቦታ እቲኣ ኸኣ፡ ‘ኣብዚ ቦታ እዚ ኣመንዝራ ቤተ መቕደስ ኣይነበረትን’ ኢሎም” በሎ።
23 ይሁዳ ኸኣ፡ “ከይንነዓቕሲ፡ ንዓኣ ትውሰዶ። ዝዀነ ዀይኑ፡ ኣነ ነዚ ማሕስእ እዚ ልኢኸ እየ፣ ንስኻ ግና ኣይረኸብካያን” በለ።
24 ድሕሪ ሰለስተ ወርሒ ኣቢሉ፡ ንይሁዳ፡ “ታማር ሰበይቲ ወድኻ መንዚራ፡ ብምንዝርናኣ እውን ጠኒሳ ኣላ” ተባሂሉ ተነግሮ። ይሁዳ ድማ፡ “ኣውጽእዋ እሞ ትንደድ” በለ።
25 ምስ ኣውጽእዋ ኸኣ፡ ናብ ሓሙኣ፡ “ኣነ ኻብ ብዓል እዚ እየ ጠኒሰ ዘለኹ” ኢላ ሰደደት። “እዛ ቐለቤት ማሕተም እዚኣን እዛ ማዕተብ እዚኣን እዛ በትሪ እዚኣን ናይ መን ከም ዝዀና እስከ በጃኻ መርምር” ድማ በለት።
26 ይሁዳ ኸኣ መርመሮ፡ “ንወደይ ሸላሕ ስለ ዘይሃብክዋስ፡ ካባይ ንሳ ትጸድቕ” ድማ በለ። ድሕሪኡ ኸኣ ምስኣ ጾታዊ ርክብ ኣይገበረን።
27 ግዜ ሕርሳ ምስ ኣኸለ፡ ኣብ ማሕጸና ማንታ ነበሩ።
28 ክትወልድ ከላ ኸኣ፡ እቲ ሓደ ኢዱ ኣውጽአ፣ እታ መሕረሲት ድማ፡ “እዚ ቐዳማይ ወጸ” ኢላ ብኡብኡ ቐይሕ ፈትሊ ወሲዳ ኣብ ኢዱ ኣሰረትሉ።
29 ንሱ ኢዱ ምስ መለሰ ግና፡ ሓዉ ወጸ፣ ንሳ ኸኣ፡ “ከመይ ሰንጠቕካ!” በለት። ስለዚ፡ ስሙ ፋሬስ ተባህለ።
30 ድሕሪኡ ኸኣ፡ እቲ ኣብ ኢዱ ቐይሕ ፈትሊ ዝነበሮ ወጸ፣ ስሙ ድማ ዜራሕ ተባህለ።

1 ንዮሴፍ ከኣ ናብ ግብጺ ኣውረድዎ፣ ጶጢፋር ዚብሃል ኣገልጋሊ ቤተ መንግስቲ ፈርኦንን ሓለቓ ዘብዐኛታትን ዝነበረ ግብጻዊ ድማ ካብ ኢድ እቶም ናብኡ ዘውረድዎ እስማኤላውያን ዓደጎ።
2 የሆዋ ግና ምስ ዮሴፍ ነበረ። ስለዚ፡ ዕዮኡ ቐንዓሉ፣ ኣብ ቤት እቲ ግብጻዊ ጐይታኡ ድማ ሓላፍነት ተዋህቦ።
3 ጐይታኡ ኸኣ፡ የሆዋ ምስኡ ኸም ዘሎን ንሱ ዝገበሮ ዘበለ ዅሉ የሆዋ ኸም ዜቕንዓሉን ረኣየ።
4 ዮሴፍ ድማ ኣብ ቅድሚ ኣዒንቱ ሞገስ ይረክብ ነበረ፣ ብሕታዊ ኣገልጋሊኡ እውን ኰነ። ኣብ ልዕሊ ቤቱ ኸኣ ሸሞ፣ ዘለዎ ዅሉ ድማ ኣብ ኢዱ ሃቦ።
5 ኣብ ልዕሊ ቤቱን ኣብ ልዕሊ ዅሉ ዘለዎን ካብ ዝሸሞ ግዜ ጀሚሩ፡ የሆዋ ምእንቲ ዮሴፍ ኢሉ ንቤት እቲ ግብጻዊ ባረኻ፣ ኣብ ቤትን ኣብ መሮርን ኣብ ዝነበረ ዅሉ ጥሪቱ በረኸት የሆዋ ነበረ።
6 ዘለዎ ዅሉ ድማ ኣብ ኢድ ዮሴፍ ኣሕሊፉ ሃቦ፣ ብዘይካ እታ ዚበልዓ እንጌራ፡ ዋላ ሓንቲ ኣይሓስብን ነበረ። ዮሴፍ ከኣ ጽቡቕ ዝቕርጹን መልክዐኛን ኰነ።
7 ድሕሪ እዚ ነገር እዚ፡ ሰበይቲ ጐይታኡ ንዮሴፍ ዓይና ኸተውድቐሉን “ምሳይ ደቅስ” ክትብሎን ጀመረት። 8 ንሱ ግና ኣበየ፣ ንሰበይቲ ጐይታኡ ድማ፡ “እንሆ፡ ጐይታይ ኣብ ቤቱ ምሳይ እንታይ ከም ዘሎ ኣይፈልጥን እዩ፣ ዘለዎ ዅሉ ድማ ኣብ ኢደይ ሂቡኒ እዩ።
9 ኣብዛ ቤት እዚኣ ኻባይ ዚዓቢ የልቦን፣ ሰበይቱ ስለ ዝዀንኪ ድማ፡ ብዘይካኽስ ገለ እኳ ኣይከልኣንን። ከመይ ገይረ ደኣ እዚ ዓብዪ ኽፍኣትን ኣብ ቅድሚ ኣምላኽ ከኣ ሓጢኣትን ክገብር እኽእል፧” በላ።
10 መዓልቲ መዓልቲ ንዮሴፍ ትዛረቦ ነበረት፣ ንሱ ግና ምስኣ ኺድቅስ ወይ ምስኣ ኺጸንሕ ፍቓደኛ ኣይኰነን።
11 ግናኸ፡ ሓደ መዓልቲ ዕዮኡ ኺገብር ናብ ቤት ምስ ኣተወ፡ ኣብታ ቤት ካብ ገላዉ እታ ቤት ዋላ ሓደ ኣይነበረን።
12 ሽዑ፡ ብኽዳኑ ኣጽኒዓ ሒዛ፡ “ምሳይ ደቅስ” በለቶ። ንሱ ግና ክዳኑ ኣብ ኢዳ ሓዲጉ፡ ናብ ግዳም ሃደመ። 13 ክዳኑ ኣብ ኢዳ ሓዲጉ ናብ ግዳም ከም ዝሃደመ ምስ ረኣየት፡
14 ኣእውያ ንሰብ ቤታ ጸዊዓ፡ “እንሆ፡ መስሓቕ ኪገብረናስ፡ ነዚ እብራዊ እዚ ኣምጺኡልና። ንሱ ድማ ምሳይ ኪድቅስ ናባይ መጸ፣ ኣነ ኸኣ ዓው ኢለ ኣእወኹ።
15 ድምጸይ ዓው ኣቢለ ኸም ዘእወኹ ምስ ሰምዐ፡ ክዳኑ ሓዲጉ ናብ ግዳም ሃዲሙ” በለቶም።
16 ጐይታኡ ናብ ቤቱ ኽሳዕ ዚመጽእ ድማ፡ ነቲ ኽዳኑ ምስኣ ኣንበረቶ።
17 ከምዚ ዘረባ እዚ ኢላ ኸኣ ነገረቶ፦ “እቲ ዘምጻእካልና እብራዊ ጊልያ፡ መስሓቕ ኪገብረኒ ናባይ መጺኡ። 18 ድምጸይ ዓው ኣቢለ ምስ ኣእወኹ፡ ክዳኑ ሓዲጉለይ ናብ ግዳም ሃዲሙ።”
19 ጐይታኡ ኸኣ፡ ሰበይቱ፡ “ጊልያኻ ኸምዚ ገይሩኒ” ኢላ ዝነገረቶ ዘረባ ምስ ሰምዐ፡ ቍጥዓኡ ነደደ።
20 ጐይታ ዮሴፍ ድማ ወሲዱ ናብ ቤት ማእሰርቲ፡ ናብታ እቶም እሱራት ንጉስ ዚእሰሩላ ቦታ፡ ኣእተዎ፣ ኣብኣ ኸኣ ኣብታ ቤት ማእሰርቲ ነበረ።
21 የሆዋ ግና ምስ ዮሴፍ ነበረ፣ ብተኣማንነት ከኣ የፍቅሮ፡ ኣብ ቅድሚ ኣዒንቲ እቲ ሓለቓ ቤት ማእሰርቲ ድማ ሞገስ ይህቦ ነበረ።
22 እቲ ሓለቓ ቤት ማእሰርቲ ኸኣ ንዮሴፍ ኣብ ልዕሊ እቶም ኣብታ ቤት ማእሰርቲ ዝነበሩ ዅሎም እሱራት ሸሞ፣ ኣብኡ ዚገብርዎ ዘበለ ዅሉ፡ ኣብ ትሕቲኡ ይግበር ነበረ።
23 የሆዋ ምስ ዮሴፍ ነበረ፡ ዚገብሮ ዘበለ እውን የሆዋ የቕንዓሉ ነበረ እሞ፡ እቲ ሓለቓ ቤት ማእሰርቲ በቲ ኣብ ኢድ ዮሴፍ ዝነበረ ብገለ እኳ ኣይሓልን ነበረ።

1 ድሕሪ እዚ ነገር እዚ፡ እቲ ናይ ንጉስ ግብጺ ኣሰላፍ መስተን እቲ ሰንካትን ንጐይታኦም ንጉስ ግብጺ በደሉ።
2 ፈርኦን ድማ በቶም ክልተ ሰበ ስልጣኑ፡ ማለት በቲ ሓለቓ ኣሰለፍቲ መስተን በቲ ሓለቓ ሰንከትትን ተቘጥዐ፣
3 ኣብ ቤት እቲ ሓለቓ ዘብዐኛታት ኪእሰሩ፡ ናብታ ዮሴፍ ተኣሲሩላ ዝነበረ ቦታ ኣእተዎም።
4 ሽዑ፡ እቲ ሓለቓ ዘብዐኛታት ንዮሴፍ ምሳታቶም ኪኸውንን ኬገልግሎምን መደቦ፣ ንገለ እዋን ከኣ ኣብ ቤት ማእሰርቲ ጸንሑ።
5 እቶም ኣብታ ቤት ማእሰርቲ ተኣሲሮም ዝነበሩ ናይ ንጉስ ግብጺ ኣሰላፍ መስተን ሰንካትን ክልቲኦም ብሓንቲ ለይቲ በበይኑ ዝትርጉሙ ሕልሚ ሓለሙ።
6 ንጽብሒቱ ንግሆ፡ ዮሴፍ መጺኡ ምስ ረኣዮም፡ ጕህዮም ነበሩ።
7 ስለዚ፡ ነቶም ኣብ ቤት ጐይታኡ ምስኡ ተኣሲሮም ዝነበሩ ሰበ ስልጣን ፈርኦን፡ “ስለምንታይ እዩ ሎሚ ገጽኩም ጸምልዩ፧” ኢሉ ሓተቶም።
8 ንሳቶም ድማ፡ “ሕልሚ ሓሊምና፡ ዚትርጕመልና ግና የልቦን” በልዎ። ዮሴፍ ከኣ፡ “ትርጉም ናይ ኣምላኽ ደይኰነን፧ በጃኹም ሕልምኹም ንገሩኒ” በሎም።
9 ሽዑ፡ እቲ ሓለቓ ኣሰለፍቲ መስተ ንዮሴፍ ከምዚ ኢሉ ሕልሙ ነገሮ፦ “ብሕልመይ ኣብ ቅድመይ ተኽሊ ወይኒ ነበረት።
10 ኣብታ ተኽሊ ወይኒ ድማ ሰለስተ ውልዶታት ነበረ፣ ንሱ ኺጥጥዕ ከሎ ድማ፡ ዓምቢቡ ኣብ ዘለላኡ ብሱል ወይኒ ኣፍረየ።
11 ጽዋእ ፈርኦን ድማ ኣብ ኢደይ ነበረት፣ ነቲ ወይኒ ወሲደ ኸኣ ናብታ ጽዋእ ፈርኦን ጸመቝክዎ። ድሕሪኡ፡ ነታ ጽዋእ፡ ንፈርኦን ኣብ ኢዱ ሃብክዎ።”
12 ዮሴፍ ከኣ ከምዚ በሎ፦ “ትርጉሙ እዚ እዩ፦ እቲ ሰለስተ ውልዶታት፡ ሰለስተ መዓልቲ እዩ።
13 ድሕሪ ሰለስተ መዓልቲ፡ ፈርኦን ኬውጽኣካ፡ ናብ ሽመትካ እውን ኪመልሰካ እዩ። ከምቲ ኣቐዲምካ ኣሰላፍ መስተኡ ኸለኻ እትገብሮ ዝነበርካ ድማ፡ ጽዋእ ፈርኦን ኣብ ኢዱ ኽትህቦ ኢኻ።
14 ጽቡቕ ምስ ኰነልካ ኸኣ ዘክረኒ። ካብዛ ቦታ እዚኣ ምእንቲ ኸተውጽኣኒ፡ በጃኻ ብተኣማንነት ኣፍቅረኒ፡ ንፈርኦን ከኣ ንገረለይ።
15 ኣነ ኻብ ምድሪ እብራውያን እተጨወኹ እየ፣ ኣብዚ ድማ ኣብ ቤት ማእሰርቲ ዜእቱ ገለ እኳ ኣይገበርኩን።”
16 እቲ ሓለቓ ሰንከትቲ፡ ዮሴፍ ጽቡቕ ከም ዝተርጐመ ምስ ረኣየ፡ ንሱ እውን ከምዚ በሎ፦ “ኣነ እውን ብሕልመይ ሰለስተ መሶብ ጻዕዳ እንጌራ ኣብ ርእሰይ ነበረ፣
17 ኣብቲ ላዕለዋይ መሶብ ከኣ ንፈርኦን ዚኸውን ኵሉ ዓይነት እንጌራ ነበረ፣ ካብቲ ኣብ ልዕሊ ርእሰይ ዝነበረ መሶብ ድማ ኣዕዋፍ ይበልዓ ነበራ።”
