1 መዓልቲ እግዚኣብሄር ትመጽእ ኣላ፣ ቀሪባ ኸኣ እያ እሞ፣ ኣብ ጽዮን መለኸት ንፍሑ፣ ኣብ ቅዱስ ከረነይ ድማ ኣእውዩ፣ ኣብታ ሃገር ዚነብሩ ዘለዉ ዅላቶም የንቀጥቅጡ።
2 መዓልቲ ጸልማትን ጣቓን፣ መዓልቲ ደበናን ድቕድቕ ጸልማትን ከም ወጋሕታ ኣብ ልዕሊ ኣኽራን ይዝርጋሕ። ዓብይን ሓያልን ህዝቢ፣ ካብ ጥንቲ ጀሚሩ ኸምኡ ዝበለ ዘይነበረ፣ ድሕሪኡውን ክሳዕ ዓመታት ወለዶ ዚሐልፍ ከቶ ዘይኸውን።
3 ኣብ ቅድሚኡ ሓዊ ይበልዕ፣ ኣብ ድሕሪኡ ሃልሃልታ ሞዅ የብል። እታ ሃገር ኣብ ቅድሚኡ ኸም ገነት፣ ኣብ ድሕሪኡ ኸኣ ጸምጸም በረኻ እያ፣ ካብኡ ዜምልጥውን የልቦን።
4 ትርኢቶም ከም ትርኢት ኣፍራስ እዩ፣ ከም ፈረሰኛታት ይጐዩ።
5 ከምቲ ኣብ ርእሲ ኣኽራን ድዋዕዋዕ ዚብል ሰረገላታት፣ ከምቲ ሓሰር ኪውሕጥ ከሎ ጥዋዕዋዕ ዚብል ሃልሃልታ ሓዊ፣ ከምቲ ንውግእ እተሰለፈ ሓያል ህዝቢ ይዘሉ።
6 ኣብ ቅድሚኦም ህዝብታት ይጭነቑ፣ኵሉ ገጽ ይጽልም።
7 ከም ጀጋኑ ይጐዩ፣ ከም ዚዋግኡ ሰብ ናብ ቀጽሪ ይድይቡ፣ ነፍሲ ወከፍ በብጐደናኡ ይሐልፍ ካብ መገዶም ኸኣ ኣየግልሱን።
8 ንብጻዩ ዚደፍእ የልቦን፣ ነፍሲ ወከፍ በብመገዱ ይሐልፍ፣ ናብ ማእከል ኣጽዋር ይኣትዉ ኣይቈስሉን ከኣ።
9 ናብታ ኸተማ ይወሩ፣ ኣብ ቀጽሪ ይጐዩ፣ ናብ ኣባይቲ ይድይቡ፣ ከም ሰራቒ ብመሳዅቲ ይኣትዉ።
10 ምድሪ ኣብ ቅድሚኦም ራዕራዕ ትብል፣ ሰማያት የንቀጥቅጥ፣ ጸሓይን ወርሕን ይጽልምታ፣ ከዋኽብቲ ከኣ ብርሃኖም ይኽውሉ።
11 ሰፈር ሰራዊቱ ኣዝዩ ዓብዪ እዩ፣ እቲ ንቓሉ ዚፍጽም ከኣ ሓያል እዩ፣ እግዚኣብሄር ኣብ ቅድሚ ሰራዊቱ ድምጺ የስምዕ። እወ፣ መዓልቲ እግዚኣብሄር ዓባይን ኣዝያ እተፍርህን ኣያ፣ መንከ ኺጽመማ ይኽእል፣
12 እምብኣርሲ ሕጂውን ብጾምን ብብኽያትን ብቝዝማን ብምሉእ ልብኹም ናባይ ተመለሱ፣ ይብል እግዚኣብሄር።
13 ንሱ ንዅራ ደንጓዪ፣ብሳህሊ ኸኣ ምሉእ፣ ብእከይ ድማ ተጣዓሳይ፣ ርሕሩሕን መሓርን እዩ እሞ፣ክዳንኩም ኣይኰነን ልብኹም ደኣ ቕደዱ፣ ናብ እግዚኣብሄር ኣምላኽኩምውን ተመለሱ።
