1-2 ዘረፍቲ ስለ ዝዘረፍዎምን፣ ንሓረግ ወይኖም ስለ ዘብረስዎን፣ እግዚኣብሄር፣ ከምቲ ኽብረት እስራኤል፣ ንኽብረት ያእቆብ ኪመልሶ እዩ እሞ፣ እቲ መብረሲ ይድይበካ ኣሎ፣ ነቲ ዕርዲ ሐልዎ፣ ነቲ መገዲ ኣማዕድዎ፣ ሕቜኻ ኣደልድሎ፣ ሓይልኻ ኣዚኻ ኣበርትዓዮ።
3 እቲ ዋልታ ሓያላቱ ቔሔ፣ እቶም ተዋጋእቲ ሰብ ቀይሕ ተኸድኑ: በታ መዓልቲ ምድላው ሰረገላታቱ ኸም ሃልሃልታ ሓዊ እየን፣ እቲ ዛብያታት ይንብጥበጥ።
4 እተን ሰረገላታት ኣብ መገዲ ብናህሪ ይኸዳ፣ ኣብ ኣደባባያት ይጋጨዋ፣ ትርኢተን ከም ሃልሃልታ እዩ፣ ከም መባርቕ ድማ ይጐያ።
5 ንኸበርቴታቱ ይዝክር፣ ኪኸዱ ኸለዉ ይዕንቀፉ፣ ናብ መካበብያኣ ኣቢሎም ይቕልጥፉ፣ መጸግዒ ድማ ተዳለወ።
6 ደጌታት ወሓይዝ ይኽፈት፣ እቲ ኣደራሽ ከኣ ይመክኽ።
7 ክዉን እዩ፣ ጥራያ ዀይና ተማረኸት፣ ኣግራዳ ድማ ኣፍ ልበን እናወቕዓ ብደሃይ ርግቢ ዋይዋይ ይብላ ኣለዋ።
8 ነነዌ ኻብ ጥንቲ ጀሚራ ኸም ማይ ዝመልኤ ሓጽቢ ነበረት፣ ግናኸ ሀደሙ። ደው በሉ፣ ደው በሉ፣ በልዎም፣ ግልብጥ ዝበለ ግና የልቦን።
9 እቲ መዝገብ፣ ድልቢ እቲ በብዓይነቱ ዘሎ ኽቡር ኣቓሑ፣ ታእላው የብሉን እሞ፣ ብሩር ዝመቱ፣ ወርቂ ዝመቱ።
10 ባዶን ጥራያን ኰነት፣ ባደመት፣ ልቢ መኸኸ፣ ኣብራኽ ከኣ ራዕራዕ በለ፣ ዅሉ ሕቘ ሐመመ፣ ገጽ ዅሎምውን ጸለመ።
11 እቲ ሽደናት ዚበልዑሉ ኣንበሳን ዋዕሮን ኰራኵር ኣንበሳን ድማ መፍርሂ ዜብሎም ኰይኖም ዚዛውኑሉ ቦታ ኣናብስ ኣበይ ኣሎ∶
12 ኣንበሳ ንዀራኵር ዚኣኽሎም ዘረፈ፣ ንዋዕሮታቱ ኸኣ ሐነቐለን፣ በዓትታቱ ብግዳዩ፣ ጐደጉዱ ኸኣ ብዝዘረፎ መልኦ።
13 እግዚኣብሄር ጐይታ ሰራዊት፣እኔኹ ፣ ኣብ ልዕሌኺ እየ፣ ንዓረብያታት ኣንዲደ ኽትክኾ እየ። ነቶም ኰረኵር ኣናብስኪ ሰይፊ ኺወሕጦም እዩ፣ ንዝዘመትክዮ ካብ ምድሪ ኸጥፍኦ እየ፣ ድሕርዚ ድምጺ ልኡኻትኪ ኣይኪስማዕን እዩ፣ ይብል ኣሎ።

1 እታ ሓሶትን ዓመጽን ዝመልኤት፣ ምዝራፍ ከኣ ዘይትሐድግ ከተማ ደም ወይለኣ።
2 ደሃይ ሓለንግን ደሃይ እቲ ድዋዕዋዕ ዚብል መንኰራዅርን ጋልበት ኣፍራስን ዚጐያ ዓረብያታትን ይስማዕ።
3 ጋልበት ፈረሰኛታትን ሃልሃልታ ሰይፍን መብረቕ ኵናትን ምብዛሕ ቅቱላትን ኵምራ ምዉታትን ቍጽሪ ዜብሎም ሬሳታትን ኰነ፣ ብሬሳታቶም ድማ ይዕንቀፉ።