18 ዮሴፍ ከኣ ከምዚ ኢሉ መለሰሉ፦ “ትርጉሙ እዚ እዩ፦ እቲ ሰለስተ መሶብ፡ ሰለስተ መዓልቲ እዩ።
19 ድሕሪ ሰለስተ መዓልቲ፡ ፈርኦን ንርእስኻ ኪቘርጽ እዩ፡ ኣብ ጕንዲ ኸኣ ኪሰቕለካ እዩ፣ ኣዕዋፍ ድማ ስጋኻ ኺበልዓ እየን።”
20 ኣብ ሳልሰይቲ መዓልቲ፡ ንፈርኦን መዓልቲ ልደቱ ነበረ፣+ ንዅሎም ገላዉኡ ኸኣ ድግስ ገበረሎም። ሽዑ፡ ነቲ ሓለቓ ኣሰለፍቲ መስተን ሓለቓ ሰንከትትን ኣብ ቅድሚ ገላዉኡ ኣምጽኦም።
21 ነቲ ሓለቓ ኣሰለፍቲ መስተ ኸኣ ናብ ኣሰላፍነቱ መለሶ፣ ንሱ ድማ እታ ጽዋእ ኣብ ኢድ ፈርኦን ይህብ ነበረ።
22 ነቲ ሓለቓ ሰንከትቲ ግና፡ ከምቲ ዮሴፍ ዝተርጐመሎም፡ ሰቐሎ።
23 እቲ ሓለቓ ኣሰለፍቲ መስተ ግና ንዮሴፍ ረስዖ እምበር፡ ኣይዘከሮን።

1 ድሕሪ ኽልተ ዓመት፡ ፈርኦን ሓለመ፣ እንሆ ኸኣ፡ ኣብ ገምገም ፈለግ ኒል ደው ኢሉ ነበረ።
2 ካብቲ ፈለግ ከኣ ሸውዓተ ጽቡቕ ዝትርኢተን ስቡሓት ኣሓ ወጺአን፡ ኣብቲ ሳዕሪ ኒል ይበልዓ ነበራ።
3 ድሕሪአን ድማ ካልኦት ሸውዓተ ኽፉእ ዝትርኢተን ዓባሩ ኣሓ ወጺአን፡ ኣብ ጥቓ እተን ኣብ ገምገም ኒል ዝነበራ ስቡሓት ኣሓ ደው በላ።
4 እተን ክፉእ ዝትርኢተን ዓባሩ ኣሓ ኸኣ ነተን ሸውዓተ ጽቡቕ ዝትርኢተን ስቡሓት ኣሓ በልዓአን። ሽዑ፡ ፈርኦን ተበራበረ።
5 ተመሊሱ ድማ ደቀሰ፡ ካልኣይ ሳዕ እውን ሓለመ። እንሆ ኸኣ፡ ኣብ ሓንቲ ብርዒ ሸውዓተ ምሉኣትን ጽቡቓትን ጉምቦ ሰዊት ነበራ።
6 ድሕሪአን ድማ ሸውዓተ ቐጠንትን ብንፋስ ምብራቕ ዝሃጐጓን ጉምቦ ሰዊት ወጻ።
7 እተን ቀጠንቲ ጉምቦ ሰዊት ከኣ ነተን ሸውዓተ ምሉኣትን ጽቡቓትን ጉምቦ ሰዊት ወሓጣአን። ሽዑ፡ ፈርኦን ተበራበረ፡ ሕልሚ ምዃኑ እውን ፈለጠ።
8 ምስ ነግሀ ግና፡ መንፈሱ ተናወጸ። ሽዑ፡ ልኢኹ ንዅሎም ስሒር ዚገብሩ ኻህናት ግብጽን ንዅሎም ጥበበኛታታን ጸውዖም። ፈርኦን ከኣ ሕልሙ ነገሮም። ንፈርኦን ኪትርጕመሉ ዝኸኣለ ግና ኣይነበረን።
9 ሽዑ፡ እቲ ሓለቓ ኣሰለፍቲ መስተ ንፈርኦን ከምዚ ኢሉ ተዛረቦ፦ “ሎሚ ሓጢኣተይ ክናዘዝ።
10 ፈርኦን ብገላዉኡ ተቘጢዑ ነበረ። ንዓይን ንሓለቓ ሰንከትትን ከኣ ናብ ቤት ማእሰርቲ እቲ ሓለቓ ዘብዐኛታት ኣእተወና።
11 ድሕሪኡ፡ ነፍሲ ወከፍና ብሓንቲ ለይቲ ሕልሚ ሓለምና፣ ኣነን ንሱን በበይኑ ዝትርጉሙ ሕልሚ ሓለምና። 12 ኣብኡ ድማ ሓደ እብራዊ ጐበዝ፡ ጊልያ እቲ ሓለቓ ዘብዐኛታት፡ ምሳና ነበረ። ንዕኡ ምስ ነገርናዮ፡ ሐሕልምና ተርጐመልና።
13 ልክዕ ከምቲ ዝተርጐመልና ኸኣ ኰነ። ኣነ ናብ ሽመተይ ተመለስኩ፡ እቲ ሓደ ግና ተሰቕለ።”
14 ሽዑ፡ ፈርኦን ንዮሴፍ፡ ካብ ቤት ማእሰርቲ ቐልጢፎም ኬውጽእዎ ለኣኸሉ። ንሱ ኸኣ ተላጽዩ፡ ክዳኑ ለዊጡ ናብ ፈርኦን ከደ።
15 ፈርኦን ድማ ንዮሴፍ፡ “ሕልሚ ሓሊመ፣ ዚትርጕሞ ግና የልቦን። ሕልሚ ሰሚዕካ ኸም እትትርጕም ከኣ ብዛዕባኻ ኺዝረብ ሰሚዐ” በሎ።
16 ዮሴፍ ድማ ንፈርኦን፡ “እዚ ኻባይ ኣይኰነን። ኣምላኽ ደኣ ብዛዕባ ድሕንነት ፈርኦን ኪዛረብ ኢሉ እዩ” ኢሉ መለሰሉ።
17 ፈርኦን ድማ ንዮሴፍ ከምዚ ኢሉ ተዛረቦ፦ “ብሕልመይ ኣብ ገምገም ፈለግ ኒል ደው ኢለ ነበርኩ።
18 ካብ ኒል ከኣ ሸውዓተ ጽቡቕ ዝትርኢተን ስቡሓት ኣሓ ወጺአን፡ ኣብቲ ሳዕሪ ኒል ይበልዓ ነበራ።
19 ድሕሪአን ድማ ካልኦት ሸውዓተ ዝማሰናን ክፉእ ዝትርኢተንን ዓባሩን ኣሓ ወጻ። ከማታተን ዝምኽፋአን ኣብ ኵላ ምድሪ ግብጺ እኳ ኣይረኣኹን።
20 እተን ዓባሩን ክፉኣትን ኣሓ ድማ ነተን ሸውዓተ ቐዳሞት ስቡሓት ኣሓ በልዓአን።
21 ምስ በልዓአን ግና፡ ትርኢተን ከም ቀደመን ክፉኣት ስለ ዝነበራ፡ ከምኡ ኸም ዝገበራ ኣይተፈልጠን። ሽዑ፡ ተበራበርኩ።
22 “ድሕርዚ፡ ብሕልመይ ኣብ ሓንቲ ብርዒ ሸውዓተ ምሉኣትን ጽቡቓትን ጉምቦ ሰዊት ኪወጻ ረኣኹ።
23 ድሕሪአን ድማ፡ ዓሸልን ቀጠንትን ብንፋስ ምብራቕ ዝሃጐጓን ሸውዓተ ጉምቦ ሰዊት ወጻ።
24 እተን ቀጠንቲ ጉምቦ ሰዊት ከኣ ነተን ሸውዓተ ጽቡቓት ጉምቦ ሰዊት ወሓጣአን። እዚ ኸኣ ነቶም ስሒር ዚገብሩ ኻህናት ነገርክዎም፡ ኪገልጸለይ ዝኸኣለ ግና ኣይነበረን።”
25 ዮሴፍ ድማ ንፈርኦን ከምዚ በሎ፦ “ሕልሚ ፈርኦን ሓደ እዩ። እቲ ናይ ሓቂ ኣምላኽ እንታይ ከም ዚገብር ንፈርኦን ነጊርዎ ኣሎ።
26 እተን ሸውዓተ ጽቡቓት ኣሓ፡ ሸውዓተ ዓመት እየን። እተን ሸውዓተ ጽቡቓት ጉምቦ ሰዊት እውን፡ ሸውዓተ ዓመት እየን። እቲ ሕልሚ ሓደ እዩ።
27 እተን ድሕሪአን ዝወጻ ሸውዓተ ዓባሩን ክፉኣትን ኣሓ፡ ሸውዓተ ዓመት እየን። እተን ዓሸልን ብንፋስ ምብራቕ ዝሃጐጓን ሸውዓተ ጉምቦ ሰዊት እውን፡ ሸውዓተ ዓመት ጥሜት ኪዀና እየን።
28 እቲ ንፈርኦን ዝነገርክዎ እዚ እዩ፦ እቲ ናይ ሓቂ ኣምላኽ እንታይ ከም ዚገብር ንፈርኦን ኣርእይዎ ኣሎ።
29 “ኣብ ኵላ ምድሪ ግብጺ ብዙሕ ጽጋብ ዝዀነለን ሸውዓተ ዓመት ኪመጻ እየን።
30 ብድሕሪአን ግና ሸውዓተ ዓመት ጥሜት ብርግጽ ኪመጻ እየን፣ ኵሉ እቲ ኣብ ምድሪ ግብጺ ዝነበረ ጽጋብ ድማ ብርግጽ ኪርሳዕ እዩ፡ እታ ምድሪ እውን ብጥሜት ክትውዳእ እያ።
31 እቲ ድሒሩ ዚመጽእ ጥሜት ኣዝዩ ስለ ዚብርትዕ፡ ካብኡ እተላዕለ፡ እቲ ኣብታ ሃገር ዝነበረ ጽጋብ ኣይኪዝከርን እዩ።
32 ፈርኦን ነቲ ሕልሚ ኽልተ ሳዕ ምሕላሙ፡ እቲ ነገር በቲ ናይ ሓቂ ኣምላኽ ስለ ዝጸንዐ እዩ፣ እቲ ናይ ሓቂ ኣምላኽ ድማ ቀልጢፉ ኺገብሮ እዩ።
33 “ሕጂ ድማ ፈርኦን ኣስተውዓልን ጥበበኛን ሰብኣይ ይድለ እሞ፡ ኣብ ልዕሊ ምድሪ ግብጺ ይሽሞ።
34 ፈርኦን ከኣ ስጕምቲ ይውሰድ፡ ኣብ ምድሪ ግብጺ ሓለፍቲ ይሽም፣ በተን ሸውዓተ ዓመት ጽጋብ ድማ ካብ ፍርያት ግብጺ ሓምሻይ ኣፍ ይኣክብ።
35 ኣብተን ዚመጻ ሰናይ ዓመታት ከኣ፡ ኵሉ ምግቢ ይኣክቡ፣ ነቲ እኽሊ ድማ ንቐለብ ኪኸውን ኣብ ትሕቲ ኢድ ፈርኦን ኣብ ከተማታት ይደልብዎን ይሓልውዎን።
36 እታ ምድሪ ብጥሜት ምእንቲ ኸይትጠፍእ፡ እቲ ምግቢ ነቲ ኣብ ምድሪ ግብጺ ዚመጽእ ሸውዓተ ዓመት ጥሜት ቀለብ ኪኸውን እዩ።”
37 ፈርኦንን ገላዉኡን ነዚ እማመ እዚ ጽቡቕ ኰይኑ ረኸብዎ።
38 ስለዚ፡ ፈርኦን ንገላዉኡ፡ “ከምዚ ዝበለ መንፈስ ኣምላኽ ዘለዎ ሰብኣይ ኪርከብ ይከኣልዶ፧” በሎም።
39 ፈርኦን ድማ ንዮሴፍ፡ “ኣምላኽ ነዚ ዅሉ ኻብ ኣፍለጠካ፡ ከማኻ ዝበለ ኣስተውዓልን ጥበበኛን የልቦን። 40 ንስኻ ኣብ ልዕሊ ቤተይ ክትከውን ኢኻ፣ ኵሉ ህዝበይ ድማ ፈጺሙ ኺእዘዘካ እዩ። ኣነ ንጉስ ብምዃነይ ጥራይ እየ ኻባኻ ዝዓቢ” በሎ።
41 ፈርኦን ከኣ ንዮሴፍ፡ “ርአ፡ ኣብ ልዕሊ ዅላ ምድሪ ግብጺ እሸመካ ኣለኹ” በሎ።
42 ሽዑ፡ ፈርኦን ቀለቤት ማሕተሙ ኻብ ኢዱ ኣውጺኡ ኣብ ኢድ ዮሴፍ ገበረሉ፡ ቅጭን በፍታ ድማ ከደኖ፡ ኣብ ክሳዱ ኸኣ ድሪ ወርቂ ገበረሉ።
43 ኣብታ ኻልአይቲ ሰረገላ ኽብሪ ድማ ኣወጥሖ፣ ቀቅድሚኡ ኸኣ፡ “ኣብረኽ!” ኢሎም ይጭድሩ ነበሩ። በዚ ኸምዚ፡ ኣብ ልዕሊ ዅላ ምድሪ ግብጺ ሸሞ።
44 ፈርኦን ድማ ንዮሴፍ፡ “ኣነ ፈርኦን እየ፣ ኣብ ኵላ ምድሪ ግብጺ ኸኣ ብዘይ ፍቓድካ ዋላ ሓደ ሰብ ሓንቲ እኳ ኣይግበር” በሎ።
45 ድሕርዚ፡ ፈርኦን ንዮሴፍ፡ ጻፍናት-ጳዕናሕ ኢሉ ስም ኣውጽኣሉ፣ ኣሰናት ጓል ጶጢፌራዕ ካህን ኦን ድማ፡ ሰበይቱ ኽትኰኖ ሃቦ። ዮሴፍ ከኣ ኣብ ምድሪ ግብጺ ሓላፊ ዀነ።
46 ዮሴፍ ኣብ ቅድሚ ፈርኦን ኪቐውም ከሎ፡ ወዲ 30 ዓመት ነበረ።
ሽዑ፡ ዮሴፍ ካብ ቅድሚ ፈርኦን ወጺኡ፡ ንዅላ ምድሪ ግብጺ ዞራ።
