1-2 ኣቱም ዘይትሐፍሩ ህዝቢ፣ እቲ ትእዛዝ ከይወለደ፣ እታ መዓልቲ ኸም ብቝቡቝ ከይሐለፈት፣ እቲ ርሱን ቑጥዓ ኣግዚኣብሄር ከይወረደኩም፣ እታ መዓልቲ ቑጥዓ እግዚኣብሄር ከይወረደትኩም፣ ተኣከቡ፣ ተኣከቡ።
3 ኣቱም ፍርዱ እትገብሩ ትሑታት ምድሪ ኹላትኩም፣ ንእግዚኣብሄር ድለይዎ። ምናልባሽ በታ መዓልቲ ቝጥዓ እግዚኣብሄር እንተ ተሐባእኩምሲ፣ ጽድቂ ድለዩ፣ ትሕትና ድለዩ።
4 እምብኣርሲ ጋዛ ኽትሕደግ፣ ኣስቃሎን ክትባድም፣ኣሽዶድ ብቐትሪ ኽትስጐጕ፣ ዔቕሮን ድማ ክትምንቆስ እያ።
5 ነቶም ኣብ ገምገም ባሕሪ ዚነብሩ ሰብ፣ ህዝቢ ክረታውያን፣ ወይለኦም። ኣቲ ከንኣን ሃገር ፍልስጥኤማውያን፣ ቃል እግዚኣብሄር ኣንጻርኪ እዩ፣ ሓደ እኳ ኸይነብረክስ ከጥፍኣኪ እየ።
6 እቲ ገምገም ባሕሪ ድማ መጓሰይን ኣግነት ጓሶትን ደምበ ኣባጊዕን ኪኸውን እዩ።
7 እቲ ገምገም ከኣ ነቲ ተረፍ ቤት ይሁዳ ኪኸውን እዩ፣ ኣብኡ ኺጓሰዩ እዮም። እግዚኣብሄር ኣምላኾም ኪበጽሖም፣ ካብ ምርኮ ድማ ኪመልሶም እዩ እሞ፣ ምሸት ኣብ ኣባይቲ ኣስቃሎን ኪድቅሱ እዮም።
8 ኣነ ነቶም ንህዝበይ ዝጸርፍዎን ኣብ ልዕሊ ዶቦም ርእሶም ዘዕበዩን ጸርፊ ሞኣብን ምብጫው ደቂ ዓሞንን ሰማዕኩ።
9 ስለዚ ኣነ ህያው እየ፣ ይብል እግዚኣብሄር ጐይታ ሰራዊት፣ ኣምላኽ እስራኤል፣ ብርግጽ ሞኣብ ከም ሰዶም፣ ደቂ ዓሞን ከኣ ከም ጎሞራ፣ ግዝኣት ቈጥቋጥን ጕድጓድ ጨውን ናይ ዘለኣለም ምድረ በዳን፣ ኪዀኑ እዮም። ተረፍ ህዝበይ ኪዘምቶም፣ ሓድጊ ህዝበይውን ኪርስተዮም እዩ።
10 ንህዝቢ እግዚኣብሄር ጐይታ ሰራዊት ጸሪፎምዎን ተዐብዮምሉን እዮም እሞ፣ እዚ ብሰሪ ትዕቢቶም ኪወርዶም እዩ።
11 እግዚኣብሄር ንዅሎም ኣማልኽቲ ምድሪ ኼጥፍኦም እዩ እሞ፣ ኣባታቶም መሰክሒ ኪኸውን እዩ። ኵሎም ደሴታት ኣህዛብ ከኣ፣ ነፍሲ ወከፍ ከካብ ቦታኦም ኪሰግዱሉ እዮም።
12 ንስኻትኩም ኢትዮጵያውያን ድማ፣ ብሰይፊ ክትቅተሉ ኢኹም።
13 ኢዱ ኸኣ ናብ ሰሜን ኣቢሉ ኺዝርግሕ እዩ እሞ፣ ንኣሶር ኬጥፍኣ፣ ንነነዌ ድማ ኬባድማን፣ ከም ምድረ በዳ ደረቕ ኪገብራን እዩ።
14 ኣብ ማእከላ መጓሴታት፣ ኵለን እንስሳ ኣህዛብ፣ ኪሰፍራ እየን፣ ኣምባጉምባሕን ቅንፍዝን ኣብ ልዕሊ ጉልላታ ኺሐድሩ እዮም፣ ኣብ መስኰት ድምጺ ይዝምር፣ እቲ ተኸዲንዎ ዝነበረ ኦም ሊባኖስ ኪቕላዕ እዩ እሞ፣ እቲ ልዳውቲ ኺባድም እዩ።
15 እታ ሀዲኣ እትነብርን ብልባ ኸኣ፣ ኣነ እየ፣ ብጀካይ ሓደ እኳ የልቦን፣ እትብልን ሕጕስቲ ኸተማ እዚኣ እያ። ከመይ ኢላ ባደመት ማሕደር ኣራዊትውን ኰነት፣ ብእኣ ዚሐልፍ ዘበለ ይፋጽን ኢዱ ይንዝንዝን።

1 እታ ዓላዊትን ርኽስትን፣ እታ ገፋዒት ከተማ ወይለኣ።
2 ምጺ ኣይትሰምዕን፣ ቅጽዓት ኣይትቕበልን፣ ኣብ እግዚኣብሄር ኣይትውከልን፣ ናብ ኣምላኽ ኣይትቐርብን።
3 መሳፍንታ ኣብ ማእከላ ጓዘምቲ ኣናብስ እዮም፣ ፈራዶኣ ንንግሆ ገለ እኳ ዘየትርፉ ተዃሉ ምሸት እዮም።