14 ተጣዒሱ ዚምለስ እንተ ዀነ፣ ድሕሪኡ ድማ ንእግዚኣብሄር ኣምላኽኩም ብመስዋእቲ ብልዕን ብመስዋእቲ መስተን በረኸት ዚሐድግ እንተ ዀነ፣ መን ይፈልጥ∶
15 ኣብ ጽዮን መለኸት ንፍሑ፣ ጾም ቀድሱ፣ ኣኼባ ጸውዑ።
16 ህዝቢ ኣክቡ፣ ማሕበር ቀድሱ፣ ኣረገውቲ ኣክቡ፣ ቈልዑን ጡብ ዝጠብዉን ኣክቡ። መርዓዊ ኻብ ቤቱ ይውጻእ፣ መርዓት ከኣ ካብ ሕልፍኝኣ።
17 እቶም ካህናት ኣገልገልቲ እግዚኣብሄር ኣብ መንጎ ኣዳራሽን መሰውእን ይብከዩ ይበሉውን፣ ዎ እግዚኣብሄር ንህዝብኻ ንሐፎ፣ ነቲ ርስትኻ፣ ኣህዛብ ኪገዝእዎ ኢልካ፣ ንመላገጺ ኣሕሊፍካ ኣይትሀቦ። ስለምንታይከ ኣብ ኣህዛብ፣ ኣምላኾም ኣበይ ኣሎ፣ ዚበሀል∶
18 እግዚኣብሄር ንሃገሩ ቐንኤ፣ ንህዝቡ ኸኣ ራሕርሔ።
19 እግዚኣብሄር ንህዝቡ መለሰሉ በሎውን፣ እንሆ፣ ኣነ፣ እኽልን ወይን ዘይትን ክሰደልኩም እየ፣ ብእኡ ኸኣ ክትጸግቡ ኢኹም፣ ድሕርዚ ኣብ ማእከል ህዝብታት መላገጺ ኣይክገብረኩምን እየ።
20 ነቲ ሰሜናዊ ካባኻትኩም ከርሕቖ፣ ናብ ደረቕን ዝዐነወን ባሕሪ፣ ዝባኑ ኸኣ ናብ ምዕራባዊ ባሕሪ እዩ ዓብዪ ነገር ገይሩ እዩ እሞ፣ ምብድባዱ ኺወጽእ፣ ምምሽማሹ ድማ ኪድይብ እዩ።
21 ኣቲ ሃገር እግዚኣቢሄር ዓብዪ ነገር ገይሩ እዩ እሞ ኣይትፍርሂ፣ ተሐጐሲ ባህውን ይበልኪ።
22 እቲ እንስሳ መሮር፣ እቲ መጓሰዪ በረኻ ለምሊሙ፣ ኦም ፍሪኡ ይፈሪ፣ ኦም በለስን ተኽሊ ወይንን ከኣ ሓይሉ ይህብ ኣሎ እሞ፣ ኣይትፍርሁ።
23 ኣቱም ደቂ ጽዮን፣ ዝናም ጽድያ ብልክዕ ይህበኩም፣ ዝናም ጽድያን ጽብሓትን ከም ቀደሙ የውርደልኩም ኣሎ እሞ፣ ተሐጐሱ ብእግዚኣብሄር ኣምላኽኩም ባህ ይበልኩም።
24 ኣዕውዲ ኸኣ እኽሊ ኺመልእ፣ መጽመቝታትውን ወይንን ዘይትን ኪጅርብብ እዩ።
25 ኣነ ኸኣ ኣቶም ኣንበጣን ኵብኵብታን ጐደበን ሓሰኻን፣ ኣባኻትኩም ዝሰደድክዎ ዓብዪ ሰራዊተይ ዝበልዔን ዓመታት ክኽሕሰኩም እየ
26 መብልዕ ክትበልዑ ክትጸግቡውን ኢኹም፣ ነቲ ተኣምራት ዝገበረልኩም ስም እግዚኣብሄር ኣምላኽኩም ድማ ከተመስግንዎ ኢኹም። ህዝበይውን ንዘለኣለም ኣይሐንኽን።