47 እታ ምድሪ ድማ፡ በተን ሸውዓተ ዓመት ጽጋብ ብዙሕ ኣፍረየት።
48 ካብ ምድሪ ግብጺ ኸኣ ኵሉ ምግቢ እተን ናይተን ሸውዓተ ዓመት ኣከበ፡ ነቲ ምግቢ እውን ኣብ ከተማታት ደለቦ። ኣብ ከከተማኡ ድማ ካብቲ ኣብ ዙርያኡ ዝነበረ ግራውቲ ምግቢ ኣከበ።
49 ዮሴፍ ከኣ፡ እቲ እኽሊ ኺስፈር ዘይከኣል ብምንባሩ፡ ምስፋሩ ኽሳዕ ዚሓድግዎ፡ ከም ሑጻ ባሕሪ ኣዝዩ ብዙሕ ይድልብ ነበረ።
50 ዓመት ጥሜት ቅድሚ ምምጻኣ፡ ንዮሴፍ ክልተ ኣወዳት ተወልዱሉ፣ ንሳቶም ከኣ ኣሰናት ጓል ጶጢፌራዕ ካህን ኦን ዝወለደትሉ እዮም።
51 ዮሴፍ ድማ፡ “ኣምላኽ ኵሉ ሽግረይን ኵሉ ቤት ኣቦይን ኣረሲዑኒ” ኢሉ ነቲ በዅሪ ስሙ ምናሴ ኣውጽኣሉ።
52 ነቲ ኻልኣይ ድማ፡ “ኣምላኽ ኣብ ምድሪ መከራይ+ ኣፍርዩኒ” ኢሉ ስሙ ኤፍሬም ኣውጽኣሉ።
53 እተን ኣብ ምድሪ ግብጺ ዝነበራ ሸውዓተ ዓመት ጽጋብ ከኣ ሓለፋ።
54 ከምቲ ዮሴፍ ዝበሎ ድማ፡ እተን ሸውዓተ ዓመት ጥሜት ጀመራ። ኣብ ኵለን ሃገራት ከኣ ጥሜት ኰነ፣ ኣብ ኵላ ምድሪ ግብጺ ግና እንጌራ ነበረ።
55 ኵላ ምድሪ ግብጺ ምስ ጠመየት ድማ፡ እቲ ህዝቢ ብዛዕባ እንጌራ ናብ ፈርኦን ጠርዐ። ሽዑ፡ ፈርኦን ንዅሎም ግብጻውያን፡ “ናብ ዮሴፍ ኪዱ እሞ፡ ንሱ ዚብለኩም ዘበለ ግበሩ” በሎም።
56 ኣብ ልዕሊ ዅላ ገጽ ምድሪ ድማ ጥሜት ኰይኑ ነበረ። እቲ ጥሜት ከኣ ኣብ ምድሪ ግብጺ በርትዐ። ዮሴፍ ድማ ኵሉ እቲ ኣብ መንጎኦም ዝነበረ ማዕከናት እናኸፈተ፡ ንግብጻውያን ኪሸጠሎም ጀመረ።
57 እቲ ጥሜት ኣብ ኵላ ምድሪ ስለ ዝበርትዐ ድማ፡ ኪሽምቱ ኢሎም ካብ ኵላ ምድሪ ናብ ዮሴፍ ናብ ግብጺ ይመጹ ነበሩ።

1 ያእቆብ ኣብ ግብጺ እኽሊ ኸም ዘሎ ምስ ፈለጠ፡ ንደቁ፡ “ስለምንታይ ስቕ ኢልኩም ትጠማመቱ፧” በሎም።
2 ኣስዕብ ኣቢሉ ኸኣ፡ “ኣብ ግብጺ እኽሊ ኸም ዘሎ ሰሚዐ ኣለኹ። ብህይወት ክንነብር እምበር ከይንመውትሲ፡ ናብኣ ወሪድኩም ሸምቱልና” በሎም።
3 እቶም ዓሰርተ ኣሕዋት ዮሴፍ ከኣ እኽሊ ኺሽምቱ ናብ ግብጺ ወረዱ።
4 ያእቆብ ግና፡ ንብንያም ሓው ዮሴፍ፡ “ድንገት ከይረኽቦ” ኢሉ፡ ምስ ኣሕዋቱ ኣይሰደዶን።
5 እቲ ጥሜት ናብ ምድሪ ከነኣን ስለ ዝሰፍሐ፡ ደቂ እስራኤል ምስቶም ካልኦት ዚሽምቱ ዀይኖም መጹ።+ 6 ኣብ ልዕሊ እታ ምድሪ ስልጣን ዝነበሮ ድማ ዮሴፍ ነበረ፣ ንዅሉ ህዝቢ ምድሪ፡ እኽሊ ዚሸይጥ እውን ንሱ ነበረ። ኣሕዋት ዮሴፍ ከኣ መጹ፡ ብገጾም ኣብ ምድሪ ተደፊኦም ድማ ሰገዱሉ።
7 ዮሴፍ ንኣሕዋቱ ምስ ረኣዮም፡ ብኡብኡ ኣለለዮም፣ መንነቱ ግና ሓብኣሎም። ኣበርቲዑ ኸኣ ተዛረቦም፡ “ካበይ ዝመጻእኩም ኢኹም፧” ድማ በሎም፣ ንሳቶም ከኣ፡ “ካብ ምድሪ ከነኣን ምግቢ ኽንዕድግ” በልዎ።
8 ዮሴፍ ከኣ ንኣሕዋቱ ኣለለዮም፣ ንሳቶም ግና ኣየለለይዎን።
9 ዮሴፍ ድማ ብኡብኡ ነቲ ብዛዕባኦም ዝሓለሞ ሕልምታት ዘከረ እሞ፡ “ንስኻትኩም ሰለይቲ ኢኹም! እተቓልዐ ሸነኽ እዛ ምድሪ እዚኣ ኽትርእዩ ዝመጻእኩም ኢኹም!” በሎም።
10 ንሳቶም ከኣ፡ “ኣይፋልናን ጐይታይ፡ ገላዉኻስ ምግቢ ኺዕድጉ ደኣ እዮም መጺኦም።
11 ንሕና ዅላትና ደቂ ሓደ ሰብኣይ ኢና። ንሕና ቕኑዓት ኢና። ገላዉኻ ሰለይቲ ኣይኰኑን” በልዎ።
12 ንሱ ግና፡ “ኣይፋልኩምን! እተቓልዐ ሸነኽ እዛ ምድሪ እዚኣ ደኣ ኽትርእዩ ዝመጻእኩም ኢኹም!” በሎም።
13 ንሳቶም ከኣ፡ “ገላዉኻ 12 ኣሕዋት እዮም። ንሕና ደቂ ሓደ ኣብ ከነኣን ዚነብር ሰብኣይ ኢና፣ እቲ ሕሳስ ልደ ምስ ኣቦና ኣሎ፡ እቲ ሓደ ኸኣ የሎን” በልዎ።
14 ዮሴፍ ግና ከምዚ በሎም፦ “ከምቲ ዝበልኩኹም፡ ‘ንስኻትኩም ሰለይቲ ኢኹም!’
15 በዚ ኽትፍተኑ ኢኹም፦ ከምቲ ፈርኦን ህያው ዝዀነ፡ እቲ ሕሳስ ልደ ሓውኩም ናብዚ ኸይመጸ፡ ካብዚ ኣይክትከዱን ኢኹም።
16 ንስኻትኩም ኣብዚ ተኣሲርኩም ከለኹም፡ ሓደ ኻባኻትኩም ንሓውኩም ኬምጽእ ስደዱ። በዚ ኸምዚ፡ ሓቂ ትዛረቡ እንተ ኣለኹም፡ ዘረባኹም ይፍተን። እንተ ዘይኰነስ፡ ከምቲ ፈርኦን ህያው ዝዀነ፡ ሰለይቲ ኢኹም።”
17 ሽዑ፡ ሰለስተ መዓልቲ ብሓደ ኣሰሮም።
18 ድሕርዚ፡ ኣብ ሳልሰይቲ መዓልቲ፡ ዮሴፍ ከምዚ በሎም፦ “ኣነ ንኣምላኽ እፈርሆ እየ እሞ፡ እዚ ግበሩ፡ ብህይወት ድማ ትነብሩ።
19 ቅኑዓት እንተ ዄንኩም፡ ሓደ ሓውኩም ኣብታ ተኣሲርኩምላ ዝነበርኩም ቤት ተኣሲሩ ይጽናሕ፣ ዝተረፍኩም ግና ኬድኩም ነቶም ጠምዮም ዘለዉ ቤተ ሰብኩም ዚኸውን እኽሊ ኣብጽሑ።
20 ድሕሪኡ፡ ነቲ ሕሳስ ልደ ሓውኩም ናባይ ኣምጽእዎ እሞ ዘረባኹም ኪእመን እዩ፣ ኣይትሞቱን ድማ።” ንሳቶም ከኣ ከምኡ ገበሩ።
21 ንሓድሕዶም ድማ፡ “ብርግጽ ብሰሪ ሓውና ኢና እንቕጻዕ ዘለና፣ ከመይሲ፡ ክንርሕርሓሉ ኺልምነና ኸሎ፡ ጭንቁ ርኢናስ ኣይሰማዕናዮን። ስለዚ ኸኣ እዩ እዚ ጭንቂ እዚ ዚበጽሓና ዘሎ” ተባሃሃሉ።
22 ሮቤል ከኣ፡ “‘ነዚ ቘልዓ እዚ ኣይትበድልዎ’ ኢለኩምዶ ኣይነበርኩን፧ ንስኻትኩም ግና ኣይሰማዕኩምን። ሕጂ ደሙ ብርግጽ ይድለ ኣሎ” ኢሉ መለሰሎም።
23 ኣብ መንጎኦም ኣስተርጓሚ ነበረ እሞ፡ ዮሴፍ ከም እተረድኦም ኣይፈልጡን ነበሩ።
24 ንሱ ኸኣ ካባታቶም ኣልጊሱ በኸየ። ተመሊሱ ኸም ብሓድሽ ምስ ተዛረቦም ከኣ፡ ንስምኦን ካባታቶም ወሲዱ ኣብ ቅድሚ ኣዒንቶም ኣሰሮ።
25 ድሕርዚ፡ ዮሴፍ ነቲ ኸረጺታቶም ብእኽሊ ኺመልኡሎምን ነቲ ገንዘቦም ኣብ ከከረጺቶም ኪመልሱሎምን ንመገዲ ስንቂ ኺህብዎምን ኣዘዘ። ከምኡ ኸኣ ተገብረሎም።
26 እኽሎም ኣብ ኣእዱጎም ጽዒኖም ድማ ካብኡ ኸዱ።
27 ኣብ መሕደሪ ኸኣ ሓደ ኻባታቶም ንኣድጉ ድርቋ ኺህብ ከረጺቱ ምስ ከፈተ፡ ነቲ ገንዘቡ ኣብ ኣፍ ከረጺቱ ረኣዮ።
28 ንኣሕዋቱ ድማ፡ “ገንዘበይ ተመሊሱ፡ እንሆ ኸኣ ኣብ ከረጺተይ!” በሎም። ሽዑ፡ ልቦም መለቘ፡ ራዕራዕ እናበሉ ኸኣ፡ “እዚ ኣምላኽ ገይሩና ዘሎ እንታይ እዩ፧” ተባሃሃሉ።
29 ናብ ኣቦኦም ያእቆብ ናብ ምድሪ ከነኣን ምስ መጹ ድማ፡ ዝበጽሖም ኵሉ ኸምዚ ኢሎም ነገርዎ፦
30 “እቲ ጐይታ እታ ሃገር ዝዀነ ሰብኣይ ኣበርቲዑ ተዛረበና፡ ከም ሰለይቲ እታ ሃገር ገይሩ እውን ረኣየና። 31 ንሕና ግና፡ ‘ንሕና ቕኑዓት ኢና። ሰለይቲ ኣይኰንናን።
32 ንሕና 12 ኣሕዋት፡+ ደቂ ኣቦና ኢና። እቲ ሓደ የሎን፡+ እቲ ሕሳስ ልደ ድማ ሎሚ ምስ ኣቦና ኣብ ምድሪ ከነኣን ኣሎ’ በልናዮ።
33 እቲ ጐይታ እታ ሃገር ዝዀነ ሰብኣይ ግና፡ ‘ቅኑዓት ምዃንኩም በዚ ኽፈልጥ እየ፦ ሓደ ሓውኩም ምሳይ ይጽናሕ። ነቶም ጠምዮም ዘለዉ ቤተ ሰብኩም ዚኸውን ድማ ሒዝኩም ኪዱ።
34 ቅኑዓት እምበር፡ ሰለይቲ ዘይምዃንኩም ምእንቲ ኽፈልጥሲ፡ ነቲ ሕሳስ ልደ ሓውኩም ናባይ ኣምጽእዎ። ሽዑ፡ ሓውኩም ክህበኩም እየ፡ ኣብዛ ምድሪ እዚኣ እውን ትነግዱ’ በለና።”
35 ከከረጺቶም ኪግልብጡ ኸለዉ ኸኣ፡ ናይ ነፍሲ ወከፍ ማሕፉዳ ገንዘብ ኣብ ከከረጺቱ ነበረ። ንሳቶምን ኣቦኦምን ነቲ ማሕፉዳ ገንዘቦም ምስ ረኣዩ፡ ፈርሁ።
36 ኣቦኦም ያእቆብ ድማ፡ “ውሉድ ዘይብለይ ጌርኩምኒ! ዮሴፍ የሎን፡ ስምኦን ከኣ የሎን፡ ንብንያም ድማ ክትወስድዎ ኢኹም! እዚ ዅሉ ኣባይ እዩ በጺሑ!” በሎም።
37 ሮቤል ግና ንኣቦኡ፡ “ኣነ ናባኻ እንተ ዘይመሊሰዮ፡ ንኽልቲኦም ደቀይ ቅተል። ንዓይ ሕድሪ ሃበኒ፡ ኣነ ድማ ናባኻ ኽመልሶ እየ” በሎ።