4 ነብያታ መጓበብትን ጠበርትን ሰብኡት እዮም፣ ካህናታ ንመቕደስ ኣርከስዎ፣ ንሕጊ ዐመጽዎ።
5 እግዚኣብሄር ኣብ ማእከላ ጻድቕ እዩ፣ንሱ ኣይእብስን፣ ንግሆ ንግሆ ኸየብኰረ ፍርዱ ናብ ብርሃን የውጽእ፣ ዓማጺ ግና ሓንከት ኣይፈልጥን።
6 ኣነ ንህዝብታት ኣጽነትኩ፣ ግምብታቶም ዐነወ፣ ንመገድታቶም፣ ሓደ እኳ ኸይሐልፈን፣ ኣባደምክወን፣ ከተማታቶም ሓደ ሰብ ዜብለን፣ ዚነብረለን እኳ ዜብለን ኰይነን ጠፍኣ።
7 ኣነ ኸኣ፣ ኣየ፣ እንተ ትፈርህንስ፣ መቕጻዕቲ ኸኣ እንተ ትቕበልስ፣ በልኩ። ሽዑ ሰፈራ በቲ እተጻባጸብክዋ ዅሉ ኣይምጠፍኤትን፣ ንሳቶም ግና ንግሆ ተንሲኦም ኵሉ ግብሮም ኣባላሸዉ።
8 እግዚኣብሄር ከምዚ ይብል ኣሎ፣ ኵላ ምድሪ ብሓዊ ቕንኣተይ ክትውሓጥሲ፣ ኵራይን ርሱን ቍጥዓይን ምእንቲ ከፍስሰሎም፣ ነህዛብ ክእክቦም፣ ንመንግስትታት ከኣ ክኣኻኽቦም ፍርደይ እዩ እሞ፣ ስለዚ ኽሳዕ እታ ንዘመተ ዝለዐለላ መዓልቲ ተጸበዩኒ።
9 ስለዚ ዅላቶም ንስም እግዚኣብሄር ኪጽውዑን ሐቢሮም ከኣ ኬገልግልዎንሲ፣ ሽዑ ንህዝብታት ጽሩይ ከናፍር ክመልሰሎም እየ።
10 ካብ ክንየው ርባታት ኢትዮጵያ እቶም ተማህለልተይ፣ ፋሕ ዝበሉ ደቀይ፣ መባእ ኬምጽኡለይ እዮም።
11 ሽዑ ኣነ ነቶም ብዅርዓትኪ ባህ ዝብሎም ካብ ማእከልኪ ኸውጽኦም እየ፣ ንስኺ ድማ ድሕርዚ ኣብቲ ቅዱስ ከረነይ ኣይክትኰርዕን ኢኺ እሞ፣ በታ መዓልቲ እቲኣ በቲ ንኣይ ዝበደልክሉ ዅሉ ግብርኺ ኣይክትሐንክን ኢኺ።
12 ኣብ ማእከልኪ ሽጉርን ድኻን ህዝቢ ኺሐድግ እየ፣ ንሳቶምውን ብስም እግዚኣብሄር ኪእመኑ እዮም።
13 ኪጓሰዩን ኪድቅሱን እዮም፣ ዜሰምብዶም ድማ የልቦን እሞ፣ እቶም ተረፈ እስራኤል ኣይኪብድሉን ኣይኪሕስዉን እዮም፣ ኣብ ኣፎም ከኣ ጠላሚት ልሳን ኣይክትርከብን እያ።
14 ኣቲ ጓል ጽዮን፣ ዘምሪ፣ ኣታ እስራኤል፣ እልል በል፣ ኣቲ ጓል የሩሳሌም፣ ብዅሉ ልብኺ ተሐጐሲ ባህ ከኣ ይበልኪ።
15 እግዚኣብሄ ንፍርድኺ ኣርሐቖ፣ ንጸላኢኺ ሰጐጎ፣ እግዚኣብሄር ንጉስ እስራኤል ኣብ ማእከልኪ እዩ፣ ድሕርዚ ኸኣ ገለ ኽፉእ ዜፍርህ የብልክን።
16-17 በታ መዓልቲ እቲኣ ንየሩሳሌ፣ ዎ ጽዮን ኣይትፍርሂ፣ ኣእዳውኪ ኣይተሐለላ፣ ኣግዚኣብሄር ኣምላኽኪ ኣብ ማእከልኪ ዚድሕን ጅግና እዩ፣ ብኣኺ ሓጐስ ኪሕጐስ እዩ፣ ብፍቕሩ ኺሀድእ፣ ብኣኺ እልል እናበለ ኺሕጐስ እዩ፣ ኪብልዋ እዮም።
18 ነቶም ብዛዕባ ኣኼባ በዓላት ዚጕህዩ ኽእክቦም እየ፣ ናትኪ እዮም፣ ጾሮም ጸርፊ ነበረ።
19 እንሆ፣ በቲ ጊዜ እቲ ነቶም ዚጭቍንኺ ዅሎም ክጻረሮም እየ፣ ነታ ዝሐንከሰት ከድሕና፣ ነታ እተሰጐት ከኣ ክእክባ፣ ኣብቲ ዝነወርዎ ዅሉ ነገራት ክቡራትን ስሙያትን ክገብሮም እየ።
20 ነቶም ምሩኻትኩም ኣብ ቅድሚ ኣዒንትኹም ምስ መለስክዎም፣ ኣብ ኵላቶም ህዝብታት ምድሪ ስሙያትን ክቡራትን ክገብረኩም እየ እሞ፣ በታ ጊዜ እቲኣ ኸእትወኩም፣ በታ ጊዜ እቲኣውን ክእክበኩም እየ፣ ይብል እግዚኣብሄር።