27 ኣነ ኣብ ማእከል እስራኤል ከም ዘሎኹ፣ ኣነ ኸኣ እግዚኣብሄር ኣምላኽኩም ከም ዝዀንኩ፣ ብጀካይ ድማ ካልእ ከም ዜልቦ ኽትፈልጡ ኢኹም፣ ህዝበይውን ንዘለኣለም ኣይሐንኽን።
28 ብድሕርዚ ኪኸውን እዩ፣ መንፈሰይ ናብ ልዕሊ ዅሉ ስጋ ክዅዑ እየ፣ ኣወዳትኩምን ኣዋልድኩምን ኪንበዩ፣ ኣረገውትኹም ሕልሚ ኪሐልሙ፣ ኣጕባዝኩም ከኣ ራእይ ኪርእዩ እዮም።
29 በተን መዓልታት እቲኤንሲ ኣብ ሰብኡትን ኣንስትን ባሮት እኳ መንፈሰይ ክዅዑ እየ።
30 ኣብ ሰማያትን ኣብ ምድርን ከኣ ተኣምራት፣ ደምን ሓውን ኣዕኑድ ትክን፣ ከርኢ እየ።
31 እታ ዓባይን መፍርሂትን መዓልቲ እግዚኣብሄር ከይመጸት፣ ጸሓይ ኣብ ጸልማት፣ ወርሒ ድማ ኣብ ደም ትልወጥ።
32 ኪኸውን ከኣ እዩ፣ ከምቲ እግዚኣብሄር ዝበሎ፣ ኣብ ከረን ጽዮንን ኣብ የሩሳሌምን ኣብቶም እግዚኣብሄር ዚጽውዖም ተረፍን ምድሓን ኪኸውን እዩ እሞ: ስም እግዚኣብሄር ዚጽውዕ ዘበለ ኹሉ ኺድሕን እዩ::

1 እንሆ ኸኣ፣ በተን መዓልታት እቲኣተንን በቲ ጊዜ እቲአንን ንይሁዳን ንየሩሳሌምን ካብ ምርኮ ምስ መለስኩዎም፣
2 ብዛዕባ ህዝበይን ብዛዕባ ርስተይ እስራኤልን ነቶም ፋሕ ዘበልዎም ንምድረይ ከኣ እተማቐልዋ ኣህዛብ፣ ኣብኡ ምሳታቶም ንፍርዲ ኺኣቱስ፣ ንዅሎም ህዝብታት ክእክቦም፣ ናብ ለሰ ዮሳፋጥ ከኣ ከውርዶም እየ።
3 ንህዝበይ ዕጭ አውድቐሉ፣ ነመንዝራ ሰበይቲ ዋጋኣ ቘልዓ ሀቡ፣ ጓል ድማ ንወይኒ ሸጥዋ ሰተዩ ኸኣ።
4-6 ኣቱም ጢሮስን ሲዶናን ኵልኻትኩም ሃገር ፍልስጥኤምን፣ ምሳይ እንታይ ኣሎኩም∶ ብሩረይን ወርቀይን ወሲድኩም፣ ነቲ ዜብህግ ክቡር ኣቓሖይ ከኣ ናብ መቓድስኩም ኣእቲኹም፣ ንደቂ ይሁዳን ንደቂ የሩሳሌምን ከኣ ካብ ዶቦም ከተርሕቕዎምሲ፣ ናብ ደቂ ዮናናውያን ሼጥኩምዎም ኢኹም እሞ፣ ፍዳዶ ክትፈድዩኒ ኢኹም∶ ምንም እኳ ፍዳ እንተ ፈዴኹምኒ፣ ኣነ ቐልጢፈ ብድንገት ፍዳኹም ናብ ርእስኹም ክመልሰልኩም እየ።
7 እንሆ፣ ኣነ ኻብቲ ዝሸጥኩምዎም ስፍራ ኸበግሶም እየ፣ ፍዳኹምውን ናብ ርእስኹም ክመልሰልኩም እየ።