38 ንሱ ግና፡ “ሓዉ ሞይቱ፡ ንሱ ኸኣ በይኑ ተሪፉ እዩ እሞ፡ ወደይሲ ምሳኻትኩም ኣይኪወርድን እዩ። ኣብቲ እትኸድዎ መገዲ ገለ ድንገት እንተ ረኺብዎ፡ ሽዑ ብርግጽ ንሽበተይ ብሓዘን ናብ መቓብር ከተውርድዎ ኢኹም” በሎም።

1 እቲ ጥሜት ከኣ ኣብታ ምድሪ በርትዐ።
2 ነቲ ኻብ ግብጺ ዘምጽእዎ እኽሊ በሊዖም ምስ ወድኡ ድማ፡ ኣቦኦም፡ “ተመሊስኩም ሒደት ምግቢ ዓድጉልና” በሎም።
3 ይሁዳ ኸኣ፡ “እቲ ሰብኣይ፡ ‘ሓውኩም ምሳኻትኩም እንተ ዘየልዩ፡ ደጊም ገጸይ ኣይክትርእዩን ኢኹም’ ኢሉ ብንጹር ኣጠንቂቑና እዩ።
4 ንሓውና ምሳና ትሰድዶ እንተ ዄንካ፡ ወሪድና ምግቢ ኽንዕድገልካ ኢና።
5 ዘይትሰድዶ እንተ ዄንካ ግና፡ እቲ ሰብኣይ፡ ‘ሓውኩም ምሳኻትኩም እንተ ዘየልዩ፡ ደጊም ገጸይ ኣይክትርእዩን ኢኹም’ ኢሉና እዩ እሞ፡ ኣይንወርድን ኢና” በሎ።
6 እስራኤል ከኣ፡ “ነቲ ሰብኣይ ካልእ ሓው ከም ዘሎኩም ብምንጋር ስለምንታይ ሽግር ኣምጺእኩምለይ፧” በለ።
7 ንሳቶም ድማ፡ “እቲ ሰብኣይ ብዛዕባናን ብዛዕባ ኣዝማድናን፡ ‘ኣቦኹም ገናዶ ብህይወት ኣሎ፧ ካልእ ሓውከ ኣሎኩምዶ፧’ ኢሉ ብቐጥታ ሓቲቱና፣ ንሕና ኸኣ እዚ ሓቂ እዚ ነጊርናዮ። ‘ንሓውኩም ናብዚ ኣውርድዎ’ ኸም ዚብለና ኸመይ ጌርና ኽንፈልጥ ንኽእል፧” በሉ።
8 ይሁዳ ድማ ንኣቦኡ እስራኤል ከምዚ በሎ፦ “ንሕናን ንስኻን ቈልዑናን ብህይወት ክንነብር እምበር፡ ከይንመውትሲ፡ ነዚ ወዲ ምሳይ ስደዶ እሞ ንኺድ።
9 ኣነ እውሓሶ። ኣነ ተሓታቲ እኸውን። ናባኻ እንተ ዘይመሊሰዮን ኣብ ቅድሜኻ እንተ ዘየቕሪበዮን፡ ንሓዋሩ ኸም ዝበደልኩኻ እኸውን።
10 እንተ ዘይንድንጕስ፡ ክሳዕ ሕጂ ኽልተ ሳዕ ናብኡ ኼድና ምተመለስና ኔርና።”
11 ሽዑ፡ ኣቦኦም እስራኤል ከምዚ በሎም፦ “ከምኡ እንተ ዀይኑስ፡ ከምዚ ግበሩ፦ ካብ ፍርያት እዛ ምድሪ እዚኣ ዘዝበለጸ ኣብ ከረጺታትኩም ውሰዱ፣ ነቲ ሰብኣይ ህያብ ኪኸውን ድማ ሒደት በለሳንን ሒደት መዓርን ምዑዝ ዕንዲዳን ዕንዲዳዊ ቕላጥን ካዕካዕን ለውዝን ተማልኡሉ።
12 ዕጽፊ ገንዘብ ድማ ውሰዱ፣ እቲ ኣብ ኣፍ ከረጺታትኩም እተመልሰ ገንዘብ እውን ምለስዎ። ምናልባት ብጌጋ ይኸውን።
13 ንሓውኩም ወሲድኩም ተንስኡ እሞ ናብቲ ሰብኣይ ተመለሱ።
14 ነቲ ሓደ ሓውኩምን ንብንያምን ምሳኻትኩም ምእንቲ ኺሰድዶም፡ እቲ ዅሉ ዚኽእል ኣምላኽ ኣብ ቅድሚ እቲ ሰብኣይ ምሕረት ይሃብኩም። ኣነ ግና፡ ውሉድ እንተ ስኢነ፡ እስኣን!”
15 ሽዑ፡ እቶም ሰባት ነዚ ህያብ እዚ ወሰዱ፡ ዕጽፊ ገንዘብ ድማ ኣብ ኢዶም ሓዙ፡ ንብንያም እውን ተማልእዎ። ተንሲኦም ከኣ ናብ ግብጺ ወረዱ፡ ኣብ ቅድሚ ዮሴፍ ድማ መሊሶም ደው በሉ።
16 ዮሴፍ ንብንያም ምሳታቶም ምስ ረኣዮ፡ ነቲ ኣብ ልዕሊ ቤቱ እተሸመ፡ “ነዞም ሰባት እዚኦም ቀትሪ ምሳይ ኪምስሑ እዮም እሞ፡ ናብ ቤት ውሰዶም፡ ሕሩድ ሓሪድካ እውን ኣዳሉ” በሎ።
17 እቲ ሰብኣይ ድማ ብኡብኡ ኸምቲ ዮሴፍ ዝበሎ ገበረ፣ ነቶም ሰባት ከኣ ናብ ቤት ዮሴፍ ወሰዶም።
18 እቶም ሰባት ግና ናብ ቤት ዮሴፍ ምስ ተወስዱ፡ ፈርሁ፣ “ብምኽንያት እቲ ኣብ ዝሓለፈ ግዜ ኣብ ከረጺታትና እተመልሰ ገንዘብ እዮም ናብዚ ኣምጺኦምና። ሕጂ፡ ኬጥቅዑናን ባሮቶም ኪገብሩናን ኣእዱግና ኺወስዱን እዮም!” ድማ በሉ።
19 ናብቲ ኣብ ልዕሊ ቤት ዮሴፍ እተሸመ ሰብኣይ ቀሪቦም ድማ፡ ኣብ ኣፍ ደገ እታ ቤት ተዛረብዎ፣
20 ከምዚ ኸኣ በልዎ፦ “ኣይትሓዘልና ደኣ እምበር ጐይታይ፡ ብቐዳማይ ምግቢ ኽንዕድግ ወሪድና ኔርና።
21 ኣብ መሕደሪና ምስ በጻሕናን ከረጺታትና ምስ ከፈትናን ግና፡ ገንዘብና ኸከምቲ እተመዝኖ፡ ገንዘብ ነፍሲ ወከፍ ኣብ ኣፍ ከከረጺቱ ነበረ። ባዕልና ኽንመልሶ ኸኣ ንደሊ ኢና።
22 ምግቢ ንምዕዳግ ድማ ተወሳኺ ገንዘብ ኣምጺእና ኣለና። ነቲ ገንዘብ መን ኣብ ከረጺታትና ኸም ዘእተዎ ኣይንፈልጥን ኢና።”
23 ንሱ ኸኣ፡ “ኣጆኹም ኣይትፍርሁ። ኣብ ከረጺታትኩም መዝገብ ዝሃበኩም ኣምላኽኩምን ኣምላኽ ኣቦኹምን እዩ። ገንዘብኩምሲ ተቐቢለ እየ” በሎም። ድሕርዚ፡ ንስምኦን ናባታቶም ኣምጽኦ።
24 ሽዑ፡ እቲ ሰብኣይ ነቶም ሰባት ናብ ቤት ዮሴፍ ኣእትዩ፡ ኣእጋሮም ኪሕጸቡ ማይ ሃቦም፡ ንኣእዱጎም ድማ ድርቋ ሃበን።
25 ኣብኡ እንጌራ ኸም ዚበልዑ ሰሚዖም ነበሩ እሞ፡ ዮሴፍ ቀትሪ ኽሳዕ ዚመጽእ ነቲ ህያብ ኣዳለዉ።
26 ዮሴፍ ናብ ቤት ምስ መጸ፡ ህያባቶም ናብኡ ናብ ውሽጢ ቤቱ ኣምጽኡሉ፡ ናብ ምድሪ ፍግም ኢሎም ከኣ ሰገዱሉ።
27 ድሕርዚ፡ ደሓን እንተ ዀይኖም ሓተቶም፡ “እቲ ብዛዕባኡ እተዛረብኩምኒ ዝኣረገ ኣቦኹምከ ደሓንዶ ኣሎ፧ ገናዶ ብህይወት ኣሎ፧” ከኣ በሎም።
28 ንሳቶም ድማ፡ “ጊልያኻ ኣቦና ደሓን ኣሎ። ብህይወት ኣሎ” በልዎ። ፍግም ኢሎም ድማ ሰገዱሉ።
29 ኣዒንቱ ኣልዒሉ ንብንያም ሓዉ ወዲ ኣዲኡ ምስ ረኣዮ፡ “እዝስ እቲ ብዛዕባኡ እተዛረብኩምኒ ሕሳስ ልደ ሓውኩም ድዩ፧” በሎም። ኣስዕብ ኣቢሉ ድማ፡ “ወደየ፡ ኣምላኽ ሞገስ ይሃብካ” በሎ።
30 ዮሴፍ ብምኽንያት ሓዉ ስምዒቱ ምቍጽጻር ኣብይዎ፡ ዚበኽየሉ ቦታ ኺረክብ ተቐላጢፉ ወጸ። ናብ ብሕት ዝበለት ክፍሊ ኣትዩ ኸኣ፡ ኣብኡ በኸየ።
31 ድሕርዚ፡ ገጹ ተሓጺቡ ወጸ፡ ርእሱ ተቘጻጺሩ እውን፡ “መኣዲ ኣቕርቡ” በለ።
32 ሽዑ፡ ንዕኡ ንበይኑ፡ ንዓታቶም ድማ ንበይኖም፡ ነቶም ምስኡ ዝነበሩ ግብጻውያን ከኣ ንበይኖም ኣቕረቡሎም። ግብጻውያንሲ ምስ እብራውያን እንጌራ ምብላዕ የፈንፍኖም እዩ እሞ፡ ግብጻውያን ምሳታቶም ኪበልዑ ኣይከኣሉን።
33 እቶም ኣሕዋት ከኣ፡ እቲ በዅሪ ኸም ብዅርናኡ፡ እቲ ሕሳስ ልደ ኸም ምንኣሱ ኣብ ቅድሚኡ ተቐመጡ፣ ተገሪሞም ድማ ንሓድሕዶም ተጠማመቱ።
34 ካብቲ ኣብ ቅድሚኡ ዝነበረ ምግቢ ኸኣ፡ ግዲኦም ይሰድደሎም ነበረ፣ ንብንያም ግና ሓለፋ ግደ ዅሎም ሓሙሽተ ዕጽፊ ኣቕረበሉ። ክሳዕ ዚኣኽሎም ድማ ምስኡ በልዑን ሰተዩን።

1 ነቲ ኣብ ልዕሊ ቤቱ እተሸመ ኸኣ ከምዚ ኢሉ ኣዘዞ፦ “ንኸረጺታት እዞም ሰባት እዚኦም ኪወስድዎ ዚኽእሉ ዘበለ ምግቢ ምልኣዮ፣ ገንዘብ ነፍሲ ወከፍ ድማ ኣብ ኣፍ ከከረጺቱ ኣንብር።
2 ነታ ጽዋአይ፡ ነታ ጽዋእ ብሩር ድማ፡ ኣብ ኣፍ ከረጺት እቲ ሕሳስ ልደ ምስቲ ንእኽሉ እተባህለ ገንዘብ ግበራ።” ንሱ ኸኣ ከምቲ ዮሴፍ ዝበሎ ገበረ።
3 ንግሆ ምስ በርሀ፡ ነቶም ሰባት ምስ ኣእዱጎም ሰደድዎም።
4 ካብታ ኸተማ ወጺኦም ገና ኸይረሓቑ፡ ዮሴፍ ነቲ ኣብ ልዕሊ ቤቱ እተሸመ፡ ከምዚ በሎ፦ “ተንስእ! ደድሕሪ እቶም ሰባት ስዒብካ ኣርክቦም እሞ፡ ‘ስለምንታይ ንጽቡቕ ብኽፉእ እትፈድዩ፧
5 እታ ጐይታይ ዚሰትየላን ብእኣ ፋል ዚፈልጠላንሲ እዚኣ ደይኰነትን፧ ክፉእ ኢኹም ጌርኩም’ በሎም።”
6 ንሱ ኸኣ ኣርከቦም፡ ነዚ ዘረባ እዚ ድማ ተዛረቦም።
7 ንሳቶም ግና፡ “ስለምንታይ ጐይታይ ከምኡ ኢሉ ይዛረብ፧ ገላዉኻ ኸምዚ ዝበለ ነገር ኪገብሩስ ዘይሕሰብ እዩ።
8 እቲ ኣብ ኣፍ ከረጺታትና ዝረኸብናዮ ገንዘብ እኳ ኻብ ምድሪ ከነኣን መሊስናልካ። ካብ ቤት ጐይታኻ ግዳ ኸመይ ጌርና ብሩር ወይ ወርቂ ኽንሰርቕ፧
9 ካብ ባሮትካ እቲ እተረኽበቶ ይሙት፡ ዝተረፍና ኸኣ ባሮት ጐይታይ ንኹን” በልዎ።
10 ንሱ ኸኣ፡ “ከም ዝበልኩምዎ ይኹን፦ እቲ እተረኽበቶ ባርያይ ኪኸውን እዩ፣ ዝተረፍኩም ግና ንጹሃት ትዀኑ” በሎም።
11 ቀልጢፎም ድማ ነፍሲ ወከፎም ከከረጺቶም ናብ ምድሪ ኣውሪዶም ከፈቱ።