4 እዚ ኸኣ ብሰሪ እቲ ብዝሒ ምንዝርና ናይታ ንህዝብታት ብምንዝርና፣ ንዓሌታት ከኣ ብጠንቈላ እትሸይጥ መልክዔኛ ኣመንዝራ፣ ፈላጥ ጠንቋሊት እዩ።
5 እግዚኣብሄር ጐይታ ሰራዊት ከምዚ ይብል ኣሎ፣ እኔኹ ኣንጻርኪ እየ፣ ኣነ ንዘፈር ክዳንኪ ኣብ ልዕሊ ገጽኪ ክቐልዖ፣ ንህዝብታት ዕርቃንኪ፣ ንመንግስትታት ከኣ ነውርኺ ኸርእዮም እየ።
6 ርኽሰት ኣባኺ ኽድርቢ፣ ንዕቕቲ ኽገብረኪ፣ መላገጺ ኽትኰኒውን ክውፍየኪ እየ።
7 ኪኸውን ድማ እዩ፣ ዚርእዩኺ ዘበሉ ዅላቶም ካባኺ ኺሀድሙ እሞ፣ ነነዌ ባደመት፣ መንከ ይበኽየላ∶ ዜጸናንዑኺ ኻበይ ክደልየልኪ እየ∶ ኪብሉ እዮም።
8 ንስኺዶ ኻብቲ ኣብ መንጎ ርባታት እተቐመጠት፣ ማያት ዝኸበበ፣ ቀጽራ ባሕሪ፣ መካባብያ ኸኣ ባሕሪ ዝዀነ ኖ-ኣሞን ትበልጺ ኢኺ∶
9 ኢትዮጽያን ግብጽን መወዳእታ ዜብሉ ሓይሊ ነበሩ፣ ፉጥን ሊብያን ሓገዝትኺ ነበሩ።
10 ግናኸ ንሳ ተሰደትን ተማረኸትን፣ ሕጻናታ ድማ ኣብ ርእሲ ዅሉ መገድታት ተጨፍለቑ። ኣብቶም ክቡራት ሰባታ ኸኣ ዕጭ ኣውደቑ፣ ኵላቶም ዓበይቲ ሰባውን ብመቝሕ ተኣስሩ።
11 ንስኺ ድማ ክትሰኽርን ክትሕብእን ኢኺ፣ ንስኺውን ኣብ ቅድሚ ጸላኢ ዕሩድ ቦታ ኽትደልዪ ኢኺ።
12 ኵሉ ዕርድታትኪ ኸም በዅሪ ፍረ ዘለዎ ኣእዋም በለስ እዩ፣ ሰሰው እንተ ኣበልካያ፣ ኣብ ኣፍ እቲ በላዒ ይረግፍ።
13 እንሆ ህዝብኺ ኣብ ማእከልኪ ኣንስቲ ዀኑ። እተን ደጌታት ሃገርኪ ንጸላእትኺ ኽፉታት እየን፣ ነቲ መሃርሃሪታትኪ ሓዊ በልዖ።
14 ክትክበቢ ኢኺ እሞ፣ ማይ ቅድሒ፣ ዕርድኺ ኣጽንዒ፣ ኣብ ጭቃ እተዊ፣ መሬት ርገጺ፣ መስርሕ ጡብ ከኣ ኣጣጥኢ።
15 ኣብኡ ሓዊ ኺበልዓኪ፣ ሰይፊ ኼጥፍኣኪ፣ ከም ኵብኵብታ ኺበልዓኪ እዩ። ከም ኵብኵብታ ብዝሒ፣ ከም ኣንበጣ ብዝሒ።
16 ንነጋዶኺ ካብ ከዋኽብቲ ሰማይ ኣብዛሕክዮም። ኵብኵብታ ፋሕ ይብል፣ ነፊሩውን ይኸይድ።
17 እቶም ዘውዲ ዝደፍኡ ኣባኺ ዘለዉ ኸም ኣንበጣ፣ እቶም ሓላቑኺ ድማ ከምቲ ብመዓልቲ ቝሪ ኣብ ሓጹር ዚሰፍር ጭፍራ ዅብኵብታ እዮም። ጸሓይ ምስ በረቐት፣ ይሀድሙ፣ ኣበይ ከም ዝነብሩ ቦታኦም ኣይፍለጥን እዩ።
18 ዎ ንጉስ ኣሶር፣ ጓሶትካ ደቀሱ፣ እቶም ከበርቴታትካ ዐረፉ፣ ህዝብኻ ኣብ ኣኽራን ፋሕ በሉ፣ ዚእክቦም ድማ የልቦን።
19 እከይካ ዅሉ ጊዜ ብልዕሊኡ ዘይሐለፎ መን እዩ∶ ስለዚ ንቝስልኻ ፈውሲ የብሉን፣ መውቃዕትኻ ብርቱዕ እዩ፣ እቶም ወሬኻ ዝሰምዑ ዅላቶም ኣእዳዎም ኣጣቕዑልካ።