8 ነወዳትኩምን ነዋልድኩምን ናብ ኢድ ደቂ ይሁዳ ኽሸጦም እየ፣ ንሳቶምውን ናብቶም ኣብ ርሑቕ ዘለዉ ህዝቢ፣ ናብ ሰብ ሳባ ኺሸጥዎም እዮም። እዚ እግዚኣብሄር ትዛሪብዎ እዩ።
9 እዚ ኣብ ማእከል ህዝብታት ኣውጁ፣ ውግእ ኣዳልዉ፣ ነቶም ጀጋኑ ኣንቅሕዎም፣ ኵሎም ተዋጋእቲ ይቕረቡ፣ ይውጽኡ።
10 ማሕረሻኹም ሰይፊ፣ ማዕጺድኩም ከኣ ኲናት ስርሕዎ። እቲ ድኹም ድማ፣ ኣነ ጅግና እየ፣ ይበል።
11 ኣቱም ኣብ ከባቢ ዘሎኹም ኵልኹም ህዝብታት፣ ቀልጥፉ፣ ንዑ ተኣከቡ። ዎ እግዚኣብሄር፣ ኣብኡ ጀጋኑኻ ኣውርዶም።
12 ኣነ ነቶም ኣብ ዙርያ ዘለዉ ዅሎም ህዝብታት ክፈርድሲ፣ ኣብኡ ክቕመጥ እየ እሞ፣ እቶም ህዝብታት ይበገሱ፣ ናብ ለሰ ዮሳፋጥ ይውጽኡ።
13 እከዮም ስለ ዝዐበየ፣ ቀውዒ በጺሑ እዩ እሞ፣ ማዕጺድ ስደዱ፣ እቲ መጽመቝ መሊኡ፣ ኣጋንእ ከኣ ይጅርብብ ኣሎ እሞ፣ ንዑ ርገጹ።
14 መዓልቲ እግዚኣብሄር ኣብ ለሰ ምምዳብ ቀሪባ እያ እሞ፣ ጭፍራ፣ ጭፍራ ኣብ ለሰ ምምዳብ።
15 ጸሓይን ወርሕን ይጽልማ፣ ከዋኽብቲ ድማ ብርሃኖም ይሐብኡ።
16 እግዚኣብሄር ካብ ጽዮን ይጓዝም፣ ድምጹ ኻብ የሩሳሌም የስምዕ፣ ሰማይን ምድርን ከኣ የንቀጥቅጥ። ግናኸ እግዚኣብሄር ንህዝቡ መዕቈቢ፣ ንደቂ እስራኤል ድማ ዕርዲ እዩ።
17 ኣነ ኣብ ቅዱስ ከረነይ ኣብ ጽዮን ዝነብር እግዚኣብሄር ኣምላኽኩም ከም ዝዀንኩ፣ ክትፈልጡ ኢኹም። የሩሳሌም ከኣ ቅድስቲ ኽትከውን እያ፣ ድሕርዚውን ጓኖት ኣይኪሐልፍዋን እዮም።
18 በታ መዓልቲ እቲኣ ኪኸውን እዩ፣ ኣኽራን ኰልዒ ወይኒ ኪነትዑ፣ ኵርባታት ድማ ጸባ ኬውሕዙ፣ ካብ ኵሉ ርባታት ይሁዳ ኸኣ ማይ ጃሕጃሕ ኪብል እዩ። ካብ ቤት እግዚኣብሄርውን ዓይኒ ማይ ኪፍልፍል፣ ንለሰ ሽጢም ድማ ኬስትያ እዩ።
19 ኣብ ምድሮም ንጹህ ደም ክዕዮም እዮም እሞ፣ ብሰሪ እቲ ንደቂ ይሁዳ እተገብረ ዓመጻ፣ ግብጺ ኽትባድም፣ ኤዶም ከኣ ጽምጽም በረኻ ኽትከውን እያ።
20 ይሁዳ ግና ንዘለኣለም ትነብር፣ የሩሳሌም ከኣ ንውሉድ ወሎዶ።
21 ኣነ ድማ ነቲ ዘየጽሬኽዎ ደሞም ከጽርዮ እየ። እግዚኣብሄር ኣብ ጽዮን ኪነብር እዩ።