12 ንሱ ኸኣ ካብቲ ዓብዪ ጀሚሩ ኣብቲ ንእሽቶ ኽሳዕ ዚውድእ ኣጸቢቑ ጐርጐሮም። እታ ጽዋእ ድማ ኣብ ከረጺት ብንያም ተረኽበት።
13 ሽዑ፡ ክዳውንቶም ቀደዱ፡ ነፍሲ ወከፎም ኣኣድጎም ጽዒኖም ድማ ናብታ ኸተማ ተመልሱ።
14 ይሁዳን ኣሕዋቱን ከኣ ናብ ቤት ዮሴፍ ምስ ኣተዉ፡ ንሱ ገና ኣብኣ ነበረ። ኣብ ቅድሚኡ ድማ ናብ ምድሪ ተደፍኡ።
15 ዮሴፍ ከኣ፡ “እዚ ዝገበርኩምዎ እንታይ ግብሩ እዩ፧ ከማይ ዝበለ ሰብኣይሲ ፋል ከም ዚፈልጥ ኣይትፈልጡን ዲኹም፧” በሎም።
16 ይሁዳ ድማ፡ “ንጐይታይ እሞ እንታይ ክንብል ንኽእል፧ እንታይሲ ኽንዛረብ ንኽእል፧ ከመይ ጌርናኸ ርእስና ኸነጽድቕ ንኽእል፧ እቲ ናይ ሓቂ ኣምላኽ ስሕተት ባሮትካ ረኺቡ ኣሎ። እነና ንሕናን እቲ ኣብ ኢዱ ጽዋእ እተረኽበቶን ባሮት ጐይታይ ኢና” በለ።
17 ንሱ ግና፡ “ከምዚ ኽገብርሲ ዘይሕሰብ እዩ! እቲ ኣብ ኢዱ ጽዋእ እተረኽበቶ ሰብ፡ ንሱ ባርያይ ኪኸውን እዩ። ዝተረፍኩም ግና ናብ ኣቦኹም ብሰላም ደይቡ” በሎም።
18 ሽዑ፡ ይሁዳ ናብኡ ቐሪቡ ኸምዚ በለ፦ “ጐይታይ፡ እልምነካ ኣለኹ፡ በጃኻ ባርያኻ ሓንቲ ቓል ኣብ እዝኒ ጐይታይ ይዛረብ፣ ንስኻ ኸም ፈርኦን ኢኻ እሞ፡ ንባርያኻ ኣይትቈጥዓዮ።
19 ጐይታይ ንባሮቱ፡ ‘ኣቦ ወይ ሓው ኣሎኩምዶ፧’ ኢሉ ሓተቶም።
20 ንሕና ኸኣ ንጐይታይ፡ ‘ዝኣረገ ኣቦን ኣብ እርጋኑ ዝወለዶ ሕሳስ ልደን ኣለዉና። ሓዉ ግና ሞይቱ እዩ፣ እዚ ኸኣ ካብ ደቂ ኣዲኡ በይኑ ተሪፉ እዩ፣ ኣቦኡ ድማ ይፈትዎ እዩ’ በልናዮ።
21 ድሕርዚ፡ ንስኻ ንባሮትካ፡ ‘ምእንቲ ኽርእዮስ ናባይ ኣውርድዎ’ በልካዮም።
22 ንሕና ግና ንጐይታይ፡ ‘እቲ ወዲ እቲ ኻብ ኣቦኡ ኺፍለ ኣይክእልን እዩ። ካብኡ እንተ ተፈልዩ፡ ኣቦኡ ብርግጽ ኪመውት እዩ’ በልናዮ።
23 ንስኻ ድማ ንባሮትካ፡ ‘እቲ ሕሳስ ልደ ሓውኩም ምሳኻትኩም እንተ ዘይወሪዱ፡ ደጊም ገጸይ ኣይክትርእዩን ኢኹም’ በልካዮም።
24 “ንሕና ኸኣ ናብ ባርያኻ ኣቦይ ደየብና፡ ዘረባ ጐይታይ ድማ ነገርናዮ።
25 ጸኒሑ፡ ኣቦና፡ ‘ተመሊስኩም ሒደት ምግቢ ዓድጉልና’ በለና።
26 ንሕና ግና፡ ‘ክንወርድ ኣይንኽእልን ኢና። እቲ ሕሳስ ልደ ሓውና ምሳና እንተ ዘየልዩ፡ ገጽ እቲ ሰብኣይ እቲ ኽንርኢ ኣይንኽእልን ኢና እሞ፡ እዚ ሕሳስ ልደ ሓውና ምሳና እንተ ኣልዩ፡ ክንወርድ ኢና’ በልናዮ።
27 ሽዑ፡ ባርያኻ ኣቦይ፡ ‘ሰበይተይ ክልተ ኣወዳት ጥራይ ከም ዝወለደትለይ፡ ንስኻትኩም ትፈልጡ ኢኹም። 28 እቲ ሓደ ድማ ካባይ ወጸ፡ ኣነ ኸኣ፡ “ብርግጽ ተበሊዑ ኪኸውን ኣለዎ” በልኩ፣ ክሳዕ ሕጂ ድማ ኣይረኣኽዎን።
29 ነዚ ኸኣ ካብ ቅድሚ ዓይነይ እንተ ወሲድኩምዎ እሞ፡ ድንገት እንተ ረኺብዎ፡ ብርግጽ ንሽበተይ ብመዓት ናብ መቓብር ከተውርድዎ ኢኹም’ በለና።
30 “ሕጂ ኸኣ ነቲ ወዲ ኸይተማላእና ናብ ባርያኻ ኣቦይ እንተ ተመሊሰ፡ ህይወቱ ምስ ህይወት እዚ ስለ እተኣስረት፡
31 ሽዑ እዚ ወዲ እዚ ኸም ዘየሎ ርእይ ምስ ኣበለ፡ ኪመውት እዩ፣ ባሮትካ ድማ ንሽበት ባርያኻ ኣቦና ብጓሂ ናብ መቓብር ኬውርድዎ እዮም።
32 ባርያኻ ነዚ ወዲ እዚ፡ ኣብ ቅድሚ ኣቦይ፡ ‘ናባኻ እንተ ዘየምጺአዮ፡ ንሓዋሩ ኸም ዝበደልኩኻ እኸውን’ ኢሉ ተዋሒስዎ እዩ።
33 ሕጂ በጃኻ፡ እዚ ወዲ እዚ ምስ ኣሕዋቱ ምእንቲ ኺድይብ፡ ባርያኻ ኣብ ክንዲ እዚ ወዲ እዚ፡ ባርያ ጐይታይ ኰይኑ ይጽናሕ።
34 እዚ ወዲ እዚ ምሳይ ከየሎ፡ ከመይ ገይረ ናብ ኣቦይ ክድይብ እኽእል፧ እዚ መዓት እዚ ኣብ ኣቦይ ኪወርድ ከሎስ ክርኢ ኣይክእልን እየ!”

1 ሽዑ፡ ዮሴፍ ኣብ ቅድሚ እቶም ምስኡ ዝነበሩ ኣገልገልቲ፡ ርእሱ ኺቈጻጸር ኣይከኣለን። ዓው ኢሉ ኸኣ፡ “ንዅሎም ካብ ቅድመይ ኣውጽኡለይ” በለ። ዮሴፍ ንኣሕዋቱ፡ መንነቱ ኼፍልጦም ከሎ፡ ዋላ ሓደ ኻልእ ሰብ ምስኡ ኣይነበረን።
2 ድምጹ ዓው ኣቢሉ ድማ በኸየ፣ ግብጻውያን ከኣ ሰምዑ፡ ቤት ፈርኦን እውን ሰምዐት።
3 ዮሴፍ ድማ ንኣሕዋቱ፡ “ኣነ ዮሴፍ እየ። ኣቦይከ ገናዶ ብህይወት ኣሎ፧” በሎም። ኣሕዋቱ ግና ብሰንኩ ተደሚሞም ስለ ዝነበሩ፡ ኪምልሱሉ ኣይከኣሉን።
4 ዮሴፍ ከኣ ንኣሕዋቱ፡ “በጃኹም ናባይ ቅረቡ” በሎም። ንሳቶም ድማ ናብኡ ቐረቡ።
ሽዑ፡ ከምዚ በሎም፦ “ኣነ ናብ ግብጺ ዝሸጥኩምኒ ዮሴፍ ሓውኩም እየ።
5 ንምድሓን ህይወት ኢሉ ኣምላኽ እዩ ቕድሜኹም ዝለኣኸኒ እሞ፡ ሕጂ ናብዚ ስለ ዝሸጥኩምኒ ኣይትጕሃዩን ኣይትወቓቐሱን።
6 ኣብዛ ምድሪ፡ ጥሜት ካብ ዚኸውን እዚኣ ኻልአይቲ ዓመት እያ፣ ዘይሕረሰለን ወይ ዘይዕጸደለን ከኣ ገና ሓሙሽተ ዓመት ኣለዋ።
7 ግናኸ፡ ኣብ ምድሪ ተረፍ ምእንቲ ኼትርፈልኩም፡ ብዓብዪ ድሕነት ድማ ብህይወት ምእንቲ ኽትነብሩ፡ ቅድሜኹም ዝለኣኸኒ ኣምላኽ እዩ።
8 እምበኣር፡ ንፈርኦን ቀንዲ ኣማኻሪኡ፡ ንዅላ ቤቱ ጐይታ፡ ኣብ ኵላ ምድሪ ግብጺ ኸኣ ገዛኢ ክኸውን ዝሸመኒ እቲ ናይ ሓቂ ኣምላኽ እዩ እምበር፡ ንስኻትኩም ኣይኰንኩምን ናብዚ ዝለኣኽኩምኒ።
9 “ቀልጢፍኩም ናብ ኣቦይ ደይቡ እሞ፡ ከምዚ በልዎ፦ ‘ወድኻ ዮሴፍ ከምዚ ይብል ኣሎ፦ “ኣምላኽ ኣብ ልዕሊ ዅላ ግብጺ ጐይታ ገይሩ ሸይሙኒ ኣሎ።+ ናባይ ውረድ። ኣይትደንጒ።
10 ንስኻን ደቅኻን ደቂ ደቅኻን ጤለ በጊዕካን ከብትኻን ዘሎካ ዅሉን ኣብ ምድሪ ጎሼን ኣብ ጥቓይ ክትቅመጥ ኢኻ።
11 ገና ሓሙሽተ ዓመት ጥሜት ተሪፉ ኣሎ እሞ፡ ኣብኡ ኽምግበካ እየ። እንተ ዘይኰነስ፡ ንስኻን ቤትካን ዘሎካ ዅሉን ክትደኽዩ ኢኹም።”’
12 ዝዛረበኩም ዘለኹ ኣነ ምዃነይ፡+ ኣዒንትኹምን ኣዒንቲ ሓወይ ብንያምን ይርእያ ኣለዋ።
13 ስለዚ፡ ብዛዕባ ዅሉ ኣብ ግብጺ ዘሎኒ ኽብርን ብዛዕባ እቲ ዝረኣኹምዎ ዅሉን ንኣቦይ ንገርዎ። ንኣቦይ ከኣ ቀልጢፍኩም ናብዚ ኣውርድዎ።”
14 ሽዑ፡ ንሓዉ ብንያም ሓቚፍዎ በኸየ፣ ብንያም እውን ኣብ ክሳዱ በኸየ።
15 ንዅሎም ኣሕዋቱ ኸኣ እናበኸየ ሰዓሞም፣ ድሕርዚ፡ ኣሕዋቱ ምስኡ ተዛረቡ።
16 ኣብ ቤት ፈርኦን ድማ፡ “ኣሕዋት ዮሴፍ መጺኦም” ዚብል ወረ ተሰምዐ። እዚ ኸኣ ኣብ ቅድሚ ኣዒንቲ ፈርኦንን ገላዉኡን ጽቡቕ ነበረ።
17 ፈርኦን ከኣ ንዮሴፍ ከምዚ በሎ፦ “ንኣሕዋትካ ኸምዚ ኢልካ ንገሮም፦ ‘ከምዚ ግበሩ፦ መጽዓኛታትኩም ጽዒንኩም ናብ ምድሪ ከነኣን ኪዱ፣
18 ንኣቦኹምን ንቤተ ሰብኩምን ሒዝኩም ከኣ ናባይ ምጹ። ካብ ምድሪ ግብጺ ጸጽቡቑ ኽህበኩም እየ፣ ካብቲ ስቡሕ ክፋል እዛ ምድሪ እውን ክትበልዑ ኢኹም።’
19 ከምዚ ኢልካ ኽትነግሮም እውን እእዝዘካ ኣለኹ፦ ‘ከምዚ ግበሩ፦ ንቘልዑኹምን ንኣንስትኹምን ካብ ግብጺ ሰረገላታት ውሰዱ፣ ንኣቦኹም ድማ ሒዝኩምዎ ምጹ።
20 እቲ ኣብ ኵላ ምድሪ ግብጺ ዘሎ ዘዝበለጸ ናታትኩም እዩ እሞ፡ ብዛዕባ ንብረትኩም ኣይትጨነቑ።’”
21 ደቂ እስራኤል ድማ ከምኡ ገበሩ፣ ዮሴፍ ከኣ ከም ትእዛዝ ፈርኦን፡ ሰረገላታት ሃቦም፣ ንመገዲ ድማ ስንቂ ሃቦም።
22 ንነፍሲ ወከፎም ለውጢ ኽዳውንቲ ሃቦም፣ ንብንያም ግና 300 ብሩርን ሓሙሽተ ለውጢ ኽዳውንትን ሃቦ።
23 ንኣቦኡ ድማ ጸጽቡቕ ነገር ግብጺ እተጻዕኑ ዓሰርተ ኣእዱግ፡ ንመገዲ ዚዀኖ ኸኣ እኽልን እንጌራን ቀለብን እተጻዕና ዓሰርተ ኣንስትዮ ኣእዱግ ለኣኸሉ።
24 ንኣሕዋቱ ኸኣ ሰደዶም፣ ምስ ነቐሉ ድማ፡ “ኣብ መገዲ ንሓድሕድኩም ኣይትተሓራረቑ” በሎም።
25 ካብ ግብጺ ደዪቦም ከኣ ናብ ምድሪ ከነኣን ናብ ኣቦኦም ያእቆብ መጹ።
26 ሽዑ፡ “ዮሴፍ ገና ብህይወት ኣሎ፣ ኣብ ልዕሊ ዅላ ምድሪ ግብጺ ዚገዝእ ዘሎ እውን ንሱ እዩ” ኢሎም ነገርዎ። ንሱ ግና ስለ ዘይኣመኖም፡ ልቡ ደንዘዘ።
27 እቲ ዮሴፍ ዝበሎም ኵሉ ዘረባ ምስ ነገርዎ፡ እቲ ኺመጸሉ ኢሉ ዮሴፍ ዝሰደዶ ሰረገላታት ድማ ምስ ረኣየ፡ መንፈስ ኣቦኦም ያእቆብ ተሓደሰ።
28 እስራኤል ከኣ፡ “ይኣክል! ወደይ ዮሴፍሲ ገና ብህይወት ኣሎ! ቅድሚ ሙማተይ ደኣ ኸይደ ኽርእዮ” በለ።

1 እስራኤል ድማ ዘለዎ ዅሉ ሒዙ ነቐለ። ኣብ ብኤር-ሸባዕ+ ምስ በጽሐ፡ ንኣምላኽ ኣቦኡ ይስሃቅ መስዋእቲ ሰውአ።
2 ኣምላኽ ከኣ ንእስራኤል ተዛረቦ፣ ብራእይ ለይቲ እውን፡ “ያእቆብ፡ ያእቆብ” በሎ። ንሱ ኸኣ፡ “እነኹ” በለ። 3 ንሱ ድማ፡ “ኣነ ናይ ሓቂ ኣምላኽ፡ ኣምላኽ ኣቦኻ እየ። ኣብኡ ዓብዪ ህዝቢ ኽገብረካ እየ እሞ፡ ናብ ግብጺ ንምውራድ ኣይትፍራህ።
4 ኣነ ባዕለይ ምሳኻ ናብ ግብጺ ኽወርድ እየ፣ ኣነ ባዕለይ ድማ ካብኡ ኸደይበካ እየ። ዮሴፍ ከኣ ኢዱ ኣብ ኣዒንትኻ ኼንብር እዩ”* በሎ።+
5 ድሕርዚ፡ ያእቆብ ካብ ብኤር-ሸባዕ ነቐለ፣ ደቂ እስራኤል ከኣ ንኣቦኦም ያእቆብን ንቘልዑኦምን ንኣንስቶምን በቲ ኺመጹሉ ኢሉ ፈርኦን ዝሰደደሉ ሰረገላታት ኣግዓዙ።
6 ኣብ ምድሪ ከነኣን ዘጥረይዎ ዅሉ መጓሰኦምን ጥሪቶምን እውን ተማልኡ። ያእቆብን ኵሉ ዘርኡን ከኣ ናብ ግብጺ መጹ።
7 ንሱ ድማ ንደቁን ንደቂ ደቁን፡ ንኣዋልዱን ንኣዋልድ ደቁን፡ ኰታስ ንዅሎም ዘርኡ ምስኡ ናብ ግብጺ ኣምጽአ።
8 እቶም ናብ ግብጺ ዝመጹ ደቂ እስራኤል፡ ያእቆብን ደቁን፡ ስማቶም እዚ እዩ በዅሪ ያእቆብ ሮቤል።
9 ደቂ ሮቤል፡ ሓኖክን ፋሉን ሔጽሮንን ካርሚን።
10 ደቂ ስምኦን፡ የሙኤልን ያሚንን ኦሃድን ያኪንን ጾሓርን ሻኡል ወዲ እታ ከነኣናዊትን።
11 ደቂ ሌዊ፡ ጌርሾንን ቀሃትን መራሪን።
12 ደቂ ይሁዳ፡ ዔርን ኦናንን ሸላሕን ፋሬስን ዜራሕን። ዔርን ኦናንን ግና ኣብ ምድሪ ከነኣን ሞቱ።
ደቂ ፋሬስ፡ ሔጽሮንን ሓሙልን።
13 ደቂ ይሳኮር፡ ቶላዕን ፉዋን ዮብን ሺምሮንን።
14 ደቂ ዛብሎን፡ ሰረድን ኤሎንን ያሕልኤልን።
15 እዚኣቶምን ጓሉ ዲናን፡ ልያ ንያእቆብ ኣብ ጳዳን-ኣራም ዝወለደትሉ ደቂ እዮም። ኵሎም ደቁን ኣዋልዱን 33 እዮም።
16 ደቂ ጋድ፡ ጺፍዮንን ሓጊን ሹኒን ኤጽቦንን ዔሪን ኣሮዲን ኣርኤሊን።
17 ደቂ ኣሴር፡ ዪምናን ዪሽዋን ዪሽዊን በሪዓን ሓብቶም ሴራሕን።
ደቂ በሪዓ፡ ሔበርን ማልኪኤልን።
18 እዚኣቶም ደቂ እታ ላባን ንጓሉ ልያ ዝሃባ ዚልጳ እዮም። ንሳ ንያእቆብ፡ ነዚኣቶም ወለደትሉ፦ ኵላቶም 16 ሰባት እዮም።
19 ደቂ ራሄል ሰበይቲ ያእቆብ፡ ዮሴፍን ብንያምን።
20 ንዮሴፍ ኣብ ምድሪ ግብጺ እተወልዱሉ፡ ኣሰናት ጓል ጶጢፌራዕ ካህን ኦን* ዝወለደትሉ፡ ምናሴን ኤፍሬምን።
21 ደቂ ብንያም፡ ቤላዕን ቤከርን ኣሽቤልን ጌራን ንእማንን ኤሒን ሮሽን ሙጲምን ሑጲምን ኣርድን።
22 እዚኣቶም ንያእቆብ እተወልዱሉ ደቂ ራሄል፡ ኵላቶም 14 ሰባት እዮም።
23 ወዲ ዳን፡ ሑሺም።
24 ደቂ ንፍታሌም፡ ያሕጽኤልን ጉኒን የጸርን ሺሌምን።
25 እዚኣቶም ደቂ እታ ላባን ንጓሉ ራሄል ዝሃባ ቢልሃ እዮም። ንሳ ንያእቆብ፡ ነዚኣቶም ወለደትሉ፦ ኵላቶም ሸውዓተ ሰባት እዮም።
26 ኵሎም እቶም ካብ ያእቆብ እተወልዱ ናብ ግብጺ ዝኸዱ ሰባት፡ ብዘይካ ኣንስቲ ደቂ ያእቆብ፡ 66 ነበሩ። 27 ኣብ ግብጺ እተወልዱሉ ደቂ ዮሴፍ ከኣ ክልተ ነበሩ። ናብ ግብጺ ዝመጹ ዅሎም ሰባት ቤት ያእቆብ 70 ነበሩ።
28 ያእቆብ፡ ናብ ጎሼን ይጕዓዝ ከም ዘሎ፡ ኣቐዲሙ ኸይዱ ንዮሴፍ ኪነግሮ ኢሉ ንይሁዳ ለኣኾ። ናብ ምድሪ ጎሼን ምስ መጹ፡
29 ዮሴፍ ሰረገላኡ ኣጽዒኑ፡ ንኣቦኡ እስራኤል ኣብ ጎሼን ኪቕበሎ ደየበ። ምስ ረኸቦ ኸኣ፡ ብኡብኡ ሓቚፍዎ ንንውሕ ዝበለ ግዜ በኸየ።
30 እስራኤል ድማ ንዮሴፍ፡ “ገና ብህይወት ከም ዘለኻ፡ ገጽካ ኻብ ረኣኹ፡ ሕጅስ እሙት” በሎ።
31 ሽዑ፡ ዮሴፍ ንኣሕዋቱን ንቤተ ሰብ ኣቦኡን ከምዚ በሎም፦ “ናብ ፈርኦን ደዪበ፡ ‘ኣብ ምድሪ ከነኣን ዝነበሩ ኣሕዋተይን ቤተ ሰብ ኣቦይን ናባይ መጺኦም ኣለዉ።
32 እዞም ሰባት እዚኦም ጓሶትን ሰብ ማልን እዮም፣ ጤለ በጊዖምን ከብቶምን ዘለዎም ኵሉን ድማ ኣምጺኦም ኣለዉ’ ኢለ ኽነግሮ እየ።
33 ፈርኦን ጸዊዑ፡ ‘ስራሕኩም እንታይ እዩ፧’ ኢሉ እንተ ሓቲቱኩም፡ 34 ጓሳ ኣባጊዕ ዘበለ ኣብ ግብጻውያን ፍንፉን እዩ እሞ፡ ኣብ ምድሪ ጎሼን ምእንቲ ኽትቅመጡስ፡ ‘ገላዉኻ፡ ንሕናን ኣቦታትናን ካብ ንእስነትና ኽሳዕ ሕጂ ሰብ ማል ኢና’ በሉ።”

1 ዮሴፍ ድማ ናብ ፈርኦን ከይዱ፡ “ኣቦይን ኣሕዋተይን ጤለ በጊዖምን ከብቶምን ዘለዎም ኵሉን ካብ ምድሪ ከነኣን መጺኦም ኣለዉ፣ ኣብ ምድሪ ጎሼን ከኣ ኣለዉ” ኢሉ ነገሮ።
2 ካብቶም ኣሕዋቱ ድማ ሓሙሽተ ወሲዱ፡ ኣብ ቅድሚ ፈርኦን ኣቕረቦም።
3 ፈርኦን ከኣ ንኣሕዋቱ፡ “ስራሕኩም እንታይ እዩ፧” በሎም። ንሳቶም ድማ ንፈርኦን፡ “ገላዉኻ፡ ንሕናን ኣቦታትናን ጓሶት ኣባጊዕ ኢና” ኢሎም መለሱሉ።
4 ሽዑ፡ “ኣብ ምድሪ ከነኣን ጥሜት በርቲዑ እዩ እሞ፡ መጓሰ ገላዉኻ ዚጓሰያሉ ስለ ዘየልቦ፡ ኣብዛ ምድሪ እዚኣ ጓኖት ኴንና ኽንነብር መጺእና ኣለና። ሕጂ ኸኣ በጃኻ ገላዉኻ ኣብ ምድሪ ጎሼን ይቀመጡ” በልዎ።
5 ፈርኦን ድማ ንዮሴፍ፡ “ኣቦኻን ኣሕዋትካን መጺኦምኻ ኣለዉ።
6 ምድሪ ግብጺ ኣብ ቅድሜኻ እያ። ንኣቦኻን ንኣሕዋትካን ኣብ ዝበለጸ ኽፋል እዛ ምድሪ ኣቐምጦም። ኣብ ምድሪ ጎሼን ይቀመጡ፣ ካባታቶም ክኢላታት ሰብኡት እትፈልጦም እንተ ኣልዩካ፡ ኣብ ልዕሊ ማለይ ሓላፍነት ሃቦም” በሎ።
7 ሽዑ፡ ዮሴፍ ንኣቦኡ ያእቆብ ኣምጺኡ፡ ኣብ ቅድሚ ፈርኦን ኣቕረቦ፣ ያእቆብ ከኣ ንፈርኦን መረቖ።
8 ፈርኦን ከኣ ንያእቆብ፡ “ዕድሜኻ ኽንደይ እዩ፧” በሎ።
9 ያእቆብ ድማ ንፈርኦን፡ “ከርተት ዝበልኩለን ዓመታት 130 እየን። ዓመታት ህይወተይ ሒደትን ጭንቅን እየን፣ ክንዲ እቲ ዓመታት ህይወት ኣቦታተይ ብእዋን ከርተቶም ኣይኣኽላን እየን” በሎ።
10 ድሕርዚ፡ ያእቆብ ንፈርኦን መሪቑ ኻብ ቅድሚኡ ወጸ።
11 ዮሴፍ ድማ ንኣቦኡን ንኣሕዋቱን ኣስፈሮም፣ ከምቲ ፈርኦን ዝኣዘዞ ኸኣ ኣብ ምድሪ ግብጺ፡ ኣብ ዝበለጸት ክፋል ምድሪ ራዕምሴስ ርስቲ ሃቦም።
12 ዮሴፍ ድማ ንኣቦኡን ንኣሕዋቱን ንብዘለዉ ቤተ ሰብ ኣቦኡን ከከም ብዝሒ ቘልዑኦም እንጌራ ይምግቦም ነበረ።
13 እቲ ጥሜት ኣዝዩ ስለ ዝበርትዐ ድማ፡ ኣብ ኵላ እታ ምድሪ እንጌራ ኣይነበረን፣ ምድሪ ግብጽን ምድሪ ከነኣንን ከኣ ብጥሜት ተወድኣ።
14 ዮሴፍ ድማ ነቲ እኽሊ ኺሽምቱ ኸለዉ ዝሃብዎ፡ ኣብ ምድሪ ግብጽን ኣብ ምድሪ ከነኣንን እተረኽበ ዅሉ ገንዘብ ኣከበ፣ ዮሴፍ ከኣ ነቲ ገንዘብ ናብ ቤት ፈርኦን የእትዎ ነበረ።
15 ኣብ ምድሪ ግብጽን ኣብ ምድሪ ከነኣንን ዝነበረ ገንዘብ ድማ ተወድአ። ኵሎም ግብጻውያን ከኣ ናብ ዮሴፍ እናመጹ፡ “እንጌራ ሃበና! ገንዘብና ስለ እተወድአ፡ ስለምንታይ ኣብ ቅድሚ ኣዒንትኻ እንመውት፧” ይብልዎ ነበሩ።
16 ዮሴፍ ከኣ፡ “ገንዘብኩም እንተ ተወዲኡ፡ ማልኩም ኣምጽኡ፡ ኣብ ክንዲ ማልኩም ከኣ እንጌራ ኽህበኩም እየ” በሎም።
17 ማሎም ከኣ ናብ ዮሴፍ ኣምጽኡ፣ ዮሴፍ ድማ ኣብ ክንዲ ኣፍራሶምን ጤለ በጊዖምን ከብቶምን ኣእዱጎምን እንጌራ ሃቦም። በታ ዓመት እቲኣ ድማ ኣብ ክንዲ ዅለን ማሎም እንጌራ ሃቦም።
18 እታ ዓመት እቲኣ ምስ ሓለፈት፡ በታ እትቕጽል ዓመት ናብኡ መጺኦም፡ “ገንዘብን ማልን ንጐይታይ ከም ዝሃብናዮ፡ ንጐይታይ ኣይንሓብኣሉን ኢና። ብዘይካ ገዛእ ርእስናን ምድርናን ኣብ ቅድሚ ጐይታይ ገለ እኳ ኣይተረፈን።
19 ንሕናን ምድርናን ስለምንታይ ኣብ ቅድሚ ኣዒንትኻ እንመውት፧ ንዓናን ንምድርናን ብእንጌራ ዓድገና፣ ንሕናን ምድርናን ድማ ባሮት ፈርኦን ንኸውን። ብህይወት ክንነብር እምበር፡ ከይንመውት፡ ምድርና እውን ከይትባድምሲ፡ ዘርኢ ሃበና” በልዎ።
20 እቲ ጥሜት ኣዝዩ በርቲዑ ነበረ እሞ፡ ኵሉ ግብጻዊ ገግራቱ ስለ ዝሸጠ፡ ዮሴፍ ንዅላ ምድሪ ግብጻውያን ንፈርኦን ክትከውን ዓደጋ፣ እታ ምድሪ ድማ ናይ ፈርኦን ኰነት።
21 ሽዑ፡ ነቲ ህዝቢ፡ ካብቲ ሓደ ወሰን ሃገር ግብጺ፡ ክሳብ እቲ ኻልእ ወሰን፡ ናብ ከተማታት ኣግዓዞ።
22 ግደ እቶም ካህናት ካብ ፈርኦን ነበረ እሞ፡ ፈርኦን ዝሃቦም ግደ ስለ እተመገቡ፡ ምድሪ እቶም ካህናት ጥራይ ኣይዓደጋን። ስለዚ፡ ንሳቶም ምድሮም ኣይሸጡን።
23 ዮሴፍ ከኣ ነቶም ህዝቢ፡ “እንሆ፡ ሎሚ ንዓኻትኩምን ንምድርኹምን ንፈርኦን ዓዲገኩም ኣለኹ። እንሆልኩም ዘርኢ፡ ነታ ምድሪ ዝርእዋ።
24 ምስ ኣፍረየት ከኣ፡ ሓምሻይ ኣፍ ንፈርኦን ሃቡ፣ ኣርባዕተ ኢድ ከኣ ንዓኻትኩም፡ ንዘርኢ ግራትን ንቐለብኩምን ንቐለብ እቶም ኣብ ቤትኩም ዘለዉን ንቐለብ ቈልዑኹምን ኪኸውን እዩ” በሎም።
25 ንሳቶም ድማ፡ “ህይወትና ኣድሒንካያ ኢኻ። ኣብ ቅድሚ ኣዒንቲ ጐይታይ ደኣ ሞገስ ንርከብ እምበር፡ ንፈርኦን ባሮቱ ኽንከውን ኢና” በሉ።
26 ሽዑ፡ ዮሴፍ ሓምሻይ ኣፍ ንፈርኦን ኪኸውን፡ ኣብ ልዕሊ ምድሪ ግብጺ ኽሳዕ ሎሚ ዘሎ ስርዓት ገበረ። ምድሪ ኻህናት ጥራይ ንፈርኦን ኣይኰነትን።
27 እስራኤል ድማ ኣብ ምድሪ ግብጺ ኣብ ምድሪ ጎሼን ተቐመጠ። ኣብኣ ኸኣ ሰፈሩን ፈረዩን ኣዝዮም በዝሑን።
28 ያእቆብ ኣብ ምድሪ ግብጺ 17 ዓመት ነበረ፣ መዓልትታት ህይወት ያእቆብ ከኣ 147 ዓመት ኰነ።
29 እስራኤል ድማ ዚሞተላ መዓልቲ ቐረበት። ንዮሴፍ ወዱ ጸዊዑ ኸኣ፡ “ኣብ ቅድሚ ኣዒንትኻ ሞገስ እንተ ረኺበስ፡ በጃኻ ኢድካ ኣብ ትሕቲ ሰለፈይ ኣንብር እሞ፡ ብተኣማንነት ኣፍቅረንን ተኣማንነት ኣርእየንን። በጃኻ ኣብ ምድሪ ግብጺ ኣይትቕበረኒ።
30 ምስ ሞትኩ፡ ካብ ግብጺ ተሰኪምካ ኣብ መቓብር ኣቦታተይ ቅበረኒ” በሎ። ንሱ ድማ፡ “ከም ዘረባኻ ኽገብር እየ” በሎ።
31 ንሱ ኸኣ፡ “ምሓለለይ” በሎ። መሓለሉ ድማ። ሽዑ፡ እስራኤል ኣብ ትርኣስ ዓራቱ ሰገደ።

1 ድሕሪ እዚ ነገር እዚ፡ ንዮሴፍ፡ “እንሆ፡ ኣቦኻ ይደክም ኣሎ” ተባሂሉ ተነግሮ። ንሱ ኸኣ ንኽልቲኦም ደቁ፡ ንምናሴን ንኤፍሬምን፡ ምስኡ ወሰዶም።
2 ንያእቆብ ድማ፡ “እንሆ ወድኻ ዮሴፍ ናባኻ መጺኡ ኣሎ” ተባሂሉ ተነግሮ። እስራኤል ከኣ ተጋዲሉ ኣብ ዓራቱ ኾፍ በለ።
3 ያእቆብ ድማ ንዮሴፍ ከምዚ በሎ፦
“እቲ ዅሉ ዚኽእል ኣምላኽ ኣብ ሉዝ ኣብ ምድሪ ከነኣን ተራእየኒ፡ ባረኸኒ ኸኣ።
4 ‘እንሆ፡ ከፍርየካን ከብዝሓካን ጭፍራ ህዝብታት ክገብረካን እየ፡ ብድሕሬኻ ድማ እዛ ምድሪ እዚኣ ንዘርእኻ ንሓዋሩ ርስቲ ገይረ ኽህቦ እየ’ በለኒ።
5 ሕጂ ኸኣ እቶም ኣነ ናባኻ ናብ ግብጺ ቕድሚ ምምጻአይ ኣብ ምድሪ ግብጺ እተወልዱልካ ኽልቲኦም ደቅኻ ናተይ እዮም። ኤፍሬምን ምናሴን ከም ሮቤልን ስምኦንን ናተይ ኪዀኑ እዮም።
6 ብድሕሪኦም እትወልዶም ውሉዳት ግና ናትካ ኪዀኑ እዮም። ኣብ ርስቶም ብስም ኣሕዋቶም ኪስመዩ እዮም።
7 ኣነ ድማ ካብ ጳዳን ክመጽእ ከለኹ፡ ናብ ኤፍራታ ንምብጻሕ ገለ ርሕቐት ምስ ተረፈኒ፡ ራሄል ኣብ ምድሪ ከነኣን ኣብ ጥቓይ ሞተት። ኣብ መገዲ ኤፍራታ፡ ንሳ ቤት-ልሄም፡ ከኣ ቀበርክዋ።”
8 እስራኤል ድማ ንደቂ ዮሴፍ ረኣዮም እሞ፡ “እዚኣቶም እንታዎት እዮም፧” ኢሉ ሓተቶ።
9 ዮሴፍ ከኣ ንኣቦኡ፡ “እዚኣቶም ኣምላኽ ኣብዚ ዝሃበኒ ደቀይ እዮም” በሎ። ንሱ ድማ፡ “ክምርቖምሲ፡ በጃኻ ናባይ ኣምጽኣዮም” በሎ።
10 ኣዒንቲ እስራኤል ከኣ ካብ እርጋን እተላዕለ ደኺመን ነበራ እሞ፡ ኪርኢ ኣይከኣለን። ዮሴፍ ድማ ናብኡ ኣቕረቦም፣ ንሱ ኸኣ ሰዓሞምን ሓቘፎምን።
11 እስራኤል ድማ ንዮሴፍ፡ “ገጽካ ኽርኢ ኣይሓሰብኩን ነይረ፣ እንሆ ግና፡ ኣምላኽ ዘርእኻ እውን ኣርእዩኒ” በሎ።
12 ሽዑ፡ ዮሴፍ ካብ ኣብራኽ እስራኤል ኣልገሶም እሞ፡ ብገጹ ተደፊኡ ናብ ምድሪ ሰገደ።
13 ዮሴፍ ድማ ንኽልቲኦም ወሲዱ፡ ንኤፍሬም ብየማኑ ናብ ጸጋም እስራኤል፡ ንምናሴ ኸኣ ብጸጋሙ ናብ የማን እስራኤል ገይሩ ናብኡ ኣቕረቦም።
14 እስራኤል ግና የማነይቲ ኢዱ ዘርጊሑ ኣብ ርእሲ እቲ ዝነኣሰ ኤፍሬም፡ ጸጋመይቲ ኢዱ ድማ ኣብ ርእሲ ምናሴ ኣንበረ። ምናሴ በዅሪ ብምንባሩ፡ ኰነ ኢሉ ኣእዳዉ በዚ ኸምዚ ኣንበረ።
15 ሽዑ፡ ንዮሴፍ ከምዚ ኢሉ መረቖ
“እቲ ኣቦታተይ ኣብርሃምን ይስሃቅን ኣብ ቅድሚኡ እተመላለሱ ናይ ሓቂ ኣምላኽ፡
እቲ ኣብ ኵሉ ህይወተይ ክሳዕ እዛ መዓልቲ እዚኣ ዝጓሰየኒ ናይ ሓቂ ኣምላኽ፡
16 እቲ ኻብ ኵሉ መዓት ዘድሓነኒ መልኣኽ፡ ነዞም ኣወዳት እዚኦም ይባርኮም።
ስመይን ስም ኣቦታተይ ኣብርሃምን ይስሃቅን ኣባታቶም ይጸዋዕ፡
ኣብ ምድሪ ብዙሓት ኪዀኑ ድማ ይሰስኑ።”
17 ዮሴፍ ከኣ ኣቦኡ የማነይቲ ኢዱ ኣብ ርእሲ ኤፍሬም ከም ዘንበረ ምስ ረኣየ፡ በዚ ጐሃየ እሞ፡ ኢድ ኣቦኡ ሒዙ ኻብ ርእሲ ኤፍሬም ናብ ርእሲ ምናሴ ኼሕልፋ ፈተነ።
18 ዮሴፍ ድማ ንኣቦኡ፡ “ኣቦየ፡ እቲ በዅሪ እዚ እዩ እሞ፡ ከምኡ ኣይኰነን። የማነይቲ ኢድካ ኣብ ርእሱ ኣንብር” በሎ።
19 ኣቦኡ ግና ኣብዩ፡ “እፈልጥ ወደየ፡ እፈልጥ። ንሱ እውን ህዝቢ ኪኸውን እዩ፡ ንሱ እውን ዓብዪ ኪኸውን እዩ። ኰይኑ ግና፡ እቲ ንእሽቶ ሓዉ ኻብኡ ኺዓቢ እዩ፡ ዘርኡ እውን ማዕረ ኣህዛብ ኪኸውን እዩ” በለ።
20 በታ መዓልቲ እቲኣ ኸኣ ከምዚ ኢሉ መረቖም
“‘ኣምላኽ ከም ኤፍሬምን ምናሴን ይግበርካ’
ኢሎም እስራኤላውያን ብኣኻ ይመርቑ።”
በዚ ኸምዚ፡ ንኤፍሬም ቅድሚ ምናሴ ገበሮ።
21 ሽዑ፡ እስራኤል ንዮሴፍ፡ “እንሆ፡ እመውት ኣለኹ፣ ኣምላኽ ግና ብርግጽ ምሳኻትኩም ኪኸውን እዩ፡ ናብ ምድሪ ኣቦታትኩም ድማ ኪመልሰኩም እዩ።
22 ኣነ ኸኣ ካብታ ኻብ ኢድ ኣሞራውያን ብሰይፈይን ብቐስተይን ዝወሰድክዋ ምድሪ ሓለፋ ኣሕዋትካ ሓደ ኽፋል* ሂበካ ኣለኹ” በሎ።

1 ያእቆብ ድማ ንደቁ ጸዊዑ ኸምዚ በሎም፦ “ኣብተን ዳሕሮት መዓልትታት እንታይ ከም እትዀኑ ኽነግረኩምሲ፡ ተኣከቡ።
2 ኣቱም ደቂ ያእቆብ፡ ተኣከቡ እሞ ስምዑ፣ እወ፡ ንኣቦኹም እስራኤል ስምዕዎ።
3 “ሮቤል፡ ንስኻ በዅረይ፡ ሓይለይን መጀመርታ ስብእነተይን፡ ብሉጽ ክብርን ብሉጽ ብርታዐን ኢኻ።
4 ከም ዚናወጽ ማያት ብሸለልትነት ናብ ዓራት ኣቦኻ ስለ ዝደየብካ፡ ኣይክትበልጽን ኢኻ። ኣብቲ ግዜ እቲ፡ ንዓራተይ ኣርከስካዮ። እወ፡ ናብኡ ደየበ።
5 “ስምኦንን ሌዊን ኣሕዋት እዮም። ኣጽዋሮም፡ ኣጽዋር ዓመጻ እዩ።
6 ብቝጥዓኦም ሰብኡት ቀቲሎም፡ ንባህታኦም ኣብዑር ቀንጂቦም እዮም እሞ፡ ነፍሰይ ኣይትሕበሮም። ክብረይ ኣብ ኣኼባኦም ኣይሕበር።
7 ቍጥዓኦም ሕሱም፡ ነድሮም ከኣ ጨካን እዩ እሞ፡ ርጉም ይኹን። ኣብ ያእቆብ ክብትኖም፡ ኣብ እስራኤል ፋሕ ከብሎም እየ።
8 “ኣታ ይሁዳ፡ ኣሕዋትካ ኺውድሱኻ እዮም። ኢድካ ኣብ ክሳድ ጸላእትኻ ኽትከውን እያ። ደቂ ኣቦኻ ኺሰግዱልካ እዮም።
9 ይሁዳ ዅርኩር ኣንበሳ እዩ። ወደየ፡ ካብ ግዳይ ብርግጽ ክትድይብ ኢኻ። ንሱ ኸም ኣንበሳ ተዀርመየን በጥ በለን፣ ከም ኣንበሳኸ መን ደፊሩ የተንስኦ፧
10 ሺሎ ኽሳዕ ዚመጽእ፡ ካብ ይሁዳ ዘንጊ፡ ካብ መንጎ ኣእጋሩ ኸኣ በትሪ ኣዛዚ ኣይኪፍለን እዩ፣ ተኣዛዝነት ህዝብታት ናቱ እዩ።
11 ንኣድጉ ምስ ተኽሊ ወይኒ፡ ንውላድ ኣድጉ ምስ ብሉጽ ተኽሊ ወይኒ ኣሲሩ፡ ልብሱ ብወይኒ፡ ክዳኑ ድማ ብደም ወይኒ ኺሓጽብ እዩ።
12 ኣዒንቱ ብወይኒ ኪቐይሓ፡ ኣስናኑ ኸኣ ብጸባ ኺጽዕድዋ እየን።
13 “ዛብሎን ኣብ ገምገም ባሕሪ፡ ጥቓ እቲ መራኽብ መልህቕ ዚድርብያሉ ገምገም ኪነብር እዩ፣ ጫፍ ዶቡ ኸኣ ናብ ሲዶን ኪኸውን እዩ።
14 “ይሳኮር ኣብ መንጎ ኽልተ እተወደነ ጽዕነት በጥ ዚብል ድልዱል ዝዓጽሙ ኣድጊ እዩ።
15 እታ መዕረፊት ጽብቕቲ፡ እታ ምድሪ ድማ ባህ እተብል ምዃና ኺርኢ እዩ። ንምጻር መንኵቡ ኼትሕትን ብግዲ ኺሽቅልን እዩ።
16 “ዳን ከም ሓደ ኻብ ነገዳት እስራኤል ኰይኑ ንህዝቡ ኺዳኒ እዩ።
17 ዳን፡ እቲ ኣብ ፈረስ ዚውጣሕ ንድሕሪት ምእንቲ ኺወድቕ፡ ሸዀናታት ፈረስ ዚነክስ ኣብ ደረት መገዲ ተመን፡ ኣብ ወሰን መገዲ ድማ ቀራን ተመን ይኹን።
18 ኦ የሆዋ፡ ንድሕነትካ ኽጽበ እየ።
19 “ንጋድ+ ዘማቲ ጭፍራ ኼጥቅዖ እዩ፣ ንሱ ግና እግሪ እግሮም ኬጥቅዖም እዩ።
20 “እንጌራ ኣሴር+ ብዙሕ* ኪኸውን እዩ፣ ንንጉስ ዚበቅዕ ምግቢ እውን ኪህብ እዩ።
21 “ንፍታሌም+ ሽንቅጥ ዝበለት እራብ እዩ። ጥዑም ቃል ይዛረብ ኣሎ።
22 “ዮሴፍ+ ጨንፈር ፈራዪት ኦም፡ ጨናፍራ ኣብ ልዕሊ መንደቕ እተዘርግሐ ኣብ ጥቓ ዓይኒ ማይ ዘላ ፈራዪት ኦም እዩ።
23 ቀስተኛታት ግና ኣጨነቕዎን ወርወሩሉን ጸልእዎን።
24 ቀስቱ ግና ጸኒዑ ይነብር፣ ኣእዳዉ ድማ ድልዱልን ንጡፍን እዩ። እዚ ድማ ካብ ኣእዳው እቲ ናይ ያእቆብ ሓያል፡ ካብቲ ጓሳ፡ ካብቲ እምኒ እስራኤል እዩ።
25 ንሱ ኻብ ኣምላኽ ኣቦኻ እዩ፡ ንሱ እውን ኪሕግዘካ እዩ። ንሱ ምስቲ ዅሉ ዚኽእል እዩ፡ ንሱ ድማ ብበረኸት ሰማያት ላዕሊ፡ ብበረኸት መዓሙቝ ታሕቲ፡ ብበረኸት ኣጥባትን ማሕጸንን ኪባርኸካ እዩ።
26 በረኸት ኣቦኻ ኻብ በረኸት ዘለኣለማዊ ኣኽራን፡ ካብ ስልማት ነባሪ ዅርባታት ኪልዕል እዩ። ኣብ ርእሲ ዮሴፍ፡ ኣብ መንበስበስታ እቲ ኻብ ኣሕዋቱ እተፈልየ ኪኸውን እዩ።
27 “ብንያም ከም ተዅላ ኺሰላልዕ እዩ። ንግሆ ንግዳዩ ኺበልዖ፡ ምሸት ከኣ ምርኮኡ ኺመቅል እዩ።”
28 ኵሎም እዚኣቶም 12 ነገዳት እስራኤል እዮም፣ ኣቦኦም ኪምርቖም ከሎ ዝበሎም ከኣ፡ እዚ እዩ። ንነፍሲ ወከፎም ዘዚግብኦም ምርቓ ሃቦም።
29 ድሕርዚ፡ ከምዚ ኢሉ ኣዘዞም፦ “ኣነ ናብ ህዝበይ እእከብ ኣለኹ። ምስ ኣቦታተይ ኣብታ ኣብ ግራት ዔፍሮን እቲ ሔታዊ ዘላ በዓቲ ቕበሩኒ።
30 ንሳ ኣብ ግራት ማክጴላ፡ ኣብ መንጽር መምሬ፡ ኣብ ምድሪ ከነኣን ዘላ በዓቲ እያ፣ እታ ኣብርሃም ካብ ዔፍሮን እቲ ሔታዊ ኸም ርስቲ መቓብር ዝዓደጋ ግራት ድማ እያ።
31 ንኣብርሃምን ንሰበይቱ ሳራን ኣብኣ ቐበርዎም። ንይስሃቅን ንሰበይቱ ርብቃን ከኣ ኣብኣ ቐበርዎም፣ ኣነ ድማ ንልያ ኣብኣ ቐበርክዋ።
32 እታ ግራትን እታ ኣብኣ ዘላ በዓትን ካብ ደቂ ሔት እተዓደገት እያ።”
33 ያእቆብ ድማ ንደቁ ኸምዚ ኢሉ ኣዚዙ ወድአ። ድሕሪኡ፡ ኣእጋሩ ናብ ዓራት ኣከበ፡ ትንፋሱ ሓለፈት፡ ናብ ህዝቡ እውን ተኣከበ።

1 ሽዑ፡ ዮሴፍ ኣብ ኣቦኡ ወዲቑ፡ ኣብ ልዕሊኡ በኸየ፡ ሰዓሞ ድማ።
2 ድሕርዚ፡ ዮሴፍ ንገላዉኡ፡ ነቶም ሓካይም፡ ንኣቦኡ ኺለኽይዎ ኣዘዞም። እቶም ሓካይም ከኣ ንእስራኤል ለኸይዎ፣
3 ምሉእ መዓልትታት ምልካይ ከምኡ ነበረ እሞ፡ ምሉእ 40 መዓልቲ ወሰዱ። ግብጻውያን ድማ 70 መዓልቲ በኸዩሉ።
4 መዓልትታት ሓዘን ምስ ሓለፋ ኸኣ፡ ዮሴፍ ንሰበ ስልጣን ቤተ መንግስቲ ፈርኦን ከምዚ ኢሉ ተዛረቦም፦ “ኣብ ቅድሚ ኣዒንትኹም ሞገስ እንተ ረኺበስ፡ ንፈርኦን እዚ መልእኽቲ እዚ ንገሩለይ፦
5 ‘ኣቦይ፡ “እንሆ፡ ኣነ እመውት ኣለኹ። ኣብታ ኣብ ምድሪ ከነኣን ዝዀዓትክዋ መቓብረይ ቅበረኒ” ኢሉ ኣምሒሉኒ እዩ። ሕጂ ኸኣ፡ ደዪበ ንኣቦይ ቀቢረ ኽምለስ፡ በጃኻ ፍቐደለይ።’”
6 ፈርኦን ድማ፡ “ደይብ እሞ ከምቲ ዘምሓለካ፡ ንኣቦኻ ቕበሮ” ኢሉ መለሰ።
7 ዮሴፍ ከኣ ንኣቦኡ ኪቐብሮ ደየበ፣ ኵሎም ገላዉ ፈርኦንን ዓበይቲ ቤተ መንግስቱን ኵሎም ዓበይቲ ምድሪ ግብጽን እውን ምስኡ ደየቡ።
8 ኵሎም ቤተ ሰብ ዮሴፍን ኣሕዋቱን ቤተ ሰብ ኣቦኡን ድማ ደየቡ። ቈልዑኦምን ጤለ በጊዖምን ከብቶምን ጥራይ ኣብ ምድሪ ጎሼን ሓደጉ።
9 ሰረገላታትን+ ፈረሰኛታትን እውን ምስኡ ደየቡ፣ ኣዝዩ ብዙሕ ጭፍራ ኸኣ ነበረ።
10 ናብታ ኣብ ዞባ ዮርዳኖስ ዘላ ዓውዲ ኣጣድ ከኣ መጹ፣ ኣብኣ ድማ ኣዝዩ ብርቱዕን መሪርን መልቀስ ኣልቀሱ፣ ንሱ ኸኣ ንኣቦኡ ሸውዓተ መዓልቲ ሓዘነሉ።
11 እቶም ኣብታ ምድሪ ዚነብሩ ከነኣናውያን ድማ ነቲ ኣብ ዓውዲ ኣጣድ እተገብረ ሓዘን ረኣዩ እሞ፡ “እዚ ዓብዪ ሓዘን ግብጻውያን እዩ” በሉ። ስለዚ፡ ስማ ኣቤል-ሚስራይም* ተባህለ፣ ንሳ ኣብ ዞባ ዮርዳኖስ ዘላ እያ።
12 ደቁ ድማ ከምቲ ዝኣዘዞም ገበሩሉ።
13 ደቁ ናብ ምድሪ ከነኣን ጾይሮም፡ ኣብ በዓቲ ግራት ማክጴላ፡ ኣብታ ኣብ መንጽር መምሬ ዘላ ኣብርሃም ካብ ዔፍሮን እቲ ሔታዊ ርስቲ መቓብር ክትከውን ዝዓደጋ ግራት ቀበርዎ።
14 ዮሴፍ ንኣቦኡ ምስ ቀበሮ፡ ንሱ ምስ ኣሕዋቱን ምስ ኵሎም እቶም ንኣቦኡ ኪቐብሩ ምስኡ ዝደየቡን ናብ ግብጺ ተመልሰ።
15 ኣሕዋት ዮሴፍ ኣቦኦም ከም ዝሞተ ምስ ረኣዩ፡ “ዮሴፍ ይጸልኣና ይኸውን፡ ስለቲ ዝገበርናዮ ዅሉ ኽፉእ ከኣ ይፈድየና ይኸውን” በሉ።
16 ንዮሴፍ ድማ ከምዚ ኢሎም ለኣኹሉ፦ “ኣቦኻ ቕድሚ ሞቱ፡ ከምዚ ኢሉ ኣዘዘ፦
17 ‘ንዮሴፍ፡ “እልምነካ ኣለኹ፡ ኣበሳ ኣሕዋትካን ንዓኻ ብምጕዳእ ዝገበርዎ ሓጢኣትን በጃኻ ሕደገሎም” በልዎ።’ ሕጂ ኸኣ፡ በጃኻ ኣበሳ ገላዉ ኣምላኽ ኣቦኻ ሕደገሎም።” ዮሴፍ ከኣ ምስ ተዛረብዎ በኸየ።
18 እቶም ኣሕዋቱ ድማ መጺኦም ኣብ ቅድሚኡ ተደፍኡ እሞ፡ “እነና፡ ንሕና ባሮትካ ኢና” በልዎ።
19 ዮሴፍ ከኣ፡ “ኣይትፍርሁ። ኣነዶ ኣብ ቦታ ኣምላኽ እየ፧
20 ንስኻትኩም ክትጐድኡኒ እኳ እንተ ሓሰብኩም፡ ኣምላኽ ግና ከምዚ ሎሚ ዚገብሮ ዘሎ ብዙሕ ህዝቢ ምእንቲ ኼድሕን ኢሉ ንጽቡቕ እዩ ሓሲብዎ።
21 ሕጂ ኸኣ ኣይትፍርሁ። ኣነ ንዓኻትኩምን ንቘልዑኹምን ክምግበኩም እየ” በሎም። በዚ ኸምዚ፡ ኣጸናንዖም፡ ልቦም ድማ ኣቕሰነሎም።
22 ዮሴፍ ከኣ፡ ንሱ ምስ ቤተ ሰብ ኣቦኡ ኣብ ግብጺ ተቐመጠ። ዮሴፍ ድማ 110 ዓመት ነበረ።
23 ዮሴፍ ከኣ ንደቂ ኤፍሬም ክሳዕ ሳልሳይ ወለዶ፡ ከምኡ ድማ ንደቂ ማኪር+ ወዲ ምናሴ ረኣየ። ንሳቶም ኣብ ኣብራኽ ዮሴፍ ተወልዱ።
24 ዮሴፍ ከኣ ንኣሕዋቱ፡ “ኣነ እመውት ኣለኹ፣ ኣምላኽ ግና ብርግጽ ቈላሕታኡ ኺገብረልኩም እዩ፣ ካብዛ ምድሪ እዚኣ ኸኣ ናብታ ንኣብርሃምን ንይስሃቅን ንያእቆብን ዝመሓለሎም ምድሪ ብርግጽ ኬደይበኩም እዩ” በሎም።
25 ዮሴፍ ድማ ንደቂ እስራኤል፡ “ኣምላኽ ብርግጽ ቈላሕታኡ ኺገብረልኩም እዩ። ንኣዕጽምተይ ከኣ ካብዚ ኣደይብዎ” ኢሉ ኣምሓሎም።
26 ዮሴፍ ድማ ወዲ 110 ዓመት ምስ ኰነ፡ ሞተ፣ ኣልከይዎ እውን፣ ኣብ ሳጹን ተገይሩ ኸኣ ኣብ ግብጺ ተነብረ።